ಇಸ್ರಾಲವಾಲಾವೊನು ಮನಸಾಂತರ
1 ಯಹೊವಾ ಕವಾನು ಐಕೊ: ತಾರಿ ವ್ಯಾಜನೆ ಡೊಂಗರೊನೆ ತಿಳಸಾ. ಡೊಂಗರೊ ತಾರಾ ಗಳೊ ಐಕಾದೆ.
2 ಯಹೊವಾನೆ ತಿನಾ ಮನಕ್ಹೊನಾ ವಿರುದ್ದ ವ್ಯಾಜ ಛೆ. ಪರ್ವತೊ ಜಿಮಿನಾ ಅಸ್ತಿವಾರೊ ಯಹೊವಾನಾ ದುರೊನೆ ಐಕೊ. ಇಸ್ರಾಯಲೊನೆ ತಪ್ಪ ಕರಲವಾಲೊ ವ್ಹೈ ಕೈನ ತೆ ಧೃಡ ಕರಸ.
3 ಯಹೊವಾ ಕವಾನು ಸುವೈ ಕದ್ಯಾರೆ, ಮಾರಾ ಮನಕ್ಹೊ, ಮಿ ಕರಲ ಸುವೈ ತಿಳಸಾವೊ. ತುಮೊನೆ ವಿರುದ್ದ ಥೈನ ಮಿ ಸುತಬಿ ಕರ್ಯೊಸು? ತುಮೊನೆ ಜಿವ್ಸಾನೆ ಕಷ್ಟ ಸುತಬಿ ಕರ್ಯೊಸು? 4 ಮಿ ಕರಲ ಕ್ಹಾರು ತುಮೊನೆ ಕೌಸ, ಮಿ ತುಮೊಕನ ಮೊಶೆ, ಆರೊನ, ವರಿ ಮಿರ್ಯಾಮಳನೆ ವಳಾಯೊತೊ. ಮಿ ಐಗುಪ್ತ ದೆಶತೊ ತುಮೊನೆ ಬಲೈಲಾಯೊ. ಗುಮಾತನಾಕ್ಹು ತುಮೊನೆ ಛೊಡಾಯೊ. 5 ಮಾರಾ ಮನಕ್ಹೊ, ಮೊವಾಬ್ಯರನೊ ರಾಜೊ಼ ಥಯಲ ಬಚ್ಚಾನಾ ದುಷ್ಟ ವಿಚಾರೊನೆ ಸ್ಹೆಂ ಕರೊ. ಬೆಯೊರನೊ ದಿಕ್ರೊ ಥಯಲ ಬಿಳಾಮನನಾ ಬಚ್ಚಾನೆ ಸು ಕದ್ಯೊ ಕೈನ ಸ್ಹೆಂ ಕರಲಿವೊ. ಶಿಟ್ಟಿಮತಾ ಗಿಲ್ಗಾಲಿನಾ ಲಕ್ಕಾ ಚಾ಼ಲಲ ಕ್ಹಾರು ತುಮಾರಾ ಸ್ಹೆಂನೆ ಲಾವೊ. ತೆಕ್ಹಾರು ತುಮೆ ಸ್ಹೆಂ ಕರ್ಯಾರೆ ಯಹೊವಾ ನಿತಿವಂತವಾಲೊ ವ್ಹೈ ಕೈನ ತುಮೊನೆ ಗೊತ್ತ ಥಾವಸ.
6 ಮಿ ಕ್ಹುದಾ ಥಯಲ ಯಹೊವಾನೆ ಸಂದಿಸಾನೆ ಆತಾಮಾ ಸು ಲಿನ ಔ? ಪರಲೊಕನೊ ಕ್ಹುದಾನೆ ಮಿ ಅಡ್ಡ ಪಡಿನ ಸ್ತುತಿ ಕರ್ತಾಮಾ ಸು ಕರು? ಮಿ ಕರ್ತಾಕನ ಆತಾಮಾ ಸರ್ವಾಂಗ ಹೊಮನಾಕ್ಹಾತೆ ಯಕ್ಕ ವರಕ್ಹನು ಬೈಲನಾ ಬಚ್ಚಾನೆ ಲಿನ ಔಸು? 7 ಕ್ಹುದಾ ಥಯಲ ಯಹೊವಾ ಯಕ್ಕ ಹಜಾ಼ರ ಟಗರೊ ದಕ್ಹ ಹಜಾ಼ರ ಒಲಿವ ತೆಲನಾ ಝರು ಕ್ಹುಶಿ ಥಾವಸು? ಮಿ ಕರಲ ತಪ್ಪನಾ ಪರಿಹಾರನಾಹುತಿ ಮಾರಾ ಪೈಲಾರ ದಿಕ್ರಾನೆ ಚ಼ಡೌಸು? ಮಾರಾ ಅಂಗಕ್ಹು ಆಯಲ ದಿಕ್ರಾನೆ ಮಾರಾ ಪಾಪೊನಾಹುತಿ ಚ಼ಡೌಸು? 8 ಮನಕ್ಹ ಚೊ಼ಕುಜ಼ ವ್ಹೈ ಸುಕೈನ ಯಹೊವಾ ತುನೆ ಕದ್ಯೊಸ. ಯಹೊವಾ ತಾರಾಕ್ಹು ಆಪೆಕ್ಷೆ ಕರಾನು ಸುವೈ ಕದ್ಯಾಮ , ಬಿಜಾ಼ವೊನೆ ತು ಅನ್ಯಾಯ ಕರಿತಬಿ. ದಯಾ ವರಿ ನಂಬಿಕೆನೆ ಮಯಾ ಕರ. ದಿನತೆಕ್ಹು ತಾರಾ ಕ್ಹುದಾನೆ ವಿದೆಯ ಥಾ.
