1 Ikhaa numuu rúꞌkhue̱n, gu̱ya̱ri̱dáálaꞌ rí naꞌne Ana̱ꞌlóꞌ, numuu rí ikháanꞌ ñajwanlaꞌ i̱jii̱n tsí phú nandoo̱ jaꞌñúu̱. 2 Ga̱galaꞌ ju̱ñu̱ú mbá xúgíin xa̱bo̱, xómá rí Krísto̱ ndiyoo jaꞌyalóꞌ mangaa. Ikhaa̱ nixnáxe̱-mine̱e̱ꞌ rí ma̱ja̱ñúu̱ ga̱jma̱á numalóꞌ, xómá mbá tsi̱gi̱jña̱ꞌ rí ndaa thawuun xu̱u̱ꞌ i̱ga̱nú ná inuu Ana̱ꞌlóꞌ.

3 Xómáꞌ ikháanꞌlaꞌ, ga̱juwalaꞌ xómá jaꞌyoo rí ma̱ju̱wá xa̱bi̱i Ana̱ꞌlóꞌ. Mu̱xúba̱ꞌ gajmiálaꞌ xa̱bo̱ tsí túya̱a̱laꞌ, ni máꞌ mu̱xúne̱laꞌ nimbá rí xkawe̱ꞌ, ni máꞌ ma̱xáni̱gua̱ꞌlaꞌ rí mu̱guaꞌdáálaꞌ mi̱ndaꞌkho. 4 Mu̱xútha̱nlaꞌ ajngáa xkawe̱ꞌ, ni máꞌ ajngáa rí nuthan tsí júgoo inúú, ni máꞌ ajngáa xiaꞌwun rí tsíjmaa, numuu rí nda̱a̱ rí gámbáyálaꞌ rúꞌkhue̱n. I̱wa̱á máján rí gu̱rígu̱ulaꞌ gamaku inuu Ana̱ꞌlóꞌ. 5 Numuu rí ndu̱ya̱álaꞌ máꞌ rí asndo nimbáa tsí nabóo ga̱jma̱á xa̱bo̱ tsí táyáa, nda̱a̱ rí gájanáa̱ ná náꞌthán-ñájun Krísto̱ jamí Ana̱ꞌlóꞌ, ni máꞌ tsí naꞌne rí xkawe̱ꞌ, ni máꞌ tsí na̱ni̱gu̱u̱ꞌ ma̱gi̱ꞌdoo mi̱ndaꞌkho, numuu rí asndo xó ikhaa máꞌ rúꞌkhue̱n naꞌne-mba̱a̱ jaꞌnii. 6 Nimbáa ma̱xáꞌne-nduwáanꞌlaꞌ ga̱jma̱á ajngáa rí mitsaan iwán jamí nda̱a̱ mbá jayu numuu, numuu rí ga̱jma̱á numuu rúꞌkhue̱n Ana̱ꞌlóꞌ naꞌne rí ma̱ꞌkha̱ jamínu̱ꞌ inúú xa̱bo̱ tsí najñaguun juyáa̱. 7 Ikhaa jngó, ma̱xámbáxa̱ꞌ gajmiálaꞌ rí mu̱ne̱laꞌ rí nuni̱i̱.

8 Ikháanꞌlaꞌ nijuwalaꞌ ná mijína nákhí wajyúú. Rí xúge̱ꞌ rá, juwalaꞌ ná mbiꞌi, numuu rí nimbiꞌyalaꞌ aguu Táta̱. Ikhaa jngó, ga̱juwalaꞌ xómá gíꞌmaa rí ma̱ju̱wá tsí nambiꞌñúú eꞌne Ana̱ꞌlóꞌ. 9 Numuu rí Xu̱u̱ꞌ Ana̱ꞌlóꞌ* naꞌne rí ma̱nindxa̱ꞌlóꞌ xa̱bo̱ tsí májáan a̱kui̱ín, rí mu̱ꞌne̱lóꞌ rí máján jamí rí ma̱ꞌne kuwáanꞌlóꞌ. 10 Gu̱ya̱á májánlaꞌ náá rí na̱ni̱gu̱u̱ꞌ Táta̱ rí mu̱ne̱laꞌ. 11 Mu̱xúne̱laꞌ rí nune̱ xa̱bo̱ tsí júwa̱ꞌ ná mijína, numuu rí na̱nguá gíꞌdoo numuu rí nuni̱i̱. I̱wa̱á máján gu̱tha̱nlaꞌ rí ra̱máján nuni̱i̱. 12 Numuu rí asndo mate̱ꞌ máꞌ rí mu̱ꞌthánlóꞌ rí nune̱ xa̱bo̱ tsúꞌkhue̱n ná ngu̱ꞌwa̱. 13 I̱ndo̱ó máꞌ numuu rí ído̱ nagájnuu mbá xúgíí ná pa̱jnu, nakujma ne̱, numuu rí agu naꞌne rí ma̱kujma xáne phú jaꞌnii xúgíí. 14 Ikhaa numuu rúꞌkhue̱n nuthan xa̱bo̱:

