1 Yeti, ɔnate kyɛ bɛtingye ɛmɔ ne Kristo nati, ɛmɔpena nningyein bɔ ɔwɔ anwuro ne, nekaa bɔ Yesu te Nyameɛ sa famaa so ne. 2 Ɛmɔfa ɛmɔ adwene besie nningyein bɔ ɔwɔ anwuro naso, nná nningyein bɔ ɔwɔ aseɛ he aso ne. 3 Ofikyɛ ɛmɔ wuli, na bafa ɛmɔ ngoa bama Kristo wɔ Nyameɛ nu. 4 Sɛ bɛda Kristo bɔ ɔte yɛ ngoa ne ali a, ɛmɔ koso, bɛkɔla ɛmɔ ne ye ali wɔ anuonyam nu.

5 Yeti, ɛmɔhu ɛmɔ nipadua akwaa bɔ ɔwɔ aseɛ he aso ne wɔ adwamammɔ, bra-bɔne, nnaa nwo akɔnnɔ bɔ yenoa yɛ se, akɔnnɔ bɔne, ɔne anyeborolɛ bɔ ɔte abosonsom nwo. 6 Ofikyɛ sɔ nningyein hemɔ ati yeɛ Nyameɛ yaa ba bɛ bɔ bɛ so yɛ se naso ne. 7 Mmerɛ bie bɔ wapɛ nu ne, sɔ ala yeɛ ɛmɔ bɔle ɛmɔ bra ɔ. 8 Nakoso kesaalae de, ɛmɔgyi nningyein he amukoraati bɛgua: ahone tɛɛ, ɛyaa, nningyein tɛɛ, alapaa, na nnɛmɔ maa edwirɛ bɔ ye nwo nde fi ɛmɔ noa nu fite. 9 Nnɛmɔ pɛ anoanu bɛkyire ɛmɔ nwo, mmom ɛmɔye suban daa ne bɛgua, 10 na ɛmɔwura suban foforɛ bɔ bɛnate nahorɛ nimdeɛ so bɛyɛ ye foforɛ, maa osoma bɔ ɔbɔle né suban ne. 11 Ɔba sɔ a, Greekniɛ anaa Yudaniɛ nne berɛ, bɔ bapɛ ye toa anaa bɔ bɛpɛlle ye toa nne berɛ, Skiteniɛ anaa ɛwɔfoɛ nne berɛ, akoaa anaa dehyeɛ nne berɛ, ofikyɛ Kristo yeɛ ɔte nikye biala, na ɔne yɛ mukoraati ayɛ kõ ɔ.

12 Yeti, mmenia bɔ Nyameɛ aye ɛmɔ, akrongronfoɛ ne adɔfo, ɛmɔfa ahunu-ndetelɛ, paayɛlɛ, anwobraseɛ, honhom bɔ odwo, ɔne aboterɛ bɛyɛ atadeɛ bɛwura. 13 Sɛ ebie ne ye mmango le edwirɛ a, ɛmɔhɔ so benya ɛmɔ nwo aboterɛ, na ɛmɔfa bɛhyɛ ɛmɔ nwo koraa, kyɛbɔ Awurade fa ɛmɔ bɔne kyɛ ɛmɔ ne. 14 Ye mukoraati si ne, ɛmɔwura ɔdɔ kyɛ atadeɛ, ofikyɛ ɔka nningyein bɔnu maa odi mu. 15 Afei, ɛmɔma Kristo asomdwie ne li ɛmɔ ahone so, ofikyɛ ɛhe ati yeɛ bɛfrɛle ɛmɔ bɛwale nipadua kõ nu ne. Na nnɛmɔyɛ bonniayɛ. 16 Ɛmɔma Kristo dwirɛ ne bu so wɔ ɛmɔ nu, na wamaa ɛmɔ anya nyanza pee. Ɛmɔfa edwein, ayɛyie, ne honhom nu dwein bɔ bɛfa anisɔ bɛto ye b’ahone nu bɛye Awurade ayɛ, behyirehyire ɛmɔ nwo, ná ɛmɔ hyehyɛ ɛmɔ nwo nguraen. 17 Na nikye biala bɔ ɛmɔyɛ ne, kyɛ ɔte dwudwolɛ anaa nneyɛɛ ne, ɛmɔyɛ ye mukoraati wɔ Awurade Yesu dumaa nu, na ɛmɔfa ye so bɛla Nyameɛ bɔ ɔte Baba ne ase.

18 Mmrasua bɔ ɛmɔ agya ne, ɛmɔbrɛ ɛmɔ nwo ase bɛma bɛ humɔ, kyɛbɔ ɛmɔyɛ bɛma Awurade ne.

19 Na mmrienzua koso, ɛmɔhɔ so bɛlɔ bɛ yemɔ, na nnɛmɔ fɛ bɛ so yaa serɛ-serɛ.

20 Ngwalaa, ɛmɔtie ɛmɔ awofo dwirɛ wɔ nikye biala nu, na ɛhe yeɛ ɔsɔ Awurade nye ɔ.

21 Baba mɔ, nnɛmɔ hyɛ ngwalaa nemɔ anyeborolɛ,* wanyɛ sɔ a, b’abanu kobu.

22 Ngoaa koso, ɛmɔtie ɛmɔ wuramɔ bɔ bɛte mmenia ne wɔ nikye biala nu, nná mmerɛ bɔ bɛnwu bɔ ɛmɔyɛ ne ngome, ná wanyɛ kyɛ ɛmɔsɔ sona nye, mmom ɛmɔfi ɛmɔ ahone nu bɛyɛ ye kyɛ mmenia bɔ bɛsuro Awurade. 23 Nikye biala bɔ ɛmɔyɛ ne, ɛmɔfi ɛmɔ ahone nu bɛyɛ ye kyɛ ɛmɔyɛ bɛma Awurade, na ɔtte sona, 24 ofikyɛ ɛmɔse kyɛ agyapadeɛ bɔ bɛkɔfa bɛkotua ɛmɔ kerɛ ne, ofi Awurade berɛ. Ɛmɔyɛ ngoaa bɛma yɛ Wura Kristo. 25 Bɔ ɔte yeɛ ole kyɛ, ebiala bɔ ɔkɔyɛ bɔne ne, okonya ye bɔne nanwo akatua, ofikyɛ Nyameɛ nnea sona nyunu.