1 E̱je̱n, gu̱ne̱-mbáníílaꞌ rí naꞌthán tátiálaꞌ ga̱jma̱á nániálaꞌ xómá rí nandoo Táta̱, numuu rí rúꞌkhue̱n gíꞌmaa rí mu̱ne̱laꞌ. 2 Numuu ríge̱ꞌ ñajuun timbá xtángoo rí na̱ꞌkha̱ ga̱jma̱á mbá rí nixuda-mina̱ꞌ Ana̱ꞌlóꞌ: «Atiamakuíí ana̱a̱ꞌ jamí ru̱dáaꞌ, 3 kajngó ma̱ra̱xtaa májáanꞌ jamí ma̱ra̱xtaa mba̱yo̱ꞌ ná numbaa».*

4 Jamí ikháanꞌlaꞌ tsáanꞌ ñajwanlaꞌ anu̱ú e̱je̱n, mu̱xúne̱laꞌ rí ma̱jiꞌníi i̱jña̱ꞌlaꞌ, rí gu̱xprígúu̱nlaꞌ jamí gu̱sngúu̱nlaꞌ xómá rí nandoo Táta̱.

5 Ikháanꞌlaꞌ, yumbáá tsí waꞌtsi̱in, gu̱ne̱-mbáníílaꞌ ga̱jma̱á gamaku jamí ngamí rí nuthan ña̱ꞌñalaꞌ tsí xa̱bo̱ numbaa ñajúún. Mbá jañii a̱kia̱nꞌlaꞌ gúne̱ rí nuthee̱n, asndo xó rí Krísto̱ máꞌ e̱ne̱-mba̱a̱laꞌ. 6 Xkuaꞌnii gúne̱laꞌ tsitsíí, ra̱ꞌkhá i̱ndo̱ó máꞌ ído̱ rí júwe̱e̱ꞌ mu̱ya̱xa̱ꞌlaꞌ. Ga̱ju̱ma̱ꞌlaꞌ rí Krísto̱ ñajuun ña̱ꞌñalaꞌ, kajngó mbá jañii a̱kia̱nꞌlaꞌ gúne̱ rí nandoo Ana̱ꞌlóꞌ. 7 Gagi a̱kia̱nꞌlaꞌ gúne̱laꞌ ñajun rí nixná-ñájwanlaꞌ mu̱ne̱laꞌ, asndo xó rí Táta̱ máꞌ e̱ne̱-mba̱a̱laꞌ, ra̱ꞌkhá xa̱bo̱ numbaa. 8 Numuu rí ndu̱ya̱álaꞌ máꞌ rí Táta̱ ma̱ꞌne rí ma̱grui̱gúu gamaku mbámbáa ga̱jma̱á numuu rí máján neꞌne, tsíꞌyoo máꞌ xí yumbáá tsí waꞌtsi̱i̱ o xa̱bo̱ tsí naꞌthán-ñájun-mina̱ꞌ máꞌ ikhaa ñajuu̱n.

9 Jamí ikháanꞌlaꞌ, ña̱ꞌñu, xúꞌkhue̱n máꞌ gu̱ya̱-makúún mangáanꞌlaꞌ tsí nu̱ñajun inalaꞌ, jamí mu̱xúne̱-mi̱ꞌñúu̱laꞌ. Ga̱rmáꞌáan a̱kia̱nꞌlaꞌ rí Táta̱ tsí naꞌthán-ñájúu̱n ikhii̱n jamí tsí naꞌthán-ñájwanlaꞌ ikháanꞌlaꞌ ná mikhuíí xtáa̱, jamí ikhaa̱ tsíraꞌwíi̱n xa̱bo̱ tsí ma̱ꞌne-nga̱júu̱n.

10 Rí nda̱wa̱á jayu rá, a̱ngui̱nꞌ, ga̱wajún-gúkuálaꞌ ga̱jma̱á ski̱yu̱u̱ꞌ Táta̱ rí tsíyámba̱. 11 Ga̱jmalaꞌ mbá xúgíí ski̱yu̱u̱ꞌ Ana̱ꞌlóꞌ, rí xómá xtíin ajwa̱nꞌ jaꞌnii, kajngó ma̱wajún-gúkuálaꞌ inuu rí mi̱nduwa drígo̱o̱ gixa̱a̱. 12 Numuu rí ra̱ꞌkhá xa̱bo̱ numbaa guáꞌdáá gajmiálóꞌ xkujndu, rí guáꞌdáálóꞌ xkujndu ga̱jma̱á nindxu̱u̱ gíñá xkawe̱ꞌ, ga̱jma̱á nindxu̱ún tsiakhe̱ ꞌguéen, gajmíí tsí nuthan-ñajun ná mijína, jamí gajmíí gíñá xkawi̱inꞌ tsí ngrigu̱ún ri̱jma̱á ná inuu ju̱ba̱ꞌ. 13 Ikhaa jngó, ga̱jmalaꞌ mbá xúgíí ski̱yu̱u̱ꞌ Ana̱ꞌlóꞌ, rí xómá xtíin ajwa̱nꞌ jaꞌnii, kajngó ma̱ꞌnga̱ꞌlaꞌ mu̱ne̱-gajmiálaꞌ tsí ra̱májáan ído̱ ága̱nú mbiꞌi xkawe̱ꞌ rúꞌkhue̱n. Jamí ído̱ wámba̱ꞌlaꞌ ne̱ne̱-gajmiálaꞌ, xóó máꞌ kuajún-gúkuálaꞌ gáꞌne.

