Mateus 21

ಯೆಸು ರಾಜಾ಼ ಲಿಂಗತ ಯೆರುಸಲೆಮಮಾ ಪ್ರವೆಶ ಕರ‍ಲ

1 ಯೆಸು ವರಿ ತಿನಾ ಶಿಷ್ಯಾ ಯೆರುಸಲೆಮನಾ ನಜಿಕ ಗೈನ ಒಲಿವ ತೆಲನಾ ಝಾಡೊನಾ ಡೊಂಗರನಾ ಬಾಜು಼ಮಾ ರ‍್ಹಯಲ ಬೆತ್ಫೆನೆ ಆಯಲ್ಪರ 2 ಯೆಸು ಬೆ ಶಿಷ್ಯಾವೊನೆ ಬಲೈನ, ತುಮಾರಾ ಕ್ಹಾಮಾ ರ‍್ಹಯಲ ಖೆಡಾ ಗಾಮೊನೆ ಜಾ಼ವೊ; ಗಯಲ ಬರೊಬ್ಬರ ತ್ಯಾ ಭಾಂದಲ ಗದ್ಡಾನೆ ತಿನಾ ಕ್ಹಾತೆ ರ‍್ಹಯಲ ಗದ್ಡಾನು ಬಚ಼್ಚು ದೆಕೊಶಿ; ತ್ಯುನೊನೆ ಛೊಡೈನ ಮಕನ ಲಿನ ಆವೊ. 3 ಕುನ್ನತಬಿ ತುಮೊನೆ ಸುತಬಿ ಕದ್ಯಾಮ, ‘ಎ ಹಮಾರಾ ಪ್ರಭುನೆ ಚಾ಼ಯೆ ಥಯಾಸ’ ಕೈನ ತುಮೆ ಕವೊ; ತೆ ತೆಳಾಮಾಜ಼ ತ್ಯುನೊನೆ ಛೊಡಿನ ದಿವಸ ಕೈನ ವಳಾಯೊ.

4 ಪ್ರವಾದಿ ಕದಲ ವಾತ ಪುರಾ ಥಾವಾನಾಹುತಿ

ಇಮ್ಮ ಥಯು; ತೆ ಸುವೈ ಕದ್ಯಾಮ,

5 ಚಿಯೊನ ದಿಕ್ರಿ, ದೆಕ, ತಾರೊ ರಾಜೊ಼

ತುಕನ ಆವಾಡೊಸ; ತೆ ಚೊ಼ಕಿ ಗುಣಾ

ರ‍್ಹಯಲವಾಲೊ ಥೈನ ಗದ್ಡಾನೆ, ಹೊ ಗದ್ಡಾನಾ

ಬಚ್ಚಾ಼ಪರ ಚ಼ಡಿನ ಆವಾಡೊಸ ಕೈನ ಕವೊ ಕವಾನುಜ಼ ವ್ಹೈ.

6 ತೆಳಾಮಾ ಶಿಶ್ಯಾ ಗೈನ ಯೆಸು ತ್ಯುನೊನೆ ಅಪ್ಪಣೆ ದಿದಲ ತಿಮ್ಮ ಕರ‍್ಯಾ. 7 ಗದ್ಡಾನೆ ವರಿ ತಿನಾ ಬಚ್ಚಾ಼ನೆ ಲಿನ ಐನ ತ್ಯುನಾ ಉಪ್ಪರ ತ್ಯುನಾ ವಣ್ಣಾ ಘಾಲಲ್ಪರ ಯೆಸು ಚ಼ಡಿನ ಬೈಟ್ಯೊ. 8 ತೆಳಾಮಾ ಮನ್ಹೊನಾ ಗುಂಪಮಾ ಘನ್ನಾ ಜ಼ನಾ ತ್ಯುನಾ ವಣ್ಣಾ ವಾಟಮಾ ವಚ್ಚಾ಼ಯಾ ಬಿಜಾ಼ ದಕ್ಹಾಜ಼ನಾ ಝಾಡೊಕ್ಹು ಟೊಂಗಿಯೊ ವಾಟಮಾ ವಚ್ಚಾ಼ಯಾ. 9 ತಿನಾ ಅಗಾ ಪಾಚಾ಼ ಜಾವಾಲಾ ಮನಕ್ಹೊ, ದಾವಿದನಾ ದಿಕ್ರಾ ಹೊಸನ್ನಾ! ಕರ್ತಾನಾ ನಾಮಪರ ಆವಾಲೊ ಧನ್ಯ ವ್ಹೈ! ಉಪ್ಪರಲ್ಯಾ ಲೊಕಮಾ ಹೊಸನ್ನಾ ಕೈನ ವದ್ರ್ಯಾ. 10 ಯೆಸು ಯೆರುಸಲೆಮನಾ ಮ್ಹೈ ಜಾ಼ತಾಮಾ ಗಾಮಾ ಕ್ಹಾರಾ ಗದ್ದಲ ಥೈನ, ಆಂ ಕುನ್ನ ವ್ಹೈ? ಪುಚ್ಯಾ಼. 11 ತೆನೈಸೊ ತೆ ಗುಂಪನಾ ಮನಕ್ಹೊ, ಎ ಗಲಿಲಾಯನೊ ನಜರೆತನೊ ಯೆಸು ವ್ಹೈ ಕೈನ ಕದ್ಯಾ.