1 Afei aliemaa mɔ, mekaye ɛmɔ nzɛmba bɔ nga ngyirele ɛmɔ, bɔ ɛmɔle bɛtole nu ne, ná ɛmɔ asɔ nu ne. 2 Na sɛ ɛmɔsɔ nzɛmba bɔ nga ngyirele ɛmɔ nanu yé a, nzɛmba ne kɔmaa bɛkole ɛmɔ ngoa. Sɛ wamma ye sɔ a, ye de ɛmɔ alɛ́ bali mbaen.

3 Nningyein bɔ ye nwo hia bɔ nni moa nyane ne, ɛhene yeɛ mva mmane ɛmɔ ne, na ebie yeɛ ole kyɛ: Tworɔnzɛm ne maa yɛnwu kyɛ, yɛ bɔne ti yeɛ Kristo wuli ɔ. 4 Na bɛsiele ye, na kyẽa bɔ ɔtɔ so nza ne, bɛtingyele ye, kyɛbɔ Tworɔnzɛm ne ka ne. 5 Na ɔyele ye nwo ali hyirele Kefa,* afei buru-ne-nyɔ ne. 6 Ɛhene si ne, ɔyele ye nwo ali hyirele aliemaa mɔ kɔbo 500 mmerɛ komapɛ, bɛ nu pee te ase, na ebiemɔ koso ala wɔ ewue nu. 7 Afei ɔyele ye nwo ali hyirele Yakobo, na ye si ne, asomafoɛ namukoraati. 8 Na bɔ ɔpɛ yebo ne, ɔyele ye nwo ali hyire me bɔ mayɛ kyɛ ebie bɔ ye mmerɛ anzo bɔ bɛwole ye ne. 9 Me yeɛ nde kaa koraa wɔ asomafoɛ nanu ɔ, na menvata kyɛ bɛfrɛ me somafoɛ po, ofikyɛ nduli me nye nziele Nyameɛ asafo naso paa.* 10 Nakoso Nyameɛ adom ti yeɛ nde kyɛbɔ nde ye. Na ye adom bɔ ɔfa lole me ne anyɛ mbaen, ofikyɛ nyɛle adwuma ndrale bɛ mukoraati, nná me mmɔdemmɔ ɔ, na mmom Nyameɛ adom bɔ ɔboka me ne ɔ. 11 Yeti sɛ me ahɔ oo, sɛ bɛ ahɔ oo, nzɛmba komapɛ nala yeɛ yɛka ɔ, na ɛmɔ koso ɛmɔle bɛlili.

12 Na sɛ yɛka kyɛ, batingye Kristo bafi ewue nu a, nzuati yeɛ ɛmɔ nu biemɔ ka kyɛ, awufo tingyele biala nne berɛ ne? 13 Na sɛ ɔte amba kyɛ bɛngɔtingye awufo de a, na ye de Kristo koso, bandingye ye. 14 Na sɛ ɔte amba kyɛ bandingye Kristo a, mvasoɛ biala nne y'asɛnka naso, na ɛmɔ gyidie koso ayɛ mbaen. 15 Na sɛ ɔte nahorɛ kyɛ bɛngɔtingye awufo a, ye de yali adanzeɛ bɔ ɔtte nahorɛ yafa Nyameɛ nwo. Ofikyɛ yɛnwa watingye Kristo, aberɛ bɔ wandingye ye ɔ. 16 Na sɛ bɛngɔtingye awufo de a, na ye de bandingye Kristo. 17 Na sɛ bandingye Kristo de a, mvasoɛ biala nne ɛmɔ gyidie naso, na ɛmɔtɛ́ te ɛmɔ bɔne nu. 18 Na bɛ bɔ bawuwu wɔ Kristo nu ne, bamini. 19 Na sɛ asetena he anu ngome yeɛ yɛle anidasoɛ wɔ Kristo nu a, ye de ahaa yɛyɛ anwunvo yɛtra ebiala.

