1 ಪಾಚಾ಼ತಾ ಧಾಂಡಾ ನಿಂಗತ ರ‍್ಹಯಲ ಅಳ್ತಿನಿ ಯಕ್ಕ ಲಾಕಡಿ ಮನೆ ದಿನ್ನ ಅಮ್ಮ ಕವಾಯಾ; "ಜಾ಼, ಕ್ಹುದಾನಿ ಯಗ್ನೆವೆದಿ ವರಿ ತಿನಿ ಆಲಯ ಅಳತಿ ಕರ; ವರಿ ತ್ಯಾ ಆರಾಧನಾ ಕರಾಲಾ ಮನಕ್ಹೊನೆ ಮೊಜ಼. 2 ತೆನೈಸೊ ಆಲಯನಿ ಭಾರಲಿ ಅಂಗಳಾ ಅಳತಿ ಕರ‍್ಯಾವಾಚಿ ಛೊಡಿಪಾಡ. ತೆ ಯೆಹುದಿಯೊ ನೈ ರ‍್ಹಯಲ ಮನಕ್ಹೊನೆ ಛೊಡ್ಯಾಸ. ತೆ ಮನಕ್ಹೊ ಪವಿತ್ರ ಗಾಮಪರ 42 ಮ್ಹೈನಾ ಖುಂದತಾ ಚಾ಼ಲಸ.. 3 ಕೊತ್ಳಾ ಘಾಲ್ಲಿದಲ ಮಾರಿ ಬೆ ಸಾಕ್ಕಷಿಯೊನೆ ಅದಿಕಾರ ದ್ಯುಸ. ತ್ಯುನೆ ಬಾರಾಕ್ಹೊನ ಕ್ಹಾಟ ದಿನ್ನ ಪ್ರವಾದನೆ ಕರಸ"

4 ಭುಲೊಕನೊ ಪ್ರಭುನಿ ಸನ್ನಿದಾನಮಾ ಹುಬ್ರಯಲ ಬೆ ತೆಲನಾ ಝಾಡೊ ವರಿ ಬೆ ದಿವ್ವಾನಾ ಖಂಬಾ ಎ ಬೆ ಸಾಕ್ಷಿ ವ್ಹೈ. 5 ಎ ಸಾಕ್ಕಷಿನೆ ಕುನಬಿ ಕೆಟ್ಟ ಕರಾನೆ ಕೊಶಿಶ ಕರ‍್ಯಾಮ, ಸಾಕ್ಕಷಿಯೊನಾ ಮ್ಹೊಡಾಮಾತು ಆಗ ಭಾರಿ ಐನ ತ್ಯುನಾ ದುಶ್ಮನೊನೆ ಕದ್ಯಾಮ ತ್ಯುನೊನೆ ತ್ರಾಸ ಕರಾನೆ ಕೊಶಿಶ ಕರಲ ಕ್ಹಾರಾವೊನೆ ಖಲಾಸ ಕರಸ. 6 ಎ ಸಾಕ್ಕಷಿಯೊ ತ್ಯುನಾ ಪ್ರವಾದನೆನಾ ಟೈಮಮಾ ಹಬಾಳ ಪರತು ಪಡಾನು ಪಾನಿ ಹುಬ್ರಾಡಾನೆ ಪಾನಿನೆ ರಗತ ಕರಾನೆ ಜಿಮಿನ್ನೆ ಕ್ಹಾರಿ ತರಾನಾ ತ್ರಾಸೊ ದಿವಾನೆ ಅದಿಕಾರ ವ್ಹಂದಲ ರ‍್ಹವಸ. ತ್ಯುನೆ ತ್ಯುನೊನೆ ಮನಸ್ಸ ಆಯಲ ತೆಕ್ಲು ಅಮ್ಮ ಕರ ಸಕಸ.

7 ಎ ಬೆ ಸಾಕ್ಷಿಯೊ ತ್ಯುನಿ ಸಂದೆಶ ಕೈನ ಕ್ಹರಲ ಪರ ಪಾತಾಳಮಾತು ಉಪ್ಪರ ಆವಾನು ಜಾನವರ ತ್ಯುನಾ ವಿರುದ್ದ ಯುದ್ದ ಕರಸ. ಎ ಜಾನವರ ತ್ಯುನೊನೆ ಸೊಲ್ಸಿನ ಖಲಾಸ ಕರಸ. 8 ಎ ಸಾಕ್ಷಿಯೊನಾ ಬೆ ಮುರದಾ ಮ್ಹೊಟಾ ಗಾಮ್ನಾ ವಾಟಮಾ ಪಡಲ ರ‍್ಹವಸ. ಎ ಗಾಮನೆ ಸೊದೊಮ ವರಿ ಇಜಿಪ್ತ ಕೈನ ನಾಮ ಥಾವಸ. ತೆ ಗಾಮನಾ ನಾಮೊನೆ ಖಾಸ ಮತ್ಲಬ ಛೆ. ಪ್ರಭು ಎ ನಗರಮಾಜ಼ ಶಿಲುಬಿ ಪರ ಘಾಲ್ಯಾ.

