1 Odikyɛ mmenia nwu yɛ kyɛ yɛte Kristo asomvoɛ, na yɛnea Nyameɛ dwirɛ krongron bɔ wafea naso. 2 Yeti, ebiala bɔ ɔnea ebie awuro so ne, odikyɛ odi nahorɛ. 3 Na me de, sɛ ɛmɔ anaa sona foforɛ* bie bu me atɛn a,* ɔnhyɛ da nha me. Ofikyɛ me bɔbɔ, memmu me nwo atɛn. 4 Ofikyɛ me ahonim* mmu me fɔ, nakoso, ɛhe ngyire kyɛ nde teneneeniɛ. Awurade yeɛ okobu me atɛn ɔ. 5 Yeti, kosi kyɛ mmerɛ ne kɔso ne, nnɛmɔbu nikye biala nwo atɛn, ɛmɔ nwondɛ ma Awurade bra. Ye yeɛ ɔkɔye edwirɛ bɔ wafea awosii nu namukoraati kofite, ná ɔkɔmaa yekonwu bɔ ɔwɔ ebiala ahone nu. Sɔ mmerɛ ne, ebiala konya ayɛyie bɔ ɔfata ye kofi Nyameɛ berɛ.

6 Aliemaa mɔ, ɛmɔ pa nu ti, mafa edwirɛ ne mafa me ne Apolo nwo, ná wamaa ɛmɔ asua ɛhe bafi yɛ berɛ, kyɛ: "Ɛmɔngɔyɛ nikye ma ɔngɔtra bɔ bahworɔ ne." Na ɛmɔ amma ɛmɔ nwo so, bamva sona kõ bambɛ kõ poa. 7 Na nwa yeɛ wamaa atra wɔ mmango ɔ? Nzu yeɛ ele ye bɔ bamva bamma wɔ ɔ? Na sɛ bɛfa bɛmane wɔ a, nzuati yeɛ edwa wɔ noa nu kyɛ bamva bamma wɔ ne?

8 Nnaa ɛmɔ sa aha bɔ ɛmɔpena ne dada?* Nnaa ɛmɔ anya ɛmɔ nwo bayie? Nnaa ɛmɔ ahyɛ yebo bɛdi hene bɔ yɛbokka so ɔ? Ɔhale me ngome a, ahaa ɛmɔ ahyɛ yebo bɛdi hene, na wamaa yɛne ɛmɔ abɔnu ali hene. 9 Menwu ye kyɛ, Nyameɛ afa yɛ bɔ yɛte asomafoɛ ne apɛ ye bo, ná waye yɛ wahyire te kyɛ mmenia bɔ babu bɛ kumfɔ bɔ bɛkwaahu bɛ ne, ofikyɛ yayɛ nikye bɔ wiase ne, abɔfo, ne mmenia mukoraati nea yɛ ɔ. 10 Yɛ de, Kristo ti yɛte ngwaseafoɛ, nakoso ɛmɔ de, ɛmɔte anyanzafoɛ wɔ Kristo nu; yayɛ mmerɛ, na ɛmɔ de, ɛmɔ nwo yɛ se; bahyɛ ɛmɔ anuonyam, nakoso yɛ de, bɛbu yɛ animtia. 11 Na ɛnɛ ne ɛnɛ po, ɛhɔen ne nzuhɔen ku yɛ, yɛ nwo la so, bɛbo yɛ, yɛlle nekaa bɔ yɛte ɔ, 12 na yɛyere yɛ nwo yɛfa yɛ sa yɛyɛ adwuma. Sɛ bɛpɛ yɛ nzoaa a, yɛhyira bɛ, sɛ bɛtane yɛ nye a, yɛmia yɛ nye yɛgyina nu; 13 sɛ bɛsɛkye yɛ dumaa a, yɛto yɛ bo ase yɛne bɛ dwudwo. Na ɔbaadwu ɛnɛ, yayɛ kyɛ bɔla wɔ wiase, yayɛ kyɛ nningyein mukoraati boso nwura.

14 Mandworɔ ɛhe kyɛ mefa megua ɛmɔ nyunu ase, mmom mefa metu ɛmɔ fo kyɛ me mmaa bɔ mekuro ɛmɔ dwirɛ. 15 Sɛ ɛmɔle mmenia 10,000 bɔ bɛnea ɛmɔ wɔ Kristo nu po a, ɛmɔ baba mɔ de, bɛnzone, ofikyɛ me yeɛ nnate nzɛmba naso maayɛ ɛmɔ baba wɔ Kristo Yesu nu ɔ. 16 Yeti mesrɛ ɛmɔ, ɛmɔsuesua me. 17 Ɛhe ati mesoma Timoteo meba ɛmɔ berɛ, ɔte mma bɔ medɔ ye, na odi nahorɛ wɔ Awurade nu. Ɔkɔkaye ɛmɔ kyɛbɔ mebɔ me bra wɔ Kristo Yesu nu, kyɛbɔ mekyirekyire wɔ asafo biala nu, wɔ nekaa biala ne.

18 Ɛmɔ nu biemɔ ama bɛ nwo so, te kyɛ ɛnwa mengɔwa berɛ. 19 Nakoso, sɛ Awurade ma atee a, ɔngɔhyɛ biala ngɔwa berɛ. Na ngonwu tumi bɔ bɛ bɔ bama bɛ nwo so ne le ye ne, ɔtte edwirɛ bɔ bɛkeka ne. 20 Ofikyɛ Nyameɛ Ahennie ne gyi tumi so, ɔtte dwudwolɛ. 21 Na beni yeɛ ɛmɔ kuro ɔ? Kain yeɛ mva mmera ɛmɔ so ɔ, anaa ɔdɔ ne honhom bɔ odwo?