1 ತೆ ದಿನಮಾ ಮನಕ್ಹೊ,ಫರಿನ ಗುಂಪ ಥೈನ ಕುಡಿನ ಆತಾಮಾ ತ್ಯುನೊನೆ ಖಾವಾನೆ ಸು ನೈಸೊ ಯೆಸು ತಿನಾ ಶಿಷ್ಯಾವೊನೆ ನಜಿ಼ಕ ಬಲೈನ ವರಿ ಕದ್ಯೊ. 2 ಆ ಮನಕ್ಹೊನೆ ದೆಕಿನ ಮರಗಾ ಐಸ. ಯುನೆ ಮಕನ ಐನ ತನ ದಿನ್ನ ಥಯಾಸ. ಇವ್ನೊನೆ ಖಾವಾನೆ ಸುಜ಼ ನತ್ತಿ. 3 ಇವ್ನೊನೆ ಭುಕ್ಕಕಾವೊನೆಜ಼ ಘರೆ ಮೊಕ್ಕಲಿಪಾಡ್ಯಾಮ ವಾಟಮಾ ಚಕ್ಕರ ಐನ ಪಡಿಜಾ಼ವಸ ಇವ್ನೊಮಾ ದಕ್ಹಾಜ಼಼ನಾ ದುರತಾ ಆಯಾಸತೊ.

4 ತಿನಾ ಶಿಷ್ಯಾ ಕದ್ಯಾ ಕುನ್ನಜ಼ ನೈಸೊ ಜ಼ಗಾಮಾ ರೊಕ್ಲಾ ಕಿಜ಼್ಗಾಂತಾ ಲೈನ ಯುನು ಪೆಟ ಭರಾಯ್ಯೆ? ಕದ್ಯಾ.

5 ಯೆಸು ತ್ಯುನೊನೆ ಪುಚ್ಯೊ ತುಮೊಕನ ಕೆಕ್ಲಾ ರೊಕ್ಲಾ ಛೆ ಕೈನ ತ್ಯುನೊನೆ ಪುಚ಼ಲಕ್ಹು ತಿವ್ನೆ

ಕ್ಹಾತ ಛೆ ಕದ್ಯಾ.

6 ತೆಳಾಮಾ ಯೆಸು ತೆ ಮನಕ್ಹೊನಾ ಗುಂಪನೆ ಜಿಮಿನ್ಪರ ಬೈಟೊ ಕೈನ ಅಪ್ಪಣೆ ದಿನ್ನ ತೆ ಕ್ಹಾತ ರೊಕ್ಲಾ ಲಿನ ಕ್ಹುದಾನೆ ಸ್ತೊತ್ರಾ ಕೈನ ರೊಕ್ಲಾ ಭಾಗಿನ ತಿನಾ ಶಿಷ್ಯಾಯೊನಾ ಹತ್ಮಾ ವಾಟಾಹುತಿ ದಿದ್ಯೊ. 7 ತ್ಯುನೆ ತೆ ಗುಂಪಮಾ ರ‍್ಹಯಲವಾಲಾವೊನಾ ವಾಟಿನ ದಿದ್ಯಾ. ಎನೈಸೊ ತಿವ್ನೊಮಾ ದಕ್ಹಿಯೊ ನ್ಹಾನಿಯೊ ಮಚ್ಲಿ಼ಯೊ ವ್ಹತ್ತಿಯೊ ಯೆಸು ಲಿನ ಕ್ಹುದಾನೆ ಸ್ತೊತ್ರಾ ಕೈನ ತ್ಯುನೊನೆ ವಾಟಾನೆ ದಿದ್ಯೊ. 8 ತ್ಯುನೆ ಪೆಟ ಭರೆಲಕ್ಕಾ ಖೈನ ಉಗ್ರಲ ತುಕಡಾ ರೊಕ್ಲಾ ಮಳಾತಾಮಾ ಕ್ಹಾತ ಟೊಪ್ಲಿಯೊ ಥಯ್ಯೊ. 9 ಖಾದಲವಾಲಾ ಕಮ ಜಾಸ್ತ ಚಾರ ಹಜಾ಼ರ ಮನಕ್ಹೊ ವ್ಹತ್ತಾ ಪಾಚ಼ಲ್ತೊ ಮನಕ್ಹೊನೆ ಮೊಕ್ಕಲಿಪಾಡ್ಯೊ. 10 ಯೆಸು ತ್ಯುನೊನೆ ಮೊಕ್ಕಲಿಪಾಡಲ್ಪರ ತೆಳಾಮಾಜ಼ ತಿನಾ ಶಿಷ್ಯಾವೊನೆ ಲಿನ ಹಡ್ಗೊ ಚ಼ಡಿನ. ದಲ್ಮುಥ ಗಾಮೆ ಗಯಾ..

