1 ಮೊಶೆ ಯಹೊವಾನೊ ಸೆವಕ ವ್ಹತ್ತೊ. ನುನನೊ ದಿಕ್ರೊ ಥಯಲ ಯೆಹೊಶುವಾ ಮೊಶೆನೊ ಸಹಾಯಕ ವ್ಹತ್ತೊ. ಮೊಶೆ ಮರಲ್ಪರ ಯಹೊವಾ ಯೆಹೊಶುವಾನಾ ಕ್ಹಾತೆ ಬೊಲಿನ, 2 ಮಾರೊ ಸೆವಕ ಥಯಲ ಮೊಶೆ ಮರಿಗಯೊ. ಹಮ್ನಾ ತು ಉಟ ವರಿ ಎ ಮನಕ್ಹೊ ಯೊರ್ದನ ನದಿ ದಾಟಿನ ಜೌ. ಇಸ್ರಾಯೆಲನಾ ಮನಕ್ಹೊ ಥಯಲ ತುಮೊನೆ ಮಿ ದಿವಾನಾ ದೆಶೆ ತುಮೆ ಜೌ. 3 ಮಿ ತೆ ದೆಶನೆ ತುಮೊನೆ ದಿವ್ಸ ಕೈನ ಮೊಶೆನೆ ವಾಗ್ದಾನ ಕರ‍್ಯೊಸ. ತಿನಾಹುತಿ ತುಮೆ ಪಗೊ ಮ್ಹೆಲಾನಿ ಕ್ಹಾರಿ ಜ಼ಗಾ ತುಮೊನೆ ದಿವ್ಸ. 4 ರಾನ ವರಿ ಲೆಬನೊನ ಡೊಂಗರ ಎ ಕ್ಹಾರು ಮಳಿನ ಯುಫ್ರೆಟಿಸ ಮ್ಹೊಟ್ಟಿ ನದಿ ಲಕ್ಕಾ ಹಿತ್ತಿವಾಲಾವೊನಿ ಕ್ಹಾರಿ ಜ಼ಗಾ ತುಮಾರು ಥಾವಸ. ತುಮಾರಿ ಜ಼ಗಾ ಪಶ್ಚಿಮಾ ರ‍್ಹಯಲ ಎಡಿಟರೆನಿಯನ ಸಮುಂದರ ಲಕ್ಕಾ ಫೈಲಸ. 5 ಮಿ ಮೊಶೆನಾ ಕ್ಹಾತೆ ರ‍್ಹಯಲ ಲಿಂಗತ ತಾರಾ ಕ್ಹಾತೆಬಿ ರ‍್ಹೌಸ. ತಾರಿ ಜಿಂದಗಿ ಭರಿನ ಕುನ್ನಜ ತಾರಾ ಕ್ಹಾತೆ ಲಡೈ ನೈ ಕಾಡ್ತು. ಮಿ ತಾರೊ ಹತ್ತ ನೈ ಛೊಡತೊ; ಢಕಲಿ ಪಡ್ತೊ ನೈ" ಕೈನ ಕದ್ಯೊ. 6 ಯೆಹೊಶುವಾ, ತು ಘಟ್ಟ ಥೈನ ರ‍್ಹೌ; ಧೈರ್ಯವಂತ ಥೈನ ರ‍್ಹೌ; ಎ ಮನಕ್ಹೊ ತ್ಯುನು ದೆಶ ಪಡ್ದಿಲಿವಾನೆ ತು ತ್ಯುನೊನೆ ಅಗೊ ಥೈನ ಚಲೌ. ಮಿ ಇವ್ನೊನೆ ಎ ಜ಼ಗಾ ದಿವ್ಸ ಕೈನ ಇವ್ನಾ ಪುರ್ವಿಕರೊನೆ ಪ್ರಮಾಣ ಕರ‍್ಯೊಸ. 7 ತೆನೈಸೊ ತು ಬಿಜಿ ಯಕ್ಕ ವಿಶಯಮಾಬಿ ಘಟ್ಟ ಥೈನ ರ‍್ಹೌ; ಧೈರ್ಯವಂತ ಥೈನ ರ‍್ಹೌ. ಮಾರೊ ಸೆವಕ ಥೈನ ರ‍್ಹಯಲ ಮೊಶೆ ತುನೆ ದಿದಲ ಆಗನ್ಯಾವೊನೆ ತು ಕ್ಹರಿಜ಼ ಪಾಲಸು. ತಿನು ಕ್ಹಾರು ಧರ್ಮೊಪದೆಶ ನಕ್ಕರಬಿ ಬುಕ್ಯಾ ಬಗರ ಚಾಲಿಲಿನ ಗಯಲ ರ‍್ಹಯಮ ತು ಕರಾನಾ ಕ್ಹಾರಾ ಕಾಮೊಮಾ ತುನೆ ಕ್ಹರಿಬಿ ಜಯ ಮಳಸ. 8 ತೆ ಧರಮಶಾಸ್ತ್ರಮಾ ಬರ್ದಲ ವಿಶಯೊ ಕೆಳಾಮಾಬಿ ಶೆಂ ಮ್ಹೆಲ. ದಿನ್ನ ರಾತ ತೆ ಧರಮಶಾಸ್ತ್ರನೆ ಧ್ಯಾನ ಕರ. ತೆಳಾಮಾ ತಿಮಾ ಬರ್ದಲ ವಿಶಯೊನೆ ತು ಕ್ಹರಿಮಾಬಿ ವಿದೆಯ ಥೈನ ರ‍್ಹಶಿ. ತು ಇಮ್ಮ ಕರ್xಯೊಮ ತು ಕರಾನಾ ಹರಯಕ್ಕ ಕಾಮಮಾ ತು ಶಾಣ್ಯೊ ಥಾಶಿ ವರಿ ಜಯಶಾಲಿ ಥೈನ ರ‍್ಹಶಿ. 9 ಶೆಂ ಮ್ಹೆಲ, ತು ಘಟ್ಟ ಥೈನ ರ‍್ಹೌ ಕೈನಬಿ ಧೈರ್ಯವಾಲೊ ಥೈನ ರ‍್ಹೌ ಕೈನಬಿ ಮಿ ತುನೆ ಆಗನ್ಯಾ ದಿವ್ಸ. ತಿನಾಹುತಿ ಭುಚ್ಕು ನಕೊ, ಕಾಕದ್ಯಾಮ ತು ಗಯಲ ಕ್ಹಾರಿ ಜ಼ಗಾ ತಾರೊ ಕ್ಹುದಾ ಥಯಲ ಯಹೊವಾಜ ತಾರಾ ಕ್ಹಾತೆ ರ‍್ಹವಸ" ಕೈನ ಕದ್ಯೊ.

10 ತೆಳಾಮಾ ಯೆಹುಶುವಾ ಮನಕ್ಹೊನಾ ಅದಿಪತಿನೆ, 11 ತುಮೆ ಪಾಳೆಯನಾ ಕ್ಹಾರಿ ಬಗಲ ಗೈನ ಮನಕ್ಹೊನೆ ತಯ್ಯಾರ ಥೈನ ರ‍್ಹವಾನೆ ದಿಳ್ಸಾವೊ; ದಕ್ಹು ಅನ್ನ ತಯ್ಯಾರ ಕರಿಲಿವಾನೆ ಕವೊ. ಹಜ್ಜುನ ತನ್ನ ದಿನ್ನಮಾ ಅಪೆ ಆಂಯೊರ್ದನ ನದಿ ದಾಟಿನ ಗಯೆಸ. ಮಿ ಗೈನ ಯಹೊವಾ ಥಯಲ ಅಪ್ನೊ ಕ್ಹುದಾ ಅಪೊನೆ ದಿವಾನಾ ದೆಶನೆ ವಶ ಕರಿಲಿಯೆಸ ಕವೊ" ಕೈನ ಆಗನ್ಯಾ ದಿದ್ಯೊ. 12 ಪಾಚಲ್ತೊ ಯೆಹುಶುವಾ ರುಬೆನ್ಯವಾಲಾವೊನಾ, ಗಾದ್ಯಾವಾಲಾವೊನಾ ವರಿ ಮನಸ್ಸೆ ಖಾಂದಾನನಾ ಅರ್ದಾ ಮನಕ್ಹೊನಾ ಕ್ಹಾತೆ ಬೊಲಿಲಿನ ತ್ಯುನೊನೆ, 13 ಯಹೊವಾನೊ ಸೆವಕ ಥಯಲ ಮೊಶೆ ತುಮೊನೆ ಕದಲ ಶೆಂ ಕರಿಲಿವೊ. ತುಮಾರೊ ಕ್ಹುದಾ ಥಯಲ ಯಹೊವಾ ಅರಾಮ ಕರಾನಾ ಹುತಿ ಯಕ್ಕ ದೆಶ ತುಮೊನೆ ದಿವ್ಸ ಕೈನ ವಾಗ್ದಾನ ಕರ್xಯೊತೊ. 