1 Awura mɔ, ɛmɔ ne ɛmɔ ngoaa nemɔ li ye wɔ atee bɔ ɔtengyɛ na ɔfata so, na ɛmɔkaye kyɛ ɛmɔ koso ɛmɔ Wura wɔ anwuro.

2 Ɛmɔyere ɛmɔ nwo bɛbɔ mbaeɛ, ɛmɔma ɛmɔ nye la berɛ wɔ mbaebɔ nu, na ɛmɔla ase. 3 Afei koso, ɛmɔbɔ mbaeɛ bɛma yɛ, kyɛbɔ ɔkɔyɛ a, Nyameɛ kobukye atee bie kɔma yɛ, na yahora yaha Kristo nwo dwirɛ krongron bɔ wafea ne, na ɛhene ati yeɛ bafa kyenyi bakyekye me bato prizin ne. 4 Ɛmɔbɔ mbaeɛ bɛma me, na wamaa mahora maha ye yé, kyɛbɔ odikyɛ meka ne.

5 Bɛ bɔ bɛ bokka yɛ so ne, ɛmɔ ne bɛ li ye yé, na ɛmɔfa ɛmɔ mmerɛ beli dwumaa yé. 6 Ɛmɔma ɛmɔ noa nu dwirɛ yɛ fɛ daa biala, na ngyee bra nu, kyɛbɔ ɔkɔyɛ a ɛmɔ konwu edwirɛ bɔ ɛmɔkɔha bɛkohyire ebiala ɔ.

7 Tikiko te nniema bɔ medɔ ye, ɔba a, ɔkɔha me nwo dwirɛ mukoraati kohyire ɛmɔ. Ɔte somvoɛ bɔ odi nahorɛ, na ɔte me mmango akoaa wɔ Awurade nu. 8 Mesoma ye meba ɛmɔ berɛ, kyɛbɔ ɔkɔyɛ a ɛmɔ konwu kyɛbɔ yɛ nwo te ɔ, na wasa wahyɛ ɛmɔ nguraen. 9 Ɔne Onesimus yeɛ bɛkɔwa ɔ, ye koso ɔte nniema bɔ medɔ ye, na odi nahorɛ, bɛkɔha bɔ ɔkɔso wɔ ɛwa namukoraati bɛkohyire ɛmɔ.

10 Aristarko bɔ mene ye la prizin ne nwa ɔkyea ɛmɔ, na Barnaba abusuaniɛ Marko koso nwa ɔkyea ɛmɔ (ye yeɛ bɛha bɛhyirele ɛmɔ kyɛ, sɛ ɔba ɛmɔ berɛ a, ɛmɔle ye ne), 11 ɔne Yesu bɔ bɛfrɛ ye Yusto ne. Ɛhemɔ ala yeɛ bɛte Yudafoɛ bɔ bɛne me yɛ Nyameɛ Ahennie nanwo adwuma ɔ, na bamaa m'ahone atɔ me kunu paa. 12 Epafra, Yesu Kristo akoaa bɔ ofi ɛmɔ berɛ ne nwa ɔkyea ɛmɔ. Daa biala, ɔyere ye nwo bɔ mbaeɛ ma ɛmɔ, kyɛbɔ ɔkɔyɛ a, ɛmɔ kogyina pindinn, na ɛmɔ adwene asi ɛmɔ pi wɔ bɔ Nyameɛ kuro mukoraati nu. 13 Medi ye nwo adanzeɛ kyɛ, ɔyɛ bɔ ɔkɔhora biala boka ɛmɔ ne bɛ bɔ bɛwɔ Laodikea ne Hierapoli ne. 14 Luka bɔ ɔte yɛ dɔfo dɔktaniɛ ne, ɔne Dema nwa bɛkyea ɛmɔ.

15 Ɛmɔhyea aliemaa mɔ bɔ bɛwɔ Laodikea ne bɛma me, na ɛmɔhyea Nimfa ne asafo bɔ beyia nu wɔ ye awuro berɛ ne bɛma me. 16 Sɛ ɛmɔkenga krataa he wɔ ɛmɔ berɛ beyie a, ɛmɔma bɛkenga ye wɔ Laodikea asafo nanu, na ɛmɔle bɛ deɛ ne koso bɛkenga. 17 Afei, ɛmɔha behyire Arkipo kyɛ: "Ɔsom adwuma bɔ ɛlɛle ye wɔ Awurade nu ne, yere wɔ nwo yɛ ye yé."

18 Paul, me bɔbɔ me sa yeɛ mva ndworɔle ngyeaa he ɔ.

Ɛmɔkaye kyenyi bɔ bafa bakyekye me bato prizin.

Adom ha ɛmɔ.