ದುಡ್ಕಿನ ಕ್ಹಮ್ಮ ಘಾಲು ನಕೊ
1 ಗುಡಿಯೆ ಜಾ಼ತಾಮಾ ತಾರಾ ಹೆಜ್ಜಿಯೊನೆ ದೆಕ. ಪಿಸಾಳಾವೊನಿ ಬಲಿತಿಬಿ ಸನ್ನಿದಿನೆ ಐನ ಕಾನ ದಿನ ಐಕಾನು ಚೊ಼ಕು ವ್ಹೈ. ತ್ಯುನೆ ತಪ್ಪ ಕರಾಡಾಸ ಕವಾನು ಪಿಸಾಳಾವೊನೆ ಗ್ವತ್ತಜ಼ ನತ್ತಿ.
2 ತಾರಾ ಮ್ಹೊಡಾಕ್ಹು ದುಡಕು ನಕೊ ವರಿ ಕ್ಹುದಾನಾ ಕ್ಹಾಮೊ ಬೊಲಾನೆ ತಾರಾ ಮನಸಮಾ ಗಡಬಡ ಕರು ನಕೊ. ಕ್ಹುದಾ ಪರಲೊಕಮಾ ಛೆ. ತು ಜಿಮಿನಪರ ಛೆ, ತಿನಾಹುತಿ ತಾರಾ ವಾತೊ ಕಮ್ಮ ರ‍್ಹವಾದೆ. 3 ಘನ್ನಿ ಚಿಂತಾಕ್ಹು ಕೆಟ್ಟ ಕ್ಹಪನೊ ಆವಸ ವರಿ ಪಿಸಾಳಾನು ಆವಾಜ಼ ಘನ್ನಾ ವಾತೊಕ್ಹು ಭರಲ ರ‍್ಹವಸ. 4 ತು ಕ್ಹುದಾನೆ ಹರಿಕೆ ಕರ‍್ಯೊಮ ತಿನೆ ಪುರಾ ಕರಾನೆ ಲೆಟ ಕರು ನಕೊ. ಪಿಸಾಳಾವೊಮಾ ಕ್ಹುದಾನೆ ಕ್ಹುಶಿ ನತ್ತಿ. ತು ಪ್ರಮಾಣ ಕರಲ ಪುರಾ ಕರ. 5 ತು ಹರಕೆ ಕರಲನೆ ಪುರಾ ಕರ‍್ಯಾವಾಚಿ ರ‍್ಹವಾತಿ ಹರಿಕೆ ಕರ‍್ಯಾ ಬಗರ ರ‍್ಹವಾನುಜ಼ ಚೊ಼ಕು ವ್ಹೈ. 6 ತಾರು ಮ್ಹೊಡು ತುನೆ ಪಾಪಮಾ ಘಾಲ್ಯಾ ಬಗರ ದೆಕಿಲೆ. "ಎ ತಪ್ಪಕ್ಹು ಥಯು" ಕೈನ ದುತನಾ ಕ್ಹಾಮೊ ಕೌ ನಕೊ. ಕ್ಹುದಾ ತಾರಿ ವಾತಪರ ಶಿಟ್ಟ ಥೈನ ತಾರಾ ಕಾಮೊನೆ ಕಾ ಹಾಳ ಕರು? 7 ಘನ್ನ ಕ್ಹಪನೊಕ್ಹು, ವ್ಯರ್ಥ ವಿಶಯಕ್ಹು, ಘನ್ನಾ ವಾತೊಕ್ಹುಬಿ ವ್ಯರ್ಥಜ಼ ವ್ಹೈ. ತುತಬಿ ಕ್ಹುದಾನಿ ಭಯಭಕ್ತಿ ರ‍್ಹಯಲವಾಲೊ ಥೈನ ರ‍್ಹೆ.
ಜಿಂದಗಿಜ಼ ವ್ಯರ್ಥ ವ್ಹೈ
8 ಸಂಸ್ಥಾನಮಾ ಗರಿಬೊನಾ ತ್ರಾಸನೆ, ನಿತಿನ್ಯಾಯನಾ ನಾಶನೆ ತು ದೆಕ್ಯೊಮ ಘಾಬ್ರೊ ಥೌ ನಕೊ. ಕಾಕದ್ಯಾಮ ಯಕ್ಕ ಅದಿಕಾರಿನಾ ಉಪ್ಪರ ಬಿಜೆಕ್ಲೊ ರ‍್ಹವಸ. ತೆ ಭಂಬಿ ಜ಼ನಾವೊನಾ ಉಪ್ಪರ ಜಾಸ್ತ ಅದಿಕಾರವಾಲೊ ರ‍್ಹವಸ. 9 ಜಿಮಿನಕ್ಹು ಕ್ಹಾರಾವೊನೆ ಫೈದೊ ಛೆ ವರಿ ಖೆತರೊಕ್ಹು ರಾಜಾ಼ನೆ ಫೈದೊ ಥಾವಸ. 10 ದೊಕ್ಡಾನೆ ಆಸ ಕರಾಲಾನೆ ಕೆಕ್ಲಾ ದೊಕ್ಡಾಕ್ಹುಬಿ ತೃಪ್ತಿ ನೈ ಥಾತಿ ವರಿ ಆಸ್ತಿಪರ ಆಸ ರ‍್ಹಯಲವಾಲಾನೆ ಪಗಾರ ಕಕ್ಲೊ ರ‍್ಹಯೊತಬಿ ಬಸ್ಸ ನೈ ಥಾತು. ಎಬಿ ವ್ಯರ್ಥಜ಼ ವ್ಹೈ. 