1 ಬರೊಕ್ಹಾಮಾ ಕಮ್ಜೊ಼ರ ರ‍್ಹಯಲ ಮನಕ್ಹನೆ ತುಮಾರಾ ಕ್ಹಾತೆ ಮಳೈ ಲಿವೊ ತಿವ್ನಾ ಸ್ವಂತ ವಿಷಯಮಾ ತಿನಾ ಕ್ಹಾತೆ ವಾಗ್ವಾದ ಕರೊ ನಕೊ. 2 ಯಕ್ಲೊ ಕೈ ತರಾನಿ ಅನ್ನ ಖೌ ಕೈನ ವಿಚಾರ ಕರಸ. ತೆನೈಸೊ ಬರೊಕ್ಹಾಮಾ ಬಲಹಿನ ರ‍್ಹಯಲ ಮನಕ್ಹ ತೆ ತರಕಾರಿಯೊ ಯಕ್ಕಜ಼ ಖೌ ಕೈನ ವಿಚಾರ ಕರಸ. 3 ಕೈ ತರಾನು ಅನ್ನ ಖೌ ಕೈನ ಬರೊಕ್ಹೊ ಕರಾನೊ ಮನಕ್ಹ ತರಕಾರಿ ಯಕ್ಕಜ಼ ಖಾವಾಲಾ ಮನಕ್ಹನೊ ಫೈಸಲೊ ಕರು ನೈ. ತಿನಾನಿಂಗತಜ಼ ತರಕಾರಿಯೊ ಯಕ್ಕಜ಼ ಖಾವಾಲೊ ಮನಕ್ಹ ಕ್ಹಾರು ತರಾನು ಅನ್ನ ಖಾವಾಲಾ ಮನಕ್ಹನೆ ತಪ್ಪ ಕರ‍್ಯೊಸ ಕೈನ ಫೈಸಲೊ ಕರು ನೈ. ಕ್ಹುದಾ ತೆ ಮನಕ್ಹನೆ ವಪ್ಪಿಲಿದ್ಯೊಸ. 4 ತು ಬಿಜೆ಼ಕ್ಲಾ ಮನಕ್ಹನಾ ಸೆವಕನೆ ಫೈಸಲೊ ಕರಾಲೊ ತು ಕುನ ವ್ಹೈ? ತೆ ಕರತೊ ರ‍್ಹಯಲ ಚೊ಼ಕು ವ್ಹೈಸು ನೈತೊ ಕೆಟ್ಟ ವ್ಹೈಸು ಕವಾನು ತಿನೊ ಸ್ವಂತ ಮಾಲಕಜ಼ ಫೈಸಲೊ ಕರಸ. ವರಿ ತ್ಯುನೆ ಕರೆಟ್ಟಜ಼ ರ‍್ಹವಸ, ಕಾಕದ್ಯಾಮ ಪ್ರಭು ತ್ಯುನೊನೆ ಸಫಲ ಕರಾನೆ ಶಕ್ತ ಥಯೊಸ.

