ಮೊರ್ದೆಕೈನೆ ಸನ್ಮಾನ ಕರಲ ರಾಜೊ಼
1 ತೆ ರಾತೆ ರಾಜಾ಼ನೆ ನಿಂದರ ಐನೈ; ತಿನಾಹುತಿ ಪೈಲಾನಾ ಘಟನೆ ಥಯಲನಾ ಬುಕ್ಕೊ ಲಿನಾವಾನೆ ಸೆವಕೊನೆ ಅಪ್ಪಣೆ ದಿನ ತಿನೆ ಒದಾಲಗಾಡಾಡೊತೊ. 2 ಅಹಷ್ಟೆರೊಷ ರಾಜಾ಼ನೆ ಖಲಾಸ ಕರು ಕೈನ ಬಾಗಲಕನ ಕೈದಾಲಾ ಬಿಗೆತಾನ ವರಿ ತೆರೆಷ ಕವಾನಾ ಬೆ ರಾಜಕಂಚುಕಿಯೊ ಮ್ಹೈನು ಮ್ಹೈ ಕರಲ ವಿಚಾರನಾ ಸಂಗತಿಯೊ ತೆ ಮೊರ್ದೆಕೈಕ್ಹು ಭಾರು ಆಯಲ ಸಂಗತಿ ವ್ಹೈ ಕೈನ ತಿಮಾ ಲಿಕ್ಕಲ ವ್ಹತ್ತಾ. 3 ತೆಳಾಮಾ ರಾಜೊ಼, "ಇನಾಹುತಿ ಮೊರ್ದೆಕೈನೆ ಕಯು ಸ್ಥಾನಮಾನ ಮಳ್ಯು?" ಕೈನ ಪುಚ್ಚಲ ಟೈಮಮಾ ತಿನಾ ಸೆವಕೊ ಥಯಲ ಪರಿವಾರವಾಲಾ, "ಸು ಮಳ್ಯು ನತ್ತಿ" ಕೈನ ಕದ್ಯಾ. 4 ರಾಜೊ಼, "ಮಹೆಲಮಾ ಕುನ್ನ ಛೆ?" ಕೈನ ಪುಚ್ಯೊ. ತೆಕ್ಲಾಮಾಜ಼ ಹಾಮಾನ ತೆ ತಯ್ಯಾರ ಕರಾಯಲ ಪಾರಸಿನೆ ಮೊರ್ದೆಕೈನೆ ಘಾಲಾನಾಹುತಿ ರಾಜಾ಼ನಿ ಇಜಾಜ಼ತ್ತ ಮಾಂಗಿಲ್ಯು ಕೈನ ಮಹೆಲನಾ ಭಾರಲ್ಯಾ ಮಹೆಲಮಾ ಐನ ಹುಬ್ರಯೊತೊ. 5 ತೆಳಾಮಾ ರಾಜಾ಼ನಾ ಸೆವಕೊ, "ದೆಕ, ಮಹೆಲಮಾ ಹಾಮಾನ ಛೆ" ಕೈನ ಕದ್ಯಾ. ತೆಳಾಮಾ ರಾಜೊ಼, "ತೆ ಮ್ಹೈ ಆವಾದೆ" ಕದ್ಯೊ. 6 ಹಾಮಾನ ಆಯಲ್ಪರ, "ರಾಜೊ಼ ಕಿನೆತಬಿ ಸನ್ಮಾನ ಕರಾನೆ ಮನಸ ರ‍್ಹಯಲ ರ‍್ಹಯಾಮ ತ್ಯವಾನೆ ಸು ಕರು?" ಕೈನ ತಿನೆ ಪುಚ್ಯೊ. 7 ತಿನಾಹುತಿ ಹಾಮಾನ, "ರಾಜೊ಼ ಮನೆ ಛೊಡಿನ ಬಿಜಾ಼ ಕಿನೆಬಿ ಸನ್ಮಾನ ಕರಾನೆ ಮನಸ ಕರ‍್ಯೊಸಸುಕ" ಕೈನ ಕೈಲಿದ್ಯೊ. 8 ತೆ ರಾಜಾ಼ನೆ "ಕಿನೆಬಿ ಸನ್ಮಾನ ಕರಾನೆ ರಾಜಾ಼ನೆ ಮನಸ ರ‍್ಹಯುಮ ತೆ ಘಾಲಿಲಿವಾನಾ ರಾಜಾ಼ನಾ ವಣ್ಣಾ ವರಿ ಸವಾರಿ ಕರಾನೊ ಘೊಡಾನೆ ಲೌ. 