1 Krataa he fi Paul, Silwano, ne Timoteo berɛ,

na yɛfa yɛkɔma asafo bɔ ɔwɔ Tɛsalonika bɔ bɛne Baba Nyameɛ ne Awurade Yesu Kristo ayɛ kõ ne:

2 Adom ne asomdwie bɔ ofi yɛ Baba Nyameɛ ne y’Awurade Yesu Kristo berɛ ha ɛmɔ.

3 Aliemaa mɔ, ɛmɔ ti, odikyɛ daa yɛda Nyameɛ ase, ofikyɛ ɛmɔ gyidie yɛlɛ ala yeɛ ɔyɛ piri ɔ, na ɔdɔ bɔ ɛmɔle ye bɛma ɛmɔ nwo ne koso, ɔyɛ piri. 4 Ɛhe ati, yɛfa ɛmɔ yɛ hoahoa yɛ nwo wɔ Nyameɛ asafo ahoroɛ nemɔ nu, ofikyɛ ɔmva ye nwo kyɛ bɛtane ɛmɔ, na ɛmɔsa bɛnwu amaneɛ ne, ɛmɔfa animia begyina nu, na ɛmɔda gyidie ali.

5 Ɛhe te Nyameɛ atemmuo bɔ ɔtengyɛ nanwo adanzeɛ, na ɛhene ti, babu ɛmɔ kyɛ ɛmɔ fata Nyameɛ ahennie bɔ ɛmɔnwu ye nwo amaneɛ ne. 6 Ofikyɛ, ɔtengyɛ wɔ Nyameɛ nye so kyɛ, bɛbɔ bɛmaa ɛmɔnwu amaneɛ ne, ɔkɔfa amanehunu kotua bɛ so kerɛ. 7 Nakoso, ɛmɔ bɔ ɛmɔnwu amaneɛ ne de, yɛ ne ɛmɔ mukoraati kole yɛ nwomeɛ, mmerɛ bɔ bala Awurade Yesu ali wɔ anwuro, bɔ ye abɔfo bɔ bɛle tumi ne boka ye so 8 wɔ see bɔ ɔsɔ buru-buru nu. Ná okotua bɛbɔ bɛnze Nyameɛ, ɔne bɛbɔ bɛndie y’Awurade Yesu nwo nzɛmba ne kerɛ ne. 9 Sɔ mmenia nemɔ, ɔkɔsɛkye bɛ koraa kɔfa kɔhwe bɛ so, na ɔkɔye bɛ kofi Awurade nyunu, ne ye anuonyam tumi nanwo. 10 Sɔ kyẽa ne, bɛkɔhyɛ ɔne ye akrongronfoɛ ne anuonyam, na ye nwo kɔyɛ bɛbɔ bɛlɛle ye bɛlili ne nwanwa, ofikyɛ adanzeɛ bɔ yɛlili ne, ɛmɔle bɛlili.

11 Yeti daa yɛbɔ mbaeɛ yɛma ɛmɔ, kyɛ yɛ Nyameɛ konwu ɛmɔ kyɛ ɛmɔ fata ye frɛlɛ ne, na wafa ye tumi ne wayɛ nikye pa biala bɔ ɔsɔ ye nye, ne gyidie adwuma biala, 12 kyɛbɔ ɔkɔyɛ a, bɛkɔhyɛ y’Awurade Yesu dumaa anuonyam wɔ ɛmɔ nu, na bahyɛ ɛmɔ anuonyam wɔ ye nu, kyɛbɔ yɛ Nyameɛ ne Awurade Yesu Kristo adom ne te ne.