1 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ma̱xánimba̱ꞌlaꞌ ju̱ñu̱ú mbá xúgíin xa̱bo̱ tsí nuthan rí Xu̱u̱ꞌ Ana̱ꞌlóꞌ naꞌthán-múꞌúún rí nuthan, a̱ꞌkhue̱n gakon a̱gu̱ya̱á májánlaꞌ xí gakon rí xa̱bi̱i Ana̱ꞌlóꞌ ñajúu̱n. Numuu rí ná numbaa ríge̱ꞌ júwa̱ꞌ mbaꞌiin tsí mi̱nduwiin rí ajngóo Ana̱ꞌlóꞌ nu̱rawíjnga̱a. 2 Xáꞌnii ma̱goo mbu̱ya̱álaꞌ tsáa tsí gakon ga̱jma̱á Xu̱u̱ꞌ Ana̱ꞌlóꞌ: jámba̱a̱ xa̱bo̱ tsí naꞌthán jmbuu rí Jesukrísto̱ ninindxu̱u̱ xa̱bo̱ numbaa, tsúꞌkhue̱n ñajuun xa̱bi̱i Ana̱ꞌlóꞌ. 3 Jamí jámba̱a̱ xa̱bo̱ tsí tsíꞌthán jmbuu rúꞌkhue̱n ga̱jma̱á numuu Jesukrísto̱, rí ninindxu̱u̱ xa̱bo̱ numbaa,* ra̱ꞌkhá xa̱bi̱i Ana̱ꞌlóꞌ ñajuu̱n. Tsúꞌkhue̱n ñajuun xa̱bo̱ tsí sia̱nꞌ ga̱jma̱á Krísto̱, tsí ni̱dxawíínlaꞌ máꞌ rí ma̱ꞌkha̱, jamí xtáa̱ máꞌ ná numbaa xúge̱ꞌ rá.

4 I̱ji̱nꞌ, ikháanꞌlaꞌ ñajwanlaꞌ xa̱bi̱i Ana̱ꞌlóꞌ, jamí ni̱ꞌnga̱ꞌlaꞌ inúú xa̱bo̱ tsúꞌkhue̱n, tsí mi̱nduwiin. Numuu rí i̱tha̱án máꞌ mba̱a̱ ski̱yu̱u̱ꞌ tsí xtáa ga̱jma̱á nindxa̱ꞌlaꞌ ikháanꞌlaꞌ, xó rí tsí xtáa ná numbaa. 5 Ikhiin tsúꞌkhue̱n ñajúún xa̱bi̱i numbaa ríge̱ꞌ, ikhaa jngó nuthee̱n ga̱jma̱á numuu rí ríga̱ ná numbaa ríge̱ꞌ, jamí xa̱bo̱ numbaa nudxawíín rí nuthee̱n. 6 Ikháánꞌlóꞌ ñajwanlóꞌ xa̱bi̱i Ana̱ꞌlóꞌ. Tsí naꞌne-nuwiin Ana̱ꞌlóꞌ, nadxawuun rí nuꞌthánlóꞌ. Tsí ra̱ꞌkhá xa̱bi̱i Ana̱ꞌlóꞌ ñajuun, tsídxawuun rí nuꞌthánlóꞌ. Xkuaꞌnii nduꞌyáálóꞌ tsáa ñajuun tsí ga̱jma̱á Xu̱u̱ꞌ Ana̱ꞌlóꞌ, tsí kuwiin, jamí tsáa ga̱jma̱á xu̱u̱ꞌ tsí mi̱nduwaa.

7 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ga̱galóꞌ juꞌya-mijnálóꞌ, numuu rí Ana̱ꞌlóꞌ nandoo jaꞌñúú xa̱bo̱. Jámba̱a̱ xa̱bo̱ tsí nandoo jaꞌñúú xa̱bo̱, a̱dée Ana̱ꞌlóꞌ ñajuun tsúꞌkhue̱n, jamí naꞌne-nuwii̱n Ana̱ꞌlóꞌ. 8 Tsí tsíyoo jaꞌñúú xa̱bo̱, tsúꞌkhue̱n táꞌne-nuwiin Ana̱ꞌlóꞌ. Numuu rí Ana̱ꞌlóꞌ nandoo jaꞌñúú xa̱bo̱. 9 Xáꞌnii nisngájma Ana̱ꞌlóꞌ rí nandoo jaꞌyalóꞌ: rí nixúngua̱a̱ꞌ A̱dée̱ tsí mbáwíi ma̱ꞌkha̱ ná numbaa, kajngó ma̱juwalóꞌ ga̱jma̱á majñu̱u̱ ikhaa̱. 10 Xáꞌnii nakujma rí Ana̱ꞌlóꞌ nandoo jaꞌñúú xa̱bo̱: ra̱ꞌkhá ikháánꞌlóꞌ ndiyalóꞌ juꞌyáá Ana̱ꞌlóꞌ, rí ikhaa̱ ndiyoo̱ jaꞌyalóꞌ, jamí nixúngua̱a̱ꞌ A̱dée̱ rí ma̱ja̱ñúu kajngó ma̱goo ma̱ꞌne mba̱a̱ a̱kuii̱n jaꞌyoo̱ aꞌkhánlóꞌ. 11 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, xí xkuaꞌnii ndiyoo Ana̱ꞌlóꞌ jaꞌyalóꞌ, xkuaꞌnii máꞌ jaꞌyoo rí ma̱galóꞌ juꞌya-mijná mangáánꞌlóꞌ. 12 Maske máꞌ asndo nimbáa xa̱bo̱ ninguáná táꞌyoo Ana̱ꞌlóꞌ, xí nandalóꞌ juꞌya-mijnálóꞌ, Ana̱ꞌlóꞌ xtáa jayu ga̱jma̱á nindxa̱ꞌlóꞌ, jamí ga̱jma̱á majña̱ꞌ ikháánꞌlóꞌ nakujma jaꞌwu rí Ana̱ꞌlóꞌ nandoo jaꞌñúú xa̱bo̱.

