1 Aliemaa mɔ, mepena kyɛ ɛmɔnwu ye kyɛ, né yɛ nana mɔ wura munungum nabo, na bɛ mukoraati bɛfale ɛpo nanu. 2 Yeti bɛbɔle bɛ mukoraati asu wɔ Mose nu, wɔ munungum ne ɛpo nanu, 3 bɛ mukoraati bɛlili honhom nu aleɛ kõ, 4 na bɛnone honhom nu nzue kõ. Benyane sɔ nzue ne bɛfili honhom nu nyɔboɛ bɔ ne oli bɛ si nanu, na sɔ nyɔboɛ ne yeɛ ole Kristo. 5 Nakoso, Nyameɛ nye angye bɔ bɛ nu pee yɛle nanwo, yeti ɛserɛ naso yeɛ bɛwuli ɔ.

6 Na sɔ dwirɛ hemɔ ayɛ kɔkɔbɔ ama yɛ, kyɛbɔ ɔkɔyɛ a, yɛ nye ngɔgye bɔne nwo, kyɛbɔ bɛ nye gyele ye nwo ne. 7 Yeti, nnɛmɔ sõ bosoen kyɛbɔ bɛ nu biemɔ yɛle ne. Bahworɔ kyɛ: "Mmenia ne tenane ase didili, na bɛnone, na bɛdwɔso bɛgyele bɛ nye." 8 Ná nnɛmɔ maa yɛbɔ adwaman, kyɛbɔ bɛ nu biemɔ bɔle adwaman maa ɛlɛhomapɛ mmenia 23,000 wuli ne. 9 Yeɛ nnɛmɔ maa yɛsɔ Awurade yɛnea, kyɛbɔ bɛ nu biemɔ sɔle ye neane maa ɛwoo huhuni bɛ ne. 10 Afei koso, nnɛmɔ nwiinwii, kyɛbɔ bɛ nu biemɔ nwiinwiini maa abɔfo ne sɛkyele bɛ ne. 11 Bɔ ɔtole bɛ namukoraati te kɔkɔbɔ, na bahworɔ bato berɛ kyɛ ɔbɔ yɛ bɔ wiase awieɛ ne ato yɛ ne kɔkɔ. 12 Yeti, ebiala bɔ y’adwene yɛ ye kyɛ ogyi berɛ ne, ɔnea yé na wamvi ase. 13 Nzɔhwɛ biala bɔ ɔkɔto ɛmɔ ne, ɔtte nikye bɔ sona nnwuni bie lle ɔ. Nyameɛ te ebie bɔ odi nahorɛ, yeti ɔngɔma nzɔhwɛ bɔ ɔbo ɛmɔ anwoserɛ so ngɔto ɛmɔ. Mmom ɔkɔmaa atee kɔla nzɔhwɛ nanwo, kyɛbɔ ɔkɔyɛ a ɛmɔ kofi nu, na ɛmɔ ahora bagyina ye noa.

14 Yeti nniema mɔ, ɛmɔhwe ɛmɔ nwo bɛfi abosonsom nwo. 15 Me dwudwo mekyire ɛmɔ kyɛ mmenia bɔ bɛse nworɛ, yeti ɛmɔdwene bɔ meka nanwo. 16 Nhyira kwangoa bɔ yɛhyira so ne, ɛhene ngyire kyɛ yanya Kristo mogya nanu kyɛfa anaa? Na paanoo bɔ yɛbubu nu ne, ɛhene ngyire kyɛ yanya Kristo nipadua nanu kyɛfa anaa? 17 Ɔwɔ nu kyɛ yɛsone, nakoso paanoo ne bɔ ɔte komapɛ nati, yɛ mukoraati yɛte nipadua kõ, ofikyɛ yɛdi paanoo kõ ne bie. 18 Ɛmɔnea Israelfoɛ bɔ bɛwɔ berɛ ne, bɛbɔ bɛdi afɔleɛ ne bie ne, nnaa bɛne afɔleɛ bokyea ne yeɛ ɛkyɛ ɔ? 19 Nzu koraa yeɛ mepena mekyire ye? Aso bɔ mekyire yeɛ ole kyɛ, aleɛ bɔ bɛfa bɛbɔ afɔleɛ bɛma bosoen ne te nikye bie, anaa bosoen ne te nikye bie hɔ? 20 Daabi oo, mmom afɔleɛ bɔ maen-maen ne bɔ ne, bɛbɔ bɛma adaemone,* ɔtte Nyameɛ. Ná membena kyɛ ɛmɔ ne adaemone nya abusuabɔ biala. 21 Ɛmɔ ngɔhora bɛngɔno Awurade kwangoa noa, ná ɛmɔ asa bano adaemone kwangoa noa; na ɛmɔ ngɔhora bɛngɔdidi Awurade tɛbulu so, na ɛmɔ asa badidi adaemone tɛbulu so. 22 Anaa yɛpena kyɛ yɛhyɛ Nyameɛ apue? Yɛ nwo yɛ se tra ye hɔ?

23 Yɛle ye nwo atee kyɛ yɛyɛ nikye biala, nakoso nná ye mukoraati yeɛ mvasoɛ wɔ so ɔ. Yɛle ye nwo atee kyɛ yɛyɛ nikye biala, nakoso nná ye mukoraati yeɛ ɔmaa yɛnya ngɔsoɛ ɔ. 24 Nnɛmaa ebiala pena bɔ ɔte pa ma ye nwo ngome, mmom ɔpena bɔ ɔkɔboka afoforɛ koso. 25 Ɛmɔli naen biala bɔ bɛtɔne ye dwaaso ne, nakoso ɛmɔ ahonim ti, nnɛmɔ bisa-bisa ye nwo dwirɛ, 26 ofikyɛ "aseɛ ne, ɔne nikye biala bɔ ɔwɔ nu ne te Awurade deɛ." 27 Sɛ ebie bɔ ɔtte gyidiniɛ to asaa frɛ ɛmɔ, na sɛ ɛmɔkɔ a,* bɔ ɔkɔfa kosie ɛmɔ nyunu biala, ɛmɔli, ná ɛmɔ ahonim ti, nnɛmɔ bisa ye nwo dwirɛ biala. 28 Nakoso sɛ ebie ka kyire ɛmɔ kyɛ, "Bafa aleɛ he babɔ afɔleɛ bama bosoen" a, sona bɔ ɔha hyirele ɛmɔ ne, ɔne ahonim ti, nnɛmɔ di. 29 Nná ɛmɔ ahonim deɛ nwo dwirɛ yeɛ meka hɔ oo, mmom sona ne deɛ. Na nzuati yeɛ odikyɛ ebie fa ye ahonim kyire me bɔ nyɛ ɔ? 30 Na sɛ mefa asennaa medi a, nzuati yeɛ odikyɛ bɛdwudwo betia me wɔ nikye bɔ mala ye nwo ase nanwo ɔ?

31 Yeti sɛ ɛmɔdidi oo, ɛmɔ no oo, anaa ɛmɔyɛ nikye foforɛ biala oo, ɛmɔyɛ ye mukoraati bɛhyɛ Nyameɛ anuonyam. 32 Na ɛmɔnea yé na ɛmɔ ando Yudafoɛ, Greekfoɛ, anaa Nyameɛ asafo ne sintidua, 33 kyɛbɔ mebɔ mmɔden kyɛ ngɔyɛ bɔ ɔsɔ ebiala nye ne. Nná bɔ ohia me ngome yeɛ mepena ɔ, mmom mepena bɔ ohia mmeni pee kyɛbɔ ɔkɔyɛ a bekonya ngoa ɔ.