5 ಯಕ್ಲೊ ಯಕ್ಕ ದಿನ್ನನೆ ಕ್ಹಾರಾ ದಿನ್ನೊತಿಬಿ ಘನ್ನೊ ಖಾಸ ವ್ಹೈ ಕೈನ ಬರೊಕ್ಹೊ ಕರ ಸಕಸ. ವರಿಬಿ ಬಿಜೆಕ್ಲೊ ಕ್ಹಾರಾ ಯಕ್ಕಜ಼ ದಿನ್ನೊ ವ್ಹೈ ಕೈನ ಬರೊಕ್ಹೊ ಕರಸ. ಹರಿ ಯಕ್ಕ ಮನಕ್ಹ ತಿನಾ ಸ್ವಂತ ಮನಸ್ಮಾ ರ‍್ಹಯಲ ತಿನಿ ಸ್ವಂತ ಬರೊಕ್ಹಾನಾಹುತಿ ಫೈಸಲೊ ಕರಿನ ರ‍್ಹೌ. 6 ಕಯೊ ಮನಕ್ಹ ಬಿಜಾ಼ ದಿನ್ನೊತಿ ಯಕ್ಕ ದಿನ್ನ ಖಾಸ ವ್ಹೈ ಕೈನ ವಿಚಾರ ಕರಾಲೊ ಮನಕ್ಹ ಪ್ರಭುನೆ ಸನ್ಮಾನ ದಿವಾನಾಹುತಿ ಕರಾಲೊ ಥಯೊಸ. ತಿನಾ ನಿಂಗತಜ಼ ಕ್ಹಾರಿ ತರಾಕ್ಹು ಅನ್ನ ಖಾವಾಲೊ ಮನಕ್ಹ ಪ್ರಭುನೆ ಸನ್ಮಾನ ದಿವಾನೆ ತೆ ಕ್ಹಾರು ಖಾವಸ. ಹೊ, ತೆ ತೆ ಅನ್ನನಾ ಹುತಿ ಕ್ಹುದಾನೆ ಸ್ತುತಿ ಕರಸ. ವರಿ ಕುನ ತರಕಾರಿಯೊ ಖಾವಸತೆಬಿ ಪ್ರಭುನೆ ಸನ್ಮಾನ ದಿವಾನೆಜ಼ ತಿಮ್ಮ ಕರಸ. ತೆಬಿ ಕ್ಹುದಾನೆ ಸ್ತುತಿ ಕರಾಲೊ ಥಯೊಸ. 7 ಅಪ್ನೊಮಾ ಕುನ್ನಬಿ ಅಪ್ನಾಹುತಿ ಜಿವ್ನಾ ನೈ ಕರ‍್ತಾ ವರಿ ಅಪೆ ಅಪ್ನಾ ಹುತಿಜ಼ ನೈ ಮರ‍್ತಾ. 8 ಅಪೆ ಜಿವ್ತಾ ರ‍್ಹವಾನು ರ‍್ಹಯುಮ, ಪ್ರಭುನಾ ಹುತಿಜ಼ ಜಿವ್ತಾ ರ‍್ಹಯೆಸ; ಮರವಾನು ರ‍್ಹಯುಮ ಪ್ರಭುನಾ ಹುತಿಜ಼ ವ್ಹೈ. ತಿನಾಹುತಿ ಅಪೆ ಜಿವ್ತಾ ರ‍್ಹವಾನು ವರಿ ಮರಾನು ರ‍್ಹಯುಮ ಪ್ರಭುನಾಜ಼ ಹುತಿ ವ್ಹೈ. 9 ತಿನಾಹುತಿ ವರಿ ಜಿವ್ನಾ ಕರಾನೆ ಕ್ರಿಸ್ತ ಮರಿನ ಮಜಾ಼ರೊಮಾತೊ ಜಿವ್ತೊ ಥೈ ಆಯೊ. ಮರಿಗಯಲ ಮನಕ್ಹೊನೆ ವರಿ ಜಿವ್ತಾ ರ‍್ಹಯಲ ಮನಕ್ಹೊನಾಹುತಿ ತೆ ಪ್ರಭು ವ್ಹೈ ಕೈನ ದೆಕಾಡಿನ ದಿದ್ಯೊ. 10 ಇಮ್ಮ ರ‍್ಹತಾಮಾ, ಕ್ರಿಸ್ತಮಾ ತಾರೊ ಭೈನೆ ತು ಕೆಟ್ಟ ವ್ಹೈ ಕವಾನು ಕಾ? ತು ತಾರಾ ಭೈತಿಬಿ ಚೊ಼ಕೊ ಛೆ ಕೈನ ಕೈಲಿವಾನು ಕಾ? ಅಪೆ ಕ್ಹಾರಾ ಕ್ಹುದಾನಾ ಕ್ಹಾಮಾ ಹುಬ್ರೈಯೆಸ. ತೆಳಾಮಾ ತೆ ಅಪೊನೆ ಫೈಸಲೊ ಕರಸ. 11 ಹೊ, ಪವಿತ್ರ ಗ್ರಂಥಮಾ ಇಮ್ಮ ಬರ್ದ್ಯಾಸ;

ಕ್ಹರಿಮಾಜ಼ ಮಿ ಜ್ಯುತೊ ಕ್ಹುದಾ, ಪ್ರಬು ಕವಸ.

