1 شِلِ قَنيِ قَن دَنفِ لَبُندّ قَنيِ رَ.

عِ قَشَ لْشْي قَن دَنفِ عِ بَرِ لْشْي رَ.

2 سٌقٍ كَاحّ بَنشِ قِسَ سٌقٍ شُلُن بَنشِ بّ،

بَرِ مَ قَشّ رَفِرِشِ عَدَ مَ بِرِن بّ.

عَ لَنمَ مِشِ بَلٌشِ شَ رَتُ نَ مَ.

3 سُننُنيِ قِسَ يٍلٍ بّ،

بَرِ مَ مِشِ بْحّ قَنيِ سْتْمَ نّ سُننُنيِ كُي.

4 شَشِلِمَ عَ حْشْ رَ سِفَمَ نّ قَشّ مَ،

شَشِلِتَرٍ تَن نَ يٍلٍقٍ نَن تُي.

5 شَشِلِمَ شَ شُرُي قِسَ شَشِلِتَرٍ شَ مَتْشْي بّ.

6 شَشِلِتَرٍ شَ يٍلٍ لُشِ نّ

عَلْ بٌلٍيٍ نَشٍيٍ مَبُلَمَ تُندٍ بُن مَ.

قٍ قُقَقُ نَن نَ كِ.

7 كْبِرِ تِنشِنتَرٍ عَ نِيَمَ نّ شَشِلِمَ شَ قِندِ شَشِلِتَرٍ رَ،

يٍ دْشْي عَ بْحّ مَقِندِ مَ نّ.

8 قٍ رَحْنيِ قِسَ عَ قْلّ بّ.

مِشِ سَبَرِشِ قِسَ يّتّ عِفبٌي بّ.

9 عِ بْحّ نَشَ فبَتَ تٍدٍ،

بَرِ مَ شَشِلِتَرٍيٍ بْحّ نَن تٍمَ.

10 عِ نَشَ لُ عَ قَلَ رَ، «سِنفٍ دَنفِ يَكْسِ رَ.»

شَشِلِمَيَ وْيّنيِ مُ نَ نَ رَ.

11 شَشِلِمَيَ لُشِ نّ عَلْ كّ،

عَ مُنَقَنيِ نَ دُنِحَ مِشِ بِرِن بّ.

12 شَشِلِمَيَ قِندِشِ مِشِ شَ كَنتَرِ نَن نَ،

كْبِرِ قَن قِندِشِ مِشِ شَ كَنتَرِ نَن نَ،

كْنْ شَشِلِمَيَ نَن قِسَ،

بَرِ مَ عَ شَشِلِمَ رَكِسِمَ.

13 عَلَ شَ وَلِ مَتٌ.

عَ نَشَن مَدَلِن، ندٍ نْمَ نَ مَتِنشِندٍ؟

14 عِ شَ سّيوَ هّيرِ تّمُي.

تْورّ تّمُي نَ عَ لِ، عِ شَ رَتُ عَ مَ،

عَ عَلَ نَن نَ قِرِنيِ بِرِن دَاشِ.

نَ كُي عَدَ مَدِ مُ نْمَ عَ شَ تِنَ كٌلٌندٍ.

15 ﭑ مَ سِمَيَ قُقَقُ كُي،

ﭑ عَ تٌشِ نّ تِنشِنتْي ندٍ قَشَ سِمَيَ دُنكٍ كُي هَلِ عَ تٌ تِنشِنشِ،

تِنشِنتَرٍ ندٍ بُ دُنِحَ هَلِ عَ تٌ مُ تِنشِن.

16 عِ نَشَ عِ يّتّ قِندِ تِنشِنتْي رَ،

عِ نَشَ عِ يّتّ قِندِ لْننِلَ رَ،

شَ نَ مُ عَ رَ عِ عِ يّتّ كَنَمَ نّ.

17 عِ نَشَ قِندِ تِنشِنتَرٍ رَ،

شَ نَ مُ عَ رَ عِ قَشَمَ نّ بٍينُ عِ شَ وَشَتِ شَ عَ لِ.

18 عَ لَنمَ عِ شَ عِ حْشْ سَ نَ مَرَ سِ قِرِنيِ شْن مَ.

عَلَ شَ يَرَفَاشُي شَ قٍ سْونّيَمَ نّ نَ بِرِن كُي.

19 شَشِلِمَ شَ شَشِلِمَيَ عَ سّنبّ فبٌمَ نّ دَنفِ تَا مَنفّ قُ رَ.

20 تِنشِنتْي مُ نَ يِ دُنِحَ مَ،

نَشَن قٍ قَنيِ تُن نَبَمَ، عَ مُ يُنُبِ يٌ رَبَ.

21 عِ نَشَ عِ تُلِ مَتِ مِشِ شَ وْيّنيِ بِرِن نَ،

شَ نَ مُ عَ رَ عِ قَمَ عِ شَ كٌنيِ شُي مّدٍ عَ عِ دَنكَمَ،

22 عَلْ عِ تَن يَتِ بَرَ عَ رَبَ سَنيَ وُيَشِ مِشِيٍ رَ.

23 ﭑ نَ بِرِن عِفبّشِ نّ شَشِلِمَيَ رَ.

ﭑ نَشَ عَ قَلَ، «ﭑ شَ قِندِ شَشِلِمَ رَ،»

كْنْ ﭑ مُ نْ.

24 شَشِلِمَيَ تَن تِلِن، عَ مَكُيَ وٌن نَ،

ندٍ نْمَ عَ قَهَامُدٍ؟

25 نَ كُي ﭑ نَشَ كَتَ نَ كٌلٌندٍ،

ﭑ شَ سٌ شَشِلِمَيَ كُي، ﭑ شَ قَهَامُي سْتْ،

ﭑ شَ عَ كٌلٌن تِنشِنتَرٍيَ قِندِشِ شَشِلِتَرٍحَ نَن نَ،

شَشِلِتَرٍحَ قَن قِندِشِ دَشُحَ نَن نَ.

26 ﭑ بَرَ قٍ ندٍ تٌ نَشَن شْنْ دَنفِ قَشّ رَ.

فِنّ نَ عَ رَ نَشَن قِندِشِ يّلّ رَ،

نَشَن بْحّ قِندِشِ فَنتَنيِ رَ،

نَشَن بّلّشّيٍ لُشِ عَلْ لُوتِ بَلَنشِ.

مِشِ نَشَن نَقَن عَلَ مَ،

عَ كٍلِمَ نّ نَ فِنّ شُن مَ،

كْنْ نَ فِنّ يُنُبِتْي نَن مَسْتْمَ.

27 ﭑ تَن كَوَندِلَ يِ نَن تٌ ﭑ مَ قٍ مَتٌشِ بِرِن كُي؛

28 ﭑ نَشَ شّمّ تِنشِنشِ كٍرٍن تٌ شّمّ وُلُ يَ مَ،

ﭑ نَشَ عَ قٍن هَن،

كْنْ ﭑ مُ فِنّ يٌ تٌ حَمَ يَ مَ نَشَن تِنشِن.

29 ﭑ يِ نَن فبَنسَن تٌ كْرّ؛

عَلَ عَدَ مَدِيٍ دَاشِ نّ عٍ تِنشِنشِ،

كْنْ عٍ تَن نَشَ عٍ يّتّ مَدَشُ.