1 Ɛmɔpena ɔdɔ, nakoso ɛmɔyere ɛmɔ nwo bɛpena honhom akyɛdeɛ nemɔ, ye titire ne, kyɛ ɛmɔ kɔhyɛ ngɔm. 2 Ofikyɛ bɔ ɔka dwudwolɛ ahoroɛ ne, ɔnga mma sona, mmom ɔka ma Nyameɛ; na ebiala nde yebo, nakoso ɔnate honhom naso ka nningyein krongron bɔ wafea ne. 3 Nakoso sona bɔ ɔhyɛ ngɔm ne de, ye dwudwolɛ ne ma mmenia nya ngɔsoɛ, ɔhyɛ bɛ nguraen, na ɔkyekye bɛ wora. 4 Sona bɔ ɔka dwudwolɛ ahoroɛ ne, ye bɔbɔ yeɛ onya ngɔsoɛ ɔ, nakoso bɔ ɔhyɛ ngɔm ne maa asafo ne nya ngɔsoɛ. 5 Ɔhale me ngome a, ahaa ɛmɔ mukoraati ɛmɔka dwudwolɛ ahoroɛ, nakoso, bɔ mekuro paa yeɛ ole kyɛ, ɛmɔ kɔhyɛ ngɔm. Bɔ ɔte yeɛ ole kyɛ, bɔ ɔhyɛ ngɔm ne, ɔtra bɔ ɔka dwudwolɛ ahoroɛ ne, sana ebie kyire yebo kora ne wamaa asafo ne anya ngɔsoɛ.

6 Aliemaa mɔ, sɛ meba ɛmɔ berɛ mebaka dwudwolɛ ahoroɛ a, mvasoɛ beni yeɛ ɛmɔ konya ye wɔ so ɔ? Sana meka edwirɛ bie bɔ Nyameɛ aye ahyire me, nimdeɛ, ngɔmhyɛ anaa ngyerɛkyerɛ. 7 Sɔ ala yeɛ nningyein bɔ ngoa nne nu te kyɛ atɛntɛnbɛn ne dwotai koso te ɔ. Sɛ kyɛbɔ bɛgyegye nanu anna berɛ a, ɔkɔyɛ sɛɛ ne ebie anwu bɔ bɛbɔ ne? 8 Sɛ awɛen* ne anyegye yé a, nwa yeɛ okosiesie ye nwo kɔhɔ koɛ ɔ? 9 Sɔ ala yeɛ ɛmɔ koso, sɛ ɛmɔka dwudwolɛ bɔ bɛnde yebo a, ɔkɔyɛ sɛɛ ne ebie anwu bɔ ɛmɔka ne? Ye de, né ɛmɔ dwudwo bɛgua mvrama nu. 10 Nahorɛ nu, dwudwolɛ pee yeɛ ɔwɔ wiase ɔ, nakoso enu ebiala nne berɛ bɔ olle bɔ okyire ɔ. 11 Na sɛ mende dwudwolɛ bɔ sona ne ka nabo a, sona ne kobu me kyɛ nde wɔfoɛ, na me koso ngobu ye kyɛ ɔte wɔfoɛ. 12 Yeti ɛmɔ koso, ɔnate kyɛ ɛmɔ nye aboro paa bɔ ɛmɔpena honhom akyɛdeɛ nati, akyɛdeɛ bɔ ɔkɔmaa asafo ne konya ngɔsoɛ ne, ɛmɔbɔ mmɔden kyɛ ɛmɔ konya pee.

13 Yeti, ebiala bɔ ɔka dwudwolɛ foforɛ ne, ɔbɔ mmɔden kyɛ ɔkɔhora kohyire ye bo. 14 Ofikyɛ sɛ mefa dwudwolɛ foforɛ mebɔ mbaeɛ a, honhom akyɛdeɛ bɔ manya ye ne yeɛ ɔbɔ mbaeɛ ne ɔ, na m'adwene de, ɔnyɛ hwee. 15 Ye de nzu yeɛ ngɔyɛ ɔ? Ngɔfa honhom akyɛdeɛ ne ngɔbɔ mbaeɛ, ná mafa m'adwene koso mabɔ mbaeɛ. Ngɔfa honhom akyɛdeɛ ne ngɔto ayɛyie dwein, na mafa m'adwene koso mato ayɛyie dwein. 16 Na sɛ ɛmɔfa honhom akyɛdeɛ ne bɛbɔ mbaeɛ a, ɔkɔyɛ sɛɛ né ebie mbaen bɔ ɔwɔ ɛmɔ nu ne alɛ́ ɛmɔ mbaeɛ naso "Amen," mmerɛ bɔ ɔnze bɔ ɛmɔka nanwo hwee ne? 17 Ɔwɔ nu, kyɛbɔ ɛda ase ne te pa, nakoso sona ne nngonya ngɔsoɛ biala. 18 Meda Nyameɛ ase paa kyɛ meka dwudwolɛ ahoroɛ pee metra ɛmɔ mukoraati ɔ. 19 Nakoso asafo nanu de, ɔte pa kyɛ ngɔfa m'adwene ngɔha edwirɛ nnu, kyɛbɔ ɔkɔyɛ a ngohyirehyire mmenia, tra kyɛ ngɔfa dwudwolɛ foforɛ ngɔha edwirɛ apee-buru ɔ.