13 Xáne lá gágoo mbu̱ꞌyáálóꞌ rí juwalóꞌ jayu ga̱jma̱á nindxu̱u̱ Ana̱ꞌlóꞌ, jamí ikhaa̱ xtáa̱ jayu ga̱jma̱á nindxa̱ꞌlóꞌ ikháánꞌlóꞌ rá. Nduꞌyáálóꞌ rúꞌkhue̱n numuu rí ikhaa̱ nixniálóꞌ Xu̱u̱ꞌ. 14 Jamí ikháanꞌxo̱ꞌ ndi̱ya̱áxo̱ꞌ, xúꞌkhue̱n máꞌ nu̱tha̱nxo̱ꞌ rí Ana̱ꞌlóꞌ Mikhuíí nixúꞌmaa A̱dée ma̱ꞌkha̱ ná numbaa, kajngó ma̱nindxu̱u̱ tsí naꞌne-jáwíin xa̱bo̱. 15 Jámba̱a̱ xa̱bo̱ tsí naꞌthán jmbuu rí Jesús ñajuun A̱dée Ana̱ꞌlóꞌ, Ana̱ꞌlóꞌ xtáa jayu ga̱jma̱á nindxu̱u̱ tsúꞌkhue̱n, jamí ikhaa̱ xtáa̱ jayu ga̱jma̱á nindxu̱u̱ Ana̱ꞌlóꞌ.

16 Xómáꞌ ikháánꞌlóꞌ nduꞌyáálóꞌ jamí nanimba̱ꞌlóꞌ rí Ana̱ꞌlóꞌ nandoo jaꞌyalóꞌ. Ana̱ꞌlóꞌ nandoo jaꞌñúú xa̱bo̱. Xa̱bo̱ tsí nandoo máꞌ xúꞌkhue̱n jaꞌñúú xa̱bo̱, tsúꞌkhue̱n xtáa jayu ga̱jma̱á nindxu̱u̱ Ana̱ꞌlóꞌ, jamí Ana̱ꞌlóꞌ xtáa jayu ga̱jma̱á nindxu̱u̱ ikhaa̱. 17 Rúꞌkhue̱n nasngájma jaꞌwu rí Ana̱ꞌlóꞌ nandoo jaꞌñúú xa̱bo̱ ga̱jma̱á majña̱ꞌ ikháánꞌlóꞌ. A̱ꞌkhue̱n rí ma̱xámíñalóꞌ ído̱ ma̱ga̱nú mbiꞌi rí ma̱to̱ꞌo̱o̱ awan ga̱jma̱á numalóꞌ. Numuu rí ikháánꞌlóꞌ juwalóꞌ xómá nixtáa Jesús ná numbaa ríge̱ꞌ. 18 Xa̱bo̱ tsí ndaꞌyoo rí Ana̱ꞌlóꞌ nandoo jiꞌyáá eꞌne, na̱nguá imíñuu̱, a̱ꞌkhue̱n gakon ído̱ ndaꞌyoo̱ rí Ana̱ꞌlóꞌ nandoo jiꞌyáa̱ eꞌne, ikhaa rúꞌkhue̱n naꞌne rí ma̱xámíñuu̱. Numuu rí xa̱bo̱ tsí namíñuu, gíꞌthu̱u̱n rí ma̱ꞌne-numaa̱ aꞌkhúu̱n. Ikhaa jngó tsí namíñuu, xóó máꞌ tsíꞌyoo mújúu̱n rí nandoo jiꞌyáa̱ eꞌne Ana̱ꞌlóꞌ.

19 Ikháánꞌlóꞌ nandalóꞌ juꞌyáá Ana̱ꞌlóꞌ, numuu rí ikhaa̱ ginii̱ ndiyoo̱ jaꞌyalóꞌ. 20 Xí mbáa naꞌthán: «Ikhúúnꞌ nandoꞌ ja̱yo̱o̱ Ana̱ꞌlóꞌ», jamí tsíyoo̱ gáꞌyoo̱ dxájuu̱, naꞌne-nduwa tsúꞌkhue̱n. Numuu rí xa̱bo̱ tsí tsíyoo gáꞌyoo dxájuu, tsí nandoo ndaꞌyoo̱, xáne lá gágoo ma̱goo̱ jaꞌyoo̱ Ana̱ꞌlóꞌ, tsí tsíyoo mba̱ꞌyoo̱ xúꞌkhue̱n rá. 21 Jamí Jesukrísto̱ nixnálóꞌ xtángoo ríge̱ꞌ: tsí nandoo jaꞌyoo Ana̱ꞌlóꞌ, ga̱goo jaꞌyoo dxájuu mangaa.