ಮಿಕ 4

ಇಸ್ರಾಯಲೊನೆ ಬಿಜಿಯೊ ವಾಗ್ದಾನ

1 ಲಾಸ್ಟನಾ ದಿನೊಮಾ ಯಹೊವಾನು

ಆಲಯನು ಪರ್ವತಬಿ ಕ್ಹಾರಾ ಪರ್ವತೊತಿ

ಅತ್ಯುನ್ನ ಥಯಲ ರ‍್ಹವಸ.

ತೆ ಡೊಂಗರೊತಿಬಿ ಉನ್ನತ ಥಯಲ ರ‍್ಹವಸ.

ತ್ಯಾ ಮನಕ್ಹೊ ಗುಂಪ ಗುಂಪ ಥೈನ ಜಾ಼ವಸ.

2 ಘನಾ ದೆಶೊತಾ ಮನಕ್ಹೊ ತ್ಯಾ ಜಾ಼ವಸ.

ಆವೊ, ಅಪೆ ಯಹೊವಾನಾ ಪರ್ವತನೆ ಗಯೆ,

ಯಾಕೊಬನಾ ಕ್ಹುದಾನಾ ಆಲಯನೆ ಅಪೆ ಗಯೆ.

ತೆಳಾಮಾ ಅಪೊನೆ ಜಿವ್ನಾನಿ ವಾಟನೆ ಸಿಕ್ಲಾವಸ.

ವರಿ ಅಪೆ ತಿನೆಜ಼ ಅನುಸರಸಿಯೆಸ ಕೈನ ಕವಸ. ಕ್ಹುದಾನಿ ಉಪದೆಶ , ತಿನಿ ವಾಕ್ಯಾ ಚಿಯೊನ ಡೊಂಗರಪ

ರ‍್ಹವಾನು ಯರುಸಲೆಮಾ ಶುರು ಥೈನ ಜಗತ್ಮಾ ಪೂರಾ ಫೈಲಸ.

3 ತೆಳಾಮಾ ಕ್ಹಾರಾ ಜನಾಂಗೊನೆ

ಯಹೊವಾಜ಼ ನ್ಯಾಯ ತಿರ್ಪ ಕರಾಲೊ ವ್ಹೈ .

ದೆಶ ವರಿಯಕ್ಕ ದೆಶ ವಿರುದ್ದ ಥೈನ ಯುದ್ದ ಕರ್ತಾ ನೈ

ಮನಕ್ಹೊನಾ ಲಡಯೊ ತೆಜ಼ ಹುಬ್ರಾಡಸ. ತೆ ಮನಕ್ಹೊ

ಯುದ್ದನಾ ಆಯೊದೊನೆ ಉಪಯೊಗ ಕರಾನು ಹುಬ್ರಾಡಸ. ತ್ಯುನಾ ತಲ್ವಾರೊಕ್ಹು ನೆಗಿಲ ಗುಳೊನೆ ತಯಾರ ಕರಸ.

ಬರ್ಜಿಕ್ಹು ದಾತಡು ತಯಾರ ಕರಸ. ಮನಕ್ಹೊಮಾ ಯುದ್ದ ಥಾವಾನು ಹುಬ್ರಾಡಸ. ಯುದ್ದನೆ ತರಬೆತಿ ಕೆಳಾಮಾಬಿ ಕರು ನೈ.

4 ಹರಯಕ್ಲೊ ತಿನಾ ದ್ರಾಕ್ಷಿನಾ ಮಳಾನಾ ಛೌಲಿಮಾ ಬೈಟಸ.

ತ್ಯುನೆ ಅಂಜುರನಾ ಝಾಢನಾ ಹೆಟಾ ವಿಶ್ರಾಂತಿಮಾ ರ‍್ಹವಸ.

ಕಾಕದ್ಯಾಮ ಸರ್ವಶಕ್ತ ಥಯಲ

ಯಹೊವಾ ಅಮ್ಮ ಥಾವಸ ಕೈನ ಕವಸ.

5 ಬಿಜಾ಼ ದೆಶವಾಲಾ ತ್ಯುನಾ ಕ್ಹುದಾವೊನಾ ನಾಮಪರ ಚಾ಼ಲಸ. ತೆನೈಸೊ ಹಮೆ ರ‍್ಹೈತಬಿ ಹಮರೊ ಕ್ಹುದಾ ಥಯಲ ಯಹೊವಾನಾ ನಾಮಪರ ಕೆಳಾಮಾಬಿ ಸ್ಹೆಂ ಕರುಸ.

