1 A̱gu̱ya̱álaꞌ rí ra̱ꞌkhá tháán nandoo Ana̱ꞌlóꞌ Mikhuíí jaꞌyalóꞌ, rí asndo naꞌne mbiꞌyalóꞌ i̱ji̱in Ana̱ꞌlóꞌ. ¡Jamí ikhaa máꞌ ñajwanlóꞌ!* Ikhaa numuu rúꞌkhue̱n xa̱bo̱ tsí júwa̱ꞌ ná numbaa ríge̱ꞌ tsíyáa̱ rí i̱ji̱in Ana̱ꞌlóꞌ ñajwanlóꞌ, numuu rí ikhii̱n tsínimbúu̱n juyáa̱ Ana̱ꞌlóꞌ. 2 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, rí xúge̱ꞌ rá, i̱ji̱in máꞌ Ana̱ꞌlóꞌ ñajwanlóꞌ, jamí xóó máꞌ tsíkujma rí ma̱nindxa̱ꞌlóꞌ nda̱wa̱á. I̱ndo̱ó máꞌ numuu rí nduꞌyáálóꞌ máꞌ rí ído̱ ma̱ꞌkha̱a Krísto̱, ma̱nindxa̱ꞌlóꞌ xómá jaꞌnii̱ jayu ikhaa̱, numuu rí mbu̱ꞌyáa̱lóꞌ xómá jaꞌnii̱ jayu ikhaa̱. 3 Jamí jámba̱a̱ tsí gíꞌthu̱u̱n ga̱jma̱á mbá jañii a̱kui̱in ríge̱ꞌ ná inuu̱ ikhaa̱, naꞌne-khaꞌwu-minaa̱ꞌ máꞌ xúꞌkhue̱n, xómá rí khaꞌwii Krísto̱.

4 Jámba̱a̱ xa̱bo̱ tsí naꞌne aꞌkhán, tsúꞌkhue̱n tsíꞌne-mbánuu rí naꞌthán xtángoo. Numuu rí ído̱ tsígu̱ma-mbáníí xtángoo, aꞌkhán ñajuun rúꞌkhue̱n. 5 Ndu̱ya̱á máꞌ ikháanꞌlaꞌ rí Krísto̱ ni̱ꞌkha̱ rí marngudi̱i aꞌkhánlóꞌ. Jamí ikhaa̱ na̱nguá gíꞌdoo̱ nimbá aꞌkhán. 6 Jámba̱a̱ xa̱bo̱ tsí xtáa jayu ga̱jma̱á nindxu̱u̱ ikhaa̱, tsíꞌnii̱ máꞌ xúꞌkhue̱n aꞌkhán. Jamí jámba̱a̱ xa̱bo̱ tsí naꞌne máꞌ xúꞌkhue̱n aꞌkhán, táꞌyoo̱ Krísto̱, ni máꞌ táꞌne-nuwii̱n. 7 I̱ji̱nꞌ, mu̱xúni̱ꞌñá-mijnálaꞌ rí ma̱ꞌne-nduwáanꞌlaꞌ nimbáa. Tsí naꞌne rí máján, xa̱bo̱ tsí májáan ñajuun tsúꞌkhue̱n, xómá rí májáan Krísto̱. 8 Xa̱bo̱ tsí naꞌne máꞌ xúꞌkhue̱n aꞌkhán, xa̱bi̱i gixa̱a̱ ñajuun tsúꞌkhue̱n. Numuu rí gixa̱a̱ naꞌne máꞌ xúꞌkhue̱n aꞌkhán asndo nákhí ginii jayu. Ikhaa numuu rúꞌkhue̱n ni̱ꞌkha̱ A̱dée Ana̱ꞌlóꞌ kajngó ma̱ꞌne-gámba̱a rí naꞌne jayu gixa̱a̱. 9 Jámba̱a̱ xa̱bo̱ tsí ñajuun a̱dée Ana̱ꞌlóꞌ, tsíꞌne máꞌ xúꞌkhue̱n aꞌkhán, numuu rí ski̱yu̱u̱ꞌ Ana̱ꞌlóꞌ ríga̱ jayu ná awúun a̱kuii̱n. Tsíyoo ma̱ꞌnii̱ máꞌ xúꞌkhue̱n aꞌkhán, numuu rí a̱dée Ana̱ꞌlóꞌ ñajuu̱n. 10 Xáꞌnii ma̱kujma tsíin ñajúún i̱ji̱in Ana̱ꞌlóꞌ, jamí xúꞌkhue̱n máꞌ tsíin ñajúún i̱ji̱in gixa̱a̱: jámba̱a̱ xa̱bo̱ tsí tsíꞌne rí máján, ni máꞌ tsíyoo jaꞌyoo dxájuu, ra̱ꞌkhá a̱dée Ana̱ꞌlóꞌ ñajuun tsúꞌkhue̱n.

11 Ríge̱ꞌ ñajuun ajngáa rí ni̱dxawíínlaꞌ máꞌ asndo nákhí ginii jayu: gíꞌmaa rí ma̱galóꞌ juꞌya-mijnálóꞌ. 12 Ma̱xánindxa̱ꞌlóꞌ xómá ninindxu̱u̱ Kaín, tsí xa̱bi̱i xa̱bo̱ xkawi̱i̱ꞌ, jamí nixíya̱a̱ dxíyo̱o̱. Náá numuu kajngó nixíya̱a̱ rá. Numuu rí ra̱máján rí naꞌne Kaín, xómáꞌ dxíyo̱o̱ naꞌne rí máján.

