1 ತೆ ದಿನ್ನಮಾ ರಾಜೊ಼ ಥಯಲ ಅಹಷ್ವೆರೊಷ ಯಹುದಿಯೊನಾ ವೈರಿ ಥಯಲ ಹಾಮಾನನು ಘರ ಎಸ್ತರ ರಾಣಿನೆ ದಿದ್ಯೊ. ತೆ ಮೂರ್ದೆಕೈನೆಬಿ ತಿನೆಬಿ ರ‍್ಹಯಲ ಸಂಬಂದನೆ ಕದಿ. 2 ತೆಳಾಮಾ ರಾಜೊ಼ ತೆ ಹಾಮನನೆ ದಿದಲ ತಿನೆ ವಚ್ಮಾನಿ ಇಟ್ಟಿನೆ ಮೊರ್ದೆಕೈನೆ ದಿದ್ಯೊ; ಎಸ್ತರಬಿ ಹಾಮನನು ಘರನು ಅಧಿಕಾರ ಕ್ಹಾರು ತಿನೆ ವಪ್ಪಸೈ. 3 ಎಸ್ತರ ವರಿ ರಾಜಾನೆ ಬೊಲಾನಾಹುತಿ ಗೈನ ತಿನಾ ಪಗೊಮಾ ಪಡಿನ ರೊತಿ ಯಹುದ್ಯನಾ ಹಾನಿನಾಹುತಿ ಸೊಚಲ ಕೆಟ್ಟ ವಿಚಾರನೆ, ಆವಾನಾ ತ್ರಾಸೊ ಹುಬ್ರಾಡು" ಕೈನ ಮಾಂಗಿಲಿದಿ. 4 ರಾಜೊ಼ ಸುವರ್ಣ ರಾಜದಂಡ ತಿನಾ ಕ್ಹಾಮೊ ಕರ‍ಲಹುತಿ ತೆ ಉಟಿನ ರಾಜಾ಼ನಾ ಕ್ಹಾಮಿ ಹುಬ್ರೈ. 5 ತೆಳಾಮಾ ಎಸ್ತರ ತಿನೆ, "ರಾಜೊ಼ ಮನೆ ಮರ್ಗಿನ, ಮನೆ ಪಸಂದ ಕರಿನ, ಮಿ ಕವಾನಿಯೊ ಕ್ಹಾರಿಯೊ ವಾತೊ ಚೊ಼ಕಿಯೊ ವ್ಹೈ ಕೈನ ವಪ್ಪಾನೊ ರ‍್ಹಯೊಮ, ರಾಜಾ಼ನಾ ಕ್ಹಾರಿಯೊ ಸಂಸ್ಥಾನೊಮಾ ರ‍್ಹಯಲ ಯಹುದಿಯೊನೆ ಖಲಾಸ ಕರಾನಿ ವಿಶಯಮಾ ಅಗಾಗನ ವಂಶವಾಲೊ, ಹಮ್ಮೆದಾತಾನೊ ದಿಕ್ರೊ ಥಯಲ ಹಾಮಾನನೆ ಬರ್ದಾಯಲ ಪತ್ರನೆ ರದ್ದ ಕರಾವಾನಾ ಹುತಿ ಆಜ್ಞಾಪತ್ರ ಪ್ರಕಟ ಕರು. 6 ಮಾರಾ ಮನಕ್ಹೊನೆ ತ್ರಾಸ ಥಾವಾನು ಮಿ ದೆಕಿನ ಕಿಮ್ಮ ಗಪ್ಪ ರ‍್ಹೌ? ಮಾರಾ ಖಾಂದಾನ ಹಾಳ ಥಾವಾನು ದೆಕಿನ ಕಿಮ್ಮ ಗಪ್ಪ ರ‍್ಹೌ?" ಕೈನ ಮಾಂಗಿಲಿದಿ. 