ಹರಿ ಯಕ್ಲೊ ಮನೆ ಪಗೆ ಪಡಸ.

ಹರಿ ಯಕ್ಲೊ ಮನೆ ಕ್ಹುದಾ ವ್ಹೈ ಕೈನ ಕವಸ. ಯೆಶಾಯ 45:23

12 ತಿನಾಹುತಿ ಅಪ್ನೊಮಾ ಹರಿ ಯಕ್ಲೊ ತ್ಯುನಿ-ತ್ಯುನಿ ಜಿವಿತನಾ ಹುತಿ ಕ್ಹುದಾಕನ ಲೆಕ್ಕೊ ದ್ಯು.

13 ತಿನಾಹುತಿ, ಅಪೆ ಯಕ್ನಾ ಯಕ್ಕ ಫೈಸಲೊ ಕರಾನು ಛೊಡಿಪಾಡು. ಅಪ್ನಾ ಭೈಯೊನೆ ವರಿ ಭೆನೊನೆ ರ‍್ಹೈನೆಕಾ ಕಮ್ಜೊ಼ರ ಕರಾನು ವರಿ ಪಾಪ ಕರಾನೆ ಕಯುಜ಼ ನೈ ಕರಾನೆ ಅಪೆ ಫೈಸಲೊ ಕರು. 14 ಮಿ ಪ್ರಭು ಥಯಲ ಯೆಸುಮಾ ಛೆ. ಕಯುಬಿ ಅನ್ನ ಪದಾರ್ಥನೆ ರ‍್ಹೈನೆಕಾ ಖಾವಾನು ತಪ್ಪ ನ್ಹವೈ ಕೈನ ಮನೆ ಗ್ವತ್ತ ಛೆ. ಯಕ್ಲೊ ಕಯುಬಿ ಅನ್ನ ಖಾವಾನು ತಪ್ಪ ವ್ಹೈ ಕೈನ ನಂಬ್ಯಾಮ, ತೆ ಅನ್ನ ತಿನೆ ಅಶುದ್ಧಥಾವಸ. 15 ತು ಖಾವಾನಿ ಅನ್ನಕ್ಹು ತಾರಾ ಭೈನಾ ಬರೊಕ್ಹೊನೆ ತು ತ್ರಾಸ ಕರತೊ ರ‍್ಹಯೊಮ, ತು ಮಯಾ ಕರಾನಿ ವಾಟ್ಮಾ ಕ್ಹರಿಮಾಜ಼ ಚಾ಼ಲಾಡೊ ನತ್ತಿ. ಯಕ್ಲೊ ಕಯುಬಿ ಖಾವಾನಾ ಅನ್ನನೆ ತಪ್ಪ ವ್ಹೈ ಕೈನ ಕೈ ಲಿದ್ಯೊಮ, ತು ತೆ ಅನ್ನನೆ ಖಾದ್ಯೊಮ ತಿನೊ ಬರೊಕ್ಹೊ ಪಡಿ ಜಾ಼ವಸ. ತಿನಾಹುತಿ ತು ತಿಮ್ಮ ಕರು ನೈ. ಕ್ರಿಸ್ತ ತೆ ಮನಕ್ಹನಾಹುತಿ ಮರ‍್ಯೊ. 16 ತು ಕಯೊ ಚೊ಼ಕು ವ್ಹೈ ವಿಚಾರ ಕರ‍ಶಿಸು ತೆ ಬಿಜಾ಼ವೊನೆ ಕೆಟ್ಟ ವ್ಹೈ ಕೈನ ಕೈಲಿವಾನೆ ದ್ಯು ನಕೊ. 17 ತೆನೈಸೊ ಕ್ಹುದಾನಿ ರಾಜ್ಯಮಾ ಖಾವಾನು ರ‍್ಹೈನೆಕಾ ಪಿವಾನು ರ‍್ಹೈನೆಕಾ ಖಾಸ ನ್ಹವೈ. ನಿತಿ ಸಮಾಧಾನ ಪವಿತ್ರ ಆತ್ಮಾನು ಥಾವಾನಿ ಖುಶಿ ತ್ಯಾ ಖಾಸ ವ್ಹೈ. 18 ಎ ತರಾಮಾ ಕ್ರಿಸ್ತನಿ ಸೆವೆ ಕರಾಲೊ ಕ್ಹುದಾನೆ ಖುಶಿ ಕರಾಲೊ ವ್ಹೈ. ಮನಕ್ಹೊ ತಿನೆ ಮಳೈ ಲಿವಸ.

