ಎಸ್ತರ 3

ಯಹುದಿಯೊನಾ ವಿರುದ್ಧ ಹಾಮಾನನಿ ಪಿಂಗಿ

1 ಎ ಥಯಲ್ಪರ ರಾಜೊ಼ ಥಯಲ ಅಹಷ್ಟರೊಷ ಅಗಾಗನಾ ಖಾಂದಾನವಾಲೊ ಹಮ್ಮೆದಾತನೊ ದಿಕ್ರೊ ಥಯಲ ಹಾಮಾನನೆ ಪದವಿ ಹೆಚ್ಕಿ ಕರಿನ, ತಿನೆ ಮ್ಹೊಟಿ ಅದಿಕಾರ ದಿನ, ತಿನಾ ಆಸ್ಥಾನನಾ ಕ್ಹಾರಾ ಸರದಾರೊಮಾ ತಿನೆ ಪಸ್ಟ ಸ್ಥಾನ ದಿದ್ಯೊ. 2 ರಾಜಾ಼ನಾ ಮಹೆಲಮಾ ರ‍್ಹಯಲ ಕ್ಹಾರಾ ಸೆವಕೊ ಹಾಮಾನನೆ ಉಂದಾ ಗುಡ್ಗಾ ಘಾಲ್ಲಿನ ನಮಸ್ಕಾರ ಕರಾಡಾತಾ; ತೆನೈಸೊ ಮೊರ್ದೆಕೈ ತಿನೆ ಉಂದಾ ಗುಡ್ಗಾ ಘಾಲ್ಲಿನ ನಮಸ್ಕಾರ ಕರ‍್ತೊ ನ್ಹೊತೊ. 3 ಮಹೆಲನಾ ಬಾಕಲ ಕೈದಾಲಾ ಮೊರ್ದೆಕೈನೆ, "ತು ರಾಜಾ಼ನಿ ಆಗನ್ಯಾ ಕಾ ದಾಟಶಿ?" 4 ಕೈನ ದಿನ್ನೆ ತಿನೆ ಹುಶಾರ ಕರ‍್ತಾತಾ. ಮೊರ್ದೆಕೈ ತೆ ಯೆಹುದ್ಯ ವ್ಹೈ ಕವಾನಿ ಹೆಮ್ಮೆ ವರಿ ಮನಕ್ಹನೆ ಉಂದಾ ಗುಡ್ಗಾ ಘಾಲ್ಲಿನ ನಮಸ್ಕಾರ ನೈ ಕರ‍್ತೊ ಕವಾನಿ ತಿನಿ ಹಟಾ ಚಾ಼ಲಸ ಸು ದೆಕೆ ಕೈನ ತ್ಯುನೆ ಹಾಮಾನನೆ ತಿಳ್ಸಾಯಾ.

ಯೆಹುದ್ಯೊನೆ ಖಲಾಸ ಕರು ಕೈನ ರಾಜಾ಼ನಿ ಆಗನ್ಯಾ

5 ಮೊರ್ದೆಕೈ ತಿನೆ ಡೊಗ್ಗಿನ ನಮಸ್ಕಾರ ನತ್ತಿ ಕರಾಡೊ ಕವಾನು ತಿಳ್ದಿಲಿದಲ ಹಾಮಾನ ಘನ್ನೊ ಶಿಟ್ಟ ಥಯೊ. 6 ತೆ ಮೊರ್ದೆಕೈನಾ ಯಕ್ಲಾನಾ ಉಪ್ಪರ ಹತ್ತ ಉಚಾಯಮ ಚಾ಼ಲ್ತು ನೈ ಕೈನ, ಎ ಯೆಹುದ್ಯನೊ ವ್ಹೈ ಕೈನ ಐಕಲ್ಪರ ಅಹಷ್ಟೆರೊಷನಾ ರಾಜ್ಯಮಾ ರ‍್ಹಯಲ ಮೊರ್ದೆಕೈನಾ ಕಳಬಳವಾಲಾವೊನೆ ಕದ್ಯಾಮ ಕ್ಹಾರಾ ಯೆಹುದ್ಯವಾಲಾವೊನೆ ಖಲಾಸ ಕರು ಕೈನ ಫೈಸಲೊ ಕರಿಲಿದ್ಯೊ. 