1 Ye de me bisa oo, Nyameɛ pole ye mmenia ne anaa? Daabi! Ofikyɛ me koso nde Israelniɛ, nde Abraham bosoniɛ, na mvi Bengyamin abusua nu. 2 Nyameɛ ambo ye mmenia bɔ oli moa yele bɛ ne. Ɛmɔse bɔ tworɔnzɛm ne ka fa Elia nwo, mmerɛ bɔ né ɔbɔ Israelfoɛ sommoɛ wɔ Nyameɛ nyunu ne? 3 Ɔka kyɛ: "Awurade, bahu wɔ adiifoɛ namukoraati, babubu wɔ afɔleɛ bokyea nemɔ, me ngome yeɛ maha ɔ, na me koso, bɛpena me bɛku me." 4 Nakoso mmuayɛ beni yeɛ Ɛdangama ne fa mane ye ɔ? Ɔha hyirele ye kyɛ: "Nne mmenia 7,000 wɔ berɛ bɔ bɛ de, bɛbulle ndwerɛ bɛsonne Baal." 5 Na sɔ ala yeɛ ɛnɛ koso, ebiemɔ wɔ berɛ bɔ ɔnate adom so aye bɛ ɔ. 6 Nakoso sɛ ɔnate adom so a, ye de ɔnnate nyumaa so kõ. Nná ye sɔ de a, ahaa adom ne, ɔtte adom kõ.

7 Ye de nzu bieku? Nikye bɔ ne Israel pena ne, wannya ye. Nakoso bɛ bɔ baye bɛ ne mmom yeɛ benyane ye ɔ. Bɛ ngaa ne de, né b’ahone yɛ se, 8 na kyɛbɔ tworɔnzɛm ne ka ne:

"Nyameɛ maa bɛlale hatee,

wama bɛ anyeɛ bɔ onnwu nikye,

ɔne asoɛ bɔ ɔnde dwirɛ tonn maa waadwu ɛnɛ."

9 David koso hane kyɛ:

"Ma bɛ tɛbulu ne yɛ ngaen

ɔto bɛ sintidua, na ɔyɛ asotwe ma bɛ.

10 Ma bɛ nye so yɛ bɛ tumm, kyɛbɔ ɔkɔyɛ a bɛngonwu nikye,

na ma bɛkundu bɛ nu daa."

11 Ye de mebisa: Mmerɛ bɔ Israel polili na bɛfine ase ne, bandwɔso kõ hɔ? Nná sɔ yeɛ ɔte ɔ! Mmom bɔne bɔ bɛyɛle ne, wamaa maen-maen nanufoɛ ne anya ngoa kyɛbɔ ɔkɔyɛ a, ɔkɔyɛ Israel yea. 12 Na sɛ bɛ bɔne ne maa wiase ne nyane ye nwo, ná bɛ so bɔ ɔtele ne maa maen-maen ne nyane ye nwo a, ye de sɛ bɛ dodoɔ ne bɔ yenoa a, nea bɔ okosi ɔ.

13 Afei medwudwo mekyire ɛmɔ maen-maen nanufoɛ ne. Ɔnate kyɛ nde maen-maen ne somafoɛ nati, mehyɛ me som adwuma né anuonyam, 14 kyɛbɔ ɔkɔyɛ a ngɔfa atee bie so ngɔha bɛ ayinga maa bɛkɔfɛ yaa, na male bɛ nu biemɔ ngoa. 15 Na sɛ bɛpole bɛ ne, ɔmaa bɛsiesiele Nyameɛ ne wiase ne afia a, ye de sɛ bedɛ bɛ a, nzu yeɛ ɔkohyire ɔ? Ɔkɔmaa bɛ bɔ bawuwu ne konya ngoa. 16 Afei koso, sɛ mɔle ne bue bɔ bɛfale ye kyɛ aba bɔ oli moa ne te krongron a, ye de nnaa mɔle namukoraati te krongron, na sɛ bakaa ne ndii ne te krongron a, ye de ye sa mmaa nemɔ koso te krongron.