19 ತಿನಾಹುತಿ ಸಮಾದಾನ ಕರಾನಾ ಕಾಮೊ ಅಪ್ನಾ ಹತೆ ಥಾವಾನು ತೆಕ್ಲು ಕೊಶಿಶ ಕರಿಯೆ. 20 ಕ್ಹುದಾನು ಕಾಮ ಅನ್ನನಾಹುತಿ ಹಾಳ ಕರಾನೆ ದಿವೊ ನಕೊ. ಕ್ಹಾರು ಖಾವಾನು ಅನ್ನ ಚೊ಼ಕುಜ಼ ವ್ಹೈ. ವರಿ ಖಾವಾನೆ ಯೊಗೈ ವ್ಹೈ. ತೆನೈಸೊ ಯಕ್ಲೊ ತೆ ಖಾವಾನು ಅನ್ನನಾ ಮುಲಕ ಬಿಜಕ್ಲಾನೆ ಪಾಪಮಾ ಪಾಡಾನು ರ‍್ಹಯುಮ, ತೆ ಅನ್ನ ಖಾವಾನು ತಪ್ಪ ವ್ಹೈ. 21 ತು ಮಾಕ್ಹ ಖಾವಾನು ವರಿ ದ್ರಾಕ್ಷಾರಸ ಪಿವಾನು, ದ್ರಾಕ್ಷಾರಸ ಪಿದ್ಯಾವಾಚಿ ರ‍್ಹವಾನು ಚೊ಼ಕು ವ್ಹೈ. ಬರೊಕ್ಹಾ ರ‍್ಹಯಲ ತಾರಾ ಭೈನೆ ರ‍್ಹೈನೆಕಾ ಭೆನನೆ ರ‍್ಹೈನೆಕಾ ಪಾಪಮಾ ಪಾಡ್ಯಾವಾಚಿ ರ‍್ಹವಾನು ಚೊ಼ಕು ವ್ಹೈ. 22 ಎ ಸಂಗತಿಯೊನಾಹುತಿ ತುನೆ ರ‍್ಹಯಲ ವಿಶ್ವಾಸ ತುನೆ ವರಿ ಕ್ಹುದಾನೆ ಯಕ್ಕಜ಼ ಗ್ವತ್ತ ರ‍್ಹವಾದೆ. ತಿನೆ ಚೊ಼ಕು ವ್ಹೈ ಕೈನ ತಿಳದಲ ಕಾಮೊ ತೆ ದೊಶಿ ಥೌಸ ಕೈನ ಸಂಶೊ ನೈಸೊ ಕರಾಲೊ ನಶಿಬವಾಲೊ ವ್ಹೈ. 23 ತೆನೈಸೊ ಯಕ್ಲೊ ತೆ ಖಾವಾನು ಅನ್ನ ದೊಶ ನತ್ತಿ ಕೈನ ಸಂಶೊ ಮ್ಹೆಲ್ಲಿನ ಖಾದ್ಯೊಮ, ತಿನಾಕ್ಹು ತಿನೆಜ಼ ತಪ್ಪ ಕರಾಲೊ ವ್ಹೈ ಕೈನ ಕವೈ ಲಿವಸ ಕಾಕದ್ಯಾಮ ತೆ ದೊಶ ನತ್ತಿ ಕವಾನೊ ಬರೊಕ್ಹೊ ತಿಕನ ನತ್ತಿ. ಬರೊಕ್ಹೊನಾ ಆದಾರ ನತ್ತಿ ಕೈನ ಕರಾನುಜ಼ ಪಾಪ ವ್ಹೈ.