ಪ್ರಸಂಗಿ 2

1 ಮಿ ಮನಸಮಾ, "ಹಮ್ನಾ ಆ, ಮಿ ತುನೆ ಕ್ಹುಶಿನಾ ಮುಲಕ ಪರಿಕ್ಷಾ ಕರುಸ. ಸುಖಾ ಅನುಭವಿಸ" ಕೈಲಿದ್ಯೊ. ಆಹಾ! ತೆನೈಸೊ ಎಬಿ ವ್ಯರ್ಥಜ಼ ವ್ಹೈ ಕೈನ ಮಿ ತಿಳ್ದಿಲಿದ್ಯೊ. 2 "ಅಕ್ಹಾನು ಪಿಸಾಳುಪನ್ನ ವ್ಹೈ, ಕ್ಹುಶಿಕ್ಹು ಸು ಸಾದನೆ ಕರುಸ?" ತಿಳ್ದಿಲಿದ್ಯೊ. 3 ಹಬಾಳನಾ ಹೆಟು ಮನಕ್ಹೊನಿ ಕಮ್ಮ ಆಯುಶಮಾ ಸು ಕರಾನು ಚೊ಼ಕು ವ್ಹೈ ಕೈನ ಮಿ ತಿಳ್ದಿಲಿವಾನಾಹುತಿ, ಮಾರು ಮನಸ ಗ್ಯಾನಕ್ಹು ರ‍್ಹತಾಮಾಜ಼ ಅಂಗನೆ ದ್ರಾಕ್ಷಿಯೊನಾ ರಕ್ಹಕ್ಹು ಕ್ಹುಶಿಮಾ ಮ್ಹೆಲಾನೆಬಿ, ಗ್ಯಾನ ನೈಸೊ ರ‍್ಹಯಲನೆ ಆದಾರ ಥೈನ ರ‍್ಹವಾನೆ ಮನಸಮಾ ವಿಚಾರ ಕರಿಲಿದ್ಯೊ. 4 ಮಿ ಮ್ಹೊಟಾ ಕಾಮೊ ಕರ‍್ಯೊ. ಘರೊ ಭಾಂದಿಲಿದ್ಯೊ ವರಿ ದ್ರಾಕ್ಷಿಯೊನಾ ಮಳಾ ಘಾಲ್ಯೊ. 5 ಮಳಾವೊನೆ ವರಿ ಗಾರ್ಡನೊ ಕರೈನ; ತಿಮಾ ಕ್ಹಾರಾ ತರಾನಾ ಬಿಜಾ಼ ಬಿಜಾ಼ ಫಲನಾ ಝಾಡೊ ಘಾಲ್ಯೊ. 6 ಬೆಳದಾನಾ ಝಾಡೊನಾ ಬೆರೊನೆ ಪಾನಿ ಘಾಲಾನೆ ಖಾಡಿಯೊ ಖಂದಾಯೊ. 7 ಗಂಡ ವರಿ ಹೆಣ್ಣಾಳೊನೆ ಲಿದ್ಯೊ; ಮಾರಾ ಮಹಲಮಾ ಇವ್ನಾಕ್ಹು ಗುಲಾಮೊ ಹುಟ್ಯಾ. ತೆನೈಸೊ ಯೆರುಸಲೆಮಮಾ ಪೈಲಾ ರ‍್ಹಯಲವಾಲಾವೊತಿಬಿ ಮಿ ಘನ್ನೊ ಆಸ್ತಿವಾಲೊ ಥೈನ ಬೈಲೊ ಬಕ್ರಾವೊನಾ ಮಂದೆ ವ್ಹಂದಿಲಿದ್ಯೊ. 8 ಮಿ ಕ್ಹೊನು ರುಪ್ಪು ರಾಜಾ಼ವೊನಾ ವರಿ ಪ್ರಾಂತ್ಯನಾ ತೆರಿಗೆ ಜ಼ಮಾ ಕರಿಲಿದ್ಯೊ. ಗಾಯಕ, ಗಾಯಕಿಯೊನೆ ವರಿ ಮನಕ್ಹೊನೆ ಭೊಗ್ಯ ಥಯಲ ಘನ್ನಿಯೊ ಬಾಕ್ಡಿಯೊನೆ ಸಂಪಾದಿಸಿ ಲಿದ್ಯೊ. 9 ಇಮ್ಮ ಯೆರುಸಲೆಮಮಾ ಪೈಲಾ ರ‍್ಹಯಲವಾವೊತಿಬಿ ಜಾಸ್ತ ಅಭಿವೃದ್ದಿ ಥೈನ ಮ್ಹೊಟೊ ಥಯೊ. ತೆನೈಸೊ ಮಾರಿ ಗ್ಯಾನ ಮಾರಾಮಾ ಜ಼ಮಾ ಥೈತಿ. 