1 Afei aliemaa mɔ, menguro kyɛ honhom nu akyɛdeɛ nanwo dwirɛ fea ɛmɔ. 2 Ɛmɔse kyɛ mmerɛ bɔ ne ɛmɔte wiasefoɛ ne, bɛlaka-lakale ɛmɔ maa ɛmɔsõne bosoen bɔ bɛndwudwo, na nekaa biala bɔ bɛkɔhɔ ne, né ɛmɔli bɛ si. 3 Na kesaalae, mepena kyɛ ɛmɔnwu ye kyɛ, ebiala nne berɛ bɔ ɔfa Nyameɛ honhom dwudwo a, ɔkɔha kyɛ, "Badome Yesu" ɔ. Na ebiala bɔ ɔkɔhora kɔha kyɛ: "Yesu te Awurade!" ne, honhom krongron wɔ ye so.

4 Ɔwɔ nu, akyɛdeɛ ne sone,* nakoso honhom ne te kõ, 5 na ɔsom adwuma ne te ahoroɛ pee, nakoso Awurade komapɛ yeɛ ɔwɔ berɛ ɔ. 6 Na dwumadie ne koso sone, nakoso Nyameɛ komapɛ nala yeɛ ɔyɛ ye mukoraati nwo adwuma wɔ ebiala nu ɔ. 7 Na nikye pa bie ti yeɛ honhom ne ala ye nwo ali wɔ ebiala nu ne. 8 Honhom ne ma ebie ka edwirɛ bɔ nyanza wɔ nu, ná honhom komapɛ nala amaa ebie anya nimdeɛ, 9 honhom komapɛ ne maa ebie nya gyidie, na honhom nala amaa sona foforɛ koso anya akyɛdeɛ bɔ ɔfa sa anwonyerɛ, 10 na ɔmaa ebie yɛ anwanwadeɛ, ebie hyɛ ngɔm, ebie nwu edwirɛ bɔ ofi honhom nu, ebie ka dwudwolɛ ahoroɛ, yeɛ ebie koso kyire dwudwolɛ ahoroɛ bo. 11 Dwumadie he mukoraati fi honhom komapɛ nala berɛ, na kyɛbɔ ɔkuro ne, yeɛ wamaa ebiala sa aha ye ɔ.

12 Na kyɛbɔ nipadua ne te kõ, nakoso ole akwaa pee, ná akwaa ne sone de, nakoso ɔbɔnu yɛ nipadua kõ ne, sɔ ala yeɛ Kristo te ɔ. 13 Na honhom komapɛ yeɛ bɛfa bɛbɔle yɛ mukoraati asu bɛhɔle nipadua komapɛ nu, ɔmva ye nwo kyɛ yɛte Yudaniɛ anaa Greekniɛ, akoaa anaa dehyeɛ ne, na yɛ mukoraati yɛnone honhom kõ.

14 Nná akwaa komapɛ yeɛ ɔyɛ nipadua ne ɔ, mmom ɔsone. 15 Sɛ ɔkɔba kyɛ agyire ka kyɛ, "Nnde asaa ti, mmoka nipadua naso" a, ɛhene ngyire kyɛ ɔbokka nipadua naso. 16 Na sɛ asoɛ ka kyɛ, "Nnde anyeɛ, yeti mmoka nipadua naso" a, ɛhene ngyire kyɛ ɔbokka nipadua naso. 17 Sɛ nipadua namukoraati te anyeɛ a, ahaa beni yeɛ yɛkɔfa yɛkɔte edwirɛ ɔ? Na sɛ ye mukoraati te asoɛ a, ahaa beni yeɛ yɛkɔfa yɛkɔte pambaen ɔ? 18 Nakoso Nyameɛ ahyehyɛ nipadua akwaa namukoraati kyɛbɔ okuro ɔ. 19 Sɛ yɛ mukoraati yɛte akwaa kõ a, ahaa beni yeɛ ole nipadua ne? 20 Kyɛbɔ ɔte ne, akwaa ne sone, nakoso nipadua ne te komapɛ. 21 Anyeɛ ngɔhora ngɔha ngohyire asaa kyɛ,"Menhia wɔ." Na sɔ ala yeɛ tire ngɔhora ngɔha ngohyire agyire kyɛ, "Menhia wɔ." 22 Na mmom bɔ ɔte yeɛ ole kyɛ, nipadua akwaa bɔ wayɛ kyɛ wayɛ mmerɛ ne, ɛhene yeɛ ye nwo hia paa, 23 na akwaa bɔ yɛnwu ye kyɛ onhia nidie ne, ɛhene mmom yeɛ yɛfa nidie yɛma ye paa, na bɔ ɔnyɛ nyemene ne, ɛhene yeɛ yɛmaa yɛ nye kɔ ye nwo paa ɔ, 24 ofikyɛ akwaa bɔ ɔyɛ nyemene ne de, onhia hwee. Nakoso kyɛbɔ Nyameɛ ahyehyɛ nipadua ne, akwaa bɔ yɛmmu ye ne po yeɛ wama ye nidie pee ɔ, 25 kyɛbɔ ɔkɔyɛ a, ngyekyɛmue biala ngɔwa nipadua nanu ɔ, na akwaa biala nwo ahia ye mmango. 26 Sɛ akwaa kõ nwu amaneɛ a, ɔka bɛ mu; na sɛ bɛhyɛ akwaa kõ anuonyam a, akwaa bɔ waha namukoraati nye gye.

27 Afei, ɛmɔte Kristo nipadua, na ɛmɔ nu biala te akwaa kõ. 28 Na Nyameɛ afa adwuma awura ebiemɔ sa wɔ asafo nanu, bɛbɔ bɛlili moa yeɛ ole asomafoɛ ne; bɔ ɔtɔ so nyɔ te adiifoɛ; bɔ ɔtɔ so nza te akyerɛkyerɛfoɛ; afei bɛbɔ bɛyɛ anwanwadeɛ; ɛhene si ne akyɛdeɛ bɔ bɛfa bɛsa anwonyerɛ; adwuma bɔ bɛyɛ bɛfa bɛboka afoforɛ; kyɛbɔ bɛdi nningyein nyunu, yeɛ bɛbɔ bɛka dwudwolɛ ahoroɛ. 29 Aso bɛ mukoraati bɛte asomafoɛ? Bɛ mukoraati bɛte adiifoɛ? Bɛ mukoraati bɛte akyerɛkyerɛfoɛ? Anaa bɛ mukoraati bɛyɛ nzɛngyerɛneɛ? 30 Aso bɛ nu biala yeɛ ole akyɛdeɛ bɛ bɛfa bɛsa anwonyerɛ ɔ? Bɛ nu biala yeɛ ɔka dwudwolɛ ahoroɛ ɔ? Anaa bɛ nu biala yeɛ okyire dwudwolɛ bo ɔ? 31 Ɛmɔyere ɛmɔ nwo bɛpena akyɛdeɛ bɔ ye nwo hia paa nemɔ.

Nakoso ngohyire ɛmɔ atee bɔ ɔte pa paa ne.