11 ತೆಳಾಮಾ ಫರಿಸಾಯರೊ ಐನ ಯೆಸುನಾ ಕ್ಹಾತೆ ತಕ್ಕರಾರ ಕರತಾ. ತಿನೆ ಪರಿಕ್ಷಾ ಲಿವಾನಾಹುತಿ ವರಿ ಕ್ಹಾಪಡಾವಾಹುತಿ - ತು ಕ್ಹುದಾಕಂತೊ ಆಯಲ ರ‍್ಹಯೊಮ ಹಬಾಳಮಾ ಯಕ್ಕ ಅಗ್ದಿ ಮ್ಹೊಟು ಕಾಮ ಕರಿನ ದೆಕಾಡ ಕದ್ಯಾ. 12 ತಿಕನ ಪುಚ್ತಾಮಾ ಯೆಸು ತಿನಿ ಆತ್ಮಾಮಾ ದುಕ ಕರಲಿನ ಉಸುಲ ಛೊಡ್ಯೊ ಎ ಮನಕ್ಹೊ ಅಗ್ದಿ ಮ್ಹೊಟು ಕಾಮ ಕಾ ಹುಡುಕಾನು ಕಾ? ಮಿ ತುಮೊನೆ ಕ್ಹರಿಜ಼ ಕೌಸ, ಮನಕ್ಹೊನೆ ಅಗ್ದಿ ಮ್ಹೊಟು ಕಾಮ ಕರಿನ ಸಾಕ್ಷಿ ನೈ ದೆಕಾಡತೊ. 13 ಕೈನ ತೆ ತ್ಯುವ್ನೊನೆ ಛೊಡಿನ ಹಡಾಗಾಮಾ ಚ಼ಡಿನ ಬಿಜಿ಼ ದಂಡಿಯೆ ಗಯೊ.

14 ಶಿಷ್ಯಾ ಹಡಗಾಮಾ ಜಾ಼ತಾಮಾ ರೊಕ್ಲಾವೊನಿ ಭುತಿ ಭಾಂದಿಲಿವಾನು ಇಕ್ಹರ‍್ಯಾತಾ ಹಡಗಾಮಾ ತ್ಯುನೊನೆ ಯಕಜ಼ ರೊಕ್ಲೊ ವ್ಹತ್ತೊ ಬಿಜು಼ ಸುಜ಼ ನ್ಹೊತು. 15 ಯೆಸು ತ್ಯುನೊನೆ. ಫರಿಸಾಯರೊ ವರಿ ಹೆರೊದನಾ ಖಾಟೊ ಲೊಟನಾ ವಾಸ್ತರ ಹುಶಾರ. ದೆಕಿ ಲಿವೊ ಕೈನ ಖರಿಮಾಜ಼಼ ತ್ಯುನೊನೆ ಕತಾಮಾ ತ್ಯುನೆ

16 ಅಪ್ನೊಕನ ರೊಕ್ಲಾ ನತ್ತಿ ಕೈನ ತೆ ಇಮ್ಮ ಬೊಲ್ಯೊ ಕೈನ ಶಿಷ್ಯಾ ತಿವ್ನೊಮಾಜ಼ ಬೊಲ್ಲಿವಾಡ್ಯಾತಾ.

