ಪ್ರಸಂಗಿ 6

1 ಆಂ ಲೊಕಮಾ ಮನಕ್ಹೊನೆ ಘನ್ನು ಅನ್ಯಾಯ ಥಾವಾನು ದೆಕ್ಯೊ. 2 ತೆ ಸುವೈ ಕದ್ಯಾಮ ಕ್ಹುದಾ ಯಕ್ಲಾನೆ ಕಯಾ ಪಸಂದಕ್ಹು ಕಯುಜ ಕೊರೆತೆ ನೈಸೊ ಧನ ದೌಲತ ವರಿ ಘನತೆ ದಿವಸ. ತೆನೈಸೊ ತಿನೆ ಅನುಭವಿಸಾನೆ ಕ್ಹುದಾ ತಿನೆ ತಾಕತ ದಿದ್ಯೊ ನೈ. ತೆ ವರಿಯಕ್ಲೊ ಅನುಭವಸಸ ಎಬಿ ವ್ಯರ್ಥ ವೈ ಕೆಟ್ಟ ಥಯುಸ. 3 ಕ್ಹೊ ಬಚ್ಚಾವೊನೆ ಪಡ್ದಿನ ಗಡಿಯೊ ಥಯೆಲಕ್ಕಾ ಘನ್ನಾ ವರಕ್ಹ ಜ್ಯುತೊ ರ‍್ಹಯಲವಾಲಾನೆ ಸಂತೃಪ್ತಿ, ಅಂತೈಕ್ರಿರೆ ನೈ ರ‍್ಹಯಾಮ, ತಿನಾತಿ ಹುಟ್ತಾಮಾ ಮರಿ ಗಯಲ ಬಚ್ಚು಼ ಕೆಕ್ಲುಕಿ ಚೊ಼ಕು ವ್ಹೈ ಕೈನ ವಿಚಾರ ಕರ‍್ಯೊ. 4 ಎ ವ್ಯರ್ಥ ಥೈನ ಆವಸ. ಅಂದಾರಾಮಾ ಜ಼ವೈ ಜ಼ಾವಸ. ಅಂಧಕಾರಬಿ ತಿನಾ ನಾಮೆನೆ ಝಕೈನ ರ‍್ಹವಸ. 5 ತೆ ಸೂರ್ಯಾನೆ ದೆಕ್ಯು ನತ್ತಿ. ತಿನೆ ತಿಳುವಳಿಕೆ ನತ್ತಿ. ರ‍್ಹೈತಬಿ ತಿನಾತಿಬಿ ತಿನಿ ಶಾಂತಿಜ಼ ಹೆಚ಼್ಚ ವ್ಹೈ 6 ಬೆ ಹಜಾ಼ರ ವರಕ್ಹ ತೆ ಜ಼್ಯುತೊ ರ‍್ಹೈತಬಿ ತೆ ತಿನಿ ಆಸ್ತಿನೆ ಅನುಭವಿಶ್ಯೊ ನೈ. ಕ್ಹಾರಾಜ಼ನಾ ಯಕ್ಕಜ ಜ಼ಗಾಕನ ಜಾ಼ವಸ್ತೊ. 7 ಮನಕ್ಹ ಪಡ್ದಾನು ಕಸ್ಟಕ್ಹಾರು ತಿನಾ ಪೆಟನಾಹುತಿ ವ್ಹೈ, ರ‍್ಹೈತಬಿ ತಿನೆ ತೃಪ್ತಿ ನತ್ತಿ. 8 ಪಿಸಾಳಾತಿಬಿ ಜ್ಞಾನಿನೆ ಹೆಚ್ಚ ಫೈದೊ ಸು ಛೆ? ಮನಕ್ಹೊನಾ ಕ್ಹಾಮಾ ಚ಼ೊಕಿತರಾ ಚಾಲಾನೆ ನೈ ತಿಳದಲವಾಲಾ ಗರಿಬನೆ ಸು ಫೈದೊ ವ್ಹೈ? 9 ಬಿಜು಼-ಬಿಜು಼ ಆಸಕರಾತಿ ಡೊಳಾನಾ ಕ್ಹಾಮು ರ‍್ಹಯಲ ಅನುಭವಿಸಾನು ಚೊ಼ಕು ವ್ಹೈ. ಎಬಿ ವಾರಾನೆ ಪಾಚಾ಼ ಲಾಗಲ ನಿಂಗತ ವ್ಯರ್ಥ ವ್ಹೈ. 10 ಮನಕ್ಹ ಕೆವೊ ರ‍್ಹೈತಬಿ ಪೈಲಾ ತಿನೆ ದಿದಲ ನಾಮಕ್ಹು ತೆ ಮಾತಿನೊ ವ್ಹೈ ಕೈನ ಗ್ವತ್ತ ಥಯುಸ. ತಿನಾತಿಬಿ ಹೆಚ್ಕಿ ತಾಕತವಾಲಾನಾ ಕ್ಹಾತೆ ವಾದ-ವಿವಾದ ಕರಾನೆ ಥಾತು ನೈ. 11 ವಾತೊ ಹೆಚ಼್ಚ ಥಯಲ ತೆಕ್ಲು ಪರಿಣಾಮ ಕಮ್ಮ ವ್ಹೈ, ತಿನಾಕ್ಹು ಮನಕ್ಹನೆ ಸು ಫೈದೊ ವ್ಹೈ? 12 ಛೌಲಿ ನಿಂಗತ ವ್ಯರ್ಥ ಥೈನ ಜಾವಾನಾ ಮನಕ್ಹನಾ ಜಿಂದಗಿಮಾ ದಿನ್ನೊ ಕ್ಹಾರಾ ತಿನೆ ಕಯು ಉಪ್ಪರ ವ್ಹೈ ಕೈನ ಕಿನೆ ಗೊತ್ತ ವ್ಹೈ? ತೆ ಮರಲ್ಪರ ಆಲೊಕಮಾ ಸು ಥಾವಸ ಕೈನ ತೆ ಕಿಕ್ಹು ತಿಳದಿಲಿದ್ಯೊ?