Atos 26

Páblo̱ naꞌthán-mbáyú-mina̱ꞌ ná inuu Agrípa̱

1 A̱ꞌkhue̱n Agrípa̱ niꞌthúun Páblo̱: «Ma̱goo ma̱ra̱tha̱n-mbáá ga̱jma̱á numaaꞌ».

A̱ꞌkhue̱n Páblo̱ nixúxe̱ ñawúun jamí nigíꞌdu̱u̱n niꞌthán-mbáyú-mine̱e̱ꞌ xáꞌnii: 2 «Táta̱ thúngaa Agrípa̱, phú nadxu a̱kui̱nꞌ rí ma̱goo ma̱tha̱n-mbáyú-mina̱ꞌ ná inaaꞌ xúge̱ꞌ, ga̱jma̱á numuu mbá xúgíí rí nune̱ aꞌkhúnꞌ xa̱bo̱ judío̱. 3 I̱tha̱án máꞌ nadxu a̱kui̱nꞌ numuu rí ikháánꞌ nathane̱-nuwiin májáanꞌ mbá xúgíí rí nune̱ jañúú xa̱bo̱ judío̱, jamí nathane̱-nuwiin májáanꞌ rí na̱tsa̱ñúu̱ ga̱jma̱á numuu. Ikhaa jngó phú na̱tha̱n-jáñaaꞌ rí ma̱ꞌngo̱o̱ a̱kia̱anꞌ ma̱ta̱dxawunꞌ rí ma̱tha̱a̱nꞌ.

4 »Mbá xúgíin xa̱bo̱ judío̱ nduyáá xáne nixtáá ná xuajñuꞌ jamí ná Jerusalén, asndo nákhí máꞌ ada̱ ñajunꞌlo̱ꞌ. 5 Xúꞌkhue̱n máꞌ nduyáa̱ rí asndo nákhí lájúún ninindxu̱ꞌ xa̱bo̱ fariséo̱, jamí xí nandúu̱n, ma̱goo muthee̱n. Tsáanꞌ ñajwanxo̱ꞌ xa̱bo̱ fariséo̱ phú gakhi̱i̱ xtángoo dríga̱ꞌxo̱ꞌ xó rí nu̱ne̱-mba̱a̱xo̱ꞌ Ana̱ꞌlóꞌ. 6 Jamí xúge̱ꞌ rá, xtáá ná inaaꞌ ge̱jyoꞌ kajngó ma̱to̱ꞌo̱o̱ awan ga̱jma̱á numuꞌ, numuu rí gúꞌthu̱u̱n ga̱jma̱á mbá jañii a̱kui̱nꞌ rí ma̱mba̱núu awan rí nixuda-mina̱ꞌ Ana̱ꞌlóꞌ ga̱jma̱á nindxu̱ún táta̱-xi̱ꞌñáxo̱ꞌ wajyúú. 7 Ikhaa awan rúꞌkhue̱n guáꞌthíi̱n rí ma̱mba̱núu ná inúú a̱ngia̱nꞌxo̱ꞌ tsí mbá gu̱wa̱ꞌ i̱jma̱ (12) kuthuun xa̱bo̱ Israél, ikhaa jngó mbiꞌíí mbruꞌwíín nune̱-mba̱a̱ Ana̱ꞌlóꞌ. Ga̱jma̱á numuu rí mbá jañii a̱kui̱nꞌ gúꞌthu̱u̱n rí ma̱mba̱núu rúꞌkhue̱n, Táta̱ thúngaa Agrípa̱, nune̱ aꞌkhúnꞌ xa̱bo̱ judío̱. 8 Náá numuu kajngó tsínimba̱ꞌlaꞌ rí Ana̱ꞌlóꞌ ma̱ꞌne rí mbuya̱a mbiꞌñúú tsí nijáñúú róꞌ.

