1 Ikhúúnꞌ ñajunꞌ Páblo̱, ga̱jmi̱ꞌ Silbáno̱ jamí Timotéo̱.

Nu̱tháánxo̱ꞌ i̱yi̱i̱ꞌ ríge̱ꞌ ma̱ꞌga ná inúú tsí nanimbu̱únꞌ juyáá Jesús ná xuajen Tesalóni̱ka̱, tsáanꞌ mbá ꞌnduꞌ juwalaꞌ ná inuu Ana̱ꞌlóꞌ xúꞌkhue̱n máꞌ ná inuu Táta̱ Jesukrísto̱.

A̱gu̱ma-tsakun-rámáaꞌlaꞌ jamí ga̱juwalaꞌ tsímáá gáꞌne Ana̱ꞌlóꞌ Mikhuíí jamí Táta̱ Jesukrísto̱.*

2 Jámba̱ miꞌtsú nu̱rígu̱uxo̱ꞌ gamaku ná inuu Ana̱ꞌlóꞌ ga̱jma̱á numalaꞌ mbá xúgiáanꞌlaꞌ, jamí tsímbumaxo̱ꞌ e̱ne̱laꞌ ído̱ rí nu̱tha̱n-jáñííxo̱ꞌ Ana̱ꞌlóꞌ. 3 Na̱rmáꞌáan máꞌ xúꞌkhue̱n a̱kia̱nꞌxo̱ꞌ ná inuu Ana̱ꞌlóꞌ Mikhuíí eꞌne ñajun rí nu̱ne̱laꞌ ga̱jma̱á numuu rí wéje̱ a̱kia̱nꞌlaꞌ ná inuu̱, rí nu̱ne̱laꞌ numuu rí nandalaꞌ ju̱ya̱á Ana̱ꞌlóꞌ, jamí rí kuajún-gúkuálaꞌ numuu rí mbá jañii a̱kia̱nꞌlaꞌ guáꞌthi̱ínlaꞌ ná inuu Táta̱ Jesukrísto̱.

4 A̱ngui̱nꞌ, tsáanꞌ phú nandoo Ana̱ꞌlóꞌ jaꞌyalaꞌ, ndu̱ya̱áxo̱ꞌ rí ikhaa̱ niraꞌwáa̱nꞌlaꞌ rí ma̱nindxa̱ꞌlaꞌ xa̱bo̱ xuajñuu̱. 5 Numuu rí ajngáa máján rí nu̱tha̱n-ráꞌaxo̱ꞌ tága̱nú ne̱ ná inalaꞌ i̱ndo̱ó máꞌ ga̱jma̱á ajngáa mixoo jayu, rí mangaa máꞌ ni̱snga̱jmáxo̱ꞌ ski̱yu̱u̱ꞌ Xu̱u̱ꞌ Ana̱ꞌlóꞌ, jamí naꞌne jañii a̱kia̱nꞌxo̱ꞌ rí nu̱tha̱nxo̱ꞌ rí gakon. Ikháanꞌlaꞌ ndu̱ya̱á májánlaꞌ xáne nijuwaxo̱ꞌ ná majña̱ꞌlaꞌ, numuu rí nandaxo̱ꞌ ju̱ya̱ꞌlaꞌ. 6 Ikhaa jngó phú gagi a̱kia̱nꞌlaꞌ ído̱ rí ni̱drígúlaꞌ ajngáa máján rúꞌkhue̱n neꞌne Xu̱u̱ꞌ Ana̱ꞌlóꞌ, maske máꞌ juwalaꞌ ná awúun jamínu̱ꞌ. Jamí xkuaꞌnii ikháanꞌlaꞌ ndi̱ya̱-ri̱dáanꞌxo̱ꞌ jamí ndi̱ya̱-ri̱dáálaꞌ Táta̱. 7 Jamí asndo ninindxa̱ꞌlaꞌ mbá xkri̱da rí mbuyáá mbá xúgíin tsí ninimbu̱únꞌ juyáá Jesús ná numbaa Masedónia̱ jamí ná numbaa Akáya̱. 8 Ná xuajñalaꞌ ikháanꞌlaꞌ a̱ꞌkhue̱n ni̱gi̱ꞌdu̱u̱n ni̱dróꞌoo a̱pha̱ ajngóo Táta̱, jamí ra̱ꞌkhá máꞌ i̱ndo̱ó ná Masedónia̱ ga̱jma̱á Akáya̱, rí mangaa máꞌ ni̱dróꞌoo ne̱ ná mbá xúgíí xuajen. Ikhaa jngó mbá xúgíin xa̱bo̱ nduyáá máꞌ rí ikháanꞌlaꞌ wéje̱ a̱kia̱nꞌlaꞌ ná inuu Ana̱ꞌlóꞌ, jamí tsíꞌyóo máꞌ rí ikháanꞌxo̱ꞌ mu̱tha̱nxo̱ꞌ nitháan ga̱jma̱á numalaꞌ. 9 Numuu rí ikhii̱n máꞌ nuthee̱n ga̱jma̱á numaxo̱ꞌ, xáne ni̱dxawíi̱n rí ni̱dríguáanꞌxo̱ꞌlaꞌ, jamí nuthee̱n xáne ni̱ni̱ꞌñáálaꞌ rí nu̱ne̱-mba̱ꞌwi̱inlaꞌ tsí ra̱ꞌkháa Ana̱ꞌlóꞌ ñajúún, kajngó mu̱ne̱-mba̱ꞌwi̱i̱laꞌ Ana̱ꞌlóꞌ tsí ndaꞌya jamí tsí phú ikhaa. 10 Xúꞌkhue̱n máꞌ nuthee̱n rí ikháanꞌlaꞌ guáꞌthi̱ínlaꞌ rí ma̱ꞌkha̱a ná mikhuíí A̱dée Ana̱ꞌlóꞌ, tsí ikhaa̱ niꞌnii̱ rí mbayáa mbiꞌyuu. Ikhaa̱ ñajuu̱n Jesús tsí naꞌne-jríñáaꞌlóꞌ inuu jamínu̱ꞌ rí ma̱ꞌkha̱ gáꞌne Ana̱ꞌlóꞌ.