«Ga̱jwi̱iꞌlaꞌ rá, ikháánꞌ tsáánꞌ nanu.

Araxu̱unꞌ ná majñu̱ú wa̱jen,

jamí ma̱mbiꞌyaaꞌ gáꞌne Krísto̱».

15 Ikhaa numuu rúꞌkhue̱n, gu̱ya̱xi̱ílaꞌ xáne juwalaꞌ. Ma̱xájuwalaꞌ xómá júwa̱ꞌ xa̱bo̱ tsí júgoo inúú, rí ga̱juwalaꞌ xómá xa̱bo̱ tsí na̱ma̱ñúú najúwa̱ꞌ. 16 Mu̱xúne̱-mbáti̱ga̱laꞌ mbiꞌi ríge̱ꞌ, numuu rí gatíí rí xkawe̱ꞌ ná awúun mbiꞌi rí juwalóꞌ. 17 Ikhaa jngó, ma̱xánindxa̱ꞌlaꞌ xa̱bo̱ tsí júgoo inúú, rí ga̱fraꞌa̱ꞌlaꞌ náá rí nandoo Táta̱ rí mu̱ne̱laꞌ. 18 Ma̱xájngáanꞌlaꞌ, numuu rí xí najngáanꞌlaꞌ rúꞌkhue̱n ma̱ꞌne rí nikhuáa mbá jayu gájuwalaꞌ. I̱wa̱á máján gu̱ni̱ꞌñá-mijnálaꞌ rí maꞌthán-ñájwanlaꞌ mbá jayu Xu̱u̱ꞌ Ana̱ꞌlóꞌ. 19 Gu̱tha̱n-míjnálaꞌ ga̱jma̱á ajmúú rí na̱ꞌkha̱ ná i̱yi̱i̱ꞌ ajngóo Ana̱ꞌlóꞌ, xúꞌkhue̱n máꞌ ga̱jma̱á ajmúú rí naꞌne-mba̱a̱ Ana̱ꞌlóꞌ jamí ajmúú rí mambáyúu nímia̱ꞌlaꞌ. Gu̱sianlaꞌ ajmúú, jamí gu̱ne̱-mba̱a̱laꞌ Táta̱ ga̱jma̱á mbá jañii a̱kia̱nꞌlaꞌ. 20 Jámba̱ miꞌtsú gu̱rígu̱ulaꞌ gamaku ná inuu Ana̱ꞌlóꞌ Mikhuíí ga̱jma̱á numuu mbá xúgíí, ga̱jma̱á majñu̱u̱ Tátiálóꞌ Jesukrísto̱.

21 Gu̱ni̱ꞌñá-mijnálaꞌ rí mu̱tha̱n-ñájun-mijnálaꞌ, ga̱jma̱á numuu rí ndu̱ya̱-makuíílaꞌ Krísto̱. 22 Go̱ꞌo̱ tsí ni̱nújún, gíꞌmaa rí mune̱-mbáníi̱ rí nuthan a̱jmbíi̱n, xómá nu̱ne̱-mbáníi̱ rí naꞌthán Táta̱. 23 Numuu rí xa̱biya̱ tsí ninigúún, ikhaa̱ ñajuu̱n xómá idxu̱u̱ a̱ꞌguii̱, xómá rí Krísto̱ ñajuun xómá idxu̱ún tsí nanimbu̱únꞌ juyáa̱, tsí ñajúún xómá xuyuu̱, jamí ikhaa̱ máꞌ naꞌne-jáwíi̱n. 24 Ikhaa jngó, xómá rí xa̱bo̱ tsí nanimbu̱únꞌ juyáá Krísto̱ nu̱ni̱ꞌñá-mijnée̱ rí mi̱ꞌthán-ñájúu̱n gáꞌnii̱ ikhaa̱, xkuaꞌnii máꞌ go̱ꞌo̱ tsí ni̱nújún mangaa gíꞌmaa rí mu̱ni̱ꞌñá-mijnée̱ rí mi̱ꞌthán-ñájúu̱n gáꞌne a̱jmbíi̱n mangaa.