13 A̱ngui̱nꞌ, ma̱xámakualaꞌ gáꞌne xí tsíñúú gúyalaꞌ xa̱bo̱ tsí júwa̱ꞌ ná numbaa ríge̱ꞌ. 14 Xí nandalóꞌ juꞌñúú a̱ngia̱nꞌlóꞌ, a̱ꞌkhue̱n nduꞌyáálóꞌ rí nijríñáaꞌlóꞌ máꞌ inuu rí ma̱ja̱ñálóꞌ, jamí nduꞌyalóꞌ rí xúge̱ꞌ rá. Xómáꞌ xa̱bo̱ tsí tsíyoo jaꞌyoo dxájuu, xóó máꞌ nijáñúu̱ xtáa̱. 15 Jámba̱a̱ xa̱bo̱ tsí tsíyoo jaꞌyoo dxájuu, tsúꞌkhue̱n ñajuun xómá tsí na̱gu̱díin xa̱bo̱. Jamí ndu̱ya̱álaꞌ máꞌ rí asndo nimbáa tsí na̱gu̱díin xa̱bo̱, na̱nguá xtáa ndaꞌya mbá jámuu tsúꞌkhue̱n.

16 Ga̱jma̱á majñu̱u̱ ríge̱ꞌ nduꞌyáálóꞌ rí nandoo Ana̱ꞌlóꞌ jaꞌyalóꞌ, rí nixnáxe̱-mina̱ꞌ Jesukrísto̱ rí ma̱ja̱ñúu ga̱jma̱á numalóꞌ. Xkuaꞌnii máꞌ mangáánꞌlóꞌ, jaꞌyoo mu̱xna̱xí-mijnálóꞌ rí ma̱ja̱ñálóꞌ ga̱jma̱á numúú a̱ngia̱nꞌlóꞌ. 17 Xí mbáa xa̱bo̱ gíꞌdoo rí ma̱xtáa-muu ndaꞌyoo rí dxájuu na̱nguá gíꞌdoo rí ma̱xtáa-muu, jamí na̱nguá imbáyúu̱, á nandoo xa̱bo̱ tsúꞌkhue̱n jaꞌyoo dxájuu xómá nandoo Ana̱ꞌlóꞌ jaꞌñúú xa̱bo̱ rá. 18 I̱ji̱nꞌ, ra̱ꞌkhá i̱ndo̱ó mu̱ꞌthánlóꞌ rí nandalóꞌ juꞌya-mijnálóꞌ, rí gu̱snga̱jmálóꞌ rí gakon nandalóꞌ juꞌya-mijnálóꞌ ga̱jma̱á majñu̱u̱ rí nu̱ꞌne̱lóꞌ.

19 Ikhaa numuu rúꞌkhue̱n nduꞌyáálóꞌ rí juwalóꞌ ná awúun rí gakon, jamí mbá jañii a̱kia̱nꞌlóꞌ juwalóꞌ ná inuu Ana̱ꞌlóꞌ. 20 Maske máꞌ ná awúun a̱kia̱nꞌlóꞌ na̱ju̱ma̱ꞌlóꞌ rí gíꞌmáálóꞌ aꞌkhán, i̱tha̱án máꞌ mba̱a̱ Ana̱ꞌlóꞌ xó rí a̱kia̱nꞌlóꞌ, jamí ikhaa̱ ndaꞌyoo̱ mbá xúgíí. 21 A̱ngui̱nꞌ, xí ná awúun a̱kia̱nꞌlóꞌ na̱nguá i̱ju̱ma̱ꞌlóꞌ rí gíꞌmáálóꞌ aꞌkhán, mbá jañii a̱kia̱nꞌlóꞌ juwalóꞌ ná inuu Ana̱ꞌlóꞌ xúꞌkhue̱n rá. 22 Jamí ikhaa̱ maxnálóꞌ mbá xúgíí rí nu̱nda̱ꞌáa̱lóꞌ, numuu rí nu̱ꞌne̱-mbáníílóꞌ xtángawoo̱, jamí nuꞌne̱lóꞌ rí na̱ni̱gu̱u̱ꞌ ikhaa̱. 23 Ríge̱ꞌ ñajuun xtángawoo̱: rí ma̱nimba̱ꞌlóꞌ juꞌyáá Jesukrísto̱, tsí A̱dée Ana̱ꞌlóꞌ, jamí xúꞌkhue̱n máꞌ rí ma̱galóꞌ juꞌya-mijná xómáꞌ rí nixná-ñájwanlóꞌ ikhaa̱. 24 Xa̱bo̱ tsí naꞌne-mbánuu xtángawoo Ana̱ꞌlóꞌ, xtáa jayu ga̱jma̱á nindxu̱u̱ Ana̱ꞌlóꞌ, jamí Ana̱ꞌlóꞌ xtáa jayu ga̱jma̱á nindxu̱u̱ ikhaa̱. Xkuaꞌnii nduꞌyáálóꞌ rí xtáa jayu Ana̱ꞌlóꞌ ga̱jma̱á nindxa̱ꞌlóꞌ, numuu rí nixniálóꞌ Xu̱u̱ꞌ ikhaa̱.