ಪ್ರಕಟನೆ 19

ಧೊಳಾ ಘೊಡಾಪರ ಬೈಟಲವಾಲೊ

11 ಪಾಚ಼ಲ್ತೊ ಸ್ವರ್ಗ ಖುಲ್ಲಾಥಾವಾನು ಮಿ ದೆಕ್ಯೊ. ಮಾರಾ ಕ್ಹಾಮೊ ಯಕ್ಕ ಧೊಳೊ ಘೊಡೊ ವ್ಹತ್ತೊ. ತೆ ಘೊಡಾಪರ ಬೈಟಲವಾಲಾನು ನಮ ಬರೊಕ್ಹಾವಾಲೊ ವರಿ ಕ್ಹರಿನೊ ವ್ಹೈ. ತಿನಾ ಫೈಸ್ಲಾಮಾ ವರಿ ಯುದ್ದಮಾ ಕ್ಹರಿಕ್ಹು ಫೈಸಲೊ ರ‍್ಹವಸ. 12 ತಿನಾ ಡೊಳಾ ಆಗ್ನಿ ಕಂಡಾನಿಂಗತ ವ್ಹತ್ತಾ. ತಿನಾ ಮಾತಾಪರ ಘನ್ನಾ ಕಿರಿಟೊ ವ್ಹತ್ತಾ. ತಿಪರ ಯಕ್ಕ ನಾಮ ಬರ್ದಲ ವ್ಹತ್ತು, ತೆನೈಸೊ ತೆ ನಾಮನೊ ಮತ್ಲಬ ತಿನೆ ಯಕ್ಕಜ಼ ವ್ಹರತಾಗಿ ಬಿಜಾ಼ ಕಿನೆಜ಼಼ ಗ್ವತ್ತ ನಹೊತು. 13 ತೆ ರಗತಮಾ ಭರಿಗಯಲ ಮ್ಹೊಟು ಅಂಗ್ಡು ಘಾಲ್ಲಿದ್ಯೊತೊ. ತಿನು ನಾಮ "ಕ್ಹುದಾನಿ ವಾಕ್ಯಾ ವ್ಹೈ" 14 ಸ್ವರ್ಗಮಾ ರ‍್ಹಯಲ ಸೈನಿಕೊ ಧೊಳಾ ಘೊಡಾವೊಪರ ಬೈಟಿನ ತಿನಾ ಪಾಚಾ಼ ಆವಡ್ಯಾತಾ. ತ್ಯುನೆ ಧೊಳಾ ವರಿ ನರಮ ರ‍್ಹಯಲ ವಣ್ಣಾ ಘಾಲ್ಲಿದ್ಯಾತಾ. 15 ಘೊಡಾಪರ ಬೈಟಲವಾಲಾನಾ ಮ್ಹೊಡಾಮಾ ಧಾರ ರ‍್ಹಯಲ ಯಕ್ಕ ತಲ್ವಾರ ಭಾರಿ ಆವಾಡಿತಿ. ತೆ ಲ್ಹೊಡಾನಿ ಬಾರ ಕ್ಹು ಜನಾಂಗೊನೆ ಆಳಸ. ತೆ ಕ್ಹಾರಾವೊತಿ ತಾಕತವರ ಥಯಲ ಕ್ಹುದಾನಿ ಶಿಟ್ಟ ದ್ರಾಕ್ಕಷಿಯೊನೆ ಚಿಕ್ಕಲಲ ನಿಂಗತ ಚಿಕ್ಕಲಿ ಪಾಡಸ. 16 ತಿನಾ ಮ್ಹಟಾ ಅಂಗ್ಡಾಪರ "ರಾಜಾ಼ವೊನೊ ರಾಜ಼ೊ ವರಿ ಪ್ರಭುವೊನೊ ಪ್ರಭು" ಕೈನ ಬರ್ದಲ ರ‍್ಹೈ.

17 ತೆ ಥಯಲ್ಪರ ಯಕ್ಕ ದೆವದುತ ಸುರ್ಯಾಪರ ಹುಬ್ರಯಲ ಮಿ ದೆಕ್ಯೊ. ತೆ ದೆವದುತ ಹಬಾಳಮಾ ಉಡಾನಿಯೊ ಪಕ್ಕಷಿಯೊನೆ ಅಮ್ಮ ಕವಾಡೊತೊ"ಕ್ಹುದಾ ಘಾಲಾನು ಮ್ಹೊಟು ಖೌನೆ ಮಳಿನ ಆವೊ. 18 ತುಮೆ ರಾಜಾ಼ವೊನು ವರಿ ಸಹಸ್ರಾದಿಪತಿಯೊನೆ ವರಿ ಪ್ರಸದ್ದಿ ಥಯಲ ಮನಕ್ಹೊನಾ ಖಾವಾನೆ ಮಳಿನ ಆವೊ. ಘೊಡಾವೊನೊ ಘೊಡವೊಪರ ಬೈಟಲವಾಲೊವೊನೆ ಸ್ವತಂತ್ರ ಥಯಲ, ಗುಲಾಮೊನೆ, ನ್ಹಾನವೊನೆ ಮ್ಹೊಟಾವೊನಾ ಅಂಗ ಖಾವಾನೆ ಆವೊ"

19 ಪಾಚ಼ಲ್ತೊ ಮಿ ದುನಿಯಾಮಾ ರ‍್ಹಯಲ ಮನಕ್ಹೊನೆ ವರಿ ಜಾನ್ವರೊನೆ ದೆಕ್ಯೊ. ತ್ಯುನೆ ಘೊಡಾಪರ ಬೈಟಲವಾಲಾನಾ ವರಿ ತಿನಾ ಸೈನಿಕೊಪರ ಯುದ್ದ ಕರಾನಾ ಹುತಿ ತ್ಯುನಾ ಸೈನಿಕೊನೆ ಮಳಾಯಾ. 20 ತೆನೈಸೊ ತೆ ಜಾನ್ವರನೆ ಸುಳ್ಳ ಪ್ರವಾದಿಯೊನೆ ಧರ‍್ಯಾ. ಎಜ಼ ಸುಳ್ಳ ಪ್ರವಾದಿ ಜಾನ್ವರನಾ ಹುತಿ ಅದ್ಭುತ ಕರಲವಾಲೊ. ಎ ಸುಳ್ಳ ಪ್ರವಾದಿ ಜಾನ್ವರನಿ ವಳಕ ಘಲೈಲಿದಲವಾಲೊ ವರಿ ತಿನಾ ಮೊರತಿಯೊನೆ ಆರಾಧನಾ ಕರಲ ಮನಕ್ಹೊನೆ ಮಳ್ಳ ಕರಾನಾಹುತಿ ಎ ಅದ್ಭುತ ಕರ‍್ಯೊ. ಎ ಸುಳ್ಳ ಪ್ರವಾದಿನೆ ಜಾನ್ವರನೆ, ಆಗನಿ ಇರಮಾ ಜಿವ್ತಾವೊನೆ ನಾಕಿಪಾಡ್ಯಾ. 21 ತ್ಯುನಿ ಸೈನ್ಯಾ ಘೊಡಡಪರ ಬೈಟಲವಾಲಾನಾ ಮ್ಹೊಡಾಮಾತಿ ಆಯಲ ತಲ್ವಾರಕ್ಹು ಖಲಾಸ ಥಯಾ. ತ್ಯುನಾ ಅಂಗೊನೆ ಪಕ್ಕಷಿಯೊ ಪೆಟ ಭರಿನ ಖೈ ಪಾಡಿಯೊ.