7 ತೆಳಾಮಾ ರಾಜೊ಼ ರಾಣಿ ಎಸ್ತರನೆ ವರಿ ಯೆಹುದ್ದಿ ರ‍್ಹಯಲ ಮೊರ್ದೈಕೈನೆ ಬಿ, "ಹಾಮಾನ ಯೆಹುದ್ದಿಯೊನೆ ವಿರುದ್ದ ಥೈನ ಹತ್ತ ಉಚಾಯಲಹುತಿ ತಿನೆ ಫಾಸಿಪರ ಚ಼ಡಾ, ತಿನೆ ಆಸ್ತಿ ಎಸ್ತರಳನೆ ದಾನ ಕರ‍್ಯೊಸ್ತೊ, ರಾಜಾ಼ನಾ ನಾಮಪರ ಬರ್ದಲ ರಾಜಮುದ್ರೆ ಕಿನೆಜ಼ ರದ್ದ ಕರಾನೆ ಥಾತು ನೈ. 8 ತಿನಾಹುತಿ ಯಹುದ್ದಿಯೊನಾ ವಿಶಯಮಾ ತುಮೊನೆ ಚೊ಼ಕು ದಿಕ್ಹಾನು ರಾಜಾ಼ನಾ ನಾಮಪರ ತುಮೆ ಬರ್ದಾವೊ, ತಿಪರ ರಾಜಾ಼ನು ಶಿಕ್ಕೊ ಮಾರೊ" ಕೈನ ಕದ್ಯೊ. 9 ತೆಳಾಮಾ ರಾಜ಼ಾನಾ ಘರ್ಮಾ ಬರ್ದಾಲಾ ರ‍್ಹಯಲವಾಲಾವೊನೆ ಬಲಾಯಾ. ತಿವ್ನೆ ಐನ ತನ್ವಾ ಮ್ಹೈನಾಮಾ ರ‍್ಹಯಲ ಜೆಸ್ಠೆ ಮಾಸನಾ ಇಕ್ಹಪರ ತನ್ನ ದಿನ್ಮಾ, ಮೊರ್ದೆಕೈನಾ ಆಗನ್ಯಾ ನಿಂಗತ ಯಹುದಿಯೊನೆ, ಭಾರತತಾ ಕುಶಿನಲಕ್ಕಾ ರ‍್ಹಯಲ ಯಕ್ಹೊನ ಇಕ್ಹಪರ ಕ್ಹಾತ ಸಂಸ್ಥಾನೊನಾ ಉಪರಾಜ಼ಾವೊನೆ, ದೆಶಾದಿಪತಿಯೊನೆ ವರಿ ಅದಿಕಾರಿಯೊನೆ ಪತ್ರ ಬರದ್ಯಾ. ತೆ ಪತ್ರ ತ್ಯುನಾ ತ್ಯುನಾ ಜಾ಼ತಮಾ ವ್ಹತಾ. 10 ಮೊರ್ದೈಕೈ ರಾಜಾ಼ನಾ ನಾಮಪರ ಬರ್ದಲ ತೆ ಪತ್ರನೆ ರಾಜಮುದ್ರೆ ಘಾಲಿನ, ರಾಜಮಹೆಲನಾ ಅಶ್ವಾಲಯಮಾ ಹುಟ್ಟಿನ ಬೆಳದಲ ಘೊಡಾವೊಪರ ಸವಾರಿ ಕರಾಲಾ ಪತ್ರ ದಿವಾಲಾವೊನಾ ಮುಕಾಂತರ ಮೊಕಲ್ಯೊ. 11 ತೆ ಪತ್ರಾಮಾ ರಾಜೊ಼ ಅಹಷ್ವೆರೊಶ ರಾಜಾನಾ ಕ್ಹಾರಿಜ಼ಗಾ ಯಹುದ್ದಿಯೊ ಯಕ್ಕಜ಼ ದಿನ್ಮಾ ಕದ್ಯಾಮ, ಬಾರ್ವಾ ಮ್ಹೈನೊ ಥಯಲ ಫಾಲ್ಗುಣ ಮಾಸಮಾ ತೆರ್ವಾ ದಿನ್ಮಾ ಕ್ಹಾರಾಜ಼ ಮಳು. 