ಪ್ರಸಂಗಿ 8

1 ಗ್ಯಾನಿ ಲಿಂಗತ ರ‍್ಹವಾಲೊ ಕುನ್ನ ವ್ಹೈ? ವಿಶಯನೆ ತಿಳಸೈನ ಕವಾಲೊ ಕುನ್ನ ವ್ಹೈ? ಗ್ಯಾನಕ್ಹು ಯಕ್ಲಾನು ಮ್ಹೊಡು ಉಜಾ಼ಳು ಹೊಂದಿಲಿವಸ, ಒರಟ ಮ್ಹೊಡು ಬದಲಿ ಥಾವಸ.

ರಾಜಾ಼ನಿ ಆಗನ್ಯಾ ಪುರಾ ಕರ

2 ಕ್ಹುದಾನಾ ಉಪ್ಪರ ಘಾಲಲ ಖಮ್ಮನಾ ನಿಮಿತ್ತ ರಾಜಾ಼ನಾ ಆಗನ್ಯಾ ಐಕಿಲಿನ ಜೌ಼ಕೈನ ಮಾರು ಭೊದನೆ ವ್ಹೈ. 3 ರಾಜಾ಼ನಿ ಸನ್ನಿದಿಮಾತೊ ಭಾರೊ ಕಾಡಾನೆ ಅಗೊಪಾಚೊ ಕರು ನಕೊ. ದ್ರೊಹನೆ ಸೆರು ನಕೊ. ತಿನಾ ಇಚ್ಛಾನಾ ನಿಂಗತ ಕರಸಕಸ. 4 ರಾಜಾ಼ನಿ ವಾತಮಾ ಅಧಿಕಾರ ಛೆ "ತು ಸು ಕರಾಡೊಸ?" ಕೈನ ಕುನ್ನ ಪುಚ್ಚಸಕಸ. 5 ರಾಜಾ಼ನಿ ಆಗನ್ಯಾ ಐಕಾಲೊ ಕಷ್ಟನೆ ಅನುಭವ ಕರ್ತೊ ನೈ. ಕಾಕದ್ಯಾಮ ನ್ಯಾಯ ವಿಚಾರಣೆ ಛೆ ಕವಾನು ಗ್ಯಾನಿನೆ ಗ್ವತ್ತ ಛೆ. 6 ಹರಯಕ್ಕ ಕಾರ್ಯನೆ ಯಕ್ಕ ಕಾಲ ವರಿ ಯಕ್ಕ ತಿರ್ಪ ರ‍್ಹವಸಜ಼, ಮನಕ್ಹ ಪಡ್ದಾನಾ ತ್ರಾಸ ತಿನೆ ಭಯಂಕರ ಥಯಾಸ. 7 ಅಗು ಸು ಥಾವಸ ಕೆನೆಜ಼ ಗೊತ್ತ ನತ್ತಿ . ಅಗು ಥಾವಾನು ತಿನೆ ಕವಾಲು ಕುನ್ನ ವ್ಹೈ? 8 ವಾರಾನೆ ತಡ್ದಾನೆ ಶಕ್ತಿ ಕಿಮ್ಮ ಕಿನೆಜ಼ ನತ್ತಿ, ತಿಮ್ಮಜ಼ ತಾರೊ ಮರಾನೊ ದಿನ ತಡ್ದಾನೆ ತಾಕತ ಕಿನೆಜ಼ ನತ್ತಿ. ಯುದ್ದನಾ ಕಾಲಮಾ ಕಿಮ್ಮ ಟೈಮ ಮಳತು ನೈತೊ, ತಿಮ್ಮಜ ದುಷ್ಟನೆ ದುಷ್ಟತನಾಕ್ಹು ಬಿಡುಗಡೆ ನತ್ತಿ.