9 »Nákhí wapha ikhúúnꞌ mangúúnꞌ ni̱ju̱mu̱ꞌ rí mbaꞌa rí ra̱máján jaꞌyoo ma̱ñu̱ú tsí nanimbu̱únꞌ juyáá Jesús tsí na̱ꞌkha̱ ná Nasarét. 10 Ikhaa máꞌ rúꞌkhue̱n ne̱ne̱ ná Jerusalén. Ído̱ nijanúꞌ i̱yi̱i̱ꞌ tsiakhe̱ nene̱ dxakuun tsí gíꞌdoo numúú, kajngó ma̱ne̱ rúꞌkhue̱n, a̱ꞌkhue̱n ni̱xu̱ꞌdíin ná géjwa̱nꞌ mbaꞌiin xa̱bo̱ tsí nanimbu̱únꞌ juyáá Jesús. Jamí ído̱ rí nu̱radíi̱n tsúꞌkhue̱n, mangúúnꞌ máꞌ ni̱xna̱ ajngóꞌ rí ma̱ja̱ñúu̱. 11 Jamí phú mbaꞌa miꞌtsú ne̱ne̱-ngíníi̱ ná awúun mbámbá guꞌwá rí na̱gi̱mbíin xa̱bo̱ judío̱, ne̱ne̱-ski̱ñúu̱ rí muthee̱n rí na̱nguá inimbúu̱n juyáa̱ Jesús. Jamí najiꞌnúú mi̱ndaꞌkho ja̱ñúu̱, ikhaa jngó nika gáne̱-ngíníi asndo tsí júwa̱ꞌ ná i̱ꞌwá xuajen.

12 »Ikhaa máꞌ rúꞌkhue̱n xtáá na̱ne̱ mbiꞌi rí naka ná Damásko̱, jamí ja̱go̱ i̱yi̱i̱ꞌ tsiakhe̱ kajngó ma̱ne̱ rí nixnangaweꞌ dxakuun tsí gíꞌdoo numúú. 13 Táta̱ thúngaa, ído̱ xtáá naka jamba̱a̱ mbá wakha̱ꞌ wáa eꞌne, a̱ꞌkhue̱n ndi̱yo̱o̱ mbá agu rí na̱ꞌkha̱ ná mikhuíí rí i̱tha̱án gakhi̱i̱ xó rí aguu a̱kha̱ꞌ. Ikhaa ne̱ nimbiꞌi-taꞌa ná inuꞌ, jamí ná inúú tsí nagóó ga̱jma̱á nindxu̱ꞌ. 14 A̱ꞌkhue̱n mbá xúgiáanꞌxo̱ꞌ ni̱drígáanꞌxo̱ꞌ mbayíí, jamí ikhúúnꞌ ni̱dxawuun mbá a̱ꞌwá rí naꞌthínꞌ ga̱jma̱á ajngáa ebréo̱: "Sáu̱lo̱, Sáu̱lo̱. Náá numuu kajngó nadxa̱ꞌ-raraxkoꞌ róꞌ. Phú gakhe̱ nathane̱-ñawún-mina̱ꞌ rí natapráꞌáá ajwa̱nꞌ rí júdú inuu".

15 »A̱ꞌkhue̱n ikhúúnꞌ ni̱thu̱u̱n: "Tsáa ñajwaanꞌ róꞌ, Táta̱".

