1 ಮನಕ್ಹೊ ಕ್ಹಾರಾ ಯೊರ್ದನನಾ ದಾಟಿನ ಗಯಲ್ಪರ ಯಹೊವಾ ಯೆಹುಶುವಾನೆ 2 ಯೊರ್ದನನಾ ವಚ್ಮಾ ಯಾಜಕರೊ ಹುಬ್ರೆಲ ಜ಼ಗಾಕಂತಾ ಬಾರಾ ದಗ್ಡಾ ಉಚೈನ 3 ತೆ ದಗ್ಡಾವೊನೆ ತುಮಾರಾ ಕ್ಹಾತೆ ಆ ಜ಼ಗಾಕನ ಲೈನ ತುಮೆ ಆ ರಾತೆ ಉತ್ರಾನಿ ಜ಼ಗಾಕನ ಹುಬ್ರಾಡೊ ಕೈನ ಆಜ್ಞಾಕರು ಕೈನ ಕದ್ಯೊ. 4 ತೆಳಾಮಾ ಯೆಹುಶುವಾ ತೆ ಇಸ್ರಾಯಲಮಾತೊ ಕುಲತಾ ಯಕ್ಲಾ ನಿಂಗತ ಇನಿಲಿದಲ ಬಾರಾ ಜನಾ ಮನಕ್ಹೊನೆ ಬಲೈನ ತ್ಯುನೊನೆ 5 ತುಮೆ ತುಮಾರೊ ಕ್ಹುದಾ ಥಯಲ ಯಹೊವಾನಾ ಮಂಜುಷನಾ ಪೈಲಾಜ ಯೊರ್ದನನಾ ವಚ್ಮಾ ಗೈನ ಇಸ್ರಾಯೆಲ ಕುಲನಾ ನಂಬರನೆ ಕರೆಟ್ಟ ಥೌ ಕೈನ ಹರಯಕ್ಲೊ ಯಕ್ಕ ಯಕ್ಕ ದಗ್ಡೊ ಕ್ಹಾಂದಾಪರ ಉಚೈಲಿನ ಆವೊ. 6 ತೆ ತುಮಾರಾ ವಚ್ಮಾ ವಳಕ ಥಾವಸ ಅಗಲ್ಯಾ ಕಾಲಮಾ ತುಮಾರಾ ಬಚ್ಚಾ ತೆ ದಗ್ಡಾ ಸು ಸುಚಿತ ಕರಸ ತುಮೊನೆ ಪುಚ್ಚ್ತಾಮಾ ತುಮೆ ತ್ಯುನೊನೆ 7 ಯಹೊವಾನಾ ಒಡಂಬಡಿಕೆನಾ ಮಂಜುಷನಾ ಯೊರ್ದನ ದಾಟತಾಮಾ ತ್ಯುನಾ ಕ್ಹಾಮಾ ಯೊರ್ದನನು ಪಾನಿ ಹುಬ್ರೈಪಡ್ಯುತು ಕೈನ ಕವೊ.ಯೊರ್ದನನು ಪಾನಿ ಹುಬ್ರೈ ಪಡ್ಯುತು ಕೈನ ಆ ದಗ್ಡಾ ಇಸ್ರಾಯಲೊನೆ ಕೆಳಾಮಾಬಿ ಸಾಕ್ಷಿ ಥಾವಸ ಕದ್ಯೊ. 8 ಇಸ್ರಾಯಲೊ ಯೆಹೊಶುವಾ ಆಜ್ಞಾ ಕರಲ ನಿಂಗತ ಕರ‍್ಯಾ ಯಹೊವಾ ಯೆಹುಶುವಾನೆ ಕದಲ ನಿಂಗತ ತ್ಯುನೆ ಇಸ್ರಾಯಲನಾ ಕುಲ ನಂಬರನಾ ನಿಂಗತ ಯೊರ್ದನನಾ ವಚ್ಮಾತಾ ಬಾರಾ ದಗ್ಡಾವೊನೆ ಉಚೈನ ತ್ಯುನೆ ಉತ್ರಾನ ಜ಼ಗಾಕನ ಲೈನ ತ್ಯಾ ಹುಬ್ರಾಡ್ಯಾ. 9 ತೆ ನೈಸೊ ಯೆಹುಶುವಾ ಬಾರಾ ದಗ್ಡಾವೊನೆ ಲಿನ ಯೊರ್ದನನಾ ವಚ್ಮಾ ಒಡಂಬಡಿಕೆನಾ ಮಂಜುಷನೆ ಉಚಾಯಲ ಯಾಜಕೊ ಹುಬ್ರೈಯಲ ಜ಼ಗಾಕನ ಹುಬ್ರಾಡ್ಯಾ.ತೆ ಹಮ್ನಾತಾ ತ್ಯಾಜ ರ‍್ಹವಸ. 10 ಮೊಶೆ ಆಜ್ಞಾ ಕರಲ ನಿಂಗತ ಯೆಹುಶುವಾ ಮನಕ್ಹೊನೆ ತಿಳಸಲ ಯಹೊವಾನಾ ಅಪ್ಪಣೆ ಕ್ಹಾರಾ ತ್ಯುನೆ ಕರೆಲಕ್ಕಾ ಮಂಜುಷನೆ ಉಚೈಲಿದಲ ಯಾಜಕೊ ಯೊರ್ದನನಾ ವಚ್ಮಾ ಹುಬ್ರೈಯಾ.ಮನಕ್ಹೊ ಭೆಗಿನ ತಳು ದಾಟ್ಯಾ. 11 ಮನಕ್ಹೊ ಕ್ಹಾರಾ ತ್ಯಾ ಗಯಲ್ಪರ ಯಾಜಕೊ ಯಹೊವಾನಾ ಮಂಜುಷ ಕ್ಹರಿ ಥೈನ ದಾಟಿನ ಮನಕ್ಹೊನಾ ಕ್ಹಾಮಾ ಗಯಾ. 