ಯೆರುಸೆಲಿಮನು ಮೊಸ ತಿನಾಹುತಿ ಥಾವನು ನಿರಾಶಾ
9 ಯಹೊವಾನಿ ಅವಾಜ಼ ಗಾಮಮಾ ಜೊ಼ರ ಐಕಾವಸ. ಗ್ಯಾನವಾಲೊ ಯಹೊವಾನಾ ಭುಚಕಿ಼ನ ನಾಮನೆ ಮರ್ಯಾದಿ ದಿವಸ. ತಿನಾಹುತಿ ಶಿಕ್ಷಾ ಬೆತ್ತಕನ ಧ್ಯಾನ ದೆ. ತೆ ಬೆತ್ತನೆ ಧರಲಿದಲವಾಲಾನೆ ಮರ್ಯಾದಿ ದೆ. 10 ಕಾಳ್ಳಿನ ಭಂಡಾರನೆ ದುಷ್ಟೊ ಗುಪ್ತ ಕರಸು? ಕೆಟ್ಟ ಮನಕ್ಹೊ ತ್ಯುನಾ ನ್ಹಾನಾ ಅಳತಿಕ್ಹ ಮನಕ್ಹೊ ಹಜಿ಼ ಮೊಸಕರಸು? ಹೊ, ತೆ ಕ್ಹಾರು ಚಾ಼ಲಾಡುಸ. 11 ದಕ್ಹಾಜ಼ನಾ ಮೊಸನು ಅಳತಿ ಪ್ರಮಾಣೊಕ್ಹು ಮನಕ್ಹೊ ಮೊಸ ಕರಸ. ಮಿ ತ್ಯುನೊನೆ ಮಾಫ ಕರುಸು? 12 ಗಾಮನಾ ಸೌಕಾರೊ ಕ್ರುರ ಥಯಲ ವರಿ ದುಷ್ಟತನಾನಾ ಗಾಮನಾ ರ‍್ಹವಾನಾ ಮನಕ್ಹೊ ಹಜಿ಼ ಸುಳ್ಳ ಕವಸ. ಹೊ, ತೆ ಮನಕ್ಹೊ ತ್ಯುನು ಸುಳ್ಳನೆ ಫೈಲಾವಸ. 13 ತಿನಾಹುತಿ ಮಿ ತುಮೊನೆ ಶಿಕ್ಷಾ ದಿವಾನು ಶುರು ಕರ್ಯೊ. ತುಮಾರಾ ಪಾಪೊನಾ ದೆಸೆಕ್ಹು ತುಮೊನೆ ನಾಶ ಕರುಸ. 14 ತುಮೆ ಕ್ಹಾವೊಸಿ. ತೆನೈಸೊ ತುಮಾರು ಪೆಟ ನೈ ಭರ್ತು. ತುಮಾರಾ ಭುಕ್ಕ ರ‍್ಹವಸಜ಼. ತುಮೆ ಮನಕ್ಹೊನೆ ಸುರಕ್ಷಿತ ಜ಼ಗಾನೆ ಲಾವಾನೆ ಕೊಶಿಶ ಕರೊಸಿ. ತೆನೈಸೊ ತುಮೆ ವಚಾ಼ಡಲ ಮನಕ್ಹೊನೆ ತಲ್ವಾರನಾ ಧಾರಕ್ಹು ಕಲಾಸ ಕರಿಪಡಸ. ಮನಕ್ಹೊ ತುಮೊನೆ ಧರಸ. 15 ತುಮೆ ಬಿಯೊ ಬಿತ್ತೊಸಿ. ತೆನೈಸೊ ಪೈರನೆ ಕಾಟತಾ ನೈ ಆಲಿವ ಹಣ್ಣೊನೆ ಗಾಣಾಮಾ ಘಾಲಿನ ತೆಲ ಕಾಡೊಸಿ. ತೆನೈಸೊ ತುಮೊನೆ ತೆಲ ಮಳತು ನೈ. ತುಮೆ ದ್ರಾಕ್ಷಿಯೊನೆ ಟೊಪ್ಲಿಮಾ ಘಾಲಿನ ಕ್ಹುಂದೊಸಿ, ತೆನೈಸೊ ಪಿವಾನೆ ದ್ರಾಕ್ಷಿನು ರಕ್ಹ ಮಳತು ನೈ. 16 ಕಾ ಕದ್ಯಾಮ ತುಮೆ ಒಮ್ರಿನ ರಾಜಾ಼ನಾ ಆಗನ್ಯಾನೆ ಪಾಲಸ್ಯಾಸ. ಅಹಾಬನಾ ಘರವಾಲಾ ಕರಾನಾ ಕೆಟ್ಟ ಕಾಮೊ ತುಮೆ ಕರಾಡಾಸ. ತುಮೆ ತ್ಯುನೆ ಭೊದನೆನೆ ಪಾಲ್ಸಾಡಾಸ. ತಿನಾಹುತಿ ತುಮೆ ನಾಶ ಥಾವಾವರಕ್ಹು ಕರುಸ. ಪಡಲ ತುಮಾರಾ ಒಣಿಯೊನೆ ದೆಕಲ ಮನಕ್ಹೊ ಆಶ್ಚರಕ್ಹು ಸಿಳ್ಳು ಘಾಲಸ. ತೆಳಾಮಾ ಬಿಜಾ ಜನಾಂಗವಾಲಾ ತುಮಾರಾ ಉಪ್ಪರ ಘಾಲಲ ಅವಮಾನನೆ ತುಮೆ ತಡ್ದಿ ಲಿವೊಸಿ.