1 بَبِلْن شَ كُيٍ بٍلِ عَ شِنبِ سِنمَ.

عَ شَ كُيٍ نٍبٌ قَن عَ قٍلٍنمَ بْشِ مَ.

سٌقَلٍيٍ عٍ بّندُنمَ شَنِن سٍ قَرِ.

نَ كٌتٍ بِنيَ، عَ سٌقَلٍيٍ رَتَفَنمَ نّ.

2 عٍ مُ نْ نَ كُيٍيٍ رَتَنفَدٍ.

عٍ بِرِن شَ سِفَ كٌنيِيَ كُي.

3 «يَشُبَ بْنسْي، وٌ وٌ تُلِ مَتِ ﭑ نَ.

عِسِرَيِلَكَ نَشٍيٍ لُشِ، وٌ وٌ تُلِ مَتِ ﭑ نَ.

كَبِ وٌ بَرِشِ تّمُي نَشّ، ﭑ بَرَ وٌ شَنِن ﭑ بّلّشّ، ﭑ بَرَ وٌ بُن تِ.

4 ﭑ نُ نَ رَبَ نّ هَن وٌ قٌرِ وَشَتِ.

وٌ شُنسّشّ تٌ نُ قِيشّمَ، ﭑ تَن نَن مَن نُ وٌ بُن تِمَ.

ﭑ تٌ وٌ دَا، ﭑ مَن نُ وٌ مَلِمَ نّ، ﭑ وٌ شَنِن، ﭑ وٌ رَكِسِ.

5 وٌ ﭑ مَ مَنِيّ تٌمَ مِندٍن؟ وٌ ﭑ قِرِن ندٍ كٌلٌن؟

6 نَاقُلِ كَنيِ شّيمَ نُن فبٍتِ رَ مِنِمَ، عَ عَ سَ سِكٍيلِ قَرِ،

عَلَكٌ شَبُي شَ كُيٍ ندٍ يَءِلَن عَ بّ،

عَ عَ شِنبِ سِنمَ نَشَن بّ عَ بَتُقٍ رَ.

7 عٍ نَ تٌنفٌ، عٍ عَ دْشْ عٍ تُنكِ قَرِ، عٍ عَ شَنِن يِرٍ، عٍ عَ تِمَ دّننَشّ.

مّننِ عَ تِشِ تُن، عَ مُ سِفَمَ دّدّ.

هَلِ مِشِ ندٍ عَ مَوَ عَ بّ، عَ مُ عَ يَابِمَ،

عَ مُ مِشِ رَتَنفَمَ عَ شَ تْورّ مَ.»

8 «وٌ تَن مُرُتّلَيٍ، وٌ شَ رَتُ نَ قٍيٍ مَ، عَلَكٌ وٌ شَ نْ كِسِدٍ.

9 وٌ شَ رَتُ ﭑ نَشَن نَبَشِ تّمُي دَنفِشِ.

عَلَ فبّتّ يٌ مُ نَ بَقٍ ﭑ تَن نَ، ﭑ قِرِن ندٍ مُ نَ.

10 عَلَ فبّتّ مُ نَ نَشَن قٍ مَسٍنمَ بٍينُن عَ شَ رَبَ،

نَشَن نْمَ عَ قَلَدٍ،

‹ﭑ وَشْنقٍ قَمَ نّ رَكَمَلِدٍ. ﭑ تَن نَن عَ رَفِرِ مَ.›

11 ﭑ تَن نَن شْنِ ندٍ شِلِمَ كٍلِقٍ سٌفٍتٍدٍ مَبِرِ،

نَشَن ﭑ وَشْنقٍ رَبَمَ ﭑ بّ.

عِيٌ، ﭑ نَشَن قَلَشِ، ﭑ عَ رَبَمَ نّ،

ﭑ نَشَن نَتّشِ، ﭑ عَ رَكَمَلِمَ نّ.

12 وٌ وٌ تُلِ مَتِ ﭑ نَ، وٌ تَن نَشٍيٍ شَشِلِ شْرْشْ،

وٌ تَن نَشٍيٍ مَكُيَشِ تِنشِنيِ رَ.

13 ﭑ مَ كِيتِ تِنشِنشِ بَرَ مَكْرّ، عَ مُ مَكُيَ قٍوٌ.

ﭑ قَمَ ﭑ مَ كِسِ قَن نَ، عَ مُ بُمَ.

ﭑ سِيٌن رَكِسِمَ نّ،

ﭑ نَن ﭑ مَ نْرّ رَفٌرٌ مَ نّ عِسِرَيِلَ مَ.»