20 Aliemaa mɔ, nnɛmɔ dwene kyɛ ngwalaa, mmom ɛmɔyɛ ngwalaa mmaa-mmaa wɔ bɔne nu. Nakoso ɛmɔ dwene kyɛ mbanyi.* 21 Bahworɔ ye wɔ mmeraa nanu kyɛ:

"Ngɔfa dwudwolɛ foforɛ,

ne ɛwɔfoɛ konvi* ngodwudwo ngohyire mmenia hemɔ,

nakoso ɛhene po, bɛngotie me." Awurade yeɛ waha ɔ.

22 Yeti bɛ bɔ benne benni ne yeɛ dwudwolɛ ahoroɛ te nzɛngyerɛneɛ ma bɛ ɔ, na ɔtte gyidifoɛ; na ngɔmhyɛ koso, ɔte nzɛngyerɛneɛ ma bɛ bɔ bɛte gyidifoɛ ne, na ɔtte bɛ bɔ bɛtte gyidifoɛ ne. 23 Sɛ asafo namukoraati yia nu, na ɛmɔ nu biala ka dwudwolɛ ahoroɛ, na sona foforɛ anaa ebie bɔ ɔtte gyidiniɛ ba berɛ a, aso ɔngɔha kyɛ ɛmɔ abɔ laen? 24 Nakoso sɛ ɛmɔ mukoraati ɛmɔhyɛ ngɔm, na sɛ ebie bɔ ɔtte gyidiniɛ anaa sona foforɛ ba berɛ a, ɛmɔ mukoraati ɛmɔ dwirɛ ne kɔha nikye bie kohyire ye, na ɔkɔmaa ɔkɔneɛnea ye nwo nu yé, 25 na wamaa ɛmɔ anwu bɔ ɔwɔ ye ahone nu ɔ. Ɛhene kɔmaa ɔkɔfa ye nyunu kɔbutu berɛ kɔsõ Nyameɛ, na waha kyɛ: "Amba, Nyameɛ wɔ ɛmɔ nu."

26 Ye de aliemaa mɔ, nzu yeɛ ɛmɔ kɔyɛ ɔ? Sɛ ɛmɔyia nu a, ɛyɛ a né ebie le edwein, ebie le ngyerɛkyerɛ, ebie le adiisɛm,* ebie le dwudwolɛ foforɛ, na ebie koso kora kyire dwudwolɛ foforɛ bo. Odikyɛ bɔ ɔkɔhɔ so namukoraati maa asafo ne nya ngɔsoɛ. 27 Sɛ ebie ka dwudwolɛ foforɛ a, ɛmɔma ɔyɛ mmenia nyɔ, waboso alaa yeɛ ole mmenia nza, na bɛha ye ngoko-ngoko. Na odikyɛ ebie kyire ye bo. 28 Nakoso sɛ ebiala nne berɛ bɔ okohyire yebo a, omua ye noa wɔ asafo nanu, na ɔne Nyameɛ ngome dwudwo. 29 Adiifoɛ de, ɛmɔma nyɔ anaa nza dwudwo, na bɛ ngaa ne neɛnea bɔ bɛka nanu yé. 30 Nakoso sɛ Nyameɛ ye nikye bie kyire bɛ bɔ bɛwɔ berɛ nanu bie a, ye de bɔ ogu so odwudwo ne, ma omua ye noa. 31 Ɛmɔ mukoraati, ɛmɔ kɔhora bɛkɔhyɛ ngɔm, kõ yie a, ne kõ ahyɛ ye deɛ, na wamaa ɛmɔ nu biala asua nikye afi nu, na wahyɛ ɛmɔ mukoraati nguraen, 32 na odikyɛ adiifoɛ nemɔ hyɛ bɛ honhom akyɛdeɛ naso. 33 Ofikyɛ Nyameɛ de, ɔtte ebie bɔ ɔyɛ ye nikye basabasa, mmom ɔte asomdwie Nyameɛ.

Na kyɛbɔ ɔkɔso wɔ akrongronfoɛ asafo mukoraati nu ne, 34 ɛmɔma mmrasua mua bɛ noa wɔ asafo nanu. Ofikyɛ bɛlle ye nwo atee kyɛ bɛdwudwo, mmom kyɛbɔ Mmeraa ne ka ne, ɛmɔma bɛbrɛ bɛ nwo ase. 35 Sɛ bɛpena kyɛ besua nikye bie a, ma bɛ bisa bɛ humɔ wɔ awuro. Ofikyɛ ɔte animguaseɛ ma brasua kyɛ ɔkodwudwo wɔ asafo nanu.

36 Ɛmɔ berɛ yeɛ Nyameɛ dwirɛ ne fi wale anaa? Anaa ɛmɔ ngome yeɛ wato ɛmɔ ɔ? 37 Sɛ ebie adwene yɛ ye kyɛ ɔte diifoɛ anaa ole honhom akyɛdeɛ a, odikyɛ onwu ye kyɛ, bɔ metworɔ mebrɛ ɛmɔ ne, ɔte ahyɛdeɛ bɔ ofi Awurade berɛ. 38 Na sɛ ebie nne ɛhe ndonu a, ye koso, bɛngole ye bɛngɔto nu. 39 Yeti nniema mɔ, ɛmɔma ɛmɔ nye boro kyɛ ɛmɔ kɔhyɛ ngɔm, nakoso nnɛmɔsi bɛ bɔ bɛka dwudwolɛ ahoroɛ ne atee. 40 Mmom ɛmɔfa nhyehyɛɛ bɛto nikye biala nwo, na wamaa wahɔso pɛpɛɛpɛ.