1 ರಾಜೊ಼ ಹಾಮಾನನಾ ಕ್ಹಾತೆ ಎಸ್ತರಳನಾ ಘರೆ ಅನ್ನ ಖಾವಾನಾ ಹುತಿ ಆಯೊ. 2 ತೆ ಎ ಬೆವಾ ದಿನ್ಮಾಬಿ ದ್ರಾಕ್ಷಾರಸ ಪಿತಾಮಾ ರಾಜೊ಼ ಎಸ್ತರಳನೆ, "ಎಸ್ತರಳ ರಾಣಿ, ತಾರಿ ವಿಗನ್ಯಾಪನ ಸು ವೈ ಕೆ; ತೆ ಪುರಾ ಕರುಸ. ತು ಮಾರಿ ರಾಜ್ಯಮಾನೊ ಅರ್ಧೊ ಭಾಗ ಮಾಂಗಿತಬಿ ಮಿ ತುನೆ ದ್ಯುಸ" ಕೈನ ಕದ್ಯೊ. 3 ತೆಳಾಮಾ ಎಸ್ತರಳ ರಾಣಿ, "ರಾಜೊ಼ ಮನೆ ಮರ್ಗಿನ ಧೈರ್ಯ ದಿವಾನೊ ರ‍್ಹಯೊಮ ಮಾರಿ ವಿಜ್ಞಾಪನ ಪ್ರಾಥನಾಮಾ ವಿಚಾರ ಕರಿನ ಮಾರೊ ಜ಼ಲಮ ವರಿ ಮಾರಿ ಜನಾಂಗನೆ ವಚಾ಼ಡು. 4 ಮನಕ್ಹೊ ಹಮೊನೆ ಕತ್ರಿನ ಖಲಾಸ ಕರಿನ, ಹಮಾರಾ ನಾಮೊ ನಿಶಾನೊ ನೈಸೊ ಇಕ್ಕಿಪಾಡ್ಯಾ. ಹಮೊನೆ ಸೆವಕೊ ಸೆವಕಿಯೊ ಥಾವಾನಾಹುತಿ ಗುಲಾಮೊನಿಂಗತ ಇಕ್ಕಲ ರ‍್ಹಯಾಮ ತೆ ತ್ರಾಸನಾ ವಿಷಯಮಾ ರಾಜ಼ನೆ ತ್ರಾಸಮಾ ಘಾಲಾನು ಚೊ಼ಕು ನ್ಹವೈ ಕೈನ ಗಪ್ಪ ರ‍್ಹತಿತಿ" ಕೈನ ಕದಿ. 5 ಅಹಷ್ವೆರೊಶ ರಾಜೊ಼ ಎಸ್ತರ ರಾಣಿನಿ, ಹವಾ ದುಷ್ಕೃತ್ಯಪರ ಮನಸ ಮ್ಹೆಲಲವಾಲು ಕುನ್ನವ್ಹೈ? ತೆ ಕಿಜ್ಗಾ಼ ಛೆ?" ಕೈನ ಪುಚ್ಯೊ. 6 ತೆಳಾಮಾ ತೆ, "ಹಮೊನೆ ತ್ರಾಸ ಕರು ಕೈನ ವರಿ ಹಮಾರೊ ದುಶ್ಮನ ಆ ಕೆಟ್ಟ ಹಾಮಾನಜ಼ ವ್ಹೈ" ಕೈನ ಕದಿ. ಎ ಐಕಿನ ಹಾಮಾನ ರಾಣಿನಾ ಕ್ಹಾಮೊ ಭುಚ್ಕಿ಼ಗಯೊ. 7 ರಾಜೊ಼, ಅಂಗಾರ ಥೈನ ದ್ರಾಕ್ಷಾರಸ ಪಿವಾನು ಛೊಡಿನ ತಿನಾ ಮಹೆಲಮಾ ರ‍್ಹಯಲ ಮಳಾಮಾ ಗಯೊ. ಹಾಮಾನತೊ ರಾಜಾ಼ಕ್ಹು ಮನೆ ಕೆಡ ತಯ್ಯಾರ ಥಯು ಕೈನ ತಿಳ್ದಿನ ಎಸ್ತರಳಕನ್ನ ತಿನೊ ಜ಼ಲಮ ವಚಾ಼ಡ ಕೈನ ಮಾಂಗಿಲೆತೊ ಹುಬ್ರಯೊತೊ. 8 ರಾಜೊ಼ ತಿನಾ ಮಳಾಮಾತೊ ತೆ ದ್ರಾಕ್ಷಾರಕ್ಹ ಪಿವಾನು ಛೊಡಿನ ಗಯಲ ಜ಼ಗಾ ಐನ ಎಸ್ತರಳ ಅರಾಮ ಕರಾನಿ ಜ಼ಗಾಪರ ಹಾಮಾನ ಪಡಲ ದೆಕಿನ, "ಎ ರಾಣಿನಿ ಮರ್ಯಾದಿಜ಼ ಕಾಡು ಕೈನ ವಸೆ ಸು?" ಕದ್ಯೊ. ರಾಜಾ಼ನಾ ಮ್ಹೊಡಾತು ವಾತ ಭಾರಿ ಆತಾಮಾಜ಼ ಸೆವಕೊ ಹಾಮಾನನಾ ಮ್ಹೊಡಾನೆ ಘುಮುಸ ಘಾಲಿನ ಯಳ್ದಿಲಿನ ಗಯಾ.

9 ತೆಳಾಮಾ ರಾಜಾ಼ನೆ ಸೆವೆ ಕರ್ತಾ ರ‍್ಹಯಲ ಯಕ್ಲೊ ಹರ್ಬೊನ, "ರಾಜಾ಼ನಾ ಜ಼ಲ್ಮನೆ ಸಮಾಚಾರ ಕೈನ ಮೊರ್ದೆಕೈನೆ ಪಾಕ್ಹೊ ಘಾಲಾಹುತಿ ಎ ಐವತ್ತ ಮಾರ ಉಚ್ಚೊ಼ ಖಾಮ ತಯ್ಯಾರ ಕರ್ಯೊಸ. ಕದ್ಯೊ ತೆ ವಾತೆ ರಾಜೊ಼, ತಿಮ್ಮ ರ‍್ಹಯುಮ ಹಾಮಾನನೆ ತಿಪರಜ಼ ಪಾಸಿಪರ ಘಾಲೊ ಕೈನ ಕದ್ಯೊ. 10 ಹಾಮಾನನೆ ಮೊರ್ದೆಕೈನಾ ಹುತಿ ತಯ್ಯಾರ ಕರಲ ಪಾಸಿನಾ ಖಂಬಾಪರಜ಼ ಚ಼ಡಾಯಾ. ಇಮ್ಮ ರಾಜಾ಼ನಿ ಶಿಟ್ಟ ಶಾಂತ ಥೈ.