1 Sɛ sɔ yeɛ ɔte a, ye de nzu yeɛ yɛkɔhora yɛkɔha kyɛ, Abraham bɔ ɔte yɛ nana wɔ anwoɔnaen nu ne nyane ye ɔ? 2 Sɛ Abraham nyumaa yeɛ ɔmaa bɛbule ye bem a, ahaa okonya nikye bie kɔhoɔhoa ye nwo, nakoso nná Nyameɛ nyunu. 3 Nakoso, nzu yeɛ tworɔnzɛm ne ka ɔ? Ɔka kyɛ: "Abraham nyane gyidie wɔ Nyameɛ nu, na bɛbule ye kyɛ ɔte teneneeniɛ." 4 Sɛ ebie yɛ adwuma a, akatua bɔ bɛfa bɛma ye ne, ɔtte akyɛdeɛ, mmom ɔte kerɛ bɔ odikyɛ bɛtua bɛma ye ɔ. 5 Nakoso, sona bɔ ɔnyɛ adwuma, ná onya gyidie wɔ bɔ obu abɔnefoɛ bem nanu ne, ye gyidie ti, bɛbu ye kyɛ ɔte teneneeniɛ. 6 David koso hane anigye* bɔ ebie nya ye, mmerɛ bɔ Nyameɛ akwati nyumaa abu ye teneneeniɛ ne; ɔhane kyɛ:

7 "Anigye* yeɛ ole sona bɔ Nyameɛ afa ye mmerato ahyɛ ye,

na wakata ye bɔne so ne;

8 anigye* yeɛ ole sona bɔ Awurade ngobu ye bɔne nwo ngondaa ɔ."

9 Aso bɛ bɔ bapɛ bɛ toa ne ngome yeɛ bekonya nhyira he ɔ, anaa bɛ bɔ bɛpɛlle bɛ toa ne koso boka so? Ofikyɛ yɛnwa, "Abraham gyidie yeɛ ɔmaa bɛbule ye teneneeniɛ ɔ." 10 Mmerɛ beni yeɛ bɛbule ye teneneeniɛ ne? Mmerɛ bɔ ne wapɛ ye toa ne, anaa mmerɛ bɔ né ɔpɛlle ye toa ne? Sɔ mmerɛ ne, né ɔpɛlle ye toa, mmom né ɔte ɛtó. 11 Ye toa bɔ ɔpɛle ne te nzɛngyerɛneɛ bɔ okyire kyɛ, ye gyidie ti, Nyameɛ buli ye teneneeniɛ mmerɛ bɔ né ɔte ɛtó ne, ná ɔfa hyɛle ye nzorɛ kyɛbɔ ɔkɔyɛ a, ɔkɔyɛ bɛ bɔ bɛle gyidie ná bɛte ɛtó namukoraati baba, ná wamaa bɛ koso, babu bɛ kyɛ bɛte teneneefoɛ. 12 Afei koso, ne ɔkɔyɛ bɛ bɔ bapɛ bɛ toa ne baba, nná bɛ bɔ bɛbata toa pɛlɛ nwo ne ngome, mmom bɛ bɔ bɛlili gyidie bɔ ne yɛ baba Abraham le ye kora yeɛ ɔbaapɛ ye toa ne si pɛpɛɛpɛ.

13 Ɛbɔ bɔ bɛhyɛle Abraham ne ye bosofoɛ kyɛ wiase ne kɔyɛ b'agyapadeɛ ne, né ɔnnate mmeraa so, mmom ɔnate tenenee bɔ ye gyidie maa onyane ye naso. 14 Sɛ bɛ bɔ bɛdi mmeraa so yeɛ benya agyapadeɛ ne a, ye de né mvasoɛ biala nne gyidie so, na bɔhyɛ ne koso ayɛ mbaen. 15 Bɔ ɔte yeɛ ole kyɛ, mmeraa ne fa ɛyaa ba, na nekaa bɔ mmeraa nne berɛ ne, ebiala ndo mmeraa.

16 Ɛhene ati yeɛ bɔhyɛ ne nate gyidie so ne, kyɛbɔ ɔkɔyɛ a okogyina adom so, ná yebo atimu ama ye bosofoɛ mukoraati; nná bɛ bɔ bɛdi mmeraa naso ne ngome, mmom bɛ bɔ bɛle Abraham gyidie ne bie ne koso. Ofikyɛ ɔte yɛ mukoraati baba. 17 (Na sɔ ala yeɛ bahworɔ ɔ, bahworɔ kyɛ: "Mafa wɔ mayɛ maen pee baba.") Ɔte yɛ baba wɔ Nyameɛ bɔ onyane gyidie wɔ ye nu ne nyunu, Nyameɛ he yeɛ otingye bɛ bɔ bawu ne, ná nningyein bɔ ɔnne berɛ ne, ɔka ye nwo dwirɛ kyɛ ɔwɔ berɛ ne. 18 Né anidasoɛ biala nne berɛ, nakoso Abraham nyane anidasoɛ, na onyane gyidie kyɛ, ɔkɔyɛ maen pee baba, kyɛbɔ né baha kyɛ: "Sɔ yeɛ wɔ bosofoɛ kɔyɛ ɔ." 19 Ɔwɔ nu, né ɔpena nya afoɛ 100, nakoso ye gyidie anyɛ mmerɛ ɔmva ye nwo kyɛ, né onwu ye kyɛ ye nipadua ne awu ayie, na ɔye Sara koso ngora wo ne. 20 Nakoso Nyameɛ bɔhyɛ nati, onyane gyidie, ná wanzu aporowaa, mmom ye gyidie ne maa onyane anwoserɛ, na ɔhyɛle Nyameɛ anuonyam. 21 Na né odɛ di paa kyɛ, ɛbɔ bɔ Nyameɛ ahyɛ ne, ɔkɔwa nu. 22 Ɛhene ati yeɛ "obuli ye kyɛ ɔte teneneeniɛ" ne. 23 Nakoso edwirɛ, "obuli ye teneneeniɛ" ne, nná ye ngome yeɛ bɛhworɔ bɛmane ye ɔ, 24 mmom bɛhworɔ bɛmane yɛ koso. Na ɔnate kyɛ yedɛ bɔ otingyele y'Awurade Yesu fili ewue nu ne yɛdi nati, bɛkobu yɛ teneneefoɛ. 25 Yɛ bɔne ti yeɛ bɛyele ye bɛmane ne, na bɛtingyele ye, kyɛbɔ ɔkɔyɛ a, okobu yɛ teneneefoɛ ɔ.