7 ರಾಜೊ಼ ಥಯಲ ಅಹಷ್ಟೆರೊಷನಿ ಆಳ್ವಿಕೆನಾ ಬಾರಾವಾ ಮ್ಹೈನೊ ಥಯಲ ಚೈತ್ರಮಾಸಮಾ ಹಾಮಾನನಾ ಕ್ಹಾಮು ಚೊ಼ಕು ಮಾಸ ವರಿ ಚೊ಼ಕು ದಿನ್ನಬಿ ಕಯು ವ್ಹೈ ಕೈನ ತಿಳ್ದಿಲಿವಾನಾ ಹುತಿ "ಪುರ್" ಕದ್ಯಾಮ ಚಿಟಿ ಘಾಲ್ಯಾ. ಚಿಟಿ ಬಾರಾವಾ ಮ್ಹೈನೊ ಥಯಲ ಫಾಲ್ಗುಣಮಾಸನಾ ತೆರಾವಾ ದಿನ್ನೆ ಪಡಿ. 8 ಹಾಮಾನ ರಾಜೊ಼ ಥಯಲ ಅಹಷ್ಟೆರೊಷನೆ, "ತಾರಾ ರಾಜ್ಯನಾ ಕ್ಹಾರಾ ಸಂಸ್ಥಾನನೊಮಾ ಯಕ್ಕ ಜನಾಂಗ ಛೆ; ತೆ ಬಿಜಾ಼ ಜನಾಂಗವಾಲಾವೊನಾ ವಚ್ಮಾ ಫೈಲ್ಯುತಬಿ ಕ್ಹಾರಾವೊತಿ ಬಿಜು಼ಜ಼ ಥೈನ ರ‍್ಹವಸ. ತೆ ಜನಾಂಗೊನಾ ನಿಯಮೊ ಬಿಜಾ಼ ಕ್ಹಾರಾ ಜನಾಂಗೊನಾ ನಿಯಮೊತಿಬಿ ಬಿಜಾ಼ ರ‍್ಹವಸ. ರಾಜಾ಼ನಾ ನಿಯಮೊನೆತೊ ತ್ಯುನೆ ಚಾ಼ಲ್ತಾಜ಼ ನೈ, ರಾಜೊ಼ ತ್ಯುನೊನೆ ಗಪ್ಪಜ಼ ಛೊಡಾನು ಚೊ಼ಕು ನ್ಹವೈ. 9 ರಾಜಾ಼ನಿ ಮರ್ಜಿ ರ‍್ಹೈಮ ತ್ಯುನೊನೆ ಖಲಾಸ ಕರು ಕವಾನಿ ಆಗನ್ಯಾ ಥಾವಾದೆ; ತಿಮ್ಮ ಕರ‍್ಯೊಮ ಮಿ ರಾಜಭಂಡಾರನಾಹುತಿ ದಕ್ಹ ಹಜಾ಼ರ ತಲಾಂತು ( 10 ಹಜಾ಼ರ ರುಪ್ಪಾನಾ ಬಿಲ್ಲಾ ವ್ಯಾಪಾರ ಕರಾಲಾವೊನಾ ಹತ್ಮಾ ದ್ಯುಸ" ಕೈನ ಕದ್ಯೊ. 10 ತೆಳಾಮಾ ರಾಜೊ಼ ತಿನಾ ಹತ್ಮಾ ರ‍್ಹಯಲ ಶಿಕ್ಕೊ ರ‍್ಹಯಲ ಇಟ್ಟಿ ಕಾಡಿನ ಅಗಾಗನಾ ಖಾಂದಾನವಾಲಾ ಹಮ್ಮೆದಾತನೊ ದಿಕ್ರೊ ಯೆಹುದ್ಯವಾಲಾವೊನೆ ದ್ವೆಶ ಕರಾಲೊ ಥಯಲ ಹಾಮಾನನೆ ಒಪ್ಸಿನ ದಿದ್ಯೊ. 11 ರಾಜೊ಼ ಹಾಮಾನನೆ ದಿನ, "ತೆ ರುಪ್ಪು ತುಕನಜ಼ ರ‍್ಹವಾದೆ; ತು ತೆ ಮನಕ್ಹೊನೆ ಸು ಚಾ಼ಯೆ ತೆ ಕರಸಕಶಿ" ಕೈನ ಕದ್ಯೊ. 