ಎಸ್ತರ 5

ಎಸ್ತರಳ ಹಮಾನನೆ ವರಿ ರಾಜಾ಼ನೆ ಖಾವಾನೆ ಬಲಾಯಲ

1 ತನ್ವಾ ದಿನ್ನಮಾ ಎಸ್ತೆರ ರಾಜ಼ವಣ್ಣಾ ಘಾಲ್ಲಿನ ಮಹೆಲನಾ ಮ್ಹೈ ಗೈನ, ರಾಜ಼ಮಂದಿರ ಕ್ಹಾಮಿ ಹುಬ್ರೈ. ರಾಜೊ಼ ತೆ ಮಂದಿರಮಾ ರಾಜ಼ಸಿಂಹಾಸನನಾ ಉಪ್ಪರ ಬಾಕಲನಾ ಕ್ಹಾಮೊ ಬೈಟ್ಯೊತೊ. 2 ತಿನಾ ಪ್ರಕಾರಮಾ ಹುಬ್ರಯಲ ಎಸ್ತೆರ ರಾಣಿನೆ ದೆಕಲ ಬರೊಬ್ಬರ ತಿನಾ ಉಪ್ಪರ ಮರ್ಗಿನ ತಿನಾ ಹತ್ಮಾ ರ‍್ಹಯಲ ಸುವರ್ಣ ಲಾಕ್ಡು ತಿಕನ ಚಾಚ್ಯೊ. ಎಸ್ತೆರ ರಾಜಾ಼ನಾ ನಜಿ಼ಕ ಗೈನ ಲಾಕ್ಡಿನಿ ತುದಿ ಮುಟ್ಟಿ. 3 ತೆಳಾಮಾ ರಾಜೊ಼ ತಿನೆ, "ಎಸ್ತೆರ ರಾಣಿ, ತುನೆ ಸು ಚಾ಼ಯೆ "ತು ಸು ಮಾಂಗಿಲಿವಾನು ಸು ವ್ಹೈ? ಮಾರಿ ಅರ್ಧಿ ರಾಜ್ಯ ಮಾಂಗಿತಬಿ ತುನೆ ದ್ಯುಸ" ಕದ್ಯೊ". 4 ತೆನಾಹುತಿ ಎಸ್ತೆರ, "ರಾಜ಼ ಮನಸ ಕರ‍್ಯೊಮ ಮಿ ಹಮ್ನಾ ತುಮಾರಾಹುತಿ ತಯ್ಯಾರ ಕರಾಯಲ ಔತಣನೆ ಹಾಮಾನನಾ ಕ್ಹಾತೆ ಆವಾದೆ" ಕೈನ ಕದಿ. 5 ತೆಳಾಮಾಜ಼ ರಾಜೊ಼, "ಎಸ್ತೆರ ಮಾಂಗಿಲಿದ್ಯಲ ಪುರಾ ಕರಾನೆ ಹಮಾನನೆ ಬಲೈಲಿನ ಆವೊ" ಕೈನ ಅಪ್ಪಣೆ ಕರಿನ ಎಸ್ತೆರ ಕರಾಯಲ ಔತಣನೆ ಹಾಮಾನನಾ ಕ್ಹಾತೆ ಗಯೊ. 6 ದ್ರಾಕ್ಷಿಯೊನು ರಕ್ಹ ಪಿತಾಮಾ ರಾಜೊ಼ ಫರಿನ ಎಸ್ತೆರನೆ, "ತು ಮಾಂಗಿಲಿವಾನು ಸು ವ್ಹೈ ಕೆ; ತೆ ಪುರಾ ಕರುಸ. ತು ಮಾರಿ ಅರ್ಧಿ ರಾಜ್ಯ ಮಾಂಗಿಲಿದಿತಬಿ ತೆ ತುನೆ ದ್ಯುಸ" ಕದ್ಯೊ. 7 ತಿನಾಹುತಿ ಎಸ್ತೆರ, "ರಾಜೊ಼ ಮಾರಾ ಉಪ್ಪರ ಮರ್ಗಿನ ಮಿ ಮಾಂಗಿಲಿವಾನು ದಿವಾನೆಬಿ ಮಿ ಮಾಂಗಿಲಿದಲ ಪುರಾ ಕರಾನೆಹುತಿ ಮನಸ್ಸ ರ‍್ಹಯಲ ರ‍್ಹಯಮ 8 ಮಿ ತುಮಾರಾಹುತಿ ತಯ್ಯಾರ ಕರಾವಾನು ಔತಣನೆ ವಂತಾಬಿ ಹಾಮಾನನಾ ಕ್ಹಾತೆ ಆವಾದೆ;