20 Nakoso bɔ ɔte yeɛ ole kyɛ, batingye Kristo bafi ewue nu, na ye yeɛ ɔte mmaa bɔ oli moa wɔ bɛ bɔ bawu nanu ɔ. 21 Na kyɛbɔ ɔnate sona so yeɛ ewue wale ne, sɔ ala yeɛ ɔnate sona so yeɛ bɛkotingye awufo ɔ. 22 Na kyɛbɔ Adam ti ebiala wu ne, sɔ ala yeɛ Kristo ti, ebiala konya ngoa ɔ. 23 Nakoso bahyehyɛ ye nnidisoɛ-nnidisoɛ: Kristo yeɛ ole aba bɔ oli moa ne, yesi ne, bɛ bɔ bɛte Kristo deɛ ne koli so, mmerɛ bɔ wawa ne.* 24 Ɛhene si ne, awieɛ ne kɔwa, na ɔkɔfa Ahennie ne kɔma ye Baba ne ye Nyameɛ mmerɛ bɔ wasɛkye tumidie, awaen ne ahennie biala ne. 25 Na odikyɛ odi bia tonn koodwu kyɛ Nyameɛ kɔfa ye atamfo mukoraati kogua ye gya bo. 26 Ɔtamfo bɔ ɔpɛ yebo koraa bɔ ɔkɔsɛkye ye, yeɛ ole ewue. 27 Ofikyɛ Nyameɛ "afa nikye biala agua ye gya bo." Na sɛ ɔka kyɛ "wafa nikye biala wagua ye gya bo" a, enu la berɛ pefee kyɛ, Bɔ ɔfale nningyein ne guale ye gya bo ne de, ɔbokka so. 28 Na sɛ ɔfa nningyein mukoraati gua ye gya bo yie a, Baa ne koso kɔfa ye nwo kowura Nyameɛ bɔ ɔfale nningyein mukoraati guale ye gya bo ne bo, ná Nyameɛ ayɛ nikye biala ama ebiala.

29 Sɛ ɔtte sɔ a, bɛ bɔ bɛbɔ bɛ asu bɛkɔ ewue nu ne, mvasoɛ beni yeɛ benya ye wɔ so ɔ? Na sɛ bɛngɔtingye awufo a, nzuati yeɛ bɛbɔ bɛ asu bɛkɔ ewue nu ɔ. 30 Ye de, nzuati yeɛ asane to yɛ mmerɛ biala ɔ? 31 Daa biala, mene ewue bɔ mbu-ne-mbu. Aliemaa mɔ, nahorɛ dwirɛ yeɛ ole kyɛ mefa ɛmɔ mehoɔhoa me nwo wɔ y'Awurade Kristo Yesu nu. 32 Sɛ mene ngaka hone kyɛbɔ ebiemɔ yɛ ye wɔ Efeso ne a, ahaa mvasoɛ beni yeɛ ngonya ye ɔ? Na sɛ awufo ngotingye de a,

"Ɛmɔma yɛdidi, na yɛno,

ofikyɛ ɛhema ne yawu."

33 Nnɛmɔ ma bɛlaka-laka ɛmɔ, adamvoa bɔ ɔttemaye ne, ɔsɛkye suban pa. 34 Ɛmɔma ɛmɔ nye la berɛ, na ɛmɔyakyi bɔne bɔ ɛmɔyɛ ne, ofikyɛ ɛmɔ nu biemɔ nze Nyameɛ nwo hwee. Ɛhe de meka maa ɛmɔ nyunu gua ase.

35 Nakoso ebie kobisa kyɛ: "Atee beni yeɛ bɛkɔfa so bɛkotingye awufo ɔ? Na nipadua beni po yeɛ bɛkɔfa bɛkɔwa ɔ?" 36 Wɔ bɔ w'adwene nyɛ adwuma!* Bɔ edua ne, ɔnvifi sana wawu kora. 37 Afei koso, nná bakaa bɔ ofifili ne yeɛ eluale ɔ, mmom né ɔte ye mmaa, ebia hwiit anaa bakaa foforɛ mmaa. 38 Nakoso Nyameɛ maa onyi yɛ bakaa bɔ okuro ɔ, mmaa biala le ye nwo so bakaa. 39 Anwoɔnaen mukoraati tte kõ, sona le ye deɛ, ngaka le bɛ deɛ, nnomaa le bɛ deɛ, yeɛ egyein koso le ye deɛ. 40 Nningyein bɔ ɔwɔ anwuro ne te sorongo, yeɛ nningyein bɔ ɔwɔ aseɛ he aso ne koso te sorongo; nningyein bɔ ɔwɔ anwuro né anuonyam ngome, yeɛ bɔ ɔwɔ ase né deɛ ngome. 41 Eyia anuonyam ngome, yeɛ ɛsraen anuonyam ngome, na nzramaa koso anuonyam ngome; bɔ ɔte yeɛ ole kyɛ, nzramaa po, ebiala le ye anuonyam deɛ.