11 ಆಸ್ತಿ ಜಾಸ್ತ ಥಯಮ ಅನುಬವಿಸಾಲಾವೊನಿ ಸಂಕ್ಯಾ ಹೆಚ್ಚ ಥಾವಸ. ತಿನೆ ಡೊಳಾಕ್ಹು ದೆಕಾನು ಛೊಡಿನ ಮಾಲಕನೆ ಬಿಜು಼ ಸುಜ಼ ಫೈದೊ ನತ್ತಿ. 12 ರಾಬಾಲೊ ದಕ್ಹುಜ಼ ಖಾವಾದೆ ಘನ್ನುಜ಼ ಖಾವಾದೆ, ಸಮಾದಾನಕ್ಹು ನಿಂದರ ಕರಸ. ತೆನೈಸೊ ಸೌಕಾರ ರ‍್ಹಯಲವಾಲಾನಿ ಆಸ್ತಿ ತಿನೆ ನಿಂದರ ಕರಾನೆ ದೆತಿ ನೈ. 13 ಸುರ್ಯಾನಾ ಹೆಟು ಮಿ ವರಿಯಕ್ಕ ತ್ರಾಸ ದೆಕ್ಯೊ. ಮಾಲಕ ತಿನಿ ಆಸ್ತಿನೆ ವಾಚಾ಼ಡಾನಾಹುತಿಜ಼ ಕೊರಗತೊ ರ‍್ಹವಸ. 14 ತೆ ಆಸ್ತಿ ವ್ಯರ್ಥ ಮ್ಹೈನತಕ್ಹು ಹಾಳ ಥಾವಸ. ತಿನೆ ದಿಕ್ರೊ ರ‍್ಹಯಮ ತೆ ದಿಕ್ರಾನಾಹುತಿ ತಿನಾ ಹತ್ಮಾ ಸುಜ಼ ನೈ ರ‍್ಹತು. 15 ಮಾನಾ ಪೆಟತೊ ಕಿಮ್ಮ ಆಯೊಸ ತಿಮ್ಮಜ಼ ಸುಜ಼ ನೈ ರ‍್ಹಯಲವಾಲೊ ಥೈನ ಹಾಳ ಥೈನ ಜಾ಼ವಸ. ತೆ ಮ್ಹೈನತ ಕರ‍್ಯೊತಬಿ, ತಿನಾ ಹತ್ಮಾ ಸುಜ಼ ಲಿನ ಜಾ಼ತೊ ನೈ. 16 . ಮನಕ್ಹ ಕಿಮ್ಮ ಆಯೊತೊ ತಿಮ್ಮಜ಼ ಜಾ಼ವಸ. ವಾರಾನಾಹುತಿ ಕರಲ ಮ್ಹೈನತಕ್ಹು ತಿನೆ ಫೈದೊ ಸು ವ್ಹೈ ಎಬಿ ವ್ಯರ್ಥಜ಼ ವ್ಹೈ? 17 ತಿನಿ ಪುರಾ ಜಿಂದಗಿಮಾಜ಼ ಅಂದಾರು ರ‍್ಹವಸ. ತಿನಾ ರೊಗನಾ ಕ್ಹಾತೆ ತಿನೆ ಘನ್ನು ಶಿಟ್ಟ ತ್ರಾಸ ರ‍್ಹವಸ. 18 ದೆಕ, ಮಿ ದೆಕಲ ಎಜ಼ ವ್ಹೈ. ಕ್ಹುದಾ ಯಕ್ಲಾನೆ ದಿದಲ ಜಿಂದಗಿನಾ ಕ್ಹಾರಾ ದಿನ್ನೊಮಾ ತೆ ಅನ್ನ ಪಾನಿ ಲಿನ ತೆ ಲೊಕಮಾ ಕರಾನಿ ಮ್ಹೈನತಮಾಬಿ ಸುಖಾ ಅನುಭವಿಸಸ. ಎ ತಿನೆ ಪ್ರಿ, ಚೊ಼ಕು ಥಯಲ ವ್ಹೈ. ಎಜ಼ ಮನಕ್ಹನು ಪಾಲನು ವ್ಹೈ. 19 ಹರಯಕ್ಕ ಮನಕ್ಹನೆ ಕ್ಹುದಾ ಆಸ್ತಿ ದಿನ, ತಿನೆ ಅನುಭವಿಸಿನ, ಪಾಲೆ ಆಯಲ ಲಿನ ತಿನಾ ಮ್ಹೈನತಮಾ ಕ್ಹುಶಿ ಥಾವಾನೆ ತಾಕತ ದಿದಲ ರ‍್ಹಯಮ ತೆ ತಿನೆ ಮಳಲ ಕ್ಹುದಾನು ಬಹುಮಾನ ವ್ಹೈ. 20 ಹೆವೊ ತಿನಿ ಪುರಾ ಜಿಂದಗಿನಾ ದಿನ್ನೊನೆ ಘನ್ನೊ ಮಾತು ನೈ ಕೆಡಶಿ ಲೆತೊ. ತೆ ತಿನಾ ಮನಸನಾ ಕ್ಹುಶಿನಾ ಘುಂಗಮಾ ರ‍್ಹಯಲ ನಿಂಗತ ಕ್ಹುದಾ ಕರ‍್ಯೊಸ.