Rute 1

ಎಲಿಮೆಕನು ಕುಟುಂಬ ಮೊವ್ಯಾಬ ದೆಶೆ ಗಯಲ

1 ಪೈಸಲೊ ಕರಲಾವೊನಾ ಕಾಲಮಾ ಆಳತಾಮಾ ದೆಶಮಾ ಬರಗಾಲ ಆಯಲಹುತಿ ಯೆಹುದಾ ಪ್ರಾಂತ್ಯನೊ ಬೆತ್ಲೆಹೆಮವಾಲೊ ಯಕಲೊ ತಿನಿ ಬೈಕೊ, ಬೆ ದಿಕ್ರಾವೊನಾ ಕ್ಹಾತೆ ಮೊವಾಬ್ಯ ದೆಶಮಾ ರ‍್ಹೌ ಕೈನ ಗಯೊ. 2 ತೆ ಮನಕ್ಹನೆ ಎಲಿಮೆಲಕ ಕೈನ ತಿನಿ ಬೈಕೊನೆ ನೊವೊಮಿ ಕೈನ ಬೆ ಬಚ್ಚಾ಼ ವ್ಹತಾ. ಮಹ್ಲೊನ, ಕಿಲ್ಯೊನ. ಕೈನ ನಾಮ ವ್ಹೈ. ಯೆಹೊದಾ ದೆಶನ ಮಳಲ ಎಫ್ರಾತಮಾ ರ‍್ಹಯಲ ಬೆತ್ಲೆಹೆಮವಾಲಾ ರ‍್ಹಯಲ ಇವ್ನೆ ಐನ ಮೊವ್ಯಾಬ ದೆಶಮಾ ಪ್ರವಾಸವಾಲಾ ರ‍್ಹಯಾ. 3 ತೆಳಾಮಾ ನೊವೊಮಿನೊ ಮಾಟಿ ರ‍್ಹಯಲ ಎಲಿಮೆಲಕ ಮರ‍್ಯೊ. ತೆ ಭಂಬಿ ಪಟ್ಟಾವೊನಾ ಕ್ಹಾತೆ ವಾಚಿತಿ, 4 ಎ ಬಚ್ಚಾ಼ ಒರ್ಫಾ, ರುತ ನಾಮ ಕವಾಲಿಯೊ ಮೊವ್ಯಾಬ್ಯನಿಯೊ ಬಾಕ್ಡಿಯೊನೆ ಹಿವಾ ಕರಿಲಿನ ತ್ಯಾ ಕಮ್ಸಿ ಕಮ್ಮ ದಕ್ಹ ವರಕ್ಹ ಲಕ್ಕಾ ತ್ಯಾಜ಼ ವ್ಹತಾ. 5 ತ್ಯುನೆ ತ್ಯಾ ರ‍್ಹತಾಮ ನವೊಮಿನಾ ಭಂಬಭಿ ಪಟ್ಟಾ ಮರಿಗಯಾ ಇಮ್ಮ ತೆ ಬಾಕ್ಡಿ ಮಾಟಿನೆ ಭಂಬಿ ಬಚ್ಚಾವೊನಿ ಜೈವೈಲಿನ ಯಕ್ಲಿಜ಼ ಥೈಗೈ.

ನವೊಮಿ ವರಿ ರುತ ಬೆತ್ಲೆಹೆಮೆ ವಾಪಾಸ ಆಯಲ

6 ಯಹೊವಾ ತಿನಾ ಮನಕ್ಹೊನೆ ಆಶಿರ್ವಾದ ದಿನ ಅನಾಜ಼ ದಿದ್ಯೊಸ ಕೈನ ಸುದ್ದಿ ಐಕಿನ ನೊವೊಮಿ ಮೊವ್ಯಾಬ್ಯ ದೆಶತಿ ತಿನಾ ಸ್ವಂತ ದೆಶೆ ಜೌ಼ ಕೈನ ವ್ಹೌವೊನಾ ಕ್ಹಾತೆ ಜಾ಼ತಾಮಾ, 7 ತೆ ತಿನಿಯೊ ವ್ಹೌವಾನಾ ಕ್ಹಾತೆ ರ‍್ಹಯಲ ಜ಼ಗಾತಿ ಯಹುದಾ ದೆಶೆ ಜಾ಼ವಾನಿ ವಾಟಮಾ ನವೊಮಿ ತ್ಯುನೊನೆ, 8 "ತುಮಾರಾ ತುಮಾರಾ ಮಾ ಪಾಪನಾ ಘರೆ ಜಾ಼ವೊ; ತುಮೆ ಮಾರಾ ಮರಲ ದಿಕ್ರಾವೊನೆ ಮಯಾ ಕರಲನಿಂಗತ ಯಹೊವಾ ತುಮೊನೆ ಮಯಾ ಕರಿನ ತುಮೊನೆ ಮರ್ಗಾದೆ. 9 ತುಮೆ ಭಂಬಿಜ಼ನಿಯೊ

