1 ಕೊರಿಂಥ 12

ಯಕ್ಕ ಅಂಗ ಘನ್ನಾ ಭಾಗೊ

12 ಅಂಗ ಯಕ್ಕಜ಼ ವ್ಹೈ; ಅಂಗನಾ ಭಾಗೊ ಘನ್ನಾ ವ್ಹೈ. ತೆ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ತೆ ಯಕ್ಕಜ಼ ಅಂಗ ವ್ಹೈ. ತಿನಾ ನಿಂಗತಜ಼ ಕ್ರಿಸ್ತ ಯೆಸು ವ್ಹೈ. 13 ಯಹುದ್ಯೊ ರ‍್ಹವಾದೆ, ಗ್ರಿಕವಾಲಾ ರ‍್ಹವಾದೆ, ಗುಲಾಮೊ ರ‍್ಹವಾದೆ, ಆಜಾ಼ದ ರ‍್ಹಯಲವಾಲಾ ರ‍್ಹವಾದೆ- ಅಪೆ ಕ್ಹಾರಾ ಯಕ್ಕಜ಼ ಅಂಗ ಥೌ ಕೈನ ಯಕ್ಕಜ಼ ಆತ್ಮಾಕ್ಹು ಬಾಪ್ತಿಸ್ಮ ಹೊಂದಿಲಿದ್ಯಾಸ. ಯಕ್ಕಜ಼ ಆತ್ಮಾನೆ ಅಪೊನೆ ಕ್ಹಾರಾವೊನೆ ಪಾನ ಥೈನ ದಿದಲ ಛೆ.

14 ಪುರಾ ಅಂಗ ಯಕ್ಕಜ಼ ಅಂಗನು ಭಾಗಕ್ಹು ನ್ಹವೈ, ಘನ್ನಾ ಅಂಗನಾ ಭಾಗೊಕ್ಹು ಮಳಲ ಛೆ. 15 ಕೆಳಾಮಾ ತುಬಿ ಪಗ್ಗ"ಮಿ ಹತ್ತ ನ್ಹವೈ, ಎ ಕಾರಣಕ್ಹು ಮಿ ಅಂಗನೆ ಮಳಿನ ನತ್ತಿ" ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು? 16 ನೈತೊ ಕಾನ"ಮಿ ಡೊಳೊ ನ್ಹವೈ" ಎ ಕಾರಣಕ್ಹು ಕೈನ ಕದಲ ರ‍್ಹಯಮ ತೆ ಅಂಗನು ಭಾಗ ಥೈನ ರ‍್ಹವಾನು ಚು಼ಕಸ ಸು? 17 ಅಂಗ ಪುರಾ ಡೊಳೊ ಥಯುಮ ತೆ ಐಕಾನು ಕಿಮ್ಮ? ನೈತೊ ತೆ ಪುರಾ ಕಾನಜ಼ ಥಯುಮ, ಬಾಸ ದೆಕಾನೆ ತಾಕತ ಕಿಜಾ಼ ಛೆ? 18 ಚೊ಼ಕು ಛೆ, ಕ್ಹುದಾ ತಿನಿ ಚಿತ್ತ ನಿಂಗತ, ಹರಯಕ್ಕ ಅಂಗನಾ ಭಾಗನೆ ಕರೆಟ್ಟ ಜೊಡಸಾಯೊಸ. 19 ತೆ ಕ್ಹಾರಾ ಯಕ್ಕಜ಼ ಅಂಗನಾ ಭಾಗ ಥಯಾಮ ತ್ಯಾ ಅಂಗ ಕಿಜಾ಼ ಛೆ? 20 ಇಮ್ಮ ಅಂಗನಾ ಭಾಗೊ ಘನ್ನಾ ರ‍್ಹಯಾತಬಿ ಅಂಗ ಪುರಾ ಯಕ್ಕಜ಼ ವ್ಹೈ.

21 ಇಮ್ಮ ರ‍್ಹತಾಮಾ "ತಾರಿ ಜ಼ರುರತ ಮನೆ ನತ್ತಿ" ಕೈನ ಹತೆ ಡೊಳೊ ಕವಾನೆ ನೈ ಥಾತು. ತಿನಾ ನಿಂಗತಜ಼"ತಾರಿ ಜ಼ರುರತ ಮನೆ ನತ್ತಿ" ಕೈನ ಪಗೊನೆ, ಮಾತು ಕವಾನೆ ನೈ ಥಾತು. 22 ತೆಕ್ಲುಜ಼ ನೈ, ತಾಕತ ನೈಸೊ ದಿಕ್ಹಾನಾ ಅಂಗನಾ ಭಾಗೊ ಅಪೊನೆ ಚಾ಼ಯೆಜ಼. 23 ನ್ಹಾನಾ ವ್ಹೈ ಕೈನ ಕವೈಲಿವಾನಾ ಅಂಗನಾ ಭಾಗೊ ಘನ್ನಾ‍ ಮ್ಹೊಟಾ ಕಾಮೊ ಕರಸ. ಜಾ಼ಕಿನ ಮ್ಹೆಲಾನಾ ಅಂಗನಾ ಭಾಗೊನೆ ಮರ್ಯಾದಿ ವಚಾ಼ಡಸ. 24 ಚೊ಼ಕು ಅಂಗನಾ ಭಾಗೊನೆ ರಕ್ಷಣೆನಿ ಜ಼ರುರತ ನೈ ರ‍್ಹತಿ. ಅಂಗನೆ ತಯ್ಯಾರ ಕರಲ ಕ್ಹುದಾ ಕಮಿ ರ‍್ಹಯಲ ಅಂಗನಾ ಭಾಗೊನೆ ಘನ್ನಿ ಮರ್ಯಾದಿ ದಿದ್ಯೊಸ. 25 ಅಂಗಮಾ ಭೆದ-ಭಾವ ನೈಸೊ ಅಂಗನಾ ಭಾಗೊನೆ ಯಕ್ನಾ ಯಕ್ಕನೆ ಚೊ಼ಕಾನಾ ಹುತಿ ಕರ‍್ಯೊಸ. 26 ಯಕ್ಕ ಅಂಗನಾ ಭಾಗನೆ ದುಕ್ಕ ಥಯುಮ, ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ದುಕ್ಕ ಖಾವಸ. ಯಕ್ಕ ಅಂಗನಾ ಭಾಗನೆ ಖುಶಿ ಥಯುಮ, ಉಗ್ರಲ ಕ್ಹಾರಾ ಅಂಗನಾ ಭಾಗೊ ತಿನಾ ಕ್ಹಾತೆ ಮಳಿನ ಖುಶಿ ಕರಸ.

27 ತುಮೆ ಕ್ಹಾರಾ ಕ್ರಿಸ್ತ ಯೆಸುನು ಅಂಗ ಥಯಾಸ; ಹರಯಕ್ಲೊ ಎ ಅಂಗನು ಭಾಗ ಥಯೊಸ.