14 ಯಹೊವಾ ಯೆಳಕ್ಕಾ ಯೊರ್ದನ ನದಿನಾ ಪುರ್ವನಿ ಜ಼ಗಾ ತುಮೊನೆ ದಿದ್ಯೊಸ. ತುಮಾರಾ ಬಾಕಡಿಯೊ, ಬಚ್ಚಾ ವರಿ ತುಮಾರಾ ಜಾನ್ವಾರೊ ಜ಼ಗಾಮಾಜ ರ‍್ಹೆ ಸಕಸ. ತೆನೈಸೊ ತುಮಾರಾ ಸೈನಿಕೊ ತುಮಾರಾ ಭಾಯೊನಾ ಕ್ಹಾತೆ ಯೊರ್ದನ ನದಿ ದಾಟು. ತುಮೆ ಯುದ್ದನೆ ತಯ್ಯಾರ ಥೈನ ತುಮಾರಾ ಭಾಯೊನೆ ತುನು ದೆಶ ಪಡ್ದಿಲಿವಾಮಾ ಸಹಾಯ ಕರು. 15 ಯಹೊವಾ ತುಮಾರಾ ಅರಾಮನಾ ಹುತಿ ಯಕ್ಕ ಜ಼ಗಾ ದಿದ್ಯೊಸ. ಯಹೊವಾ ತುಮಾರಾ ಭಾಯೊನಾ ಹುತಿಬಿ ಯಕ್ಕ ಜ಼ಗಾ ದಿವಸ. ತೆನೈಸೊ ತುಮಾರೊ ಕ್ಹುದಾ ಥಯಲ ಯಹೊವಾ ತ್ಯುನೊನೆ ದಿವಾನಾ ದೆಶೆ ತ್ಯುನೆ ಪಡ್ದಿಲಿಯೆ ಲಕ್ಕಾ ತುಮೆ ತುಮಾರಾ ಭಾಯೊನೆ ಸಹಾಯ ಕರು. ಪಾಚಲ್ತಾ ತುಮೆ ಯೊರ್ದನ ನದಿನಾ ಪುರ್ವ ದಿಕ್ಕಮಾ ರ‍್ಹಯಲ ತುಮಾರಾ ದೆಶೆ ಜಾ ಸಕೊಶಿ. ಯಹೊವಾನೊ ಸೆವಕ ಥಯಲ ಮೊಶೆ ತುಮೊನೆ ದಿದಲ ದೆಶೆ ತೆಜ ವ್ಹೈ" ಕದ್ಯೊ. 16 ತೆಳಾಮಾ ತ್ಯುನೆ ಯೆಹುಶುವಾನೆ, ತು ಆಗನ್ಯಾ ದಿದಲ ಕ್ಹಾರು ಹಮೆ ಕರಿಯೆಸ; ತು ಹಮೊನೆ ವಳಾಯಲ ಕ್ಹಾರಿ ಜ಼ಗಾಯೆ ಗಯೆಸ. 17 ಹಮೆ ಮೊಶೆನಾ ಆಗನ್ಯಾ ಕ್ಹಾರಾ ಚಾಲಿಲಿನ ಗಯಾ. ತಿನಾ ನಿಂಗತ ತಾರಿ ಆಗನ್ಯಾವೊನೆಬಿ ಚಾಲಿಲಿನ ಗಯೆಸ.ತಾರೊ ಕ್ಹುದಾ ಥಯಲ ಯಹೊವಾ ಮೊಶೆನಾ ಕ್ಹಾತೆ ರ‍್ಹಯಲ ತಿಮ್ಮ ತಾರಾ ಕ್ಹಾತೆಬಿ ರ‍್ಹವಾದೆ. 18 ಕುನ್ನತಬಿ ತಾರಿ ಆಗನ್ಯಾವೊನೆ ಇನ್ಕಾರ್ಯಮ ತೆನೈಸೊ ಕುನ್ನತಿಬಿ ತುನೆ ವಿರೊದ ಕರ‍್ಯಾಮ ತಿನೆ ಕ್ಹಲಾಸ ಕರಿಯೆಸ. ತು ಕ್ಹಾಲಿ ಘಟ್ಟ ಥೈನ ರ‍್ಹೆ; ಧೈರ್ಯವಾಲೊ ಥೈನ ರ‍್ಹೆ" ಕೈನ ಕದ್ಯಾ.