12 ತಿವ್ನಾ ಜಲಮನಾ ಹುತಿ ಉಟಿನ ತ್ಯುನಾ ವಿರುದ್ದ ಥೈನ ಉಟಿನ ಆಯುದನಾ ಕ್ಹಾತೆ ಮಳಿನ ಆವಾಲಾ ಕ್ಹಾರಾ ಜನಾಂಗವಾಲಾವೊನೆ, ಸಂಸ್ಥಾನವಾಲಾವೊನೆ ತಿವ್ನಿಯೊ ಬಾಕ್ಡಿಯೊನ ವರಿ ಬಚ್ಚಾ಼ವೊನಾ ಕ್ಹಾತೆಜ಼ ಖಲಾಸ ಕರು. 13 ತಿವ್ನಿ ಆಸ್ತಿ ಹಾಳ ಕರಿಪಾಡು, ಎ ಪತ್ರನಿ ಯಕೆಕ್ಕ ಕ್ಹಾರಾ ಮನಕ್ಹೊನೆ ದ್ಯು. ಎ ದಿನೊಮಾ ತ್ಯುನಿ ಶಿಟ್ಟ ತಿರ್ಶಿಲಿವಾನೆ ತಯ್ಯಾರ ಥೌ. ಕೈನ ಅಪ್ಪಣೆ ದಿದ್ಯೊ. 14 ಆ ರಾಜಾನಿ ಆಗನ್ಯಾ ಶುಶನ ಕೊಟೆಮಾ ಶುರು ಥಾತಾಮಾ ರಾಜ ಮಹಲನಾ ಸವಾರಿನಾ ಘೊಡಾಪರ ಚಡಿನ ಬೈಟಲ ಅಂಚೆವಾಲಾ ರಾಜಾನಾ ಆಗನ್ಯಾಕ್ಹು ಸಿದ್ದ ಥೈನ ಘನ್ನಾ ಜಲ್ದಿ ಗಯಾ. 15 ಮೊರ್ದೆಕೈ ಥೈತಬಿ ನಿಲಿ ಬಿಜಾ ಬಿಜಾ ರಾಜಾನಾ ವಣ್ಣಾ ಘಾಲಿಲಿನ ಕ್ಹೊನಾನಿ ಮ್ಹೊಟಿ ಪಟ್ಟಿ ಮಾತಾನೆ ಭಾಂದಿಲಿನ ಘನ್ನು ಲಾಲ ರ‍್ಹಯಲ ಶಾಲನೆ ವಳ್ಳಿನ ರಾಜಾ ಮಹೆಲತೊ ಗಯೊ ಶುಶನ ಗಾಮಮಾ ಕ್ಹುಶಿನಿ ಆವಾಜ ಐಕೈ. 16 ತ್ಯಾನಾ ಯಹುದ್ಯೊ ಕ್ಹುಶಿನಿ ಪ್ರಬಾವ ಝಿತ್ತಲ ತ್ಯುನೊಪರ ದಿಕ್ಹಾಡ್ಯುತು. 17 ರಾಜಾನಿ ಅನುಮತಿ ಶಾಸನೊ ಕರಲ ಹರಿಯಕ್ಕ ಜ಼ಗಾವೊಮಾಬಿ ಗಾಮೊಮಾಬಿ ರ‍್ಹಯಲ ಯಹುದ್ಯೊನೆ ಚೊಕೊ ದಿನ ಶುರು ಥಯೊ; ತ್ಯುನೆ ಕ್ಹುಶಿಕ್ಹುಬಿ ಉಲ್ಲಾಸಕ್ಹುಬಿ ಭಕ್ಷನೂ ಭೊಜನ ಕರ್ಯಾ. ದೆಶನಾ ಮನಕ್ಹೊಮಾ ಘನ್ನಾ ಜನಾ ಯಹುದ್ಯೊನೆ ಬುಚ್ಕಿನ ತ್ಯುನಾ ಸಂಗನೆ ಸೆರ್xಯಾ.