9 ಕ್ಹಾರಾ ಮನಕ್ಹೊ, ಘರದಾನು, ವಾತೊ, ಜಾ಼ತವಾಲಾ ಕ್ಹಡಾ ತನ್ನ ದಿನ್ನ ಲಕ್ಕಾ ಎ ಸಾಕ್ಷಿಯೊನಾ ಮುರದಾವೊನೆ ದೆಕತಾ ರ‍್ಹವಸ. ತ್ಯುನೊನೆ ಸಮಾದಿ ಕರಾನೆ ಮನಕ್ಹೊ ವಪ್ಪಿಲೆತಾ ನೈ. 10 ಎ ಭಂಬಿಜ಼ನಾ ಮರಲ ಹುತಿ ಜಿಮಿನ ಪರ ರ‍್ಹಯಲ ಮನಕ್ಹೊ ಖುಶಿ ಥಾವಸ. ತ್ಯುನೆ ಕಾರಯೊ ಕರಿನ, ಯಕ್ಕನೆ ಯಕ್ಕ ಆಯಾರ ದಿವಸ. ಎ ಭಂಬಿ ಪ್ರವಾದಿಯೊ ಜಿಮಿನ ಪರ ರ‍್ಹಯಲ ಮನಕ್ಹೊನೆ ಘನ್ನು ತ್ರಾಸ ದಿದಲಕ್ಹು ಎ ಮನಕ್ಹೊ ಅಮ್ಮ ಕರಸ.

11 ತೆನೈಸೊ ಕ್ಹಡಾ ತನ್ನ ದಿನ್ನ ಥಯಲ್ಪರ ಕ್ಹುದಾ ತೆ ಭಂಬಿ ಪ್ರವಾದಿಯೊಮಾ ವರಿ ಜ಼ಲಮ ಆಯೆನಿಂಗತ ಕರ‍್ಯೊ. ತೆಳಾಮಾ ತ್ಯುನೆ ತ್ಯುನಾ ಪಗೊಪರ ಹುಬ್ರಯಾ. ತ್ಯುನೊನೆ ದೆಕಲ ಕ್ಹಾರಾ ಮನಕ್ಹೊ ಭೆಕ್ಹು ಭರಿ ಗಯಾ. 12 ಪಾಚಾ಼ತಾ "ಉಪ್ಪರ ಚ಼ಡಿನ ಆವೊ" ಕೈನ ಸ್ವರಗತಿ ಮ್ಹೊಟಿ ಆವಾಜ಼ ತೆ ಪ್ರವಾದಿಯೊನೆ ಐಕೊ ಆಯು. ತೆಳಾಮಾ ತೆ ಭಂಬಿ ಪ್ರವಾದಿಯೊ ಹಬಾಳನಾ ಕ್ಹಾತೆ ಸ್ವರ್ಗನೆ ಗಯಾ. ತ್ಯುನೆ ಜಾ಼ವಾನು ತ್ಯುನಾ ದುಶ್ಮನೊ ದೆಕತಾ ವ್ಹತ್ತಾ. 13 ತೆ ಟೈಮಮಾ ಮ್ಹೊಟು ಭುಕಂಪ ಥಯು. ತೆ ಗಾಮನು ದಕ್ಹಮಾನು ಯಕ್ಕ ಭಾಗ ಹಾಳ ಥಯು. ಭುಕಂಪಮಾ ಕ್ಹಾತ ಹಜಾ಼ರ ಮನಕ್ಹೊ ಹಾಳ ಥಯಾ. ನೈ ಮರಲ ಮನಕ್ಹೊ ಘನ್ನಾ ಭೆಕ್ಹು ಸ್ವರಗಮಾನಾ ಕ್ಹುದಾನೆ ಶ್ರೆರಷ್ಠನೆ ಮಹಿಮಾ ಕರ‍್ಯಾ.

14 ಬೆಂವಾ ಮ್ಹೊಟು ಮುಸಿಬತ್ತ ಖರ‍್ಯು. ತನ್ವಾ ಮ್ಹೊಟು ಭೆಗಿನ ಆವಸ.

