1 Aliemaa mɔ, mmale ɛmɔ berɛ kyɛ mebaaha Nyameɛ dwirɛ krongron bɔ wafea né mekyire ɛmɔ ne, nná edwirɛ mbiri anaa sona nyanza yeɛ mva ngane ɔ. 2 Na mmerɛ bɔ nwɔ ɛmɔ berɛ ne, mmɔle me tianu kyɛ mengɔfa m’adwene mengosie hwee so, sana Yesu Kristo ne asɛnnua bɔ bɛbɔle ye nu ne. 3 Na nwɔ ɛmɔ berɛ ne, né meyɛ mmerɛ, né mesuro, na né me nwo popo. 4 Na edwirɛ bɔ ngane, ɔne ngyerɛkyerɛ bɔ nyɛle ne, nná nnaka-naka ne sona nyanza yeɛ mva ngane ɔ, mmom honhom né tumi, 5 kyɛbɔ ɔkɔyɛ a ɛmɔ gyidie ngogyina sona nyanza so, mmom okogyina Nyameɛ tumi so.

6 Na yɛka nyanza nwo dwirɛ yɛkyire bɛbɔ bɛ nwo akwokwa ne,* nakoso, nná wiase he anu nyanza, anaa bɛ bɔ bɛdi wiase he aso ne nyanza, bɛ de ɔngɔhyɛ bɛkɔsɛkye bɛ. 7 Mmom yɛka nyanza bɔ ofi Nyameɛ berɛ, ɛhene yeɛ ole edwirɛ krongron bɔ wafea ne. Ɛhene yeɛ Nyameɛ hyehyɛ tole berɛ kora yeɛ bɛbɔ wiase ne, kyɛ ɔkɔfa kɔhyɛ yɛ anuonyam ne. 8 Sɔ nyanza ne, bɛ bɔ bɛte atumvoɛ wɔ wiase he anu ne, bɛ nu biala annwu ye. Sɛ bɛnwuni ye a, ahaa bangu Awurade bɔ bahyɛ ye anuonyam ne. 9 Na kyɛbɔ bahworɔ ne:

"Bɔ Nyameɛ asiesie ama bɛ bɔ bɛdɔ ye ne,

anyeɛ biala nnwuni ye,

asoɛ biala telle,

na ɔwalle ebiala ahone nu lle."

10 Nakoso, yɛ de, Nyameɛ nate honhom so aye ye ali ahyire yɛ. Na honhom ne neɛnea nikye biala nu, Nyameɛ nningyein bɔ enu kɔ ne po nu. 11 Nwa yeɛ ɔkora nwu ye mmango ti anu adwene ɔ? Ebiala nne berɛ, sana sona ne bɔbɔ. Sɔ ala yeɛ ebiala nze Nyameɛ ti anu dwirɛ, sana Nyameɛ honhom. 12 Na yɛ de, yannya wiase né honhom, mmom honhom bɔ ofi Nyameɛ berɛ, kyɛbɔ ɔkɔyɛ a yekonwu nningyein bɔ Nyameɛ afia ye kunu afa ahyɛ yɛ ne. 13 Na bɔ yɛka ne koso, nná bɔ bɛfale sona nyanza bɛhyirele yɛ yeɛ yɛka ɔ, mmom bɔ honhom ne hyirele yɛ ne. Na yɛfa honhom nu dwirɛ yɛkyirekyire honhom nu nningyein nu.

14 Na sona bɔ odi ye akɔnnɔ si ne de, onne nningyein bɔ ofi Nyameɛ honhom ne berɛ ne ndonu, na ɔte ngwaseasɛm po ma ye; na ɔngɔhora ngonwu nu, ofikyɛ honhom yeɛ bɛfa bɛneɛnea nu ɔ. 15 Na sona bɔ Nyameɛ honhom kyire ye atee ne de, ɔneɛnea nningyein mukoraati nu, nakoso ye de, ebiala nneɛnea ye nu. 16 Na "nwa yeɛ wanwu Awurade adwene bɔ ɔkɔhora kohyirehyire ye ɔ?" Ná yɛ de, yɛle Kristo adwene.