1 Aliemaa mɔ, bɔ ɔpɛ yebo ne, yɛmaa ɛmɔ nwuni kyɛbɔ ɛmɔ kɔbɔ ɛmɔ bra maa ɔkɔsɔ Nyameɛ nye, na sɔ pɛpɛɛpɛ yeɛ ɛmɔyɛ ɔ. Yesa yɛsrɛ ɛmɔ, na yɛfa Awurade Yesu dumaa yɛpa ɛmɔ kyerɛ kyɛ, bɔ ɛmɔyɛ ne, ɛmɔyɛ ma ɔbo so. 2 Ná ɛmɔse akwankyerɛ bɔ yɛnate Awurade Yesu so yɛfa yɛmane ɛmɔ ne. 3 Bɔ Nyameɛ kuro ɛhe: kyɛ ɛmɔyɛ krongron,* na ɛmɔhwe ɛmɔ nwo bɛfi adwamammɔ nwo. 4 Na odikyɛ ɛmɔ nu biala nwu kyɛbɔ ɔkɔhyɛ ye nipadua* so wɔ ahoteɛ ne nidie nu, 5 na ɔnzɛ kyɛ ɛmɔma nnaa nwo akɔnnɔ bɔ yenoa yɛ se hyɛ ɛmɔ so, kyɛbɔ maen-maen bɔ bɛnze Nyameɛ ne yɛ ne. 6 Na nnɛmaa ebiala yɛ ye nikye maa ɔbo so, ná ɔyɛ oliema aborɛ wɔ ɛhe anwo, ofikyɛ kyɛbɔ yɛli moa yɛhane ye nwo dwirɛ yɛhyirele ɛmɔ, na yɛbɔle ɛmɔ kɔkɔ kitii ne, bɛ bɔ bɛyɛ sɔ nningyein, Awurade kɔhwe bɛ so. 7 Ofikyɛ Nyameɛ amvrɛ yɛ kyɛ yɛɛbɔ bra-bɔne,* mmom ahoteɛ ti yeɛ ɔfrɛle yɛ ɔ. 8 Na ebiala bɔ okobu ngyerɛkyerɛ he animtia ne, nná sona yeɛ wabu ye animtia ɔ, mmom Nyameɛ bɔ ɔfale ye honhom krongron mane ɛmɔ ne yeɛ wabu ye animtia ɔ.

9 Na ɔdɔ bɔ ɛmɔ kɔdodɔ ɛmɔ nwo ne de, ye nwo nhia kyɛ yɛtworɔ ye nwo dwirɛ biala yɛbrɛ ɛmɔ, ofikyɛ Nyameɛ bɔbɔ ahyire ɛmɔ kyɛ, ɛmɔdodɔ ɛmɔ nwo. 10 Ná amba-ne-amba, ɛmɔdɔ aliemaa mɔ bɛ bɛwɔ Makedonia nekaa biala ne. Nakoso aliemaa mɔ, yɛsrɛ ɛmɔ, ɛmɔyɛ ye pee. 11 Ɛmɔbɔ mmɔden kyɛ, ɛmɔ kɔtena berɛ konn, ɛmɔ koli ɛmɔ awuro dwirɛ, na ɛmɔ afa ɛmɔ sa bayɛ adwuma kyɛbɔ yɛ hyirele ɛmɔ nala, 12 na ɛmɔ abɔ bra pa maa bɛ bɔ benne asafo nanu ne anwu ye, na nikye fee anhia ɛmɔ.

13 Afei aliemaa mɔ, bɛ bɔ badeda wɔ ewue nu ne, yɛnguro kyɛ bɛ nwo dwirɛ kɔfea ɛmɔ, na ɛmɔ anni aworaborɛ maa wammo so, kyɛbɔ bɛ bɔ baha bɔ bɛlle anidasoɛ biala ne yɛ ne. 14 Na sɛ yedɛ yɛdi kyɛ Yesu wuli, na osa tingyele de a, ye de yedɛ yɛdi kyɛ Nyameɛ nate Yesu so kɔfa bɛ bɔ badeda* wɔ ye nu ne kɔwa. 15 Bɔ yɛnate Awurade dwirɛ so yɛka yɛkyire ɛmɔ yeɛ ole kyɛ, yɛbɔ yɛte ase ne, sɛ yɛtena ase yɛkodwu mmerɛ bɔ Awurade kɔwa ne a, yɛngoli bɛ bɔ bawuwu* ne nyunu lle, 16 ofikyɛ Awurade bɔbɔ kɔfa konviɛ bɔ yenoa yɛ se, abɔfo panyi konvi, ne Nyameɛ awɛen* kodwu, na bɛ bɔ bɛwuli wɔ Kristo nu ne koli moa kɔdwɔso. 17 Ɛhene si ne, yɛbɔ yaha bɔ yɛte ase ne, bɛkɔfa yɛne bɛ mukoraati wɔ munungum nu maa yɛkooyia Awurade wɔ ewienu, na yɛne Awurade kɔtena daa.

18 Yeti, ɛmɔfa sɔ dwirɛ he bɛhyehyɛ ɛmɔ nwo nguraen.