1 Ye de, nzu yeɛ ɔmaa Yudaniɛ di mu ɔ? Na mvasoɛ beni yeɛ ɔwɔ toa pɛlɛ so ɔ? 2 Mvasoɛ pee yeɛ ɔwɔ so ɔ. Bɔ oli moa ne, Yudafoɛ yeɛ bɛfale Nyameɛ noa dwirɛ bɛwurale bɛ sa ɔ. 3 Na sɛ bɛ nu biemɔ annya gyidie koso ɛ? Gyidie bɔ bannya ye ne kyire kyɛ Nyameɛ ngoli nahorɛ anaa? 4 Dabida! Sɛ sona biala te ngondomboniɛ po a, Nyameɛ de, odi nahorɛ, kyɛbɔ bahworɔ ne:

"Kyɛbɔ ɔkɔyɛ a ɛkoli bem wɔ wɔ dwudwolɛ nu,

na sɛ bɛbu wɔ atɛn a, ali ngunim."

5 Na sɛ yɛ nneyɛɛ bɔ ɔndengyɛ ne ma Nyameɛ tenenee da adi a, ahaa nzu yeɛ yɛkɔha ɔ? Ɛhene kyire kyɛ Nyameɛ fɛ yɛ so yaa a, wanyɛ ye yé anaa? (Me dwudwo kyɛ kuro sona.) 6 Dabida! Ye de ahaa ɔkɔyɛ sɛɛ ne Nyameɛ abu wiase ne atɛn? 7 Na sɛ mepɛ anoanu maa Nyameɛ nahorɛ da adi pefee, na ɔhyɛ ye anuonyam a, nzuati yeɛ bɛbu me atɛn kyɛ nde ɔbɔnefoɛ ɔ? 8 Ye de edwirɛ bɔ ebiemɔ fa to yɛ so kyɛ yɛka ne, nzuati yeɛ ahaa yɛnga bie ɔ? Bɛnwa yɛka kyɛ: "Ɛmɔma yɛyɛ bɔne, na nikye pa fi nu bra." Sɔ mmenia nemɔ de, bɛ atemmuo ne fata bɛ.

9 Nzu bieku yeɛ yɛka ɔ? Aso yɛtra bɛ bɔ baha ne? Dabida! Ofikyɛ yali moa yaha kyɛ, Yudafoɛ ne Greekfoɛ amukoraati wura bɔne bo; 10 kyɛbɔ bahworɔ ne:

"Sona biala nne berɛ bɔ ɔte teneneeniɛ ɔ,

komapɛ po nne berɛ.

11 Ebiala nne berɛ bɔ ole ndeaseɛ ɔ,

ná ebiala mbena Nyameɛ.

12 Sona biala amini,

na mvasoɛ nne bɛ nu biala so;

bɛ nu biala nne berɛ bɔ ɔyɛ pa ɔ,

sona-horɛ po nne berɛ."

13 "Bɛ konvi te asieleɛ bɔ ɛso abukye;

bɛfa bɛ temverema bɛlaka-laka mmenia."

"Na ɛwoo noa borɔ wɔ bɛ noa nu."

14 "Amoen ne edwirɛ bɔ ɔyɛ yea ngome yeɛ ɔwɔ bɛ noa nu ɔ."

15 "Sɛ bɛkwaahwie mogya bɛgua a, bɛ nwo nyera."

16 "Ɛsɛkyelɛ ne amanehunu yeɛ ɔwɔ b'atee so ɔ,

17 na bɛnnwuni asomdwie atee ne."

18 "Nyameɛ nwo suronyi biala nne bɛ nye so."

19 Kesaalae yɛse kyɛ bɔ mmeraa ne ka biala, ɔka ma bɛ bɔ bɛwura mmeraa nabo ne, kyɛbɔ ɔkɔyɛ a, ebiala kɔha ye noa kɔto nu, ná wiase mukoraati abu ngondaa ahyire Nyameɛ. 20 Yeti, bɛngɔfa mmeraa nanu nningyein bɛngɔbu sona biala bem wɔ ye nyunu, ofikyɛ mmeraa yeɛ ɔmaa yɛnwu bɔne yé ɔ.

21 Afei koso, nná mmeraa yeɛ ɔmaa yɛnwuni Nyameɛ tenenee ɔ, na sɔ ala yeɛ mmeraa ne adiifoɛ nemɔ di ye nwo adanzeɛ ɔ. 22 Bɛ bɔ bɛle gyidie namukoraati, sɛ benya gyidie wɔ Yesu Kristo nu a, bɛkɔhora bɛkɔɔyɛ teneneefoɛ. Ofikyɛ nzonzonyɛ biala nne bɛ nu. 23 Ebiala ayɛ bɔne, yeti bɛndwu Nyameɛ anuonyam nanwo. 24 Na akyɛdeɛ yeɛ Nyameɛ afa ama bɛ, kyɛ ye adom ti, ɔnate Kristo Yesu agyedeɛ naso abu bɛ bem. 25 Nyameɛ fale ye mane kyɛ afɔleɛ, kyɛ yɛnya gyidie wɔ ye mogya nanu, ná wamaa yasiesie yɛne ye afia. Nyameɛ yɛle sɔ fa hyirele ye bɔbɔ ye tenenee, ofikyɛ ye aboterɛ ti, wabu ye nye wagua bɔne bɔ bɛyɛle ye daa naso. 26 Ɔyɛle sɔ, kyɛbɔ ɔkɔyɛ a ɔkɔla ye tenenee ali wɔ mmerɛ he anu, na wamaa wayɛ teneneeniɛ mmerɛ po bɔ obu sona bɔ ole gyidie wɔ Yesu nu ne bem ne.

27 Ye de, nzu yeɛ yɛfa yɛhoɔhoa yɛ nwo ɔ? Baye bafi berɛ. Mmeraa beni yeɛ bɛnate so bɛye bɛfili berɛ ne? Mmeraa nyumaa ne anaa? Daabi, mmom gyidie mmeraa ne. 28 Ɛhe maa yɛnwu kyɛ, gyidie yeɛ ɔmaa bɛbu ebie bem ɔ, ná ɔtte mmeraa nanu nningyein bɔ ɔkɔyɛ ne. 29 Anaa ɔte Yudafoɛ ngome Nyameɛ? Aso ɔtte mane-maen nanufoɛ ne koso Nyameɛ? Yoo, ɔte maen-maen nanufoɛ ne koso Nyameɛ. 30 Ɔnate kyɛ Nyameɛ te komapɛ nati, gyidie yeɛ okogyina so kobu bɛ bɔ bapɛ bɛ toa ne bem, na bɛ bɔ bɛte ɛtó ne koso, bɛ gyidie yeɛ okogyina so kobu bɛ bem ɔ. 31 Ye de, yɛ gyidie ti, yatu mmeraa ne yagua anaa? Daabi oo! Bɔ ɔte yeɛ ole kyɛ, yɛmaa mmeraa ne gyina.