25 Xa̱bekha, tsáanꞌ ni̱ni̱ꞌgúúnlaꞌ, ga̱galaꞌ ju̱ñu̱ú gu̱ꞌwia̱ꞌlaꞌ, xómá rí Krísto̱ ndiyoo jaꞌñúú tsí nanimbu̱únꞌ juyáa̱ jamí nixnáxe̱-mine̱e̱ꞌ rí ma̱ja̱ñúu̱ ga̱jma̱á numúu̱, 26 kajngó ma̱nindxúu̱n i̱ndo̱ó máꞌ xa̱bii̱ ikhaa̱. Ikhaa̱ neꞌne-jaꞌwii̱n ga̱jma̱á ajngóo̱, rí xómá iya jaꞌnii, 27 kajngó ma̱ꞌne tsiꞌñíi mi̱ndaꞌkho tsí nanimbu̱únꞌ juyáa̱ rí maxnáxii̱n ná inuu̱ máꞌ ikhaa̱. Ma̱ꞌne nda̱a̱ nitháan rí ra̱máján rí mi̱ꞌthán ga̱jma̱á numúu̱ ni máꞌ nda̱a̱ aꞌkhúu̱n ni máꞌ nda̱a̱ rí tsíjmaa ná a̱kuíi̱n, rí jaꞌwuu̱n jamí tsiꞌñíi̱ mi̱ndaꞌkho gáꞌne. 28 Xkuaꞌnii máꞌ xa̱bekha tsí ni̱ni̱ꞌgúún mangaa, gíꞌmaa rí ma̱gúu̱n juñúu̱ gu̱ꞌwíi̱n, xómá rí nandúu̱n juya-mijnée̱ ikhii̱n. Tsí nandoo jaꞌyoo a̱ꞌgui̱i, ikhaa̱ máꞌ nandoo̱ jaꞌya-mine̱e̱ꞌ. 29 Numuu rí asndo nimbáa xa̱bo̱ tsíꞌne-mina̱ꞌ mi̱ndaꞌkho rí ikhaa̱. A̱ꞌkhue̱n gakon, naxná-mine̱e̱ꞌ rí ndaꞌyóo̱ jamí na̱ña̱wa̱n-míne̱e̱ꞌ, xómá rí naꞌne Krísto̱ mangaa ga̱jma̱á numúú tsí nanimbu̱únꞌ juyáa̱, 30 numuu rí mbá xúgiáanꞌ ikháánꞌlóꞌ ñajwanlóꞌ mbá xa̱bi̱i̱ xuyuu Krísto̱. 31 «Ikhaa numuu rúꞌkhue̱n xa̱biya̱ maniñuu tátée jamí nánée, rí ma̱mba̱xúu̱ ga̱jmáa̱ a̱ꞌguii̱, jamí nájmii̱ ma̱nindxúu̱n i̱mba̱wíi xa̱bo̱». 32 Maphú mba̱a̱ awan drígo̱o̱ Ana̱ꞌlóꞌ ríge̱ꞌ, rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. Xómáꞌ ikhúúnꞌ na̱tha̱n ga̱jma̱á numuu Krísto̱ jamí ga̱jma̱á numúú tsí nanimbu̱únꞌ juyáa̱. 33 Ikhaa jngó, mbámbáa tsí ikháanꞌlaꞌ ga̱goo jaꞌyoo a̱ꞌgui̱i mangaa, xómá rí nandoo jaꞌya-mina̱ꞌ mbámbáa tsí ikháanꞌlaꞌ. Xúꞌkhue̱n máꞌ a̱ꞌgo̱ tsí ninújún mangaa, gaya-makuu̱ a̱jmbaa̱.