17 ಯೆಸು ತೆ ತಿಳದಿಲಿನ ರೊಕ್ಲಾ ನತ್ತಿ ಕೈನ ಬೊಲ್ಲಿವಾನು ಕಾ? ತುಮೆ ಹಜು಼ನ ತಿಳದಿಲಿದ್ಯಾನತ್ತಿಸು? ತಿಳವಳಕಿ ನತ್ತಿ ಐ ಸು? ತುಮಾರಾ ಮನಸ್ಮಾ ತಿಳದ್ಯಾ ನತ್ತಿಸು? 18 ಡೊಳಾ ರೈನ ಬಿ ದಿಕ್ಹ್ತು ನೈಸು? ಕಾನೊ ರೈನ ಬಿ ಐಕ್ತಾ ನೈಸು? ತುಮೊನೆ ಶೆ ನತ್ತಿಸು? 19 ಮಿ ಪಾಂಚ಼ ರೊಕ್ಲಾ ಭಾಗಿನ ಪಾಂಚ಼ ಹಜಾ಼ರ ಮನಕ್ಹೊನೆ ವಾಟಾನೆ ದಿದಲಮಾ ಉಗ್ರಲ ತುಕಡಾ ಕೆಕ್ಲಾ ಭರ‍್ಯಾ ಕೈನ ಪುಚ಼ತಾಮಾ ತ್ಯುನೆ

ಬಾರಾ ಟೊಪ್ಲಿಯೊ ಕದ್ಯಾ.

20 ವರಿ ಕ್ಹಾತ ರೊಕ್ಲಾ ಚಾರ ಹಜಾ಼ರ ಮನಕ್ಹೊನೆ ವಾಟಲಮಾ ಉಗ್ರಲ ಕೆಕ್ಕಲೆಯೊ ಟೊಪ್ಲಿಯೊ ಭರ‍್ಯಾ ಕೈನ ಪುಚ಼ತಾಮಾ

ತ್ಯುನೆ ಕ್ಹಾತ ಟೊಪ್ಲಿಯೊ ಕದ್ಯಾ.

21 ತೆಳಾಮಾ ಯೆಸು ತ್ಯುನೊನೆ- ತುಮೊನೆ ಹಜು಼ನ ತಿಳವಳಕಿ ಐ ನತ್ತಿಸು? ಕೈನ ಪುಚ್ಯೊ.

22 ವರಿ ತ್ಯುನೆ ಬೆತ್ಸಾಯಿ ಗಾಮೆ ಆಯಾ. ತ್ಯಾ ಮನಕ್ಹೊ ಯಕ್ಕ ಕುಡ್ಡಾನೆ ಯೆಸುಕನ ಬಲೈ ಲೈನ ಅನೆ ಮುಟ್ಟ ಕೈನ ತಿಕನ ಮಾಂಗಿಲಿದ್ಯಾ. 23 ಯೆಸು ತೆ ಕುಡ್ಡಾನೊ ಹತ್ತ ಧರಿನ ಗಾಮ್ನಾ ಭಾರೊ ನಿಂಗೈನ ತಿನಾ ಡೊಳಾಪರ ಥುಕ್ಕಕಿನ ತಿಪರ ಹತ್ತ ಮ್ಹೆಲಿನ-ತುನೆ ಸುಬಿ ದಿಕ್ಹಾಡ್ಯುಸು? ಕೈನ ತಿನೆ ಪುಚ್ಯೊ.

24 ತೆ ಮಾತು ಉಚೈನ ದೆಕಿನ ಮನೆ ಮನಕ್ಹೊ ದಿಕ್ಹಾಡ್ಯಾಸ; ತ್ಯುನೆ ಝಾಡೊ ನಿಂಗತ ದಿಕ್ಹ್ಯಾತಬಿ ಫರವಾಡ್ಯಾಸ ಕದ್ಯೊ.