ಹಾಮಾನ ಮೊರ್ದೈಕೈನೆ ಮಾರಾನೆ ಮಸ್ಲತ ಕರಲ

9 ತೆ ದಿನ್ನ ಹಾಮಾನ ಕ್ಹುಷಿಮಾ ಘರೆ ಜಾ಼ತಾಮಾ ಮೊರ್ದೆಕೈ ತಿನೆ ಭುಚ಼ಕ್ಯಾವಾಚಿ, ತಿನಾ ಕ್ಹಾಮೊ ಉಟ್ಯಾ ಬಗರ ರಾಜ಼ ಮಹೆಲನಾ ಮ್ಹೈನಾ ಬಾಕಲಕನ ಬೈಟಲ ದೆಕಿನ ತಿಪರ ಘನ್ನೊ ಶಿಟ್ಟ ಥಯೊ. 10 ತಿಮ್ಮ ರ‍್ಹೈತಬಿ ತಿನಿ ಶಿಟ್ಟನೆ ಘಟ್ಟ ಧರಿಲಿನ ಘರೆ ಗೈನ ತಿನಾ ಕ್ಹಾರ ದೊಸ್ತೊನೆ ವರಿ ತಿನಿ ಬೈಕೊ ಥಯಲ ಜೆರೆಷನೆ ಬಲಾಯೊ. 11 ತ್ಯುನಾ ಕ್ಹಾಮೊ ತಿನಿ ಕ್ಹಾರಿ ಆಸ್ತಿನೆ, ಬಚ್ಚಾ಼ ರ‍್ಹಯಲ, ರಾಜೊ಼ ತಿನೆ ಸನ್ಮಾನ ಕರಿನ ಕ್ಹಾರಾ ಸರದಾರೊತಿ, ರಾಜನಾ ಸೆವಕೊತಿಬಿ ತಿನೆ ಕ್ಹಾಸ ಸ್ಥಾನ ದಿದ್ಯಲ ಕತೊ, 12 "ಎನೈಸೊ ಎಸ್ತೆರ ರಾಣಿ ತೆ ತಯ್ಯಾರ ಕರಾಯಲ ಔತಣನೆ ರಾಜಾ಼ನಾ ಕ್ಹಾತೆ ಮನೆ ಛೊಡಿನ ಬಿಜಾ಼ ಕಿನೆಜ಼ ಬಲೈನೈ. ವಂತಾಬಿ ರಾಜಾ಼ನಾ ಕ್ಹಾತೆ ಔ ಕೈನ ಮನೆ ಕದಿಸ. 13 ತೆನೈಸೊ ಮೊರ್ದೆಕೈ ಕವಾನಾ ಯೆಹುದ್ಯವಾಲೊ ರಾಜ಼ ಮಹೆಲನಾ ಬಾಕಲಕನ ಮಾರಾ ಡೊಳಾ ಕ್ಹಾಮೊ ಬೈಟಲ ಲಕ್ಕಾ ಎ ಕ್ಹಾರಾವೊಕ್ಹು ಮನೆ ಸಮಾಧಾನ ನೈ ಥಾತು" ಕದ್ಯೊ. 14 ತಿನಾಹುತಿ ತಿನಿ ಬೈಕೊ ಥಯಲ ಜೆರೆಷ ತಿನಾ ಕ್ಹಾರಾ ಕ್ಹಾಸ ರ‍್ಹಯಲವಾಲಾ, "ಐವತ್ತ ಮೊಳಾ ಉಚ್ಚು಼ ಯಕ್ಕ ಖಂಬೊ ತಯ್ಯಾರ ಕರೈನ ವಂತಾ ರಾಜಾ಼ನಾ ಅಪ್ಪಣೆ ಲಿನ ಮೊರ್ದೆಕೈನೆ ತಿಪರ ಘಲೌ; ಪಾಚ಼ಲ್ತೊ ತು ಕ್ಹುಷಿಕ್ಹು ರಾಜಾ಼ನಾ ಕ್ಹಾತೆ ಔತಣನೆ ಜಾ಼ ಸಕಶಿ" ಕೈನ ಕದ್ಯಾ. ಹಾಮಾನ ಎ ವಾತೆ ಮೆಚ್ಚಿನ ಖಂಬೊ ತಯ್ಯಾರ ಕರಾಯೊ.