14 Ga̱wajún-gúkuálaꞌ ga̱jma̱á rí gakon, rí ñajuun xómá xtá smídálaꞌ, jamí rí máján rí nu̱ne̱laꞌ, ga̱ꞌne xómá ajwa̱nꞌ rí kathamuu ná xo̱xta̱ꞌlaꞌ jamí ná tsu̱da̱ꞌlaꞌ. 15 Jámba̱ miꞌtsú ga̱juwa-na̱ma̱ñalaꞌ xómá mbá xa̱bo̱ tsí traꞌa̱ máꞌ cháda nakhúu, rí ma̱ga̱jnálaꞌ mu̱tha̱n-ráꞌalaꞌ ajngáa máján rí naꞌne rí ma̱ju̱wá tsímáá xa̱bo̱. 16 Ga̱we̱je̱ máꞌ xúꞌkhue̱n a̱kia̱nꞌlaꞌ ná inuu Ana̱ꞌlóꞌ, numuu rí rúꞌkhue̱n ñajuun xómá ajwa̱nꞌ paska rí mu̱sndui̱ꞌyíílaꞌ ga̱jma̱á aguu xkuíyo̱o̱ xkamídá rí nada tsí ra̱májáan. 17 Ga̱rmáꞌáan a̱kia̱nꞌlaꞌ rí Ana̱ꞌlóꞌ neꞌne-jríñáaꞌlaꞌ, numuu rí rúꞌkhue̱n ñajuun xómá xtéde̱ ajwa̱nꞌ. Ga̱jmalaꞌ ajngáa rawuun Ana̱ꞌlóꞌ mangaa, rí ñajuun xómá chídi̱i Xu̱u̱ꞌ Ana̱ꞌlóꞌ. 18 Mu̱xúni̱ꞌñáálaꞌ rí mu̱tha̱n-jáñíílaꞌ Ana̱ꞌlóꞌ. Gu̱nda̱ꞌa̱laꞌ jamí gu̱tha̱n-kháanlaꞌ ga̱jma̱á majñu̱u̱ Xu̱u̱ꞌ Ana̱ꞌlóꞌ. Ga̱juwalaꞌ xawi máꞌ xúꞌkhue̱n jamí ma̱xáꞌne níꞌnga̱ꞌlaꞌ rí mu̱tha̱n-jáñíílaꞌ Ana̱ꞌlóꞌ, jamí gu̱nda̱ꞌa̱laꞌ ga̱jma̱á numúú mbá xúgíin xa̱bi̱i Ana̱ꞌlóꞌ. 19 Gu̱tha̱n-jáñíílaꞌ Ana̱ꞌlóꞌ ga̱jma̱á numuꞌ mangúúnꞌ, kajngó ma̱janúꞌ ajngáa rí ma̱tha̱n jamí ma̱xámíñuꞌ ma̱thu̱ún xa̱bo̱ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú ga̱jma̱á numuu ajngáa máján. 20 Ikhaa numuu rúꞌkhue̱n ñajunꞌ xa̱bo̱ waxúngua̱a̱ꞌ tsí kra̱ꞌaa géjwa̱nꞌ. Gu̱tha̱n-jáñíílaꞌ Ana̱ꞌlóꞌ kajngó ma̱xámíñuꞌ rí ma̱tha̱n-ráꞌa ajngáa máján, xómá jaꞌyoo rí ma̱ne̱.

21 Na̱xu̱ꞌmáa dxájwalóꞌ Tíki̱ko̱ rí ma̱ꞌga gáꞌyalaꞌ. Ikhúúnꞌ phú nandoꞌ ja̱yo̱o̱ jamí mbá jañii a̱kuii̱n naꞌnii̱ ñajuun Táta̱. Ikhaa̱ maꞌthánlaꞌ mbá xúgíí xáne xtáá jamí dí e̱ne̱lo̱ꞌ ge̱jyoꞌ. 22 Ikhaa numuu rúꞌkhue̱n na̱xu̱ꞌmáa, kajngó mu̱dxawíínlaꞌ xáne juwaxo̱ꞌ ge̱jyoꞌ jamí ma̱ꞌni̱i wáa a̱kia̱nꞌlaꞌ mangaa.

23 A̱ngui̱nꞌ, Ana̱ꞌlóꞌ Mikhuíí jamí Táta̱ Jesukrísto̱ gúne̱ rí ma̱juwalaꞌ tsímáá, rí ma̱galaꞌ ju̱ya̱-mijnálaꞌ jamí rí ma̱we̱je̱ a̱kia̱nꞌlaꞌ ju̱ñúu̱ ikhii̱n. 24 Ana̱ꞌlóꞌ gáꞌne-tsakun-rámii tsí na̱nguá i̱ni̱ꞌñáá rí nandúún juyáá Tátiálóꞌ Jesukrísto̱. Xkuaꞌnii gáꞌne.*