1 Sona bɔ ye gyidie yɛ mmerɛ ne, ɛmɔle ye bɛto nu. Na bɛ bɔ ɛmɔ ne b'adwene nnyia ne, nnɛmɔbu bɛ atɛn. 2 Sona bie le gyidie kyɛ ɔkora di nikye biala, nakoso bɔ ye gyidie yɛ mmerɛ ne de, nyaa ngome yeɛ odi ɔ. 3 Sona bɔ odi nikye biala ne, nnɛmaa obu bɔ onni ne animtia; na bɔ onni ne koso, nnɛmaa obu bɔ odi ne atɛn, ofikyɛ Nyameɛ alɛ́ ye ato nu. 4 Wɔ yeɛ ɛle nwa bɔ ɛbu ebie akoaa atɛn ne? Sɛ okogyina oo, okofi ase oo, ɔwɔ ye bɔbɔ ye wura berɛ. Na okogyina koso, ofikyɛ Awurade kɔhora kɔmaa okogyina.

5 Ebie nwu ye kyɛ, kyẽa bie nwo hia tra ngyẽa bɔ waha ne; sona foforɛ koso nwu ye kyɛ ngyẽa namukoraati te pɛ. Ɛmɔma ebiala adwene si ye pi. 6 Sona bɔ obu kyẽa bie tra ebie ne, Awurade ti yeɛ ɔyɛ sɔ ɔ; na bɔ odi nikye biala ne, odi fa hyɛ Awurade anuonyam, ofikyɛ ɔda Nyameɛ ase. Na bɔ onni ne, Awurade ti yeɛ onni ɔ, nakoso ɔda Nyameɛ ase.

7 Yɛ nu biala nne berɛ bɔ ɔte ase ma ye nwo ɔ, na yɛ nu biala nne berɛ bɔ owu ma ye nwo ɔ. 8 Sɛ yɛte ase a, Awurade ti yeɛ yɛte ase ɔ; na sɛ yɛwu koso a, Awurade ti yeɛ yawu ɔ. Yeti, sɛ yɛte ase oo, sɛ yawu oo, yɛte Awurade deɛ. 9 Ɛhe ati yeɛ Kristo wuli ne, osa wale ngoa nu ne, kyɛbɔ ɔkɔyɛ a ɔkɔyɛ ateasefoɛ ne awufo mukoraati Wura.

10 Nzuati yeɛ ebu eliema atɛn ne? Anaa nzuati yeɛ ebu eliema animtia ne? Ofikyɛ yɛ mukoraati yɛkogyina Nyameɛ atemmuo bia ne nyunu. 11 Bahworɔ kyɛ:

"Awurade nwa nyoo,

‘Nde ase ye de,

Me yeɛ nangoroma biala kobu ndwerɛ wɔ me nyunu ɔ;

na ebiala kɔye Nyameɛ ayɛ.’ "

12 Yeti, yɛ nu biala kobu ye bɔbɔ ye ngondaa kohyire Nyameɛ.

13 Yeti, nnɛmɔ maa yɛ nu biala bu ye mmango atɛn kõ, mmom ɛmɔsi ɛmɔ adwene pi kyɛ, ɛmɔngɔfa sintidua anaa akwansideɛ biala bɛngɔto aliemaa biala nyunu. 14 Mese, na nne gyidie wɔ Awurade Yesu nu kyɛ, nikye biala nne berɛ bɔ ye bɔbɔ de, ye nwo nde ɔ; mmom sɛ ebie nwu ye kyɛ nikye bie nwo nde a, ye yeɛ ye nwo nde mma ye ɔ. 15 Na sɛ aleɛ bɔ edi to eliema sintidua a, ye de, ɛnnate ɔdɔ nu kõ. Nnɛfa w'aleɛ bɔ edi ne sɛkye sona bɔ Kristo awu ama ye ne. 16 Yeti, nnɛmɔ maa bɛka pa bɔ ɛmɔyɛ nanwo dwirɛ tɛɛ. 17 Ofikyɛ Nyameɛ Ahennie ne, ɔtte aleɛ bɔ yɛkoli ne nzãa bɔ yɛkɔno, mmom ɔte tenenee, asomdwie ne anigye bɔ ɔnate honhom krongron naso. 18 Na ebiala bɔ ɔsõ Kristo wɔ sɔ atee he aso ne, ɔsɔ Nyameɛ nye, na mmenia koso de ye to nu.

19 Yeti, ɛmɔma yɛfa y'adwene yɛsie nningyein bɔ ɔfa asomdwie ba ɔne nningyein bɔ ɔhyɛ ngunaen naso. 20 Aleɛ ti, nnɛmɔsɛkye Nyameɛ adwuma. Bɔ ɔte yeɛ ole kyɛ, aleɛ biala nwo te, nakoso ɔte bɔne kyɛ ebie koli nikye bɔ ɔkɔto oliema sintidua ɔ. 21 Ɔte pa kyɛ ɛngoli naen, anaa ɛngɔno nzãa, anaa ɛngɔyɛ nikye biala bɔ ɔkɔto eliema sintidua ɔ. 22 Gyidie bɔ ɛle ye wɔ sɔ nningyein nanwo ne, ma ɔyɛ ɛne Nyameɛ afia dwirɛ. Anigye yeɛ ole sona bɔ ommu ye nwo atɛn wɔ nningyein bɔ wale wato nu kyɛ ɔkɔyɛ nanwo. 23 Nakoso, sɛ ye adwene nu yɛ ye nnaa, na sɛ odi a, wali fɔ; ofikyɛ nna gyidie yeɛ ɔfa di ɔ. Bɔ ɔte yeɛ ole kyɛ, nikye biala bɔ oggyi gyidie so ne, ɔte bɔne.