ಕೆಟ್ಟ ಮನಕ್ಹ ವರಿ ಚೊ಼ಕೊ ಮನಕ್ಹ

9 ಮಿ ಆಂ ಕ್ಹಾರು ದೆಕಿನ, ಆಂ ಲೊಕಮಾ ಹರಯಕ್ಕ ಥಾವಾನಾ ಕಾರ್ಯಾವೊನೆ ಪರಿಕ್ಷಾ ಕರ‍್ಯೊಸ. ಯಕ್ಕ ಮನಕ್ಹ ಹಜಿಯಕ್ಲಾನಾ ಉಪ್ಪರ ಅದಿಕಾರ ಚಲೈನ ತಿನೆ ಹಾನಿ ಕರಾನೊ ಕಾಲ ಎಜ಼ ವ್ಹೈ. 10 ತೆನೈಸೊ ಕೆಟ್ಟ ಮನಕ್ಹನೆ ಮಾತಿ ಥಾವಾನು ದೆಕ್ಯೊ. ತ್ಯುನೆ ಸುಖಾಕ್ಹು ರ‍್ಹವಸ. ಧಾರ್ಮಿಕೊ ಪರಿಶುದ್ದ ಜ಼ಗಾತಾ ಜೌ಼ ಲಾಗ್ಯೂ. ಗಾಮ್ಮಾ ತ್ಯುನಿ ಸ್ಹೆಂ ನೈಸೊ ಥೈಗಯಿ. ಎ ವ್ಯರ್ಥ ವ್ಹೈ. 11 ಅಪರಾದನೆ ದಿದಲ ದಂಡಬಿ ಥಯಲ ಕಾರಣ ಅಪರಾಧ ಕರು ಕೈನ ವಿಚಾ಼ರಬಿ ಮನಕ್ಹನಾ ಮನಸಮಾ ಭರಿನ ಪಡಸ. 12 ಯಕ್ಲೊ ಪಾಪಿಬಿ ಕ್ಹೊ ಸಲಾ ಅಪರಾದ ಕರ‍್ಯೊತಬಿ ವಾಚಿನ ರ‍್ಹೆ ಸಕಸ, ತ್ಯುನೆ ಸು ಕವಾಡಾಸ ಕವಾನು ಮನೆ ಗ್ವತ್ತ ಛೆ; ತುಮೆ ಕ್ಹುದಾನೆ ವಿಧೆಯ ಥಯಾರೆ ಕ್ಹಾರು ಚೊ಼ಕೊಜ಼ ಥಾವಸ. 13 ತೆನೈಸೊ ದುಷ್ಟನೆ ಚೊ಼ಕು ಥಾತು ನೈ. ಛೌಲಿ ನಿಂಗತ ರ‍್ಹವಾನಾ ತಿನಾ ದಿನ್ನೊ ಹೆಚ಼್ಚ ಥಾತಾ ನೈ. ಕಾಕದ್ಯಾಮ ತೆ ಕ್ಹುದಾನೆ ವಿಧೆಯ ಥಾತೊ ನೈ." 14 ತೆನೈಸೊ ಲೊಕಮಾ ಥಾವಾನು ಯಕ್ಕ ವ್ಯರ್ಥ ಛೆ. ದುಷ್ಟನಾ ನಡತೆನೆ ತಿನಾತಕ್ಕ ಗತಿ ಚೊಕಾನೆ ಥಾವಸ. ಚೊಕಾನಾ ನಡತೆನೆ ತಕ್ಕ ಗತಿ ದುಷ್ಟೊನೆಬಿ ಥಾವಸ. ಎ ವ್ಯರ್ಥ ವ್ಹೈ ಕೈನ ಮಿ ಕದ್ಯೊ. 15 ತಿನಾಹುತಿ ಮಿ ಕ್ಹುಶಿನೆ ಕದ್ಯೊ. ಕಾಕದ್ಯಾಮ ಮನಕ್ಹನೆ ಲೊಕಮಾ ಪಿವಾನು , ಕ್ಹಾವಾನು, ಕ್ಹುಶಿ ಕರಸ ನೈತೊ ಬಿಜು ಸುಜ಼ ಚೊ಼ಕು ನವೈ. ಲೊಕಮಾ ಕ್ಹುದಾ ತಿನೆ ದಿದಲ ದಿನೊಮಾ ತೆ ಪಡ್ದಾನಾ ಪ್ರಯಾಸಮಾ ಕ್ಹುಶಿಜ಼ ಸೆರಲ ರ‍್ಹವಸ. 16 ಮಿ ಮಾರಾ ಮನಸಮಾ ಗ್ಯಾನನೆ ಪಡ್ದಾನೆ, ಲೊಕಮಾ ಚಾಲಾನಾ ತಿಳದಿಲಿವಾನೆ ಕೊಶಿಸ ಕರ್ತಾಮಾ, ಮಿ ದೆಕಲ ಸಂಗತಿ ಸುವೈ ಕದ್ಯಾಮ, " ಯಕ್ಲೊ ದಿನರಾತ ಡೊಳಾವೊನೆ ನಿಂದರವಾಚಿ ಹುಶಾರ ರ‍್ಹವಸ, 17 ಕ್ಹುದಾನಾ ಕ್ಹಾರಾ ಕಾಮೊನೆ ವರಿ ಲೊಕಮಾ ಕರಾನಾ ಕಾಮೊನೆ ಮನಕ್ಹ ಹೊಂದಿಲಿವಾನೆ ಸಾಧ್ಯ ಥಾತು ನೈ. ಮನಕ್ಹ ತಿನೆ ಹುಡ್ಕಾನಾಹುತಿ ಕೆಕ್ಲೊ ಕೊಶಿಶ ಕರಿತಬಿ ತಿನೆ ಪಡ್ದಿಲೆತೊ ನೈ. ಹಾಂ, ಗ್ಯಾನಿ ತಿನೆ ಪಡ್ದಿಲಿವಾನೆ ವಿಚಾರ ಕರ‍್ಯೊತಬಿ ತೆ ತಿನೆ ಪಡ್ದಿಲೆತೊ ನೈ."