25 ತೆಳಾಮಾ ಯೆಸು ತಿನಾ ಡೊಳಾಪರ ಫರಿನ ಹತ್ತ ಮ್ಹೆಲ್ತಾಮಾ ;ತೆ ಡೊಳಾ ಖೊಲಿನ ದೆಕ್ತಾಮಾ ತೆ ಅರಾಮ ಥಯೊತೊ. ಕ್ಹಾರು ಚೊ಼ಕಿ ತರಾ ದಿಕ್ಹಾಡ್ಯುತು 26 ತೆಳಾಮ ಯೆಸು ತಿನೆ ತು ಎ ಗಾಮ್ನಾ ಮ್ಹೈ ಜಾ಼ವುನಕೊ ಕೈನ ತೆ ತಿನಾ ಘರೆ ಮೊಕ್ಕಲಿಪಾಡ್ಯೊ.

27 ಯೆಸು ತಿನಾ ಶಿಷ್ಯಾ ಫಿಲಿಪ್ಪನ ಕೈಸರೆಯ ಕವಾನಾ ಗಾಮೆ ಮಳಲ ಗಾಮೊಯೆ ಚಾ಼ಲ್ಯಾತಾ ವಾಟಮಾ ಯೆಸು -ಮನಕ್ಹೊ ಮನೆ ಕುನ್ನ ವ್ಹೈ ಕೈನ ಕವಸ. ಕೈನ ಶಿಷ್ಯಾವೊನೆ ಪುಚ಼ತಾಮಾ. ತ್ಯುನೆ

28 ತುನೆ ದಕ್ಹಾಜ಼಼ನಾ ಬಾಪ್ತಿಸ್ಮ ದಿಲಾವಾಲೊ ಯೊಹಾನ ವ್ಹೈ ಕವಸ ; ದಕ್ಹಾಜ಼಼ನಾ ಎಲಿಯಾ ಕವಸ;ಹಜು಼ನ ದಕ್ಹಾಜ಼಼ನಾ ಪ್ರವಾದಿಮಾನೊ ಯಕ್ಲೊ ವ್ಹೈ ಕವಸ;

29 ಯೆಸು ತ್ಯುನೊನೆ ವರಿ ತುಮೆ ಮನೆ ಕುನ್ನ ವ್ಹೈ ಕವೊಸಿ? ಕೈನ ಪುಚ಼ತಾಮಾ ತಿಮಾನೊ

ಪೆತ್ರಾ ತು ಕ್ರಿಸ್ತ ವ್ಹೈ ಕದ್ಯೊ.

30 ತೆ ವಾತೆ ಯೆಸು ಮಾರಾ ಹುತಿ ಕಿನೆಜ಼಼ ಕೌ ನಕೊ ಕದ್ಯೊ.

31 ಎನೈಸೊ ಮನಕ್ಹನೊ ದಿಕ್ರೊ ಘನ್ನು ಕಷ್ಟ ಖೈನ ಮ್ಹೊಟಾ ಮನಕ್ಹೊನಾ ಹತೆ ಖಾಸ ಯಾಜಕನಾ ಹತೆ ಶಾಸ್ತ್ರಿಯೊನಾಹತೆ ಇನ್ಕಾರಿನ ಮಾರಾ ಲಗಾಡಿಪಾಡಸ. ಮರಿನ ತನ ದಿನ್ಪರ‍ ವಾಚಿ಼ನ ಆವಾನು ಛೆ ಕೈನ ಉಪದೆಶ ಕವಾನು ಶುರು ಕರ‍್ಯೊ. 32 ತೆ ತೆಳಾಮಾ ಯೆಸು ಎ ವಾತೊ ಝಾಕಿನ ಮ್ಹೆಲ್ಯಾ ವಾಚಿ಼ ಕದ್ಯೊ. ತೆಳಾಮಾ ಪೆತ್ರಾ ತಿನೊ ಹತ್ತ ಧರಿನ ತಿನೆ ಗದರಸಾನೆ ಚ಼ಾಲು ಕರ‍್ಯೊ.

