28 Xkuaꞌnii máꞌ xa̱bekha tsí ni̱ni̱ꞌgúún mangaa, gíꞌmaa rí ma̱gúu̱n juñúu̱ gu̱ꞌwíi̱n, xómá rí nandúu̱n juya-mijnée̱ ikhii̱n. Tsí nandoo jaꞌyoo a̱ꞌgui̱i, ikhaa̱ máꞌ nandoo̱ jaꞌya-mine̱e̱ꞌ. 29 Numuu rí asndo nimbáa xa̱bo̱ tsíꞌne-mina̱ꞌ mi̱ndaꞌkho rí ikhaa̱. A̱ꞌkhue̱n gakon, naxná-mine̱e̱ꞌ rí ndaꞌyóo̱ jamí na̱ña̱wa̱n-míne̱e̱ꞌ, xómá rí naꞌne Krísto̱ mangaa ga̱jma̱á numúú tsí nanimbu̱únꞌ juyáa̱, 30 numuu rí mbá xúgiáanꞌ ikháánꞌlóꞌ ñajwanlóꞌ mbá xa̱bi̱i̱ xuyuu Krísto̱.