42 Sɔ ala yeɛ awufo bɔ bɛkotingye bɛ ne koso te ɔ. Bɔ ɔporɔ yeɛ bɛdua ɔ, na bɔ bɛtingye ye ne de, ɔmborɔ. 43 Bɛdua ye animguaseɛ nu, bɛtingye ye anuonyam nu. Bɔ bɛdua ne yɛ mmerɛ, nakoso bɛtingye ye tumi nu. 44 Anwoɔnaen* yeɛ bɛdua ɔ, na bɛtingye ye honhom nipadua nu. Na sɛ anwoɔnaen nipadua wɔ berɛ a, ye de honhom nipadua koso wɔ berɛ. 45 Yeti bahworɔ kyɛ: "Adam bɔ oli moa ne yɛle teasefoɛ."* Na Adam bɔ ɔpɛ yebo ne te honhom bɔ ɔma ngoa. 46 Nná honhom ne yeɛ oli moa ɔ, mmom anwoɔnaen ne yeɛ oli moa ɔ, ɛhene si kora yeɛ honhom ne ba ɔ. 47 Sona bɔ oli moa ne fi aseɛ he aso, ná nnɛterɛ yeɛ bɛfa bɛyɛle ye ɔ, na sona bɔ ɔtɔ so nyɔ ne fi anwuro. 48 Kyɛbɔ sona bɔ ofi nnɛterɛ nu ne te ne, sɔ ala yeɛ bɛ bɔ bɛfale nnɛterɛ bɛbɔle bɛ ne te ɔ; na kyɛbɔ sona bɔ ofi anwuro ne te ne, sɔ ala yeɛ bɛ bɔ bɛfi anwuro ne te ɔ. 49 Na kyɛbɔ yɛte kyɛ bɔ ofi nnɛterɛ nu ne, sɔ ala yeɛ yɛkɔyɛ kyɛ bɔ ofi anwuro ne ɔ.

50 Aliemaa mɔ, meka mekyire ɛmɔ kyɛ anwoɔnaen ne mogya ngɔhora ngɔhɔ Nyameɛ Ahennie nanu, na sɔ ala yeɛ bɔ ɔporɔ koso nngonya bɔ ɔmborɔ ɔ. 51 Ɛmɔnea, meka edwirɛ krongron bɔ wafea bie mekyire ɛmɔ, yeɛ ole kyɛ: Nná yɛ mukoraati yeɛ yɛkowu ɔ, mmom yɛ mukoraati yɛkɔsesa 52 mvum nu, te kyɛ bɔ ɛbɔ wɔ nye perɛ ne, wɔ awɛen* bɔ ɔpɛ yebo nanu. Sɛ bɛbɔ awɛen* ne a, bɛkotingye awufo bɛkɔhɔ tebea bɔ ɔmborɔ nu, na yɛ de yɛkɔsesa. 53 Na odikyɛ nipadua bɔ ɔporɔ ne wura bɔ ɔmborɔ, na odikyɛ nipadua bɔ owu ne wura bɔ onwu. 54 Na sɛ bɔ ɔporɔ ne wura bɔ ɔmborɔ, ná bɔ owu ne wura bɔ onwu a, ɛberɛ yeɛ sɔ dwirɛ bɔ bahworɔ ne kɔwa nu kyɛ: "Wame ewue koraa."

55 "Ewue, wɔ ngunim ne wɔ ni?

Ewue, nikye bɔ ɛfa wowɔ ne wɔ ni?"

56 Nikye bɔ ɔfa ewue ba yeɛ ole bɔne, na mmeraa yeɛ ɔmaa bɔne nya tumi ɔ. 57 Nakoso, yɛda Nyameɛ ase paa; ɔnate y'Awurade Yesu Kristo so amaa yali ngunim.

58 Yeti, nniema mɔ, ɛmɔgyina pindinn, nnɛmɔ hinhim, ɛmɔyɛ pee wɔ Awurade adwuma nanu daa, na ɛmɔse kyɛ ɛmɔ fɛɛ ngɔyɛ mbaen wɔ Awurade nu.