1 Afei aleɛ bɔ bafa babɔ afɔleɛ bama bosoen ne, bɔ meka mefa ye nwo ɛhe: Yɛse kyɛ yɛ mukoraati yɛle nimdeɛ. Nimdeɛ ma sona ma ye nwo so, nakoso ɔdɔ ma ngɔsoɛ. 2 Sɛ ebie adwene yɛ ye kyɛ ɔse nikye bie a, ye de, onya nwuni nikye ne yé kyɛbɔ odikyɛ onwu ye ne. 3 Nakoso sɛ ebie dɔ Nyameɛ a, Nyameɛ se ye.

4 Na afei sɛ ebie di aleɛ bɔ bafa babɔ afɔleɛ bama bosoen a, yɛse kyɛ bosoen de, ɔtte hwee wɔ wiase he anu, na Nyameɛ komapɛ twen yeɛ ɔwɔ berɛ ɔ. 5 Ɔwɔ nu, nningyein pee yeɛ bɛfrɛ bɛ nyameɛ wɔ anwuro ne aseɛ he aso, kyɛbɔ "nyameɛ" pee ne "awura mɔ" pee wɔ berɛ ne, 6 nakoso yɛ de, Nyameɛ komapɛ yeɛ yɛlɛ ye ɔ, Baba ne bɔ nikye biala fi ye berɛ, na ye ti yeɛ yɛte ase ne. Ná Awurade komapɛ yeɛ ɔwɔ berɛ ɔ, Yesu Kristo, bɔ bɛnate yeso bɛbɔle nikye biala, ná ɔnate ye so yeɛ yɛwɔ berɛ ne.

7 Nakoso, nná ebiala yeɛ ɔse ɛhe ɔ. Ná ɔbaadwu ɛnɛ, bosoen nwo amaneɛ ne tɛ́ wɔ ebiemɔ adwene ne, yeti sɛ bɛdi sɔ aleɛ nemɔ bie a, b'adwene yɛ bɛ kyɛ bali aleɛ bɔ bafa bama bosoen. Na ɔnate kyɛ b'ahonim yɛ mmerɛ nati, ogua ye nwo fiɛ. 8 Nakoso, nná aleɛ yeɛ ɔmaa yɛpingye Nyameɛ ɔ; sɛ yanni a, yɛnhwere hwee, yeɛ sɛ yɛdi koso a, yɛnnya ngɔsoɛ biala. 9 Nakoso ɛmɔnea yé na ahofadie bɔ ɛmɔle ye ne, wando bɛ bɔ bɛyɛ mmerɛ ne sintidua. 10 Ofikyɛ sɛ ebie bɔ ye ahonim yɛ mmerɛ nwu wɔ bɔ ele nimdeɛ ne kyɛ ɛte bosoen sua nu edidi a, aso ɛhene ngɔha ye maa ongoli aleɛ bɔ bafa babɔ afɔleɛ bama bosoen? 11 Yeti wɔ nimdeɛ nati, odikyɛ eliema bɔ ɔyɛ mmerɛ ne sɛkye anaa? Eliema bɔ Kristo wu mane ye ne! 12 Sɛ ɛmɔyɛ bɔne sɔa betia bɛ liema mɔ, na ɛmɔpira bɛ ahonim bɔ ɔyɛ mmerɛ ne a, né ɛmɔyɛ bɔne betia Kristo. 13 Yeti, sɛ aleɛ bɔ ngoli ne kɔto nniema sintidua a, ye de mengoli naen koraa, kyɛbɔ ɔkɔyɛ a mengɔto nniema sintidua ɔ.