12 ಪಸ್ಟಲ್ಯಾ ಮ್ಹೈನಾನಾ ತೆರಾವಾ ದಿನ್ನಮಾ ರಾಜಲೆಖಕೊ ಮಳಿನ ಔ ಕೈನ ಅಪ್ಪಣೆ ಥಯು. ತ್ಯುನೆ ಹಾಮಾನನಾ ಆಗನ್ಯಾ ನಿಂಗತ ಉಪರಾಜ಼ಾವೊನೆಬಿ, ತೆತೆ ಸಂಸ್ಥಾನೊಮಾ ಅಧಿಕಾರಿಯೊನೆಬಿ, ತೆತೆ ಜನಾಂಗೊನಾ ಅದಿಪತಿಯೊನೆಬಿ ಪತ್ರ ಬರ್ದ್ಯಾ. ತೆತೆ ಸಂಸ್ಥಾನೊನಾ ಲಿಖಾವಟಮಾಬಿ ತೆತೆ ಜನಾಂಗೊನಾ ಭಾಷಾಮಾಬಿ ರ‍್ಹಯಲ ತೆ ಪತ್ರ ರಾಜೊ಼ ಥಯಲ ಅಹಷ್ಟೆರೊಷನಾ ನಾಮಪರ ಲಿಕ್ಯಲ ವ್ಹತ್ತಾ; ತೆ ಕ್ಹಾರಾವೊನೆ ರಾಜಾ಼ನಿ ಇಟ್ಟಿನೊ ಶಿಕ್ಕೊ ಘಾಲ್ಯಾತಾ. 13 ಪತ್ರ ಪೊಸ್ಟಮ್ಯಾನನಾ ಮುಲಕ ಕ್ಹಾರಾ ರಾಜ ಸಂಸ್ಥಾನೊನೆ ವಳಾಯಾ. ತೆ ಕ್ಹಾರಾವೊಮಾ, "ಯಕ್ಕಜ಼ ದಿನ್ಮಾ ಕದ್ಯಾಮ ಬಾರಾವಾ ಮ್ಹೈನೊ ಥಯಲ ಫಾಲ್ಗುಣಮಾಸನಾ ತೆರಾವಾ ದಿನ್ನಮಾ ಪಟ್ಟಾ, ಶಾನಾ, ಬಾಕ್ಡಿಯೊ, ಬಚ್ಚಾ಼ ಕೈನ ದೆಕ್ಯಾಬಗರ ಕ್ಹಾರಾ ಯೆಹುದ್ಯೊನೆ ಖಲಾಸ ಕರೊ, ನಾಶ ಕರೊ, ಜಿಮಿನಪರ ವ್ಹತ್ತಾ ಸು ನೈ ತಿಮ್ಮ ಕರೊ. ತ್ಯುನೊಕನ ರ‍್ಹಯಲ ಕ್ಹಾರು ಕಾಳಿ ಲಿವೊ" ಕೈನ ಲಿಕ್ಕಲ ವ್ಹತ್ತು. 14 ತೆಜ಼ ನೈಸೊ, "ಎ ಪತ್ರನಾ ಯಕ್ಕೆಕ್ಕ ಪೆಪರ ಯಕ್ಕೆಕ ಸಂಸ್ಥಾನಮಾ ರಾಜವಿಧಿ ವ್ಹೈ ಕೈನ ವಳೈನ ಕ್ಹಾರಾ ತೆ ದಿನ್ನಮಾ ತಯ್ಯಾರ ಥಯಲ ನಿಂಗತ ಕ್ಹಾರಾ ಮನಕ್ಹೊನೆ ತಿಳ್ದೆ ನಿಂಗತ ಪ್ರಚಾರ ಕರು" ಕೈನ ಲಿಕ್ಕಲ ವ್ಹತ್ತು. 15 ತೆ ಫೈಸಲೊ ಶುಶನಾ ಮೆಹಲಮಾ ಪ್ರಚಾರ ಥಯಲ ಬರೊಬ್ಬರ ಪೊಸ್ಟಮ್ಯಾನೊ ರಾಜಾ಼ನಿ ಆಗನ್ಯಾ ನಿಂಗತ ಜಲ್ದಿ ಗಯಾ. ರಾಜೊ಼ತಬಿ ಹಾಮಾನನಾ ಕ್ಹಾತೆ ದಾರು ಪಿವಾನೆ ಬೈಟ್ಯೊ. ತ್ಯಾ ಶುಶನಾ ಗಾಮಮಾ ಘಾಲಮೆಲ ಥಯು.