12 ರುಬೆನ್ಯರೊ ಗಾದ್ಯರೊ ಮನಸ ಕುಲನಾ ಅರ್ಧಾ ಮನಕ್ಹೊ ಮೊಶೆ ಆಜ್ಞಾ ಕರಲ ನಿಂಗತ ಯುದ್ಧ ಸಿದ್ಧ ಥೈನ ಇಸ್ರಾಯೆಲನಾ ಕ್ಹಾಮಾತಾ ಗೈನ ತಳು ದಾಟಿಪಡ್ಯಾ. 13 ತ್ಯುನೆ ಸುಮಾರ ಚಾಳಕ್ಹ ಹಜಾರ ಭಟ ಥೈನ ಯುದ್ಧ ಕರಾನಾಹುತಿ ಯಹೊವಾನಾ ಕ್ಹಾಮಾ ಯರಿಕೊನಾ ಬೈಲನೆ ಆಯಾ. 14 ತೆ ದಿನ್ನೆ ಯಹೊವಾ ಯೆಹುಶುವಾನೆ ಇಸ್ರಾಯೆಲನಾ ಕ್ಹಾರಾ ನಜರಮಾ ಘನ ಪಡಸಲಕ್ಹು ಮೊಶೆಮಾ ಕಿಮ್ಮ ತಿಮ್ಮಜ ಅನಾಮಾಬಿ ಇನಾ ಜಿವಕ್ಹು ದಿನಕ್ಹಾರೊ ಭಯ ಭಕ್ತಿವಾಲಾ ವ್ಹತ್ತಾ. 15 ಯಹೊವಾ ಯೆಹುಶುವಾನೆ ಆಜ್ಞಾ ಶಾಸನೊನೆ ಮಂಜುಷನೆ ಉಚಾಯಲ ಯಾಜಕೊನೆ 16 ಯೊರ್ದನತಾ ಉಪ್ಪರ ಆವಾನಾಹುತಿ ಕವಾನೆ 17 ತೆ ತೆ ಯಾಜಕೊನೆ ಉಪ್ಪರ ಆವಾನಾಹುತಿ ಕದ್ಯೊ. 18 ಯಹೊವಾನಾ ಒಡಂಬಡಿಕೆನಾ ಮಂಜುಷನೆ ಉಚಾಯೆಲ ಯಾಜಕೊ ಯೊರ್ದನತಾ ಉಪ್ಪರ ಐನ ಕ್ಹುಕ್ಹಿ ಜಿಮಿನ್ಪರ ತ್ಯುನಾ ಪಗೊ ಮ್ಹೆಲೆಲ್ಪರ ಪಾನಿ ಪೈಲಾತುಜ ಐನ ಯೊರ್ದನನು ತಳು ಭರಿನ ವ್ಹೈನ ಚಾಲ್ಯುತು. 19 ಮನಕ್ಹೊ ಯಕವಾ ಮ್ಹೈನಾನಾ ದಕ್ಹವಾ ದಿನಮಾ ಯೊರ್ದನ ದಾಟಿನ ಯೆರಿಕೊನಾ ಪೂರ್ವ ಪ್ರಾಂತ್ಯಮಾ ರ‍್ಹವಾನು ಗಿಲ್ಗಾಲ ಕವಾನಾ ಗಾಮಾ ಉತ್ರ್ಯಾ. 20 ಯೆಹುಶುವಾ ಯೊರ್ದನತೊ ಲಿನ ಆಯಲ ಬಾರಾ ದಗ್ಡಾವೊನೆ ಗಿಲ್ಗಾಲಮಾ ಹುಬ್ರಾಡಿನ ಇಸ್ರಾಯಲೊನೆ 21 ಅಗಲ್ಯಾ ಕಾಲಮಾ ತುಮಾರಾ ಬಚ್ಚಾ ಆ ದಗ್ಡಾವೊನೆ ಕಾ ಹುಬ್ರಾಡ್ಯಾಸ ಕದ್ಯಾಮ ತುಮೊನೆ ಪುಚ್ಯಾಮ ತುಮೆ ತ್ಯುನೊನೆ 22 ಇಸ್ರಾಯಲೊ ಕ್ಹುಕ್ಹಿ ಜಿಮಿನ ಥಯಲ ಆ ಯೊರ್ದನ ದಾಟಿನ ಆಯಲಕ್ಹು ಕೈನ ಕದ್ಯೊ. 23 ತುಮಾರೊ ಕ್ಹುದಾ ಥಯಲ ಯಹೊವಾ ಅಪ್ನಾ ಕ್ಹಾಮೊ ಲಾಲ ಸಮಂದರ ಬತ್ತಿನ ಅಪೊನೆ ದಾಟಲ ನಂಗತ ಹಮ್ನಾ ಅಪೊನಾ ಕ್ಹಾಮಾ ಆ ಯೊರ್ದನೆ ಬತ್ತಿನ ತುಮೊನೆ ದಟಾಡ್ಯೊಸ. 24 ಇನಾಹುತಿ ಭುಲೊಕನಾ ಕ್ಹಾರಾ ಯಹೊವಾನಾ ಹಸ್ತ ಪರಾಕ್ರಮ ವ್ಹೈಕೈನ ತಿಳ್ದಿಲಿವಸ ತುಮಾರಾ ಕ್ಹುದಾ ಥಯಲ ಯಹೊವಾನೆ ಕೆಳಾಮಾಬಿ ಬುಚ್ಕಾಲಾ ವ್ಹೈ ಕದ್ಯೊ.