10 ಮಾರಾ ಡೊಳಾ ಆಸ ಕರಲ ಕ್ಹಾರು, ತಿನೆ ಮಿ ದಿದ್ಯಾ ಬಗರ ರ‍್ಹಯೊ ನೈ. ಕಯುಬಿ ಕ್ಹುಶಿ ಅನುಭವಿಸಾನೆ ಮಾರಾ ಮನಸನೆ ಹುಬ್ರಾಡ್ಯೊ ನೈ. ಕಾಕದ್ಯಾಮ ಮಾರು ಮನಸ ಮಿ ಕರಾನಾ ಕಾಮೊಮಾ ಕ್ಹುಶಿ ಥಾತುತು. ಮಾರಾ ಪ್ರಯಾಸಕ್ಹು ಮನೆ ಮಳಲ ಫಲ ಎಜ಼ ವ್ಹೈ. 11 ತೆಳಾಮಾ ಮಾರಾ ಹತ್ತಕ್ಹು ಕರಲ ಕ್ಹಾರಾ ಕಾಮೊನೆ, ಮಿ ಕರಲ ಪ್ರಯಾಸೊನೆ ಲಕ್ಷಾ ದಿನ ಪರಿಕ್ಷಾ ಕರ‍್ಯೊ, ಆಹಾ, ವಾರಾನೆ ಪಾಚಾ಼ ಲಾಗೆ ಲಿಂಗತಜ಼ ಕ್ಹಾರು ವ್ಯರ್ಥ ಥಯು. ದುನಿಯಾಮಾ ಕಯುಜ಼ ಲಾಭ ದಿಕ್ಹ್ಯು ನೈ. 12 ಗ್ಯಾನನೆ ದೆಕಾನಾಹುತಿ ಫರ‍್ಯೊ, ಮರಳತನಾ ಗ್ಯಾನ ನೈಸೊ ರ‍್ಹವಾನು ದೆಕಾನಾಹುತಿ ಫರ‍್ಯೊ. ರಾಜಾ಼ನಿ ಕೊಶಿಶಜ಼ ಇಮ್ಮ ಥಯಲ್ಪರ ಬಿಜೆಕ್ಲಾಕಂತು ಸು ಥಾಸ? ಥಯಲಜ಼ ಥಾವಸ ಕೈನ ತಿಳ್ದಿಲಿದ್ಯೊ. 13 ಗ್ಯಾನ ಪಿಸಾಳುಪನ್ನತಿಬಿ ಕ್ಹಾಸ ವ್ಹೈ ಕೈನ ಉಜಾಲು ಅಂದಾರಾತಿ ಕ್ಹಾಸ ವ್ಹೈ ಕೈನ ಗ್ವತ್ತ ಥಯು. 14 ಗ್ಯಾನಿನಾ ಡೊಳಾ ತಿನಾ ಮಾತಾಮಾ ರ‍್ಹವಸ ಪಿಸಾಳೊ ಅಂದಾರಾಮಾ ಚಾ಼ಲಸ. ಇವ್ನೆ ಭಂಬಿ ಜ಼ನಾವೊನೆ ಯಕ್ಕಜ಼ ಗತಿ ವ್ಹೈ ಕೈನ ಮನೆ ದಿಕ್ಹಿನ ಐಯು. 15 ತೆಳಾಮಾ ಮಿ ಮಾರಾ ಮನಸಮಾ, "ಪಿಸಾಳಾನೆ ಥಾವಾನಿ ಗತಿ, ಮನೆಬಿ ಥಾವಸ. ಮಾರಿ ಜಾಸ್ತ ಗ್ಯಾನಕ್ಹು ಫೈದೊ ಸುಛೆ?" ಎ ವ್ಯರ್ಥಜ಼ ವ್ಹೈ ಕೈನ ಮಾರಾ ಮನಸಮಾ ತಿಳ್ದಿಲಿದ್ಯೊ. 16 ಕಾಕದ್ಯಾಮ ಪಿಸಾಳೊ ಕಿಮ್ಮ ತಿಮ್ಮಜ಼ ಗ್ಯಾನಿಬಿ ಘನ್ನಾ ದಿನ್ನೊ ಲಕ್ಕಾ ಇಕ್ಹರಿ ಪಡಸ. ಹಮ್ನಾನಾ ಮನಕ್ಹೊ ಅಗಲ್ಯಾ ಕಾಲ ಮಟಾ ಇಕ್ಹರಿ ಪಡಸ. ಆಹಾ! ಪಿಸಾಳಾ ನಿಂಗತ ಗ್ಯಾನಿಬಿ ಮರಸ. 17 ಲೊಕ ವ್ಯವಹಾರ ಕೆಟ್ಟ ವ್ಹೈ ಕೈನ ಮನೆ ದಿಕ್ಹಿನ ಆಯಲಕ್ಹು ಜಿಂದಗಿಜ಼ ಅಸೈ ಥೈನ ದಿಕ್ಹಿ. ವಾರಾನೆ ಪಾಚಾ಼ ಲಾಗೆ ಲಿಂಗತಜ಼ ಕ್ಹಾರು ವ್ಯರ್ಥ ವ್ಹೈ. 