1 Galatifoɛ, ɛmɔ adwene nne berɛ hɔ? Nná ɛmɔ yeɛ bɛmaa ɛmɔ nwuni ye pefee kyɛ babɔ Yesu Kristo asɛnnua nu ne? Ye de, nwa yeɛ ɔlaka-lakale ɛmɔ sɔ ne? 2 Edwirɛ komapɛ yeɛ mepena kyɛ mebisa ɛmɔ ɔ: Aso, mmeraa bɔ ɛmɔ lili so ne yeɛ ɔmaa ɛmɔ nyane honhom ne, anaa edwirɛ bɔ ɛmɔle bɛlili ne? 3 Sãa ɛmɔ ndwene sɔ? Honhom yeɛ ɛmɔfa bɛhyɛle yebo ɔ, ye de nzuati yeɛ ɛmɔfa anwoɔnaen bɛyie ne? 4 Amaneɛ nwora bɔ ɛmɔ nwuni ye ne, ɛmɔma ɔyɛ mbaen? Ɛhe de, ɔngɔyɛ mbaen. 5 Aso mmeraa ne bɔ ɛmɔ lili so ne, yeɛ ɔmaa Nyameɛ fale ye honhom guale ɛmɔ so, ná ɔyɛle anwanwadeɛ wɔ ɛmɔ nu ne? Anaa nzɛmba bɔ ɛmɔ tele, na ɛmɔle bɛlili ne?

6 Sɔ ala yeɛ Abraham "nyane gyidie wɔ Nyameɛ nu, na bɛbule ye kyɛ ɔte teneneeniɛ." 7 Ɛmɔse ye paa kyɛ, bɛ bɔ bɛle gyidie ne yeɛ bɛte Abraham mmaa ɔ. 8 Ná tworɔnzɛm ne ha tole berɛ kyɛ, gyidie yeɛ Nyameɛ nate so kobu maen-maen né bem ɔ, yeti Nyameɛ limoa hane nzɛmba ne hyirele Abraham kyɛ: "Wɔ ti, maen-maen namukoraati konya nhyira." 9 Né Abraham le gyidie, yeti ebiala bɔ ole gyidie ne, ɔne Abraham bɔ ne ole gyidie namukoraati anya nhyira.

10 Ebiala bɔ ɔfa ye nwo to mmeraa* naso ne, owura nnome bo, ofikyɛ bahworɔ kyɛ: "Ebiala bɔ ɔmva bɔ bahworɔ ye wɔ mmeraa nwomaa nanu namukoraati nnyɛ adwuma, ná onni so ne, nnome ha ye." 11 Afei enu la berɛ pefee kyɛ, sɛ ɔhale mmeraa ne ngome a, ahaa bɛngonya ebie bɔ ɔtengyɛ wɔ Nyameɛ nyunu, ofikyɛ, "gyidie yeɛ ɔkɔmaa teneneeniɛ konya ngoa ɔ." 12 Ɔwɔ nu, mmeraa ne, oggyi gyidie so, nakoso "ebiala bɔ odi so ne, ɔnate so konya ngoa." 13 Kristo tɔle yɛ, na olɛle yɛ fili mmeraa ne nnome nabo, na wasi yɛ gya nu wayɛ ebie bɔ badome ye, ofikyɛ bahworɔ kyɛ: "Badome ebiala bɔ basinze ye wɔ bakaa so ne." 14 Olɛle yɛ, kyɛbɔ ɔkɔyɛ a Abraham nhyira ne kɔfa Kristo Yesu so kɔwa maen-maen naso, na yɛnate yɛ gyidie so anya honhom bɔ bafa bahyɛ yɛ bɔ ne.

15 Aliemaa mɔ, ɛmɔma mva asetena nu dwirɛ nyɛ mvandoho: Sɛ sona po yɛ apam, na bedɛ bɛto nu a, bɛngora bɛmbɛ nu, anaa bɛnzesa ye. 16 Abraham ne ye bosoniɛ ne yeɛ bɛhyɛle bɛ bɔ ɔ. Tworɔnzɛm ne anga kyɛ "ye bosofoɛ," bɔ okyire mmeni pee, mmom ɔhane kyɛ "ye bosoniɛ," bɔ okyire sona-horɛ, na yeɛ ole Kristo. 17 Bɔ mekyire ɛhe: Mmeraa ne bɔ ɔwale afoɛ 430 si ne, ɔngora nzesa apam bɔ ne Nyameɛ ayɛ ne, na ɔngora mbɛ bɔhyɛ nanu. 18 Na sɛ agyapadeɛ ne gyi mmeraa so a, ye de oggyi bɔhyɛ so kõ, nakoso, Nyameɛ nate bɔhyɛ so yeɛ ɔfale agyapadeɛ ne lole Abraham ɔ.

19 Ye de mmeraa ne, né ye adwuma yeɛ ole sɛɛ? Né mmeraa ne kɔmaa bɛkonwu bɛ bɔ bɛto mmeraa ne, kodwu kyɛ Abraham bosoniɛ bɔ bɛhyɛle ye nwo bɔ ne kɔwa. Ná abɔfo nemɔ nate ebie so yeɛ bɛfa bɛsiele berɛ ɔ; ye yeɛ ne ogyi Nyameɛ ne mmenia ne afia ɔ. 20 Sɛ sona-horɛ yɛ apam a, onhia ebie bɔ okogyina afia ɔ, na Nyameɛ koso te komapɛ.

21 Ɛhe kyire kyɛ mmeraa ne tia Nyameɛ bɔhyɛ nemɔ anaa? Dabida! Nakoso mmeraa bɔ bɛfa bɛmane sona ne, sɛ né ɔkora ma sona nya ngoa a, ahaa ye de tenenee nate mmeraa so yeɛ ɔba ɔ. 22 Nakoso, tworɔnzɛm ne fa nningyein mukoraati wura bɔne bo, kyɛbɔ ɔkɔyɛ a, bɛ bɔ bɛle gyidie ne konya bɔhyɛ bɔ ogyi Yesu Kristo nu gyidie so ne.

23 Kora bɔ gyidie ba ne, bɛfale yɛ bɛwurale mmeraa bo, maa ɔneane yɛ so mane gyidie bɔ ne bɛkɔla ye ali ne. 24 Yeti, né mmeraa ne kyire yɛ atee kɔ Kristo so, kyɛbɔ ɔkɔyɛ a, bɛkobu yɛ bem wɔ gyidie nu. 25 Kesaalae bɔ gyidie awa ne, mmeraa ne ngyire yɛ atee kõ.

26 Gyidie bɔ ɛmɔle ye wɔ Yesu Kristo nu nati, ɛmɔ ayɛ Nyameɛ mmaa, 27 na ɛmɔ bɔ babɔ ɛmɔ asu bahɔ Kristo nu namukoraati, ɛmɔ awura Kristo. 28 Yeti Yudaniɛ ne Greekniɛ nne berɛ, akoaa ne dehyeɛ nne berɛ, brienzua ne brasua nne berɛ; ofikyɛ ɛmɔ mukoraati ɛmɔ ayɛ kõ wɔ Kristo Yesu nu. 29 Na sɛ ɛmɔte Kristo deɛ a, né ɛmɔte Abraham bosofoɛ bɔ ɛmɔ nate bɔhyɛ naso bɛkoli bia.