9 ತೆ ವಣ್ಣಾ ವರಿ ಘೊಡಾನೆ ಮ್ಹೊಟೊ ರ‍್ಹಯಲ ರಾಜಾ಼ನೆ ಸರದಾರ ರ‍್ಹಯಲ ಯಕ್ಲಾನಾ ಹತ್ಮಾ ದಿನ ರಾಜೊ಼ ಸನ್ಮಾನ ಕರು ಕೈನ ಛೆ ತೆ ದಾಣ್ಗಾನೆ ರಾಜಾ಼ನಾ ವಣ್ಣಾ ಘಲೌ. ತೆ ಥಯಲ್ಪರ ತಿನೆ ತೆ ಘೊಡಾಪರ ಬೆಟಾಡಿನ ಗಾಮನಿ ಒಣಿಯೊಮಾ ಮೆರವಣಗಿ ಕಾಡ್ತಾ ತಿನಾ ಕ್ಹಾಮಾ, ‘ರಾಜೊ಼ ಸನ್ಮಾನ ಕರು ಕವಾಲಾನೆ ಇನಾ ನಿಂಗತಜ಼಼ ವ್ಹೈ’ ಕೈನ ಪ್ರಕಟಣೆ ಕರೌ" ಕೈನ ಕದ್ಯೊ. 10 ತೆಳಾಮಾ ರಾಜೊ಼ ಹಾಮಾನನೆ ತು ಕದಲ ವಣ್ಣಾ ವರಿ ಘೊಡಾನೆ ಭೆಗಿನ ಲೈನ ರಾಜಾ಼ನಾ ಘರನಾ ಬಾಕಲನಾ ಕ್ಹಾಮೊ ಬೈಟಲ ಮೊರ್ದೆಕೈ ಕವಾಲೊ ಯೆಹುದ್ಯನೆ ತಿಮ್ಮಜ಼ ಕರ; ತೆ ಕದಲಮಾ ಕ್ಹಾರು ಯಕ್ಕಬಿ ಛೊಡ್ಯಾವಾಚಿ ಕರು ಕೈನ ಅಪ್ಪಣೆ ದಿದ್ಯೊ. 11 ಹಾಮಾನ ತೆ ವಣ್ಣಾ ವರಿ ಘೊಡೊ ಲೈನ ಮೊರ್ದೆಕೈನೆ ಮಳಿನ ಗಾಮನಿ ಒಣಿಯೊಮಾ ಮೆರವಣಗಿ ಕಡೈನ, ತಿನಾ ಕ್ಹಾಮೊ ರಾಜೊ಼ ಸನ್ಮಾನ ಕರಾನೊ ತರಿಕೊ ಇನಾ ನಿಂಗತಜ಼಼ ವ್ಹೈ" ಕೈನ ಪ್ರಕಟಣೆ ಕರ‍್ಯೊ. 12 ಮೊರ್ದೆಕೈ ಫರಿನ ರಾಜಾ಼ನಾ ಘರನಾ ಬಾಕಲಕನ ಗಯೊ. ಹಾಮಾನತೊ ದುಖಕ್ಹು ಭರಿನ ಮ್ಹೊಡು ಝಾಕಿಲಿನ ಭೆಗಿನಜ಼ ಘರೆ ಗೈನ 13 ತಿನಿ ಬೈಕೊ ಥಯಲ ಜೆರೆಷಕನ ವರಿ ತಿನಾ ಕ್ಹಾರಾ ಬಂದುಬಳಗನಾ ಕ್ಹಾಮೊ ಥಯಲ ಕ್ಹಾರು ಕದ್ಯೊ. ತೆಳಾಮಾ ತಿನಾ ಪಂಡಿತೊ ವರಿ ಬೈಕೊ ತಿನೆ ‘ಕಿನಾ ಕ್ಹಾಮು ತಾರು ಸೊಲ ಥಯು ತೆ ಮನಕ್ಹ ಯೆಹುದ್ಯ ಸಂತಾನವಾಲೊ ರ‍್ಹಯೊಮಜ಼ ತು ಜಿತ್ತತೊಜ಼ ನೈ. ತಿನಾ ಕ್ಹಾಮೊ ಪಡಿನ ತು ಕ್ಹರಿಜ಼಼ ಹಾಳ ಥಾಶಿ’ ಕದ್ಯಾ.
ಹಾಮಾನನೆ ಮರ್ವಾನಿ ಶಿಕ್ಷಾ
14 ತ್ಯುನೆ ಹಜುನ ತಿನಾ ಕ್ಹಾತೆ ಬೊಲ್ತಾ ರ‍್ಹತಾಮಾಜ಼ ರಾಜಕಂಚುಕಿಯೊ ಐನ ಎಸ್ತೆರ ಕ್ಹಾವಾನೆ ಅನ್ನ ಕರಲನೆ ಭೆಗಿನ ಔ ಕೈನ ಹಾಮಾನನೆ ಬಲೈಲಿನ ಗಯಾ.