6 ಯಹೊವಾ ಕವಾನು ಸುವೈ ಕದ್ಯಾಮ, ತೆ ದಿನೊಮಾ ಲಂಗ್ಡಾ ರ‍್ಹಯಲವಾಲಾವೊನೆ ಶಿಕ್ಷಾ ಲಿದಲ ಮನಕ್ಹೊನೆ ಯಕ್ಕಜ಼ ಜ಼ಗಾ ಮಳಾವಾನು ಟೈಮ ಆವಸ. ತೆನೈಸೊ ಮಿ ತಿನೆ ಮಕನ ಆವಾ ಲಗಾಡುಸ. 7 ತೆ ಲಂಗ್ಡಾ ನಗರನಾ ಮನಕ್ಹೊ ಅಳಿದ ಉಗ್ರಲ ಮನಕ್ಹೊ ಥಾವಸ. ತೆ ಗಾಮನಾ ಮನಕ್ಹೊನೆ ಜ಼ಬರದಸ್ತಿಕ್ಹು ನ್ಹಟಾಡಾಲಗಾಡ್ಯಾ.ತೆನೈಸೊ ಮಿ ತ್ಯುನೊನೆ ತಾಕತವರ ಥಯಲ ಜನಾಂಗ ನಿಂಗತ ಕರುಸ.ಯಹೊವಾ ತ್ಯುನೊ ರಾಜೊ಼ ಥಾವಸ. ತೆ ಚಿಯೊನ ಪರ್ವತನೆ ಕೆಳಾಮಾಬಿ ಆಳಸ. 8 ಹಿಂಡನು ಗುಂಬಜ಼ ತಾರೊ ಟೈಮ ಆವಸ. ಚಿಯೊನಾ ಒಫಲ್ ಡೊಂಗರ, ತುನೆ ಫರಿನ ಅದಿಕಾರ ಮಳಸ. ಹೊ, ಪೈಲಾ ನಿಂಗತ ಯರುಸಲೆಮಾ ರಾಜ್ಯ ರ‍್ಹವಸ.

ಚಿಯೊನನು ಹಮ್ನಾನು ತ್ರಾಸ ಅಗಲ್ಯು ಜಯ

9 ಕಾ ತು ಜೊ಼ರ ಅಡ್ಡಸಿ? ತು ತಾರಾ ಮಾಲಕನೆ ಜ಼ವೈ ಲಿದಿಸು? ತಾರೊ ರಾಜೊ಼ ತುನೆ ಛೊಡಿನ ಗಯೊಸು? ಆಂ ಕಾರಣಕ್ಹು ತು ಪ್ರಸವ ವೆದನೆನೆ ಅನುಭವಿಸಾನಿ ಬಾಕ್ಡಿ ನಿಂಗತ ಶ್ರಮಾ ಅನುಭವಿಸಾಡಿಸು? 10 ಚಿಯೊನಿ ರಾಣಿ, ಪ್ರಸವ ವೆದನೆಮಾ ರ‍್ಹವಾನು ಬಾಕ್ಡಿ ನಿಂಗತ ತು ದುಕ್ಕೆ ಅನುಭವಿಸು. ತು ಯರುಸಲೆಮಾ ಗಾಮನೆ ಛೊಡಿನ ಗೈನ ಕ್ಹೆತರಮಾ ರ‍್ಹಸಿಸು. ಮಿ ಕವಾನು ಸುವೈ ಕದ್ಯಾಮ, ತು ಬಾಬಿಲೊನೆ ಜಾ಼ಸಿ, ತೆನೈಸೊ ತ್ಯಾ ತು ವಚಾ಼ಡಿಲೆಸಿ. ಯಹೊವಾ ತ್ಯಾ ಐನ ತುನೆ ವಚಾ಼ಡಸ. ತಾರಾ ದುಶ್ಮನೊಕ್ಹು ತುನೆ ಛೊಡಾವಸ. 11 ಕೆಕ್ಲಾ ಜನಾಂಗೊ ತಾರಾ ವಿರುದ್ದ ಯುದ್ದನೆ ಆಯಾಸ. ತ್ಯಾ ದೆಕೊ ಚಿಯೊನ , ಆವೊ ಆಕ್ರಮಣ ಕರಿಯೆ ಕೈನ ಕದ್ಯಾ. 12 ತ್ಯುನೆ ತ್ಯುನು ವಿಚಾರ ಘಾಲಸ. ತೆನೈಸೊ ಯಹೊವಾನು ವಿಚಾರ ಸುವೈ ಕೈನ ತ್ಯುನೊನೆ ಗೊತ್ತ ಥಾತು ನೈ. ಯಹೊವಾ ತಿನಾ ಮನಕ್ಹೊನೆ ಯಕ್ಕ ಕ್ಹಾಸ ಉದ್ದೆಶನಾಹುತಿ ಯ್ಹಾಂ ಲಾಯೊಸ. ತೆ ಮನಕ್ಹೊ ಕಣನೆ ಘಾಲಲ ಗುಂಚ಼ಲಾ ನಿಂಗತ ನಜ್ಜು ಗುಜ್ಜ ಥಾವಸ.

13 ಚಿಯೊನಿ ರಾಣಿ ಉಟ ತೆ ಮನಕ್ಹೊನೆ ಪುಡಿ ಕರ! ಮಿ ತುನೆ ತಾಕತವರ ಕರುಸ. ಲ್ಹೊಡಾನಾ ಕ್ಹಂಬಾವೊ ನಿಂಗತ ತಾಂಬಾನಾ ಗೊರಸು ನಿಂಗತ ತುನೆ ಕರುಸ. ಕೆಕ್ಲಾ ಮನಕ್ಹೊನೆ ತು ತುಕ್ಡಾ ತುಕ್ಡಾ ಕರಸಿ. ತ್ಯುನಿ ಆಸ್ತಿ ತು ಯಹೊವಾನೆ ದೆಶಿ ತ್ಯುನು ನಿಕ್ಷೆಪೊನೆ ಕ್ಹಾರಿ ಜಿಮಿನನೆ ಮಾಲಕ ರ‍್ಹಯಲ ಯಹೊವಾನೆ ಚ಼ಡಾಸಿ