17 Nakoso sɛ bapepɛ ye sa mmaa ne bie bagua, na bafa wɔ bɔ ɛte olive bakaa bɔ ogyi eburo basi ye gya nu maa anya nningyein pa bɔ ofi ye ndii nanu ne bie a, 18 nnɛyɛ baka ne sa mmaa naso dwɛɛ. Sɛ ɛyɛ bɛ so dwɛɛ a, kaye kyɛ nná wɔ yeɛ ndii ne gyi wɔ so ɔ, wɔ mmom yeɛ ɛgyi ndii naso ɔ. 19 Ebia ɛkɔha kyɛ: "Bɛpepɛle ye sa mmaa ne bie, kyɛbɔ ɔkɔyɛ a bɛkɔfa me bɛkotua so ɔ." 20 Ɛhene te nahorɛ! Ofikyɛ gyidie bɔ bannya ye nati yeɛ ɔmaa bɛpepɛle bɛ ne, nakoso wɔ de, gyidie ti yeɛ wamaa ɛgyi berɛ ɔ. Nnɛyɛ dwɛɛ, mmom suro. 21 Sɛ Nyameɛ amva bakaa ne bɔbɔ sa mmaa ne nwo angyɛ ye a, ye de wɔ koso ɔngɔfa wɔ nwo ngɔhyɛ wɔ. 22 Dwene kyɛbɔ Nyameɛ kunu te pa, ná ye dwirɛ yɛ se nanwo. Bɛ bɔ bɛfini ase ne, ɔhwene bɛ so, nakoso wɔ de, sɛ ɛkɔso tena ye ayamye nanu a, Nyameɛ kɔhɔ so kɔye ye ayamye ne ali kohyire wɔ; nakoso sɛ anyɛ sɔ a, ɔkɔpɛ wɔ kofi berɛ. 23 Na bɛ koso, sɛ benya gyidie a, ɔkɔfa bɛ kootua ye nwo, ofikyɛ Nyameɛ kɔhora kɔfa bɛ kotua ye nwo bieku. 24 Ofikyɛ olive bakaa bɔ né ogyi eburo ne po, bɛhora bɛpɛle ye sa mmaa ne bie bɛfa beetuale olive bakaa bɔ ogyi turo nanu nanwo maa ɔyɛle yé; ɔwɔ nu, nná sɔ yeɛ bɛyɛ ye ɔ. Na sɛ ɛhene ayɛ yé a, ye de bakaa ne bɔbɔ sa mmaa ne de, bɛfa betua ye nwo a, ɔngɔyɛ se koraa.

25 Nniema mɔ, mepena kyɛ ɛmɔnwu edwirɛ krongron bie bɔ wafea ne, kyɛbɔ ɔkɔyɛ a ɛmɔngɔyɛ anyanzafoɛ wɔ ɛmɔ bɔbɔ ɛmɔ nye so. Yeɛ ole kyɛ: Israelfoɛ nemɔ bie apirim b’ahone, kodwu kyɛ maen-maen nanufoɛ ne dodoɔ kɔso. 26 Na sɔ atee he aso yeɛ Israel mukoraati konya ngoa ɔ. Na kyɛbɔ tworɔnzɛm ne ka ne:

"Agyenkwa ne kofi Zion kɔwa,

na ɔkɔye amumuyɛɛ kofi Yakob.

27 Na sɛ meye bɛ bɔne ne mefi berɛ a,

apam he yeɛ mene bɛ kɔyɛ ɔ."

28 Nzɛmba nanwo de, ɛmɔ ti bɛte Nyameɛ tamfo; nakoso ɔfa bɛ bɔ Nyameɛ aye bɛ ne de, bɛ nana mɔ ti, bɛte adɔfo. 29 Ofikyɛ Nyameɛ akyɛdeɛ ne, ɔne ɛfrɛlɛ bɔ ɔfrɛle bɛ ne de, ɔtte nikye bɔ onu ye nwo wɔ ye nwo ɔ. 30 Na kyɛbɔ mmerɛ bie, né ɛmɔyɛ Nyameɛ so asoserɛ, na kesaalae de b’asoserɛ ne amaa banwu ɛmɔ anwunvo ne, 31 sɔ ala yeɛ kesaalae, ɛhemɔ ayɛ asoserɛ maa banwu ɛmɔ anwunvo, kyɛbɔ ɔkɔyɛ a bɛ koso, afei de bɛkonwu bɛ anwunvo ɔ. 32 Nyameɛ afa bɛ mukoraati awura asoserɛ bo, kyɛbɔ ɔkɔyɛ a okonwu bɛ mukoraati anwunvo ɔ.

33 O, nea kyɛbɔ Nyameɛ ahonyadeɛ,

ye nyanza, ne ye nimdeɛ si sone ɔ!

Sɛ yɛka kyɛ yɛneɛnea ye atemmuo nu a, yɛngoyie lle,

Na ye atee koso, yɛngɔte yebo lle.

34 Na "nwa yeɛ wanwu Awurade adwene ɔ?

Anaa nwa yeɛ wahora watu ye fo ɔ?"

35 Anaa "nwa yeɛ wali moa wama Nyameɛ nikye,

bɔ yeti odikyɛ otua ye nikye ma ye ɔ?"

36 Ofikyɛ ye yeɛ nikye biala fi ye berɛ, ɔnate ye so, na ɔte ye deɛ ɔ.

Ye yeɛ anuonyam ha ye daa daa! Amen.