»Jamí Táta̱ niꞌthán: "Ikhúúnꞌ ñajunꞌ Jesús, tsí ikháánꞌ nadxo̱ꞌ-raraxkáá. 16 Jamí rí xúge̱ꞌ rá, ariajún. Ikhaa numuu ríge̱ꞌ ni̱snga̱jmá-mina̱ꞌ ná inaaꞌ, kajngó ma̱ꞌgíín rí ma̱tha̱ne̱ ñajunꞌ xúꞌkhue̱n máꞌ rí ma̱ra̱tha̱n mbá xúgíí rí nithayáá, jamí ma̱ra̱tha̱n mangaa rí ma̱snga̱jmáaꞌ xóó. 17 Ikhúúnꞌ ma̱xu̱ꞌmáá mi̱dxo̱ꞌ kajngó ma̱ra̱thu̱ún xa̱bo̱ judío̱ jamí xa̱bo̱ tsí ra̱ꞌkháa judío̱ ñajúún, jamí ma̱ne̱-jríñáaꞌ ná ñawúu̱n kajngó nda̱a̱ rí gúña̱a̱ꞌ. 18 Na̱xu̱ꞌmáá mi̱dxo̱ꞌ kajngó ma̱ta̱rmáꞌtháá idúu̱n, kajngó ma̱ga̱jnáa̱ ná awúun rí mijína jamí ma̱guwáa̱n ná mbiꞌi. Na̱xu̱ꞌmáá mi̱dxo̱ꞌ kajngó ma̱ga̱jnáa̱ ná ñawúun Satanás jamí ma̱guwáa̱n ná ñawúun Ana̱ꞌlóꞌ. Jamí mangaa máꞌ rí ma̱nimbúu̱n juyeꞌ ikhúúnꞌ kajngó ma̱ꞌne mba̱a̱ a̱kui̱in Ana̱ꞌlóꞌ jaꞌñúu̱, jamí mu̱dri̱guíi̱ mangii̱n rí ma̱janúú tsí ni̱gu̱ma-jaꞌwu̱un".

19 »Ikhaa numuu rúꞌkhue̱n, táta̱ thúngaa Agrípa̱, táꞌne-jñagúún inuu rí ni̱dxawuun inu-mbiꞌíí ná mikhuíí. 20 A̱ꞌkhue̱n gakon ginii jayu ni̱gíꞌdu̱u̱n ni̱tha̱n-ráꞌa ná inúú xa̱bo̱ tsí júwa̱ꞌ ná xuajen Damásko̱, xúꞌkhue̱n máꞌ ná Jerusalén ga̱jma̱á mbá xúgíí numbaa Judéa̱, jamí ná inúú xa̱bo̱ tsí ra̱ꞌkháa judío̱ ñajúún. Ni̱thu̱ún mbá xúgíin xa̱bo̱ tsúꞌkhue̱n rí ga̱thanga̱a a̱kuíi̱n ná inuu Ana̱ꞌlóꞌ jamí gu̱riꞌkhuu̱ xóo júwe̱e̱ꞌ, xúꞌkhue̱n máꞌ guni̱i̱ rí máján kajngó ma̱kujma rí nithangii̱n ná inuu Ana̱ꞌlóꞌ. 21 Ikhaa numuu rúꞌkhue̱n xa̱bo̱ judío̱ ni̱rtuwúún ná awúun guꞌwá dxákuun, jamí nini̱i̱ mu̱xíñúu̱. 22 I̱ndo̱ó máꞌ numuu rí Ana̱ꞌlóꞌ nambáyíꞌ asndo mbiꞌi xúge̱ꞌ, ikhaa jngó tsíni̱ꞌñúu na̱thu̱ún xa̱bo̱ tsí ngíníi jamí xa̱bo̱ tsí guáꞌdáá ga̱jma̱á numuu̱ ikhaa̱. Ikhúúnꞌ na̱thúu̱n mbá xúgíí rí niꞌthán máꞌ Moisés jamí rí nithan máꞌ xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú rí wéje̱ máꞌ rí ma̱ri̱gá: 23 rí ma̱ja̱ñúu Krísto̱, xúꞌkhue̱n máꞌ rí ikhaa̱ ma̱nindxu̱u̱ tsí ginii jayu ndayáa mbiꞌyuu, jamí rí ikhaa̱ ma̱nindxu̱u̱ agúún xa̱bo̱ judío̱ jamí xa̱bo̱ tsí ra̱ꞌkháa judío̱ ñajúún».

