1 ಹೊಗಳಿಲಿವಾನು ಹಿತಕರ ನವೈ. ತೆನೈಸೊ ಹೊಗಳಿ ಲಿವಾನು ಮನೆ ಅನಿವಾರ್ಯ ಥಯುಸ. ತಿನಾಹುತಿ ಕರ್ತಾ ಮನೆ ದಿದಲ ದರ್ಶನೊನೆ ವರಿ ತಿಳಸಾಯಲ ರಹಸ್ಯೊನಾಹುತಿ ಕವುಸ. 2 ಕ್ರಿಸ್ತಮಾ ರ‍್ಹಯಲ ಯಕ್ಕ ಮನಕ್ಹನೆ ದೆಕ್ಯೊ. ತೆ ಚೌದಾ ವರಕ್ಹ ಪಾಚೊ಼ ತನವಾ ಸ್ವರ್ಗೆ ಗಯೊ. ತೆ ಅಂಗನಾಕ್ಹಾತೆಜ ಗಯೊ, ತೆನೈಸೊ ಅಂಗನಾಕ್ಹಾತೆ ಗಯೊ ಮಿ ಕದ್ಯೊಸ, ಕ್ಹುದಾ ಛೆ. 3 ತೆ ಪರದೆಶಲಕ್ಕಾ ಗೈನ ಮನಕ್ಹೊಕ್ಹು ಉಚ್ಚಾರ ಕರಾನೆ, ಬೊಲಾನೆ ನೈ ಆಯಲ ವಾತೊ ಐಕ್ಯೊಸ ಕೈನ ಕದ್ಯೊ. . 4 ತೆ ಟೈಮಾ ತೆ ಅಂಗನಾಕ್ಹಾತೆಜ಼ ವ್ಹತ್ತೊ ನೈತೊ ಅಂಗನಾಕ್ಹಾತೆಜ಼ ಮಿ ಕದ್ಯೊತೊ, ಕ್ಹುದಾ ಛೆ 5 ತಿನಾಹುತಿ ಮಿ ಹೆಮ್ಮೆ ಕರುಸ. ತೆನೈಸೊ ಮಾರಿ ತಾಕತನೆ ಬಿಜಿ ಹೊಗಳಿಕಿ ಮನೆ ನತ್ತಿ. 6 ಹೊಗಳಿಲಿವಾನು ಮನೆ ಯಕ್ಕ ಯೆಳ ಮನಸ ರ‍್ಹೈತಬಿ ತಿಮ್ಮ ಹೊಗಳಿಲಿವಾಮಾ ಗ್ಯಾನ ನೈಸೊವಾಲಾ ನಿಂಗತ ನೈ ಥಾತೊ, ಕಾಕದ್ಯಾಮ ಕ್ಹರಿಜ ಕವಾಡೊಸ. ರ‍್ಹೈತಬಿ ಕುನ್ನಬಿ ಮಾರಾಮಾ ದಿಕ್ಹ್ಯಾತಿಬಿ ಮಾರಾಕ್ಹು ಐಕಾತಬಿ ಹೆಚ್ಚ ಮನೆ ಮ್ಹೊಟೊ ವ್ಹೈ ಕೈನ ಕೌ ನೈ. 7 ಎ ಕಾರಣಕ್ಹು ವರಿ ಮನೆ ತಿಳ್ಸಾಯಲ ರಹಸ್ಯೊಕ್ಹು ಘನಾ ಕ್ಹಾಸ ರ‍್ಹಯಲಕ್ಹು ಮಿ ಹೊಗಳಿ ಲಿದ್ಯಾವಾಚಿ಼ ಗಪ್ಪ ರ‍್ಹೌಸ. ಪ್ರಕಟನೆನಾ ಹೆಚ್ಚಕ್ಹು ಮಿ ಮನೆ ಅತಿಶಯ ಥೈನ ಹೆಚ್ಚ ಕರಲ್ಯು ನೈ ಕೈನ ಯಕ್ಕ ಶೂಲ ಮನೆ ತಿವಿದಾನಾಹುತಿ ಮಾರಾ ಅಂಗಮಾ ಮ್ಹೆಲ್ಯಾಸ. ಮಿ ಅಹಂಕಾರ ಕರ‍್ಯಾವಾಚಿ ತಿಮ್ಮಜ಼ ಎ ಮನೆ ತಿವಿದಿನ ಸೈತಾನನಾ ದೂತನಾ ನಿಂಗತ ಕದ್ರಾವಾಡುತು. 