15 ಕ್ಹಾತ್ವಾ ಕ್ಹುದಾನು ದುತ ತಿನಿ ತುತ್ತುರಿ ವಜಾ಼ಡ್ಯೊ. ತೆಳಾಮಾ ಸ್ವರ್ಗಮಾ ಮ್ಹೊಟಾ ಆವಾಜೊ಼ ಥಯಾ. ತೆ ಆವಾಜೊ಼ ಅಮ್ಮ್ ಕದ್ಯಾ; "ಎ ಲೊಕನು ರಾಜ್ಯ ಹಮ್ನಾ ಅಪ್ನಾ ಪ್ರಭುನಾ ವರಿ ತಿನೊಜ಼ ರ‍್ಹಯಲ ಕ್ರಿಸ್ತನಿ ರಾಜ್ಯ ಥೈಸ. ತೆ ಯುಗೊ ಯುಗೊಮಾಬಿ ಅದಿಕಾರ ಚ಼ಲಾವಾ ವಾಲೊ ವ್ಹೈ" 16 ಪಾಚಾ಼ತಾ ಇಖ್ಪರ ಚಾರ ಜ಼ನಾ ಶಾನಾ ಉಂದಾ ಗುಡ್ಗಾ ಘಾಲಿನ ಆರಾಧನಾ ಕರ‍್ಯಾ. ಕ್ಹುದಾನಿ ಸನ್ನಿಧಿಮಾ ತ್ಯುನಿ ಸಿಂಹಾಸನನಾ ಉಪ್ಪರ ಬೈಟಲ ಶಾನಾಜ಼ ತ್ಯುನೆ ವ್ಹೈ. 17 ತೆ ಶಾನಾ ಅಮ್ಮ್ ಕದ್ಯಾ;

"ಪ್ರಭು, ಸರವಶಕ್ಕತ ರ‍್ಹಯಲ ಕ್ಹುದಾ,

ಭುತಕಾಲಮಾ ರ‍್ಹಯಲವಾಲಾ, ವರತಮಾನ ಕಾಲಮಾ ರ‍್ಹವಾಲಾ, ತುನೆ ಕೃತಜ್ಞತಾಸ್ತುತಿ ಕರೆಸ.

ತು ತಾರಿ ಮ್ಹೊಟಿ ಅದಿಕಾರ ಉಪಯೊಗ ಕರಿನ ತಾರಿ ಆಡಳಿತ ಶುರು ಕರಲಕ್ಹು ತುನೆ ಕೃತಜ್ಞತಾಸ್ತುತಿ ಕರೆಸ.

18 ದುನಿಯಾನಾ ಮನಕ್ಹೊ ಶಿಟ್ಟ ಥಯಾತಾ.

ತೆನೈಸೊ ಎ ತಾರಾ ಶಿಟ್ಟನೊ ಟೈಮ ವ್ಹೈ.

ಮರಲವಾಲಾವೊನೆ ಫೈಸಲೊ ದಿವಾನೊ ಟೈಮ ಎಜ಼ ವ್ಹೈ.

ತಾರಾ ಸೆವಕೊ ರ‍್ಹಯಲ ಪ್ರವಾದಿಯೊನೆಬಿ

ತಾರಾ ಪರಿಶುದ್ಧ ಮನಕ್ಹೊನೆ ತುನೆ ಮರ್ಯಾದಿ ದಿವಾಲಾ ಮ್ಹೊಟಾವೊನೆಬಿ ನ್ಹಾನಾವೊನೆಬಿ ಪ್ರತಿಫಲ ದಿವಾನೊ ಟೈಮ ಆ ವ್ಹೈ.

ದುನಿಯಾ ಹಾಳ ಕರಾಲಾವೊನೆ ಹಾಳ ಕರಾನೊ ಟೈಮ ಆ ವ್ಹೈ"

19 ಪಾಚಾ಼ತು ಸ್ವರ್ಗಮಾ ರ‍್ಹಯಲ ಕ್ಹುದಾನಿ ಆಲಯ ಕ್ಹುಲ್ಯು. ಕ್ಹುದಾ ತಿನಾ ಮನಕ್ಹೊನೆ ದಿದಲ ವಡಂಬಡಿಕೆ ಮ್ಹೆಲಲ ಪೆಟ್ಟಗಿ ತಿನಾ ಆಲಯಮಾ ದಿಕ್ಹಿ. ತೆಳಾಮಾ ಬಿಜ್ಲಿಯೊ ಮಾರ‍್ಯೊ, ಆವಾಜೊ಼ ಥಯಾ, ಭುಕಂಪೊ ಥಯಾ ವರಿ ಘಾರಗಿಯೊನು ಪಾನಿ ಐಯು.