Páblo̱ naꞌne ma̱ꞌne rí Agrípa̱ ma̱nimbo̱o̱ꞌ jaꞌyoo Krísto̱

24 Awúun máꞌ rí Páblo̱ naꞌthán-mbáyú-mina̱ꞌ ga̱jma̱á ajngáa rúꞌkhue̱n, a̱ꞌkhue̱n Fésto̱ niꞌthán gakhe̱:

—¡Najmiyaaꞌ ikháánꞌ, Páblo̱! ¡Rí nathane̱-gajma̱a̱ guéño naꞌne rí ma̱jmiyaaꞌ!

25 Xómáꞌ Páblo̱ niꞌthán:

—Ra̱ꞌkhá najmiyuꞌ, táta̱ nikhi̱i̱ Fésto̱, rí ajngáa rí gakon i̱tha̱nlo̱ꞌ jamí ajngáa rí ga̱náꞌyoo. 26 Táta̱ thúngaa Agrípa̱ ndaꞌyoo mújúun mbá xúgíí rúꞌkhue̱n, ikhaa jngó mbá jañii a̱kui̱nꞌ na̱tha̱n ná inuu̱. Tsíju̱mu̱ꞌ rí tsíꞌne-nuwii̱n nitháan rí na̱tha̱nlo̱ꞌ, numuu rí tágu̱ma ríge̱ꞌ ná ngu̱ꞌwa̱. 27 Táta̱ thúngaa Agrípa̱, ra̱ꞌkhá nanimba̱a̱ꞌ máꞌ rí nithan xa̱bo̱ tsí ni̱rawíjnga̱a ajngóo Ana̱ꞌlóꞌ ráanꞌ. Ikhúúnꞌ nda̱yo̱o̱ rí nanimba̱a̱ꞌ rí nithee̱n.

28 A̱ꞌkhue̱n Agrípa̱ niꞌthúun Páblo̱:

—Phú i̱lájwíin ndiꞌyóo ma̱tha̱ne̱ rí ma̱nimbo̱ꞌ kajngó ma̱nindxu̱ꞌ xa̱bo̱ tsí na̱ka̱ tsu̱du̱u̱ Krísto̱.

29 A̱ꞌkhue̱n niꞌthán Páblo̱:

—Ga̱ꞌne phú i̱lájwíin o ga̱ꞌne mba̱yo̱ꞌ mbo̱ꞌ, Ana̱ꞌlóꞌ gágoo rí ikháánꞌ jamí mbá xúgíin tsí gachúún ge̱jyoꞌ nu̱dxawíín rí na̱tha̱n, ma̱nindxúu̱n xómá rí ikhúúnꞌ. I̱ndo̱ó máꞌ numuu rí ma̱xáꞌne rí xtuꞌúu̱n ga̱jma̱á ñuu ajwa̱nꞌ xómá rí ikhúúnꞌ.

30 Ído̱ wámbo̱o̱ Páblo̱ niꞌthán ajngáa rúꞌkhue̱n, a̱ꞌkhue̱n ni̱tu̱xu̱u̱ꞌ thúngaa Agrípa̱, ga̱jma̱á xa̱bo̱ ñajun Fésto̱, xúꞌkhue̱n máꞌ Bereníse̱, jamí mbá xúgíin xa̱bo̱ tsí nitrigi̱in ga̱jma̱á nindxúu̱n. 31 Jamí ído̱ nigóo̱ i̱mba̱ janíí, a̱ꞌkhue̱n nithan-mijnée̱ i̱ndo̱ó máꞌ ikhii̱n: «Nimbá nda̱a̱ rí neꞌne xa̱bo̱ tsíge̱ꞌ rí asndo jaꞌyoo rí ma̱ja̱ñúu, ni máꞌ rí ma̱gi̱de̱e̱ꞌ géjwa̱nꞌ».

32 A̱ꞌkhue̱n Agrípa̱ niꞌthúun Fésto̱: «Ma̱goo máꞌ ma̱nguanúu rí ma̱ngrigo̱o̱ꞌ xa̱bo̱ tsúꞌkhue̱n no rá, xí ra̱ꞌkhá numuu rí ikhaa̱ ni̱nda̱ꞌe̱e̱ rí Sésa̱r gáxudaa awan ga̱jma̱á numuu̱».