8 ಆಮ ದುಕ್ಕ ಮನೆ ಛೊಡಿನ ಜಾವಾ ನಿಂಗತ ತನ್ನಸಲಾ ಕರ್ತಅಕನ ಮಾಂಗಿಲಿದ್ಯೊ ತೆನೈಸೊ 9 ತಿನಾಹುತಿ ತೆ, ಮಾರಿ ಕರಪಾ ತುನೆ ಬಸ್ಸ, ತಾಕತವರ ನಯ ರ‍್ಹಯಲ ಟೈಮಾ ಮಾರಿ ತಾಕತ ತಾರಾಕ್ಹಾತೆ ರ‍್ಹವಸ. ಕೈನ ಮನೆ ಕದ್ಯೊ. ಇಮ್ಮ ರ‍್ಹತಾಮಾ, ಕ್ರಿಸ್ತನಿ ತಾಕತ ಮಾರಾಮಾ ಔ ಕೈನ ಮನೆ ಥಾವಾನು ತಾಕತ ನೈ ರ‍್ಹತಾ ಟೈಮಾ ಘನೊ ಕ್ಹುಶಿ ಥೈನ ಹೆಚ್ಚ ಕರುಸ. 10 ತಿನಾಹುತಿ ಕ್ರಿಸ್ತನಾ ನಿಮಿತ್ತ ಬಲಹಿನಮಾ ಇನ್ಕಾರಮಾ , ಕೆರತೆಮಾ, ತ್ರಾಸಮಾ, ವರಿ ಇಕ್ಕಟ ಅನುಭವ ಕರ್ತಾಮಾ ಕ್ಹುಶಿ ಥಯೊಸ. ಕಾಕದ್ಯಾಮ ಮಿ ಕೆಳಾಮಾ ತಾಕತ ನಯಸೊವಾಲೊ ಥವುಸತೊ, ತೆಳಾಮಾಜ಼ ತಾಕತವಾಲೊ ಥವುಸ.

11 ಮಿ ಇಮ್ಮ ಲಿಕ್ಕಿನ ಗ್ಯಾನ ನೈಸೊವಾಲೊ ಥಯೊಸ! ತಿನೆ ತುಮೆ ಮನೆ ಬಲವಂತ ಕರೊ ನಕೊ. ತುಮಾರಾಕ್ಹು ಮನೆ ಹೊಗಳಿಕೆ ಥಾವಾನು ವ್ಹತ್ತು, ಕಾಕದ್ಯಾಮ ಮಿ ದಕ್ಹೊ ಅಲ್ಪ ಥೈತಬಿ ಚೊಕೊ ರ‍್ಹಯಲ, ಅಪೊಸ್ತಲೊ ಕವೈಲಿವಾತಿ ಯಕ್ಕಮಾತಬಿ ಕಮ್ಮ ರ‍್ಹಯಲವಾಲೊ ನವೈ. 12 ಮಿ ತ್ರಾಸನೆ ಸ್ಥಿರ ಚಿತ್ತಮಾ ತಡ್ದಿ ಲಿವಾಮಾ ಚೊಕಾ ಕಾಮೊ ವರಿ ಅದ್ಬುತ ಕಾಮೊ, ತಿಮ್ಮ , ಮ್ಹೊಟಾ ಕಾಮೊ ಕರಲಾವಾಲಾಮಾ ಯಕ್ಕ ಅಪೊಸ್ತಲನೆ ರ‍್ಹಯಲ ಲಕ್ಷಣಾ ತುಮಾರಾ ವಚ್ಮಾ ಪ್ರಕಟ ಥಯು ನತ್ತಿ. 13 ಮನೆ ದೆಕಿಲಿವಾನು ವಜ್ಜು ಮಿ ತುಮೊಪರ ಛೊಡ್ಯಾ ಬಗರ ವರಿ ಯಕ್ಕಜ಼ ವಿಶಮಾ ನೈತೊ ಬಿಜಾ಼ ಕಯಾಜ಼ ವಿಶಯಮಾ ತುಮೊನೆ ಉಗ್ರಲ ಸಭೆವಾಲಾ ನಿಂಗತ ಕಮ್ಮ ಕರ‍್ಯೊ ನೈತೊ? ಮಾರು ಎ ತಪ್ಪನೆ ಕ್ಷಮಾ ಕರೊ. 14 ಹಮ್ನಾ ಮಿ ತುಮೊಕನ ತನವಾ ಸಲಾ ಆವಾನೆ ತಯ್ಯಾರ ಥಯೊಸ ವರಿ ತುಮೊನೆ ವಜ್ಜು ಥಯಲ ನಯ ರ‍್ಹತು. ಮಿ ತುಮಾರಾ ಸೊತ್ತನೆ ಬಯಸ್ಯಾವಾಚಿ ತುಮೊನೆ ಆಶಿಸಕರುಸ. ಬಚ್ಚಾ ಮಾಬಾಪನಾಹುತಿ ಜ಼ಮಾ ಕರಾನು ಧರ್ಮ ನವೈ ತೆನೈಸೊ ಮಾಬಾಪೊ ಬಚ್ಚಾವೊನಾಹುತಿ ಜ಼ಮಾ ಕರಾನು ಧರ್ಮ ವ್ಹೈ. 