1 Ye de, nzu yeɛ yɛka ɔ? Aso odikyɛ yɛkɔ so yɛtena bɔne nu, kyɛbɔ ɔkɔyɛ a, adom ne kobu yɛ so anaa? 2 Dabida! Sɛ yawu yama bɔne a, ɔkɔyɛ sɛɛ né yahɔso yatena nu? 3 Anaa ɛmɔnze kyɛ, mmerɛ bɔ bɛbɔle yɛ asu wɔ Kristo Yesu nu ne, né babɔ yɛ asu wɔ ye wue nanu? 4 Yeti mmerɛ bɔ yɛbɔle asu yɛhɔle ye wue nanu ne, bɛsiele yɛne ye mukoraati, ná kyɛbɔ Baba ne nate ye anuonyam so tingyele Kristo fili ewue nu ne, yɛ koso odikyɛ yɛnate asetena foforɛ nu.

5 Na sɛ yɛne ye ayɛ kõ wɔ atee bɔ ɔfale so wuli nanu de a, sɔ ala yeɛ yɛne ye kɔyɛ kõ wɔ atee bɔ bɛfale so bɛtingyele ye nanu ɔ. 6 Afei yɛse kyɛ, babɔ Kristo ne yɛ suban daa ne asɛnnua nu, kyɛbɔ ɔkɔyɛ a yɛ nipadua bɔ bɔne wɔ ye nwo ne kowu, ná yannyɛ ngoaa yamma bɔne kõ. 7 Ofikyɛ ebiala bɔ wawu ne, bafa ye bɔne bahyɛ ye.* 8 Na sɛ yɛne Kristo awu de a, yedɛ yɛdi kyɛ yɛne ye kɔtena ase. 9 Ofikyɛ yɛse kyɛ Kristo bɔ batingye ye bafi ewue nu ne, ongowu kõ; ewue lle tumi biala wɔ ye so kõ. 10 Na ewue bɔ owuli ne, owu fa yele bɔne fili berɛ pɛn kõ, ná ase bɔ ɔte ye kesaalae ne, ɔte ma Nyameɛ. 11 Yeti ɛmɔ koso, ɛmɔnwu ye kyɛ ɛmɔ awu bama bɔne, na ɛmɔ nate Kristo Yesu so bɛte ase bɛma Nyameɛ.

12 Yeti, nnɛmɔ maa bɔne kɔ so di hene wɔ ɛmɔ nipadua bɔ owu naso, ná ɛmɔ anyɛ bɔ okuro ɔ. 13 Na sɔ ala yeɛ nnɛmɔfa ɛmɔ nipadua ne bɛma bɔne, maa ɔfa yɛ nningyein bɔ ɔttemaye ɔ. Mmom ɛmɔfa ɛmɔ nwo bɛma Nyameɛ kyɛ mmenia bɔ batingye bɛ bafi ewue nu, na ɛmɔfa ɛmɔ nipadua namukoraati bɛma Nyameɛ ma ɔfa yɛ nikye bɔ ɔtengyɛ. 14 Nnɛmɔ maa bɔne di ɛmɔ so, ofikyɛ ɛmɔnne mmeraa bo, mmom ɛmɔwura adom bo.

15 Ye de, nzu bieku? Ɔnate kyɛ yɛnne mmeraa bo, na yɛwɔ adom bo nati, odikyɛ yɛyɛ bɔne anaa? Daabi oo! 16 Ɛmɔnze kyɛ, sɛ ɛmɔfa ɛmɔ nwo bɛma ebie kyɛ ngoaa, na ɛmɔyɛ sotie bɛma ye a, etielɛ bɔ ɛmɔtie ye nati, ɛmɔte ye ngoaa? Ɛmɔ kɔhora bɛkɔyɛ ngoaa bɛkɔma bɔne bɔ ɔkɔ ewue nu, anaa sotie bɔ ɔkɔ tenenee nu. 17 Nakoso yɛda Nyameɛ ase paa, ɔwɔ nu, mmerɛ bie, né ɛmɔte bɔne ngoaa, nakoso ɛmɔ afi ɛmɔ ahone mukoraati nu bayɛ sotie bama ngyerɛkyerɛ bɔ bɛfa bɛmane ɛmɔ ne. 18 Wamaa ɛmɔ alɛ́ ɛmɔ nwo koraa bafi bɔne nwo, na ɛmɔ ayɛ ngoaa bama tenenee. 19 Ɛmɔ nwonaen bɔ ɔyɛ mmerɛ nati yeɛ mefa sona adwene me dwudwo mekyire ɛmɔ ne. Kyɛbɔ mmerɛ bie, ɛmɔ fale ɛmɔ nipadua akwaa bɛyɛle ngoaa bɛmane bra-bɔne* ne mmerato maa ɔyɛle nningyein bɔ ɔto mmeraa ne, sɔ ala yeɛ kesaalae de, odikyɛ ɛmɔfa ɛmɔ nipadua ne bɛyɛ ngoaa koraa bɛma tenenee maa ɔyɛ nningyein bɔ ɔte krongron.

20 Mmerɛ bɔ ne ɛmɔte bɔne ngoaa ne, né ɛmɔ ne tenenee afia atete koraa. 21 Sɔ bra bɔ kesaalae ɔyɛ ɛmɔ fɛle kyɛ ɛmɔ bɔle ne, mvasoɛ beni yeɛ ɛmɔnya bɛfili so ɔ? Bɔ ofi sɔ nningyein nanu ba yeɛ ole ewue. 22 Nakoso kesaalae de, balɛ́ ɛmɔ bafi bɔne nu koraa, na ɛmɔte Nyameɛ ngoaa. Yeti ɛmɔsu mmaa bɔ ɔte krongron, ná ye awieɛ yeɛ ole daa ngoa. 23 Ofikyɛ bɔne akatua yeɛ ole ewue, na akyɛdeɛ bɔ Nyameɛ fa me yeɛ ole daa ngoa bɔ ɔnate y'Awurade Kristo Yesu so ne.