18 ಮಾರಿ ಪ್ರಯಾಸನು ಫಲ ಅಗಲ್ಯಾನೆ ಛೊಡಿನ ದ್ಯು ಕೈನ ಮಿ ಲೊಕಮಾ ಕರಲ ಪ್ರಯಾಸನಾಹುತಿ ಬೆಜಾರ ಥಯೊ. 19 ತೆ ಗ್ಯಾನಿ ವ್ಹೈ ಸು ನೈತೊ ಪಿಸಾಳೊ ವ್ಹೈ ಕೈನ ಕಿನೆ ಗ್ವತ್ತ ಛೆ? ಕಯೊ ರ‍್ಹಯೊತಬಿ ಮಿ ಲೊಕಮಾ ಕಿಮಾ ಗ್ಯಾನನೆ, ಪ್ರಯಾಸನೆ ಖರ್ಚ ಕರ‍್ಯೊಸ ತಿನಾ ಉಪ್ಪರ ರಾಜ಼ ಕರುಸ. ಎ ವ್ಯರ್ಥಜ಼ ವ್ಹೈ. 20 ಇಮ್ಮ ರ‍್ಹತಾಮಾ ಮಿ ಲೊಕಮಾ ಪ್ರಯಾಸ ಕರಲ ಕಾಮನಾ ವಿಷಯಮಾ ಬೆಜಾರನೆ ಮ್ಹೈ ಥಯೊ.

21 ಯಕ್ಲೊ ತಿನಾ ಗ್ಯಾನಕ್ಹು, ತಿನಿ ತಿಳಿವಳಕಿಕ್ಹು ತಿನು ಕಾಮಾ ಕರಿನ ತೆ ಕಾಮಮಾ ಮ್ಹೈನತ್ತ ಕರಾಲಾನೆ ತಿನೆ ಆವಾನು ಪ್ರತಿಫಲ ಛೊಡುಲಾಗ್ಯು. ಎಬಿ ವ್ಯರ್ಥ ವ್ಹೈ, ಖಾಲಿ ಅನ್ಯಾಯ ವ್ಹೈ. 22 ಲೊಕಮಾ ಮನಕ್ಹ ಪುರಾ ಮನಸಕ್ಹು ಕರಾನಾ ಪ್ರಯಾಸಕ್ಹು ತಿನೆ ಮಳಾನು ಲಾಭ ಸುವೈ? 23 ತಿನಾ ಕ್ಹಾರಾ ದಿನ್ನೊ ಚಿಂತಾ ವ್ಹೈ. ತಿನು ಕಾಮ ಕ್ಹಾರು ತ್ರಾಸಜ಼ ವ್ಹೈ. ರಾತೆಬಿ ತಿನಾ ಮನಸನೆ ಅರಾಮ ನತ್ತಿ. ಎಬಿ ವ್ಯರ್ಥಜ಼ ವ್ಹೈ. 24 ಅನ್ನ ಪಾನನೆ ಲಿನ ತಿನಾ ಪ್ರಯಾಸಮಾ ಸುಖಾ ಅನುಭವಿಸಾತಿಬಿ ಮನಕ್ಹನೆ ತಿತ್ತಿ ಮ್ಹೊಟು ಸು ನತ್ತಿ. ಎ ಕ್ಹುದಾಕ್ಹು ಥಯು ಕವಾನು ಗೊತ್ತ ಥಯು. 25 ಕ್ಹುದಾ ಬಗರ ಕುನಬಿ ಭೊಜನ ಕರಿನ ಸುಖಾ ಅನುಭವಸಾನು ಕಿಮ್ಮ ವ್ಹೈ? 26 ಕ್ಹುದಾ ತೆ ಮೆಚ್ಚಲವಾಲಾನೆ ಗ್ಯಾನ, ತಿಳುವಳಿಕೆ, ಸಂತೊಷ ದಿವಸ. ತೆನೈಸೊ ಕ್ಹುದಾನಾ ನಜರಮಾ ಚೊ಼ಕಾ ಮನಕ್ಹನೆ ದಿವಾನಾಹುತಿ ಜ಼ಮಾ ಕರಿನ ದಿವಾನಾಹುತಿ ಪಾಪಿನೆ ರ‍್ಹೈತಬಿ ಪ್ರಯಾಸ ದಿವಸ. ಎ ವಾರನೆ ಪಾಚಾ಼ ಮ್ಹೆಲಲ ತಿಮ್ಮಜ಼ ವ್ಯರ್ಥ ವ್ಹೈ.