33 ತೆಳಾಮಾ ಯೆಸು ಶಿಷ್ಯಾವೊನೆ ಪಾಚೊ಼ ಫರಿನ ದೆಕಿನ ಪೆತ್ರಾನೆ ಸೈತಾನ. ಮಾರಾ ಕ್ಹಾಮೊ ಹುಬ್ರೌ ನಕೊ. ಜಾ಼. ತಾರಿ ವಿಚಾರ ವ್ಹೈ ಕ್ಹುದಾಕಂತು ಆಯಲ ವಿಚಾರ ನ್ಹವೈ ಕೈನ ಗದರಶೊ.

34 ತೆ ಥಯಲ್ಪರ ತಿನಾ ಶಿಷ್ಯಾವೊನಾವರಿ ಮನಕ್ಹೊನಾ ಗುಂಪನೆ ಬಲೈನ ತ್ಯುನೊನೆ ಸುಕದ್ಯೊ ಕದ್ಯಾಮ ಕಿನೆಬಿ ರ‍್ಹವಾದೆ ಮಾರಾ ಪಾಚಾ಼ ಆವಾನು ಮನಸ ರ‍್ಹಯುಮ ತಿನೆ ತೆ ಇಕ್ಹರಿನ ತಿನಿ ಶಿಲುವಿ ಉಚೈಲಿನ ಮಾರಾ ಪಾಚೊ಼ ಆವಾದೆ. 35 ಕಯೊಬಿ ತಿನೊ ಜ಼ಲಮ ತೆ ವಚಾ಼ಡಿಲಿವಾನೆ ಕರತೊ ರ‍್ಹಯೊಮ. ತಿನೊ ಜ಼ಲಮ ತೆ ಜ಼ವೈ ಲಿವಸ. ನೈತೊ ತಿನೊ ಜ಼ಲಮ ಮಾರಾಹುತಿ ಸುವಾರ್ತೆನಾ ಹುತಿ ಜ಼ವಾಲಿದ್ಯೊಮ ತಿನೊ ಜ಼ಲಮ ತೆ ವಚಾ಼ಡಿಲಿವಸ. 36 ಯಕ್ಕ ಮನಕ್ಹ ದುನಿಯಾಮಾ ಸುಬಿ ಗಳಶ್ಯೊಮ ತಿನೊ ಜ಼ಲಮ ಗೈ ಪಾಡ್ಯೊಮ ತಿನೆ ಸು ಫೈದೊ ಕದ್ಯಾಮ ಕ್ಹುದಾನಾ ಕ್ಹಾತೆ ರ‍್ಹವಾನೊ ಹಮೆಶಾನೊ ಜ಼ಲಮ ಜ಼ವೈಲಿದ್ಯೊಮ ತಿನೆ ಸು ಫೈದೊ ವ್ಹೈ? ಸುಜ಼ ನ್ಹವೈ 37 ಯಕ್ಲೊ ತಿನಾ ಜ಼ಲಮನೆ ಸು ಮುಕ್ಕಿಲಿವಾನು ಛೆ. 38 ಕ್ಹುದಾನೊ ಭೆ ನೈಸೊವಾಲಾ ಎ ಪಾಪಿ ದಿನೊಮಾ ಮಾರಾ ಹುತಿ ಮಾರಿಯೊ ವಾತೊಕ್ಹು ಕುನ್ನ ಸರಮಸ ತಿನೆ ಮನಕ್ಹನೊ ದಿಕ್ರೊ ತೆ ತಿನಾ ಬಾಪ್ನಿ ಮಹಿಮಾನಾ ಕ್ಹಾತೆ ಪರಿಶುದ್ಧ ದುತೊನಾ ಕ್ಹಾತೆ ಆತಾಮಾ ತಿನಾ ಹುತಿ. ತೆ ಸರಮಸ ಕದ್ಯೊ.