15 ಮಿತೊ ಮನೆ ರ‍್ಹಯಲ ತುಮಾರಿ ಆತ್ಮಾ ಸಂರಕ್ಷನೆನಾಹುತಿ ಖುಶಿಕ್ಹು ಖರ್ಚ ಕರುಸ, ಮನೆಜ಼ ಖರ್ಚ ಕರಲ್ಯುಸ, ಮಿ ತುಮೊನೆ ಘನ್ನೊ ಮಯಾ ಕರ‍್ಯಾರೆ ತುಮೆ ಸು ಮನೆ ಕಮ್ಮ ಮಯಾ ಕರೊಶಿ? 16 ತೆನೈಸೊ ಇಮ್ಮ ರ‍್ಹತಾಮಾ ಮಿ ತುಮೊನೆ ವಜ್ಜು ಥಯೊ ನತ್ತಿ, ತೆನಯಸೊ ಉಪವಾಸಕ್ಹು ತುಮೊನೆ ಸಂಚು ಕರಿನ ಧರ‍್ಯೊಸ ಕೈನ ಕವೊ. 17 ಮಿ ತುಮೊಕನ ವಳಾತಾಮಾ ಕಿನಾ ಮುಲಕ ಥೈತಬಿ ತುಮೊನೆ ವಮಚತ ಕರಿನ ಸುತಬಿ ಲಿದ್ಯೊ? 18 ತುಮೊಕನ ಜಾ಼ವಾನಾಹುತಿ ಮಿ ತಿತಾನೆ ಮಾಂಗಿಲಿನ ತಿನಾಕ್ಹಾತೆ ತೆ ಭಾಯೊನೆ ವಳೈನ ದಿದ್ಯೊ, ತಿತಾ ತುಮೊನೆ ವಂಚನೆ ಕರಿನ ಸುತಬಿ ಲಿದ್ಯ? ಹಮೆ ಬೆಜ಼ನಾ ಯಕ್ಕಜ಼ ವಾಟಮಾ ಚಾ಼ಲ್ಯಾನೈ? ಹಮೆ ತೆಜ಼ ಕ್ರಮಮಾ ಹೆಜ್ಜಿ ಮ್ಹೆಲ್ಯಾ ನೈ? 19 ಹಮೆ ಅಕ್ಲಿಯೆಳ ಲಕ್ಕಾ ತುಮರಾ ಕ್ಹಾಮಾ ಪ್ರತಿ ಥಯಲ ಕರಾಡಾಸ ಕೈನ ಭಾವಿಸ್ಯಾಸ? ಕ್ಹುದಾನಿ ಸನ್ನಿದಿಮಾ ಅಪೆ ಕ್ರಿಸ್ತಮಾ ರ‍್ಹೈನ ತುಮಾರಿ ಭಕ್ತಿನಾಹುತಿ ಬೊಲಾಲಾ ಥಯಾಸ. 20 ಮಿ ಆತಾಮಾ ಯಕ್ಕಳೆ ತುಮೆ ಇಚ್ಚಾ ಕರಲ ಪ್ರಕಾರ ಮಿ ದಿಕ್ಹತೊ ನೈ ಕವಾನು ಬುಚ಼ಕ ಮನೆ ಛೆ. ತಿಮ್ಮಜ಼ ಮಿ ಇಚ್ಚಾಕರಲ ಪ್ರಕಾರ ತುಮೆ ದಿಕ್ಹಾತಾ ನೈ ಕಯನ ಶಂಕಾ ಮನೆ ಛೆ. ಯಕ್ಕ ವಕ್ಹತ ತುಮೊಮಾ ಲಡೈ, ಹೊಚ್ಚಿಗಿಟ್ಟಿ , ದ್ವೆಷ, ಮಂದ ಗ್ಯಾನ ಚಾಡಾ ಕವಾನು , ಕಾನಮಾ ಕವಾನು, ಫುಗ್ಗಾನು, ಕಲಹ ಉಟಾಡಸ ರ‍್ಹವಸ ಕೈನ ಮನೆ ಶಕ್ಕ ಛೆ. 21 ಮಿ ಫರಿನ ಆಯಲ್ಪರ ಮಾರೊ ಕ್ಹುದಾ ತುಮಾರಾ ವಿಶಯಮಾ ಮನೆ ತಗ್ಸಿ ಲಿವಾನು ಗುರಿ ಕರಲ ನಿಂಗತ ಪೈಲಾ ನಿಂಗತ ಪಾಪ ಕರಿನ, ಬಂಡತನಾ ಹಾದರತನಾ, ಕೆಟ್ಟನೆ ಕರಿನ ಪಶ್ಚಾತಾಪ ಪಡ್ದಲ ಘನಾಜ಼ನಾ ವಿಶಯೊಮಾ ಮಿ ದುಕ್ಕ ಪಡ್ದಾನಾಹುತಿ ಮನೆ ಬುಚ಼ಕ ಛೆ.