ಹಿವಾಕರಿಲಿನ ಮಾಟಿನಾ ಘರ್ಮಾ ಸುಖಾಮಾ ರ‍್ಹವಾ ವರಕ್ಹು ಯಹೊವಾ ಆಶೊರ್ವಾದ ದಿವಾದೆ ಕೈನ ಮಟ್ಟಿಲಿದಿ. ತೆಳಾಮಾ ತ್ಯುನೆ ಘನ್ನಿಯೊ ರ್ವಯ್ಯೊ. 10 ತೆಳಾಮಾ ತ್ಯುನೆ ಹಮೆ ತಾರಾ ಕ್ಹಾತೆ ಅಪ್ನಾ ಮನಕ್ಹೊಕನಜ಼ ಐಯೆಸ ಕದಿಯೊ.

11 ತೆಳಾಮಾ ನವೊಮಿ ತ್ಯುನೊನೆ ಮಾರಿ ದಿಕ್ರಿಯೊ, ತುಮೆ ಮಾರಾ ಕ್ಹಾತೆ ಆವಾನು ಕಾ? ಪಾಚಿಯೊ ಫರಿನ ಗೈಪಡೊ, ತುಮೊನೆ ಮಾಟಿಯೊ ದಿವಾನೆ ಮಾರಾ ಬಚ್ಚಾ಼ ನತ್ತಿ. 12 ಬಿಜೆಕ್ಲಾನೆ ಹಿವಾ ಕರಿಲಿವಾನೆಬಿ ಮಿ ಜಾಂಜಿಮಾನ ನತ್ತಿ. ತಿನಾಹುತಿ ಮಾರಿಯೊ ದಿಕ್ರಿಯೊ ತುಮೆ ಪಾಚಾ಼ ಫರಿನ ಜಾವೊ, ವರಿಬಿ ಹಿವಾ ಕರಿಲಿನ ಬಚ್ಚಾ಼ ಜ಼ನ್ನಿಮಿ, 13 ತ್ಯುನೆ ಮ್ಹೊಟಾ ಥಾಯೆಲಕ್ಕಾ ಕೈದೊಶಿಸು? ತ್ಯಾಲಕ್ಕಾ ಮಾಟಿಯೊ ನೈಸೊ ರ‍್ಹವೊಶಿಸು? ಮಾರಿ ದಿಕ್ರಿಯೊ ತಿಮ್ಮ ಕರೊ ನಕೊ; ಕಾಕದ್ಯಾಮ ಯೆಹೊವಾನೊ ಹತ್ತ ಮಾರಾ ವಿರುದ್ದ ರ‍್ಹಯಲ ಹುತಿ ಮಿ ತುಮಾರಾ ಹುತಿ ಘನ್ನಿ ದುಖ ಪಡ್ದುಸ ಕದಿ.

14 ತೆಳಾಮಾ ತ್ಯುನೆ ವರಿ ಘನ್ನಿಯೊ ರ್ವಯ್ಯೊ. ತೆಳಾಮಾ ಒರ್ಫ ಫೈನೆ ಮಟ್ಟಿಲಿನ ಗೈ, ರುತತೊ ಫೈನೆ ಛೊಡಿನೆ ಗೈನೈ. 15 ತೆಳಾಮಾ ನೊವೊಮಿ ರುತನೆ ದೆಕ ತಾರಿ ದೆರಾಣಿ ಫರಿನ ತ್ಯುನಾ ಮನಕ್ಹೊಕನ ವರಿ ತ್ಯುನಾ ದಿವಸ್ತಾನೊಕನ ಜಾ಼ವಸ. ತುಬಿ ತಿನಾನಿಂಗತಜ಼ ತುಮಾರಾ ಮನಕ್ಹೊಕನ ಜಾ಼ ಕದಿ.

