1 Me Paul, bɔ ɔnate bɛ bɔ Nyameɛ aye bɛ ne gyidie, ɔne nahorɛ nanwo nimdeɛ bɔ odi mu bɔ ɔne nyamesom pa yia nati, nde Nyameɛ akoaa ne Yesu Kristo somafoɛ. 2 Sɔ gyidie ne nahorɛ namukoraati gyi daa ngoa nwo anidasoɛ naso, sɔ anidasoɛ ne, Nyameɛ bɔ ɔngora mbɛ anoanu ne yeɛ wafa wahyɛ yɛ bɔ fi teteete. 3 Ye mmerɛ bɔ ɔsɛ nu ne, ɔnate asɛnka adwuma bɔ y’Agyenkwa Nyameɛ maa bɛfa bɛmane me naso lale ye dwirɛ ne ali.

4 Mefa krataa he mekɔma Tito bɔ wayɛ kyɛ mma bɔ mene ye wɔ gyidie kõ nu ne:

Adom ne asomdwie bɔ ofi yɛ Baba Nyameɛ ne Yesu Kristo bɔ ɔte y’Agyenkwa ne berɛ ha wɔ.

5 Nyakyile wɔ wɔ Kreta, kyɛ ɛnea toto nningyein bɔ ɔngɔ yé ne, na ɛye mbanyi wɔ kuro biala nu kyɛbɔ ngyirele wɔ ne; 6 sɛ ebie kɔhora kɔɔyɛ panyi a, odikyɛ ɔyɛ ebie bɔ edwirɛ nne ye nwo, sɛ wagya a ɔye kõ, ye mmaa te gyidifoɛ bɔ ebiala se kyɛ bɛnyɛ basabasa anaa asoserɛ. 7 Ɔnate kyɛ ɔnea Nyameɛ awuro so nati, odikyɛ ɔyɛ ebie bɔ edwirɛ nne ye nwo, onni ye ahone so dwirɛ, ɔmvɛ yaa ndɛ, ɔtte kɔwenzaniɛ, onguro ngondii, na ye nye mmoro sikaa. 8 Mmom ye nye gye ye nwo kyɛ okole ɛwɔfoɛ, ye nye gye ye nwo kyɛ ɔkɔyɛ nikye pa, y’adwene nu la berɛ, ɔtengyɛ, odi nahorɛ, ɔkora hyɛ ye nwo so, 9 sɛ́ ɔkyirekyire a, ɔfa ye ngyerɛkyerɛ ne gyina nahorɛ dwirɛ naso, kyɛbɔ ɔkɔyɛ a ɔkɔhora kɔfa ngyerɛkyerɛ pa ne kɔhyɛ afoforɛ nguraen, ná wadwudwo wahyire bɛ bɔ bedwudwo betia ne.

10 Ofikyɛ mmeni pee ate atua, bɛkeka edwirɛ bɔ mvasoɛ biala nne so, bɛlaka-laka mmenia, ɛnga-nga bɛ bɔ balɛ́ bagyina nu kyɛ, odikyɛ brienzua biala pɛ ye toa ne. 11 Odikyɛ bɛmaa sɔ mmenia nemɔ mua bɛ noa, ofikyɛ mvasoɛ tɛɛ bɔ bɛpena nati nningyein bɔ ɔnzɛ kyɛ bekyirekyire ne, ɛhene yeɛ bekyirekyire bɛfa bɛsɛkye gyidie bɔ abusua ne le ye ne ɔ. 12 Kretaniɛ bie bɔ ɔte diifoɛ po hane kyɛ: "Kretafoɛ de, daa bɛpɛ anoanu, bɛte ngaka bɔ bɛ nwo yɛ suro, akwadwofoɛ bɔ bɛdi ngwasea adidie."

13 Sɔ dwirɛ he te nahorɛ, yeti dwudwo kyire bɛ paa, kyɛbɔ ɔkɔyɛ a bɛkɔyɛ se wɔ gyidie nanu, 14 ná bandie Yudafoɛ anansesɛm, ɔne mmenia bɔ bahwe bɛ nwo bafi nahorɛ nanwo ne ahyɛdeɛ ne. 15 Bɛ bɔ bɛ nwo te ne, nikye biala nwo te ma bɛ; nakoso bɛ bɔ bɛ nwo nde na bɛlle gyidie ne de, nikye fee nwo nde mma bɛ. 16 Bɛnwa bɛse Nyameɛ, nakoso bɛfa bɛ nneyɛɛ bɛkyire kyɛ bapo ye. Bɛyɛ akyiwadeɛ, bemmu nikye, na ɛfa bɛ yɛ nikye pa biala a, ɔnyɛ yé.