1 Me Paul, Yesu Kristo ne ɛmɔ bɔ ɛmɔte maen-maen nanufoɛ nati, nna prizin. 2 Na medɛ́ medi kyɛ, ɛmɔ ate kyɛ Nyameɛ afa awura me sa kyɛ mmoka ɛmɔ ma ɛmɔnya ye adom naso mvasoɛ, 3 na kyɛbɔ Nyameɛ yele edwirɛ krongron bɔ wafea ne hyirele me ne, ɛhene yeɛ nni moa ndworɔle ye nwo dwirɛ kaa ne. 4 Na sɛ ɛmɔkenga ɛhe a, ɛmɔkonwu kyɛbɔ mete Kristo nwo dwirɛ bɔ wafea nabo ɔ. 5 Mmerɛ bie bɔ wapɛ nu ne, wamma mmenia anwu sɔ dwirɛ bɔ wafea ne, kyɛbɔ kesaalae ɔnate honhom naso ala ye ali ahyire asomafoɛ ne adiifoɛ krongron ne. 6 Sɔ dwirɛ bɔ wafea ne yeɛ ole kyɛ, nzɛmba ne kɔmaa maen-maen ne né Kristo Yesu kɔyɛ kõ, na bɛ koso bɛkɔɔyɛ nnehyeɛ, bɛkɔboka nipadua akwaa naso, ná bɛne ye abɔnu nu anya bɔhyɛ nanu kyɛfa.

7 Nyameɛ adom ti, maayɛ sɔ dwirɛ nanwo somvoɛ, kyɛbɔ ye tumi yɛ adwuma nati yeɛ wafa ɛhe wahyɛ me ne. 8 Ɔwɔ nu, me yeɛ nde kaa paa wɔ akrongronfoɛ nanu ɔ, nakoso me yeɛ Nyameɛ afa alo me kyɛ nga Kristo ahonya bɔ ɔbo sona ndeaseɛ so nanwo dwirɛ ngyire maen-maen ne; 9 ná mma ebiala nwu kyɛbɔ Nyameɛ da edwirɛ krongron bɔ wafea ne ali ɔ, sɔ dwirɛ ne, ofi teteete yeɛ Nyameɛ bɔ ɔbɔle wiase ne afa afea ɔ. 10 Yeti ɔnate asafo naso kɔmaa awaen ne tumi ahoroɛ bɔ bɛwɔ anwuro dɔ ne konwu Nyameɛ nyanza bɔ ɔda ye nwo ali atee pee so ne. 11 Na ɛhe ne bɔ wabɔ ye tianu kyɛ ɔnate y’Awurade Yesu Kristo so kɔyɛ ye daa ne yia. 12 Yeti, yɛkora yɛdwudwo bɔ yɛnzuro, na gyidie bɔ yanya ye wɔ ye nu nati, yɛkora yɛfa akukuduro yɛkɔ Nyameɛ nyunu. 13 Yeti mesrɛ ɛmɔ, nnɛmɔ maa ɛmɔ abanu bu wɔ amaneɛ bɔ ɛmɔ ti menwu ye nanwo, ofikyɛ ɔte anuonyam ma ɛmɔ.

14 Ɛhe ati, mebu ndwerɛ wɔ Baba ne nyunu, 15 ye berɛ yeɛ abusua biala bɔ ɔwɔ anwuro ne aseɛ so ne nya ye dumaa ɔ. 16 Bɔ mesrɛ yeɛ ole kyɛ, ye anuonyam bɔ ɔsone nati, ɔfa ye honhom ne ma ɛmɔnya anwoserɛ wɔ ɛmɔ nu, 17 na ɛmɔ gyidie ti, Kristo atena ɛmɔ ahone nu. Ná ɛmɔ atira ndii batindim wɔ fapem naso wɔ ɔdɔ nu, 18 na wamaa ɛmɔ ne akrongronfoɛ namukoraati ahora ate ye piri, ye tɛtrɛtɛ, ye tendee, ɔne kyɛbɔ enu kɔ nabo yé, 19 ná ɛmɔ anwu Kristo dɔ bɔ ɔtra nimdeɛ ne, ná wamaa Nyameɛ suban namukoraati ayi ɛmɔ dɛen.

20 Afei ye bɔ ɔkora yɛ nikye maa ɔtra bɔ yɛsrɛ anaa yɛdwene ye nwo koraa, kyɛbɔ ye tumi bɔ ɔyɛ adwuma wɔ yɛ nu ne te ne, 21 ye yeɛ anuonyam ha ye wɔ asafo nanu ne Kristo Yesu nu, wɔ aworɛ ndoɔtoasoɛ mukoraati nu daa daa. Amen.