16 ತೆಳಾಮಾ ರುತ ತುನೆ ಛೊಡಿನ ಜೌ಼ ಕೈನ ಮನೆ ಜಬರದಸ್ತಿ ಕರು ನಕೊ. ತು ಕಿಜ್ಗಾ ಗೈತಬಿ ಮಿ ತ್ಯಾ ಔಸ ತು ರ‍್ಹಯಲ ಜ಼ಗಾ ಮಿಬಿ ರ‍್ಹೌಸ; ತಾರಾ ಮನಕ್ಹೊಜ಼ ಮಾರಾ ಮನಕ್ಹೊ ವ್ಹೈ; ತಾರೊ ಕ್ಹುದಾ ಮಾರೊ ಕ್ಹುದಾ ವ್ಹೈ. 17 ತು ಮರಾನಿ ಜ಼ಗಾ ಮಿಬಿ ತ್ಯಾಜ ಮರುಸ. ತ್ಯಾಜ಼ ಮಾರಿ ಮಜಾ಼ರ ಥೌ. ಮೌತಕ್ಹು ತುಕ್ಹು ದುರ ಥೈಮ ಯಹೊವಾ ಮನೆ ಕೆಕ್ಲಿಬಿ ಶಿಕ್ಷಾ ದಿವಾದೆ.

18 ತೆ ತಿನಾ ಕ್ಹಾತೆ ಆವಾನೆ ಘಟ್ಟ ಥೈಗೈಸ ಕೈನ ನವೊಮಿನೆ ಗ್ವತ್ತ ಥೈನ ಗಪ್ಪಜ಼ ರ‍್ಹೈ.

19 ವರಿ ತ್ಯುನೆ ತ್ಯಾಂತಿಯೊ ಬೆತ್ಲೆಹೆಮೆ ಐನ ಗಾಮ್ಮಾ ಆತಾಮಾ ತ್ಯಾ ತ್ಯಾನಿಯೊ ಬಾಕ್ಡಿಯೊ ಘಾಬ್ರಿಯೊ ಥೈನ ನವೊಮಿ ವ್ಹೈ ಕೈನ ವಳಕಿನೆ ತಿನೆ ಬೊಲಾಡಿಯೊತಿಯೊ

20 ತೆಳಾಮಾ ತೆ ತ್ಯುನೊನೆ ಮನೆ ನವೊಮಿ ಕೈನ ಬಲಾವೊನಕೊ; ಯೆಹೊವಾ ಮನೆ ಘನ್ನೊ ದುಖ ಕರ‍್ಯೊಸ, ಮನೆ "*1:20 ಮಾರಾ ಕವಾನಿ ಶಬ್ದನೊ ಮತ್ಲಬ ಕಡುಮಾರಾ" ಕೈನ ಬಲಾವೊ. 21 ಮಿ ಕ್ಹಾರು ಕ್ಹಾರುಜ಼ ರ‍್ಹಯಲವಾಲಿ ಥೈನ ಗೈತಿ; ಸರ್ವ ಶಕ್ತ ಯಹೊವಾ ಮನೆ ಗತಿಗೆಡಿ ಕೈನ ಆವಾವರಕ್ಹು ಕರ‍್ಯೊಸ. ಯಹೊವಾ ಮಾರಾ ವಿರುದ್ದ ಸಾಕ್ಷಿ ಕದ್ಯೊಸ. ಯಹೊವಾ ಮನೆ ತ್ರಾಸ ದಿದ್ಯೊಸ. ತಿನಾಹುತಿ ತುಮೆ ಮನೆ ನವೊಮಿ ಕೈನ ಬಲಾವಾನು ಕಾ?

22 ಇಮ್ಮ ನವೊಮಿ ಮೊವಾಬ್ಯ ವಾಲಿ ಥಯಲ ತಿನಿ ವ್ಹೌ ರುತನಾ ಕ್ಹಾತೆ ಬೆತ್ಲೆಹೆಮೆ ಐ ತೆಳಾಮಾ ಜವೆ ಘೌನು ಸುಗ್ಗಿ ಸುರು ಥೈತಿ.