1 Nniema mɔ, nná ɛmɔ nu biala yeɛ odikyɛ okyirekyire ɔ, ofikyɛ ɛmɔse kyɛ, yɛ bɔ yɛ kyirekyire ne yeɛ yekonya atemmuo bɔ enu yɛ nno paa ne. 2 Ofikyɛ yɛ nu biala di mvomsoɛ mmerɛ pee. Sɛ ebie dwudwo na onni mvomsoɛ a, bɔ okyire yeɛ ole kyɛ, sɔ sona ne de, ɔte pɛ,* na ɔkora hyɛ ye nipadua namukoraati so. 3 Yɛfa buralɛ yɛwura mbɔngɔ noa nu maa betie yɛ, na yɛmaa bɛyɛ bɔ yɛkuro biala. 4 Ɛmɔnea hyep, ɔwɔ nu kyɛ ɔte piri paa, na mvrama kandinga yeɛ ɔkora twe ye ɔ, nakoso bakaa kamba bie yeɛ bɔ otwi hyep ne fa kyire ye atee maa ɔkɔ nekaa bɔ okuro ɔ. 5 Sɔ ala yeɛ temverema koso, ɔte akwaa kaa bie wɔ nipadua nanu, nakoso okyire ye nwo paa. Ɛmɔnea kyɛbɔ see kaa bie kora yera ɛhɔayɛ pirikua ɔ.

6 Temverema ne koso te see. Ɔte yɛ nipadua akwaa bɔ bɔne ngome yeɛ ɔyɛ ɔ; ɔkora gua nipadua nanwo fiɛ, ɔsɛkye sona abrabɔ, ɔsɛkye nikye te kyɛ Gehenna. 7 Ngaka bɔ bɛ nwo yɛ suro, nnomaa, ngaka bɔ bɛkõngõ, ne ɛpo nu ngaka mukoraati, sona kora brɛ bɛ ase, na ofi tete yeɛ batie sona ɔ. 8 Nakoso temverema de, dasaniɛ biala ngora mmrɛ ye ase. Ɔte busueniɛ bɔ bɛmmɔ ye kyɛn so, pɔizen ngome yeɛ ɔwɔ nu ɔ. 9 Temverema he yeɛ yɛfa yɛye Awurade, yɛ Baba ne ayɛ, na ye ala yeɛ yɛfa yɛdome* mmenia bɔ bayɛ bɛ Nyameɛ suban so ne. 10 Yɛ noa komapɛ nanu yeɛ nhyira ne nnome fi ba ɔ. Nniema mɔ, ɛhe de, ɔttemaye. 11 Ɔkɔyɛ sɛɛ ne yahora yanya nzue bɔ ɔyɛ fɛ, ne bɔ ɔyɛ wee yafi neka-horɛ? 12 Nniema mɔ, aso borɔdoma bakaa kora su olive mmaa? Na bobe kora su borɔdoma? Sɔ ala yeɛ yɛngɔhora yengonya nzue bɔ ɔyɛ fɛ yɛngofi nzue bɔ ɔte ngyee nu ɔ.

13 Ɛmɔ nu nwa yeɛ ɔse nworɛ, na ɔte edwirɛ bo ɔ? Ma ɔfa ye bra pa ne anwobraseɛ bɔ ofi nyanza nu ne hyire ye nyumaa. 14 Nakoso sɛ ahoɔyaa ne pɛsɛmengominya* wɔ ɛmɔ ahone nu a, nnɛmaa ɛmɔ hoɔhoa ɛmɔ nwo bɛka kyɛ, ɛmɔse nahorɛ ne. 15 Sɔ nyanza ne de, offi anwuro, ɔte aseɛ he aso, anwoɔnaen, ne sunzummɔne deɛ. 16 Ofikyɛ nekaa bɔ ahoɔyaa ne pɛsɛmengominya* wɔ ne, ɛberɛ yeɛ basabasa ne amumuyɛɛ koso wɔ ɔ. 17 Nyanza bɔ ofi anwuro ne de, bɔ oli moa ne, ye nwo te, okuro asomdwie, ɔte dwirɛ bo, ye so nyɛ se, awunvoin ne bra pa ayi ye tɛkyɛ, ɔnyeye mmenia nu, na ɔtte nyaatwom. 18 Na bɛdua tenenee mmaa wɔ asomdwie nu bɛma bɛ bɔ bɛpena asomdwie ne.